| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. ৰিত্থারসুত্তং
2. Vitthārasuttaṃ
১৬২. ‘‘চতস্সো ইমা, ভিক্খৰে, পটিপদা। কতমা চতস্সো? দুক্খা পটিপদা দন্ধাভিঞ্ঞা, দুক্খা পটিপদা খিপ্পাভিঞ্ঞা, সুখা পটিপদা দন্ধাভিঞ্ঞা, সুখা পটিপদা খিপ্পাভিঞ্ঞা।
162. ‘‘Catasso imā, bhikkhave, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā.
‘‘কতমা চ, ভিক্খৰে, দুক্খা পটিপদা দন্ধাভিঞ্ঞা? ইধ, ভিক্খৰে, একচ্চো পকতিযাপি তিব্বরাগজাতিকো হোতি, অভিক্খণং রাগজং দুক্খং দোমনস্সং পটিসংৰেদেতি। পকতিযাপি তিব্বদোসজাতিকো হোতি, অভিক্খণং দোসজং দুক্খং দোমনস্সং পটিসংৰেদেতি। পকতিযাপি তিব্বমোহজাতিকো হোতি, অভিক্খণং মোহজং দুক্খং দোমনস্সং পটিসংৰেদেতি। তস্সিমানি পঞ্চিন্দ্রিযানি মুদূনি পাতুভৰন্তি – সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং। সো ইমেসং পঞ্চন্নং ইন্দ্রিযানং মুদুত্তা দন্ধং আনন্তরিযং পাপুণাতি আসৰানং খযায। অযং ৰুচ্চতি, ভিক্খৰে, দুক্খা পটিপদা দন্ধাভিঞ্ঞা।
‘‘Katamā ca, bhikkhave, dukkhā paṭipadā dandhābhiññā? Idha, bhikkhave, ekacco pakatiyāpi tibbarāgajātiko hoti, abhikkhaṇaṃ rāgajaṃ dukkhaṃ domanassaṃ paṭisaṃvedeti. Pakatiyāpi tibbadosajātiko hoti, abhikkhaṇaṃ dosajaṃ dukkhaṃ domanassaṃ paṭisaṃvedeti. Pakatiyāpi tibbamohajātiko hoti, abhikkhaṇaṃ mohajaṃ dukkhaṃ domanassaṃ paṭisaṃvedeti. Tassimāni pañcindriyāni mudūni pātubhavanti – saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. So imesaṃ pañcannaṃ indriyānaṃ muduttā dandhaṃ ānantariyaṃ pāpuṇāti āsavānaṃ khayāya. Ayaṃ vuccati, bhikkhave, dukkhā paṭipadā dandhābhiññā.
‘‘কতমা চ, ভিক্খৰে, দুক্খা পটিপদা খিপ্পাভিঞ্ঞা? ইধ, ভিক্খৰে, একচ্চো পকতিযাপি তিব্বরাগজাতিকো হোতি, অভিক্খণং রাগজং দুক্খং দোমনস্সং পটিসংৰেদেতি। পকতিযাপি তিব্বদোসজাতিকো হোতি, অভিক্খণং দোসজং দুক্খং দোমনস্সং পটিসংৰেদেতি। পকতিযাপি তিব্বমোহজাতিকো হোতি , অভিক্খণং মোহজং দুক্খং দোমনস্সং পটিসংৰেদেতি। তস্সিমানি পঞ্চিন্দ্রিযানি অধিমত্তানি পাতুভৰন্তি – সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং। সো ইমেসং পঞ্চন্নং ইন্দ্রিযানং অধিমত্তত্তা খিপ্পং আনন্তরিযং পাপুণাতি আসৰানং খযায। অযং ৰুচ্চতি, ভিক্খৰে, দুক্খা পটিপদা খিপ্পাভিঞ্ঞা।
‘‘Katamā ca, bhikkhave, dukkhā paṭipadā khippābhiññā? Idha, bhikkhave, ekacco pakatiyāpi tibbarāgajātiko hoti, abhikkhaṇaṃ rāgajaṃ dukkhaṃ domanassaṃ paṭisaṃvedeti. Pakatiyāpi tibbadosajātiko hoti, abhikkhaṇaṃ dosajaṃ dukkhaṃ domanassaṃ paṭisaṃvedeti. Pakatiyāpi tibbamohajātiko hoti , abhikkhaṇaṃ mohajaṃ dukkhaṃ domanassaṃ paṭisaṃvedeti. Tassimāni pañcindriyāni adhimattāni pātubhavanti – saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. So imesaṃ pañcannaṃ indriyānaṃ adhimattattā khippaṃ ānantariyaṃ pāpuṇāti āsavānaṃ khayāya. Ayaṃ vuccati, bhikkhave, dukkhā paṭipadā khippābhiññā.
‘‘কতমা চ, ভিক্খৰে, সুখা পটিপদা দন্ধাভিঞ্ঞা? ইধ, ভিক্খৰে, একচ্চো পকতিযাপি ন তিব্বরাগজাতিকো হোতি, নাভিক্খণং রাগজং দুক্খং দোমনস্সং পটিসংৰেদেতি। পকতিযাপি ন তিব্বদোসজাতিকো হোতি, নাভিক্খণং দোসজং দুক্খং দোমনস্সং পটিসংৰেদেতি। পকতিযাপি ন তিব্বমোহজাতিকো হোতি, নাভিক্খণং মোহজং দুক্খং দোমনস্সং পটিসংৰেদেতি। তস্সিমানি পঞ্চিন্দ্রিযানি মুদূনি পাতুভৰন্তি – সদ্ধিন্দ্রিযং…পে॰… পঞ্ঞিন্দ্রিযং। সো ইমেসং পঞ্চন্নং ইন্দ্রিযানং মুদুত্তা দন্ধং আনন্তরিযং পাপুণাতি আসৰানং খযায। অযং ৰুচ্চতি, ভিক্খৰে, সুখা পটিপদা দন্ধাভিঞ্ঞা।
‘‘Katamā ca, bhikkhave, sukhā paṭipadā dandhābhiññā? Idha, bhikkhave, ekacco pakatiyāpi na tibbarāgajātiko hoti, nābhikkhaṇaṃ rāgajaṃ dukkhaṃ domanassaṃ paṭisaṃvedeti. Pakatiyāpi na tibbadosajātiko hoti, nābhikkhaṇaṃ dosajaṃ dukkhaṃ domanassaṃ paṭisaṃvedeti. Pakatiyāpi na tibbamohajātiko hoti, nābhikkhaṇaṃ mohajaṃ dukkhaṃ domanassaṃ paṭisaṃvedeti. Tassimāni pañcindriyāni mudūni pātubhavanti – saddhindriyaṃ…pe… paññindriyaṃ. So imesaṃ pañcannaṃ indriyānaṃ muduttā dandhaṃ ānantariyaṃ pāpuṇāti āsavānaṃ khayāya. Ayaṃ vuccati, bhikkhave, sukhā paṭipadā dandhābhiññā.
‘‘কতমা চ, ভিক্খৰে, সুখা পটিপদা খিপ্পাভিঞ্ঞা? ইধ, ভিক্খৰে, একচ্চো পকতিযাপি ন তিব্বরাগজাতিকো হোতি, নাভিক্খণং রাগজং দুক্খং দোমনস্সং পটিসংৰেদেতি। পকতিযাপি ন তিব্বদোসজাতিকো হোতি, নাভিক্খণং দোসজং দুক্খং দোমনস্সং পটিসংৰেদেতি। পকতিযাপি ন তিব্বমোহজাতিকো হোতি, নাভিক্খণং মোহজং দুক্খং দোমনস্সং পটিসংৰেদেতি। তস্সিমানি পঞ্চিন্দ্রিযানি অধিমত্তানি পাতুভৰন্তি – সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং । সো ইমেসং পঞ্চন্নং ইন্দ্রিযানং অধিমত্তত্তা খিপ্পং আনন্তরিযং পাপুণাতি আসৰানং খযায। অযং ৰুচ্চতি, ভিক্খৰে, সুখা পটিপদা খিপ্পাভিঞ্ঞা। ইমা খো, ভিক্খৰে, চতস্সো পটিপদা’’তি। দুতিযং।
‘‘Katamā ca, bhikkhave, sukhā paṭipadā khippābhiññā? Idha, bhikkhave, ekacco pakatiyāpi na tibbarāgajātiko hoti, nābhikkhaṇaṃ rāgajaṃ dukkhaṃ domanassaṃ paṭisaṃvedeti. Pakatiyāpi na tibbadosajātiko hoti, nābhikkhaṇaṃ dosajaṃ dukkhaṃ domanassaṃ paṭisaṃvedeti. Pakatiyāpi na tibbamohajātiko hoti, nābhikkhaṇaṃ mohajaṃ dukkhaṃ domanassaṃ paṭisaṃvedeti. Tassimāni pañcindriyāni adhimattāni pātubhavanti – saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ . So imesaṃ pañcannaṃ indriyānaṃ adhimattattā khippaṃ ānantariyaṃ pāpuṇāti āsavānaṃ khayāya. Ayaṃ vuccati, bhikkhave, sukhā paṭipadā khippābhiññā. Imā kho, bhikkhave, catasso paṭipadā’’ti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. ৰিত্থারসুত্তৰণ্ণনা • 2. Vitthārasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. ৰিত্থারসুত্তৰণ্ণনা • 2. Vitthārasuttavaṇṇanā
