| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. வித்தா²ரஸுத்தவண்ணனா
2. Vitthārasuttavaṇṇanā
233. து³தியே ஸப்³யாப³ஜ்ஜ²ந்தி வா ஸது³க்க²ங், அத்தனா உப்பாதே³தப்³பே³ன து³க்கே²ன ஸது³க்க²ந்தி அத்தோ², து³க்க²ஸங்வத்தனிகந்தி வுத்தங் ஹோதி. காயஸங்கா²ராதீ³ஸு காயத்³வாரே க³ஹணாதி³வஸேன சோபனப்பத்தா த்³வாத³ஸ அகுஸலசேதனா அப்³யாப³ஜ்ஜ²காயஸங்கா²ரோ நாம. வசீத்³வாரே ஹனுஸங்சோபனவஸேன வசீபே⁴த³ப்பவத்திகா தாயேவ த்³வாத³ஸ வசீஸங்கா²ரோ நாம. உப⁴யசோபனங் அப்பத்வா ரஹோ சிந்தெந்தஸ்ஸ மனொத்³வாரே பவத்தா மனோஸங்கா²ரோ நாம. இதி தீஸுபி த்³வாரேஸு காயது³ச்சரிதாதி³பே⁴தா³ அகுஸலா சேதனாவ ஸங்கா²ராதி வேதி³தப்³பா³. அபி⁴ஸங்க²ரோதீதி ஆயூஹதி, தங் பன ஆயூஹனங் பச்சயஸமவாயஸித்³தி⁴தோ ஸங்கட்³டி⁴த்வா பிண்ட³னங் விய ஹோதி. ஸது³க்க²ங் லோகந்தி அபாயலோகமாஹ. விபாகப²ஸ்ஸாதி ப²ஸ்ஸஸீஸேன தத்த² விபாகப்பவத்தமாஹ. வேமானிகபேதாதி இத³ங் பா³ஹுல்லதோ வுத்தங், இதரேஸம்பி வினிபாதிகானங் காலேன ஸுக²ங், காலேன து³க்க²ங் ஹோதி. தஸ்ஸ பஹானாயாதி தஸ்ஸ யதா²வுத்தஸ்ஸ கம்மஸ்ஸ அனுப்பத்தித⁴ம்மதாபாத³னாய. யா சேதனாதி யா அபசயகா³மினிசேதனா. தேனேவாஹ ‘‘விவட்டகா³மினீ மக்³க³சேதனா வேதி³தப்³பா³’’தி.
233. Dutiye sabyābajjhanti vā sadukkhaṃ, attanā uppādetabbena dukkhena sadukkhanti attho, dukkhasaṃvattanikanti vuttaṃ hoti. Kāyasaṅkhārādīsu kāyadvāre gahaṇādivasena copanappattā dvādasa akusalacetanā abyābajjhakāyasaṅkhāro nāma. Vacīdvāre hanusaṃcopanavasena vacībhedappavattikā tāyeva dvādasa vacīsaṅkhāro nāma. Ubhayacopanaṃ appatvā raho cintentassa manodvāre pavattā manosaṅkhāro nāma. Iti tīsupi dvāresu kāyaduccaritādibhedā akusalā cetanāva saṅkhārāti veditabbā. Abhisaṅkharotīti āyūhati, taṃ pana āyūhanaṃ paccayasamavāyasiddhito saṅkaḍḍhitvā piṇḍanaṃ viya hoti. Sadukkhaṃ lokanti apāyalokamāha. Vipākaphassāti phassasīsena tattha vipākappavattamāha. Vemānikapetāti idaṃ bāhullato vuttaṃ, itaresampi vinipātikānaṃ kālena sukhaṃ, kālena dukkhaṃ hoti. Tassa pahānāyāti tassa yathāvuttassa kammassa anuppattidhammatāpādanāya. Yā cetanāti yā apacayagāminicetanā. Tenevāha ‘‘vivaṭṭagāminī maggacetanā veditabbā’’ti.
வித்தா²ரஸுத்தவண்ணனா நிட்டி²தா.
Vitthārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. வித்தா²ரஸுத்தங் • 2. Vitthārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. வித்தா²ரஸுத்தவண்ணனா • 2. Vitthārasuttavaṇṇanā
