| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. ཝིཏྠཱརསུཏྟཾ
2. Vitthārasuttaṃ
༢༣༣. ‘‘ཙཏྟཱརིམཱནི, བྷིཀྑཝེ, ཀམྨཱནི མཡཱ སཡཾ ཨབྷིཉྙཱ སཙྪིཀཏྭཱ པཝེདིཏཱནི། ཀཏམཱནི ཙཏྟཱརི? ཨཏྠི, བྷིཀྑཝེ, ཀམྨཾ ཀཎྷཾ ཀཎྷཝིཔཱཀཾ; ཨཏྠི, བྷིཀྑཝེ, ཀམྨཾ སུཀྐཾ སུཀྐཝིཔཱཀཾ; ཨཏྠི, བྷིཀྑཝེ , ཀམྨཾ ཀཎྷསུཀྐཾ ཀཎྷསུཀྐཝིཔཱཀཾ; ཨཏྠི, བྷིཀྑཝེ, ཀམྨཾ ཨཀཎྷཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏི།
233. ‘‘Cattārimāni, bhikkhave, kammāni mayā sayaṃ abhiññā sacchikatvā paveditāni. Katamāni cattāri? Atthi, bhikkhave, kammaṃ kaṇhaṃ kaṇhavipākaṃ; atthi, bhikkhave, kammaṃ sukkaṃ sukkavipākaṃ; atthi, bhikkhave , kammaṃ kaṇhasukkaṃ kaṇhasukkavipākaṃ; atthi, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati.
‘‘ཀཏམཉྩ, བྷིཀྑཝེ, ཀམྨཾ ཀཎྷཾ ཀཎྷཝིཔཱཀཾ? ཨིདྷ, བྷིཀྑཝེ, ཨེཀཙྩོ སབྱཱབཛ྄ཛྷཾ 1 ཀཱཡསངྑཱརཾ ཨབྷིསངྑརོཏི, སབྱཱབཛ྄ཛྷཾ ཝཙཱིསངྑཱརཾ ཨབྷིསངྑརོཏི, སབྱཱབཛ྄ཛྷཾ མནོསངྑཱརཾ ཨབྷིསངྑརོཏི། སོ སབྱཱབཛ྄ཛྷཾ ཀཱཡསངྑཱརཾ ཨབྷིསངྑརིཏྭཱ, སབྱཱབཛ྄ཛྷཾ ཝཙཱིསངྑཱརཾ ཨབྷིསངྑརིཏྭཱ, སབྱཱབཛ྄ཛྷཾ མནོསངྑཱརཾ ཨབྷིསངྑརིཏྭཱ སབྱཱབཛ྄ཛྷཾ ལོཀཾ ཨུཔཔཛྫཏི། ཏམེནཾ སབྱཱབཛ྄ཛྷཾ ལོཀཾ ཨུཔཔནྣཾ སམཱནཾ སབྱཱབཛ྄ཛྷཱ ཕསྶཱ ཕུསནྟི། སོ སབྱཱབཛ྄ཛྷེཧི ཕསྶེཧི ཕུཊྛོ སམཱནོ སབྱཱབཛ྄ཛྷཾ ཝེདནཾ ཝེདིཡཏི 2 ཨེཀནྟདུཀྑཾ, སེཡྻཐཱཔི སཏྟཱ ནེརཡིཀཱ། ཨིདཾ ཝུཙྩཏི, བྷིཀྑཝེ, ཀམྨཾ ཀཎྷཾ ཀཎྷཝིཔཱཀཾ།
‘‘Katamañca, bhikkhave, kammaṃ kaṇhaṃ kaṇhavipākaṃ? Idha, bhikkhave, ekacco sabyābajjhaṃ 3 kāyasaṅkhāraṃ abhisaṅkharoti, sabyābajjhaṃ vacīsaṅkhāraṃ abhisaṅkharoti, sabyābajjhaṃ manosaṅkhāraṃ abhisaṅkharoti. So sabyābajjhaṃ kāyasaṅkhāraṃ abhisaṅkharitvā, sabyābajjhaṃ vacīsaṅkhāraṃ abhisaṅkharitvā, sabyābajjhaṃ manosaṅkhāraṃ abhisaṅkharitvā sabyābajjhaṃ lokaṃ upapajjati. Tamenaṃ sabyābajjhaṃ lokaṃ upapannaṃ samānaṃ sabyābajjhā phassā phusanti. So sabyābajjhehi phassehi phuṭṭho samāno sabyābajjhaṃ vedanaṃ vediyati 4 ekantadukkhaṃ, seyyathāpi sattā nerayikā. Idaṃ vuccati, bhikkhave, kammaṃ kaṇhaṃ kaṇhavipākaṃ.
‘‘ཀཏམཉྩ , བྷིཀྑཝེ, ཀམྨཾ སུཀྐཾ སུཀྐཝིཔཱཀཾ? ཨིདྷ, བྷིཀྑཝེ, ཨེཀཙྩོ ཨབྱཱབཛ྄ཛྷཾ ཀཱཡསངྑཱརཾ ཨབྷིསངྑརོཏི, ཨབྱཱབཛ྄ཛྷཾ ཝཙཱིསངྑཱརཾ ཨབྷིསངྑརོཏི, ཨབྱཱབཛ྄ཛྷཾ མནོསངྑཱརཾ ཨབྷིསངྑརོཏི། སོ ཨབྱཱབཛ྄ཛྷཾ ཀཱཡསངྑཱརཾ ཨབྷིསངྑརིཏྭཱ, ཨབྱཱབཛ྄ཛྷཾ ཝཙཱིསངྑཱརཾ ཨབྷིསངྑརིཏྭཱ, ཨབྱཱབཛ྄ཛྷཾ མནོསངྑཱརཾ ཨབྷིསངྑརིཏྭཱ ཨབྱཱབཛ྄ཛྷཾ ལོཀཾ ཨུཔཔཛྫཏི། ཏམེནཾ ཨབྱཱབཛ྄ཛྷཾ ལོཀཾ ཨུཔཔནྣཾ སམཱནཾ ཨབྱཱབཛ྄ཛྷཱ ཕསྶཱ ཕུསནྟི། སོ ཨབྱཱབཛ྄ཛྷེཧི ཕསྶེཧི ཕུཊྛོ སམཱནོ ཨབྱཱབཛ྄ཛྷཾ ཝེདནཾ ཝེདིཡཏི ཨེཀནྟསུཁཾ, སེཡྻཐཱཔི དེཝཱ སུབྷཀིཎྷཱ། ཨིདཾ ཝུཙྩཏི, བྷིཀྑཝེ, ཀམྨཾ སུཀྐཾ སུཀྐཝིཔཱཀཾ།
‘‘Katamañca , bhikkhave, kammaṃ sukkaṃ sukkavipākaṃ? Idha, bhikkhave, ekacco abyābajjhaṃ kāyasaṅkhāraṃ abhisaṅkharoti, abyābajjhaṃ vacīsaṅkhāraṃ abhisaṅkharoti, abyābajjhaṃ manosaṅkhāraṃ abhisaṅkharoti. So abyābajjhaṃ kāyasaṅkhāraṃ abhisaṅkharitvā, abyābajjhaṃ vacīsaṅkhāraṃ abhisaṅkharitvā, abyābajjhaṃ manosaṅkhāraṃ abhisaṅkharitvā abyābajjhaṃ lokaṃ upapajjati. Tamenaṃ abyābajjhaṃ lokaṃ upapannaṃ samānaṃ abyābajjhā phassā phusanti. So abyābajjhehi phassehi phuṭṭho samāno abyābajjhaṃ vedanaṃ vediyati ekantasukhaṃ, seyyathāpi devā subhakiṇhā. Idaṃ vuccati, bhikkhave, kammaṃ sukkaṃ sukkavipākaṃ.
‘‘ཀཏམཉྩ, བྷིཀྑཝེ, ཀམྨཾ ཀཎྷསུཀྐཾ ཀཎྷསུཀྐཝིཔཱཀཾ? ཨིདྷ, བྷིཀྑཝེ, ཨེཀཙྩོ སབྱཱབཛ྄ཛྷམྤི ཨབྱཱབཛ྄ཛྷམྤི ཀཱཡསངྑཱརཾ ཨབྷིསངྑརོཏི, སབྱཱབཛ྄ཛྷམྤི ཨབྱཱབཛ྄ཛྷམྤི ཝཙཱིསངྑཱརཾ ཨབྷིསངྑརོཏི, སབྱཱབཛ྄ཛྷམྤི ཨབྱཱབཛ྄ཛྷམྤི མནོསངྑཱརཾ ཨབྷིསངྑརོཏི། སོ སབྱཱབཛ྄ཛྷམྤི ཨབྱཱབཛ྄ཛྷམྤི ཀཱཡསངྑཱརཾ ཨབྷིསངྑརིཏྭཱ, སབྱཱབཛ྄ཛྷམྤི ཨབྱཱབཛ྄ཛྷམྤི ཝཙཱིསངྑཱརཾ ཨབྷིསངྑརིཏྭཱ, སབྱཱབཛ྄ཛྷམྤི ཨབྱཱབཛ྄ཛྷམྤི མནོསངྑཱརཾ ཨབྷིསངྑརིཏྭཱ སབྱཱབཛ྄ཛྷམྤི ཨབྱཱབཛ྄ཛྷམྤི ལོཀཾ ཨུཔཔཛྫཏི། ཏམེནཾ སབྱཱབཛ྄ཛྷམྤི ཨབྱཱབཛ྄ཛྷམྤི ལོཀཾ ཨུཔཔནྣཾ སམཱནཾ སབྱཱབཛ྄ཛྷཱཔི ཨབྱཱབཛ྄ཛྷཱཔི ཕསྶཱ ཕུསནྟི། སོ སབྱཱབཛ྄ཛྷེཧིཔི ཨབྱཱབཛ྄ཛྷེཧིཔི ཕསྶེཧི ཕུཊྛོ སམཱནོ སབྱཱབཛ྄ཛྷམྤི ཨབྱཱབཛ྄ཛྷམྤི ཝེདནཾ ཝེདིཡཏི ཝོཀིཎྞསུཁདུཀྑཾ, སེཡྻཐཱཔི མནུསྶཱ ཨེཀཙྩེ ཙ དེཝཱ ཨེཀཙྩེ ཙ ཝིནིཔཱཏིཀཱ། ཨིདཾ ཝུཙྩཏི, བྷིཀྑཝེ, ཀམྨཾ ཀཎྷསུཀྐཾ ཀཎྷསུཀྐཝིཔཱཀཾ།
‘‘Katamañca, bhikkhave, kammaṃ kaṇhasukkaṃ kaṇhasukkavipākaṃ? Idha, bhikkhave, ekacco sabyābajjhampi abyābajjhampi kāyasaṅkhāraṃ abhisaṅkharoti, sabyābajjhampi abyābajjhampi vacīsaṅkhāraṃ abhisaṅkharoti, sabyābajjhampi abyābajjhampi manosaṅkhāraṃ abhisaṅkharoti. So sabyābajjhampi abyābajjhampi kāyasaṅkhāraṃ abhisaṅkharitvā, sabyābajjhampi abyābajjhampi vacīsaṅkhāraṃ abhisaṅkharitvā, sabyābajjhampi abyābajjhampi manosaṅkhāraṃ abhisaṅkharitvā sabyābajjhampi abyābajjhampi lokaṃ upapajjati. Tamenaṃ sabyābajjhampi abyābajjhampi lokaṃ upapannaṃ samānaṃ sabyābajjhāpi abyābajjhāpi phassā phusanti. So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vediyati vokiṇṇasukhadukkhaṃ, seyyathāpi manussā ekacce ca devā ekacce ca vinipātikā. Idaṃ vuccati, bhikkhave, kammaṃ kaṇhasukkaṃ kaṇhasukkavipākaṃ.
‘‘ཀཏམཉྩ, བྷིཀྑཝེ, ཀམྨཾ ཨཀཎྷཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏི? ཏཏྲ, བྷིཀྑཝེ, ཡམིདཾ ཀམྨཾ ཀཎྷཾ ཀཎྷཝིཔཱཀཾ ཏསྶ པཧཱནཱཡ ཡཱ ཙེཏནཱ, ཡམིདཾ 5 ཀམྨཾ སུཀྐཾ སུཀྐཝིཔཱཀཾ ཏསྶ པཧཱནཱཡ ཡཱ ཙེཏནཱ, ཡམིདཾ 6 ཀམྨཾ ཀཎྷསུཀྐཾ ཀཎྷསུཀྐཝིཔཱཀཾ ཏསྶ པཧཱནཱཡ ཡཱ ཙེཏནཱ – ཨིདཾ ཝུཙྩཏི, བྷིཀྑཝེ , ཀམྨཾ ཨཀཎྷཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏི། ཨིམཱནི ཁོ, བྷིཀྑཝེ, ཙཏྟཱརི ཀམྨཱནི མཡཱ སཡཾ ཨབྷིཉྙཱ སཙྪིཀཏྭཱ པཝེདིཏཱནཱི’’ཏི། དུཏིཡཾ།
‘‘Katamañca, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati? Tatra, bhikkhave, yamidaṃ kammaṃ kaṇhaṃ kaṇhavipākaṃ tassa pahānāya yā cetanā, yamidaṃ 7 kammaṃ sukkaṃ sukkavipākaṃ tassa pahānāya yā cetanā, yamidaṃ 8 kammaṃ kaṇhasukkaṃ kaṇhasukkavipākaṃ tassa pahānāya yā cetanā – idaṃ vuccati, bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati. Imāni kho, bhikkhave, cattāri kammāni mayā sayaṃ abhiññā sacchikatvā paveditānī’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. ཝིཏྠཱརསུཏྟཝཎྞནཱ • 2. Vitthārasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢. ཝིཏྠཱརསུཏྟཝཎྞནཱ • 2. Vitthārasuttavaṇṇanā
