| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
2-6. විත්‌ථතසුත්‌තාදිවණ්‌ණනා
2-6. Vitthatasuttādivaṇṇanā
2-6. දුතියෙ හිරීයතීති ලජ්‌ජති විරජ්‌ජති. යස්‌මා හිරී පාපජිගුච්‌ඡනලක්‌ඛණා, තස්‌මා ‘‘ජිගුච්‌ඡතීති අත්‌ථො’’ති වුත්‌තං. ඔත්‌තප්‌පතීති උත්‍රසති. පාපුත්‍රාසලක්‌ඛණඤ්‌හි ඔත්‌තප්‌පං.
2-6. Dutiye hirīyatīti lajjati virajjati. Yasmā hirī pāpajigucchanalakkhaṇā, tasmā ‘‘jigucchatīti attho’’ti vuttaṃ. Ottappatīti utrasati. Pāputrāsalakkhaṇañhi ottappaṃ.
පග්‌ගහිතවීරියොති සඞ්‌කොචං අනාපන්‌නවීරියො. තෙනාහ ‘‘අනොසක්‌කිතමානසො’’ති. පහානත්‌ථායාති සමුච්‌ඡින්‌නත්‌ථාය. කුසලානං ධම්‌මානං උපසම්‌පදා නාම සමධිගමො එවාති ආහ ‘‘පටිලාභත්‌ථායා’’ති.
Paggahitavīriyoti saṅkocaṃ anāpannavīriyo. Tenāha ‘‘anosakkitamānaso’’ti. Pahānatthāyāti samucchinnatthāya. Kusalānaṃ dhammānaṃ upasampadā nāma samadhigamo evāti āha ‘‘paṭilābhatthāyā’’ti.
ගතිඅත්‌ථා ධාතුසද්‌දා බුද්‌ධිඅත්‌ථා හොන්‌තීති ආහ ‘‘උදයඤ්‌ච වයඤ්‌ච පටිවිජ්‌ඣිතුං සමත්‌ථායා’’ති. මිස්‌සකනයෙනායං දෙසනා ගතාති ආහ ‘‘වික්‌ඛම්‌භනවසෙන ච සමුච්‌ඡෙදවසෙන චා’’ති. තෙනාහ ‘‘විපස්‌සනාපඤ්‌ඤාය චෙව මග්‌ගපඤ්‌ඤාය චා’’ති. විපස්‌සනාපඤ්‌ඤාය වික්‌ඛම්‌භනකිරියතො සා ච ඛො පදෙසිකාති නිප්‌පදෙසිකං කත්‌වා දස්‌සෙතුං ‘‘මග්‌ගපඤ්‌ඤාය පටිලාභසංවත්‌තනතො’’ති වුත්‌තං. දුක්‌ඛක්‌ඛයගාමිනිභාවෙපි එසෙව නයො. සම්‌මාති යාථාවතො. අකුප්‌පධම්‌මතාය හි මග්‌ගපඤ්‌ඤාය ඛෙපිතං ඛෙපිතමෙව, නාස්‌ස පුන ඛෙපනකිච්‌චං අත්‌ථීති උපායෙන ඤායෙන සා පවත්‌තතීති ආහ ‘‘හෙතුනා නයෙනා’’ති. තතියාදීසු නත්‌ථි වත්‌තබ්‌බං.
Gatiatthā dhātusaddā buddhiatthā hontīti āha ‘‘udayañca vayañca paṭivijjhituṃ samatthāyā’’ti. Missakanayenāyaṃ desanā gatāti āha ‘‘vikkhambhanavasena ca samucchedavasena cā’’ti. Tenāha ‘‘vipassanāpaññāya ceva maggapaññāya cā’’ti. Vipassanāpaññāya vikkhambhanakiriyato sā ca kho padesikāti nippadesikaṃ katvā dassetuṃ ‘‘maggapaññāya paṭilābhasaṃvattanato’’ti vuttaṃ. Dukkhakkhayagāminibhāvepi eseva nayo. Sammāti yāthāvato. Akuppadhammatāya hi maggapaññāya khepitaṃ khepitameva, nāssa puna khepanakiccaṃ atthīti upāyena ñāyena sā pavattatīti āha ‘‘hetunā nayenā’’ti. Tatiyādīsu natthi vattabbaṃ.
විත්‌ථතසුත්‌තාදිවණ්‌ණනා නිට්‌ඨිතා.
Vitthatasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
2. විත්‌ථතසුත්‌තං • 2. Vitthatasuttaṃ
3. දුක්‌ඛසුත්‌තං • 3. Dukkhasuttaṃ
4. යථාභතසුත්‌තං • 4. Yathābhatasuttaṃ
5. සික්‌ඛාසුත්‌තං • 5. Sikkhāsuttaṃ
6. සමාපත්‌තිසුත්‌තං • 6. Samāpattisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
2. විත්‌ථතසුත්‌තවණ්‌ණනා • 2. Vitthatasuttavaṇṇanā
6. සමාපත්‌තිසුත්‌තවණ්‌ණනා • 6. Samāpattisuttavaṇṇanā
