| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๓. วิตฺตสุตฺตวณฺณนา
3. Vittasuttavaṇṇanā
๗๓. ตติเย สทฺธีธ วิตฺตนฺติ ยสฺมา สโทฺธ สทฺธาย มุตฺตมณิอาทีนิปิ วิตฺตานิ ลภติ, ติโสฺสปิ กุลสมฺปทา, ฉ กามสคฺคานิ, นว พฺรหฺมโลเก ปตฺวา ปริโยสาเน อมตมหานิพฺพานทสฺสนมฺปิ ลภติ, ตสฺมา มณิมุตฺตาทีหิ วิเตฺตหิ สทฺธาวิตฺตเมว เสฎฺฐํฯ ธโมฺมติ ทสกุสลกมฺมปโถฯ สุขมาวหตีติ สพฺพมฺปิ สาสวานาสวํ อสํกิลิฎฺฐสุขํ อาวหติฯ สาทุตรนฺติ โลกสฺมิํ โลณมฺพิลาทีนํ สพฺพรสานํ สจฺจเมว มธุรตรํฯ สจฺจสฺมิํ หิ ฐิตา สีฆเวคํ นทิมฺปิ นิวเตฺตนฺติ, วิสมฺปิ นิมฺมเทฺทนฺติ, อคฺคิมฺปิ ปฎิพาหนฺติ, เทวมฺปิ วสฺสาเปนฺติ, ตสฺมา ตํ สพฺพรสานํ มธุรตรนฺติ วุตฺตํฯ ปญฺญาชีวิํ ชีวิตมาหุ เสฎฺฐนฺติ โย ปญฺญาชีวี คหโฎฺฐ สมาโน ปญฺจสุ สีเลสุ ปติฎฺฐาย สลากภตฺตาทีนิ ปฎฺฐเปตฺวา ปญฺญาย ชีวติ, ปพฺพชิโต วา ปน ธเมฺมน อุปฺปเนฺน ปจฺจเย ‘‘อิทมตฺถ’’นฺติ ปจฺจเวกฺขิตฺวา ปริภุญฺชโนฺต กมฺมฎฺฐานํ อาทาย วิปสฺสนํ ปฎฺฐเปตฺวา อริยผลาธิคมวเสน ปญฺญาย ชีวติ, ตํ ปญฺญาชีวิํ ปุคฺคลํ เสฎฺฐํ ชีวิตํ ชีวตีติ อาหุฯ ตติยํฯ
73. Tatiye saddhīdha vittanti yasmā saddho saddhāya muttamaṇiādīnipi vittāni labhati, tissopi kulasampadā, cha kāmasaggāni, nava brahmaloke patvā pariyosāne amatamahānibbānadassanampi labhati, tasmā maṇimuttādīhi vittehi saddhāvittameva seṭṭhaṃ. Dhammoti dasakusalakammapatho. Sukhamāvahatīti sabbampi sāsavānāsavaṃ asaṃkiliṭṭhasukhaṃ āvahati. Sādutaranti lokasmiṃ loṇambilādīnaṃ sabbarasānaṃ saccameva madhurataraṃ. Saccasmiṃ hi ṭhitā sīghavegaṃ nadimpi nivattenti, visampi nimmaddenti, aggimpi paṭibāhanti, devampi vassāpenti, tasmā taṃ sabbarasānaṃ madhurataranti vuttaṃ. Paññājīviṃ jīvitamāhu seṭṭhanti yo paññājīvī gahaṭṭho samāno pañcasu sīlesu patiṭṭhāya salākabhattādīni paṭṭhapetvā paññāya jīvati, pabbajito vā pana dhammena uppanne paccaye ‘‘idamattha’’nti paccavekkhitvā paribhuñjanto kammaṭṭhānaṃ ādāya vipassanaṃ paṭṭhapetvā ariyaphalādhigamavasena paññāya jīvati, taṃ paññājīviṃ puggalaṃ seṭṭhaṃ jīvitaṃ jīvatīti āhu. Tatiyaṃ.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๓. วิตฺตสุตฺตํ • 3. Vittasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๓. วิตฺตสุตฺตวณฺณนา • 3. Vittasuttavaṇṇanā
