| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. வித்தா²ரஸுத்தவண்ணனா
2. Vitthārasuttavaṇṇanā
233. து³தியே ஸப்³யாப³ஜ்ஜ²ந்தி ஸதோ³ஸங். காயஸங்கா²ரந்தி காயத்³வாரசேதனங். அபி⁴ஸங்க²ரோதீதி ஆயூஹதி ஸம்பிண்டே³தி. ஸேஸத்³வயேபி ஏஸேவ நயோ. ஸப்³யாப³ஜ்ஜ²ங் லோகந்தி ஸது³க்க²ங் லோகங். ஸப்³யாப³ஜ்ஜா² ப²ஸ்ஸாதி ஸது³க்கா² விபாகப²ஸ்ஸா. ஸப்³யாப³ஜ்ஜ²ங் வேத³னங் வேதி³யதீதி ஸாபா³த⁴ங் விபாகவேத³னங் வேதி³யதி. ஏகந்தது³க்க²ந்தி ஏகந்தேனேவ து³க்க²ங், ந ஸுக²ஸம்மிஸ்ஸங். ஸெய்யதா²பி ஸத்தா நேரயிகாதி எத்த² ஸெய்யதா²பீதி நித³ஸ்ஸனத்தே² நிபாதோ. தேன கேவலங் நேரயிகஸத்தே த³ஸ்ஸேதி, அஞ்ஞே பன தங்ஸரிக்க²கா நாம நத்தி². இமினா உபாயேன ஸப்³ப³த்த² அத்தோ² வேதி³தப்³போ³. ஸெய்யதா²பி மனுஸ்ஸாதிஆதீ³ஸு பன மனுஸ்ஸானங் தாவ காலேன ஸுகா² வேத³னா உப்பஜ்ஜதி, காலேன து³க்கா² வேத³னா. ஏகச்சே ச தே³வாதி எத்த² பன காமாவசரதே³வா த³ட்ட²ப்³பா³. தேஸஞ்ஹி மஹேஸக்க²தரா தே³வதா தி³ஸ்வா நிஸின்னாஸனதோ வுட்டா²னங், பாருதஉத்தராஸங்க³ஸ்ஸ ஓதாரணங், அஞ்ஜலிபக்³க³ண்ஹனந்திஆதீ³னங் வஸேன காலேன து³க்க²ங் உப்பஜ்ஜதி, தி³ப்³ப³ஸம்பத்திங் அனுப⁴வந்தானங் காலேன ஸுக²ங். ஏகச்சே ச வினிபாதிகாதி எத்த² வேமானிகபேதா த³ட்ட²ப்³பா³. தே நிரந்தரமேவ ஏகஸ்மிங் காலே ஸுக²ங், ஏகஸ்மிங் காலே து³க்க²ங் வேதி³யந்தி. நாக³ஸுபண்ணஹத்தி²அஸ்ஸாத³யோ பன மனுஸ்ஸா விய வோகிண்ணஸுக²து³க்கா²வ ஹொந்தி. பஹானாய யா சேதனாதி எத்த² விவட்டகா³மினீ மக்³க³சேதனா வேதி³தப்³பா³. ஸா ஹி கம்மக்க²யாய ஸங்வத்ததீதி.
233. Dutiye sabyābajjhanti sadosaṃ. Kāyasaṅkhāranti kāyadvāracetanaṃ. Abhisaṅkharotīti āyūhati sampiṇḍeti. Sesadvayepi eseva nayo. Sabyābajjhaṃ lokanti sadukkhaṃ lokaṃ. Sabyābajjhā phassāti sadukkhā vipākaphassā. Sabyābajjhaṃ vedanaṃ vediyatīti sābādhaṃ vipākavedanaṃ vediyati. Ekantadukkhanti ekanteneva dukkhaṃ, na sukhasammissaṃ. Seyyathāpi sattā nerayikāti ettha seyyathāpīti nidassanatthe nipāto. Tena kevalaṃ nerayikasatte dasseti, aññe pana taṃsarikkhakā nāma natthi. Iminā upāyena sabbattha attho veditabbo. Seyyathāpi manussātiādīsu pana manussānaṃ tāva kālena sukhā vedanā uppajjati, kālena dukkhā vedanā. Ekacceca devāti ettha pana kāmāvacaradevā daṭṭhabbā. Tesañhi mahesakkhatarā devatā disvā nisinnāsanato vuṭṭhānaṃ, pārutauttarāsaṅgassa otāraṇaṃ, añjalipaggaṇhanantiādīnaṃ vasena kālena dukkhaṃ uppajjati, dibbasampattiṃ anubhavantānaṃ kālena sukhaṃ. Ekacce ca vinipātikāti ettha vemānikapetā daṭṭhabbā. Te nirantarameva ekasmiṃ kāle sukhaṃ, ekasmiṃ kāle dukkhaṃ vediyanti. Nāgasupaṇṇahatthiassādayo pana manussā viya vokiṇṇasukhadukkhāva honti. Pahānāya yā cetanāti ettha vivaṭṭagāminī maggacetanā veditabbā. Sā hi kammakkhayāya saṃvattatīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. வித்தா²ரஸுத்தங் • 2. Vitthārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. வித்தா²ரஸுத்தவண்ணனா • 2. Vitthārasuttavaṇṇanā
