| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
২-৬. ৰিত্থতসুত্তাদিৰণ্ণনা
2-6. Vitthatasuttādivaṇṇanā
২-৬. দুতিযে হিরীযতীতি লজ্জতি ৰিরজ্জতি। যস্মা হিরী পাপজিগুচ্ছনলক্খণা, তস্মা ‘‘জিগুচ্ছতীতি অত্থো’’তি ৰুত্তং। ওত্তপ্পতীতি উত্রসতি। পাপুত্রাসলক্খণঞ্হি ওত্তপ্পং।
2-6. Dutiye hirīyatīti lajjati virajjati. Yasmā hirī pāpajigucchanalakkhaṇā, tasmā ‘‘jigucchatīti attho’’ti vuttaṃ. Ottappatīti utrasati. Pāputrāsalakkhaṇañhi ottappaṃ.
পগ্গহিতৰীরিযোতি সঙ্কোচং অনাপন্নৰীরিযো। তেনাহ ‘‘অনোসক্কিতমানসো’’তি। পহানত্থাযাতি সমুচ্ছিন্নত্থায। কুসলানং ধম্মানং উপসম্পদা নাম সমধিগমো এৰাতি আহ ‘‘পটিলাভত্থাযা’’তি।
Paggahitavīriyoti saṅkocaṃ anāpannavīriyo. Tenāha ‘‘anosakkitamānaso’’ti. Pahānatthāyāti samucchinnatthāya. Kusalānaṃ dhammānaṃ upasampadā nāma samadhigamo evāti āha ‘‘paṭilābhatthāyā’’ti.
গতিঅত্থা ধাতুসদ্দা বুদ্ধিঅত্থা হোন্তীতি আহ ‘‘উদযঞ্চ ৰযঞ্চ পটিৰিজ্ঝিতুং সমত্থাযা’’তি। মিস্সকনযেনাযং দেসনা গতাতি আহ ‘‘ৰিক্খম্ভনৰসেন চ সমুচ্ছেদৰসেন চা’’তি। তেনাহ ‘‘ৰিপস্সনাপঞ্ঞায চেৰ মগ্গপঞ্ঞায চা’’তি। ৰিপস্সনাপঞ্ঞায ৰিক্খম্ভনকিরিযতো সা চ খো পদেসিকাতি নিপ্পদেসিকং কত্ৰা দস্সেতুং ‘‘মগ্গপঞ্ঞায পটিলাভসংৰত্তনতো’’তি ৰুত্তং। দুক্খক্খযগামিনিভাৰেপি এসেৰ নযো। সম্মাতি যাথাৰতো। অকুপ্পধম্মতায হি মগ্গপঞ্ঞায খেপিতং খেপিতমেৰ, নাস্স পুন খেপনকিচ্চং অত্থীতি উপাযেন ঞাযেন সা পৰত্ততীতি আহ ‘‘হেতুনা নযেনা’’তি। ততিযাদীসু নত্থি ৰত্তব্বং।
Gatiatthā dhātusaddā buddhiatthā hontīti āha ‘‘udayañca vayañca paṭivijjhituṃ samatthāyā’’ti. Missakanayenāyaṃ desanā gatāti āha ‘‘vikkhambhanavasena ca samucchedavasena cā’’ti. Tenāha ‘‘vipassanāpaññāya ceva maggapaññāya cā’’ti. Vipassanāpaññāya vikkhambhanakiriyato sā ca kho padesikāti nippadesikaṃ katvā dassetuṃ ‘‘maggapaññāya paṭilābhasaṃvattanato’’ti vuttaṃ. Dukkhakkhayagāminibhāvepi eseva nayo. Sammāti yāthāvato. Akuppadhammatāya hi maggapaññāya khepitaṃ khepitameva, nāssa puna khepanakiccaṃ atthīti upāyena ñāyena sā pavattatīti āha ‘‘hetunā nayenā’’ti. Tatiyādīsu natthi vattabbaṃ.
ৰিত্থতসুত্তাদিৰণ্ণনা নিট্ঠিতা।
Vitthatasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
২. ৰিত্থতসুত্তং • 2. Vitthatasuttaṃ
৩. দুক্খসুত্তং • 3. Dukkhasuttaṃ
৪. যথাভতসুত্তং • 4. Yathābhatasuttaṃ
৫. সিক্খাসুত্তং • 5. Sikkhāsuttaṃ
৬. সমাপত্তিসুত্তং • 6. Samāpattisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
২. ৰিত্থতসুত্তৰণ্ণনা • 2. Vitthatasuttavaṇṇanā
৬. সমাপত্তিসুত্তৰণ্ণনা • 6. Samāpattisuttavaṇṇanā
