| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. විත්‌ථතසුත්‌තං
2. Vitthatasuttaṃ
2. ‘‘පඤ්‌චිමානි , භික්‌ඛවෙ, සෙඛබලානි. කතමානි පඤ්‌ච? සද්‌ධාබලං, හිරීබලං, ඔත්‌තප්‌පබලං, වීරියබලං, පඤ්‌ඤාබලං. කතමඤ්‌ච, භික්‌ඛවෙ, සද්‌ධාබලං? ඉධ, භික්‌ඛවෙ, අරියසාවකො සද්‌ධො හොති, සද්‌දහති තථාගතස්‌ස බොධිං – ‘ඉතිපි සො භගවා අරහං සම්‌මාසම්‌බුද්‌ධො විජ්‌ජාචරණසම්‌පන්‌නො සුගතො ලොකවිදූ අනුත්‌තරො පුරිසදම්‌මසාරථි සත්‌ථා දෙවමනුස්‌සානං බුද්‌ධො භගවා’ති. ඉදං වුච්‌චති, භික්‌ඛවෙ, සද්‌ධාබලං.
2. ‘‘Pañcimāni , bhikkhave, sekhabalāni. Katamāni pañca? Saddhābalaṃ, hirībalaṃ, ottappabalaṃ, vīriyabalaṃ, paññābalaṃ. Katamañca, bhikkhave, saddhābalaṃ? Idha, bhikkhave, ariyasāvako saddho hoti, saddahati tathāgatassa bodhiṃ – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti. Idaṃ vuccati, bhikkhave, saddhābalaṃ.
‘‘කතමඤ්‌ච, භික්‌ඛවෙ, හිරීබලං? ඉධ, භික්‌ඛවෙ, අරියසාවකො හිරිමා හොති, හිරීයති කායදුච්‌චරිතෙන වචීදුච්‌චරිතෙන මනොදුච්‌චරිතෙන, හිරීයති පාපකානං අකුසලානං ධම්‌මානං සමාපත්‌තියා. ඉදං වුච්‌චති, භික්‌ඛවෙ, හිරීබලං.
‘‘Katamañca, bhikkhave, hirībalaṃ? Idha, bhikkhave, ariyasāvako hirimā hoti, hirīyati kāyaduccaritena vacīduccaritena manoduccaritena, hirīyati pāpakānaṃ akusalānaṃ dhammānaṃ samāpattiyā. Idaṃ vuccati, bhikkhave, hirībalaṃ.
‘‘කතමඤ්‌ච, භික්‌ඛවෙ, ඔත්‌තප්‌පබලං? ඉධ, භික්‌ඛවෙ, අරියසාවකො ඔත්‌තප්‌පී හොති, ඔත්‌තප්‌පති කායදුච්‌චරිතෙන වචීදුච්‌චරිතෙන මනොදුච්‌චරිතෙන, ඔත්‌තප්‌පති පාපකානං අකුසලානං ධම්‌මානං සමාපත්‌තියා. ඉදං වුච්‌චති, භික්‌ඛවෙ, ඔත්‌තප්‌පබලං.
‘‘Katamañca, bhikkhave, ottappabalaṃ? Idha, bhikkhave, ariyasāvako ottappī hoti, ottappati kāyaduccaritena vacīduccaritena manoduccaritena, ottappati pāpakānaṃ akusalānaṃ dhammānaṃ samāpattiyā. Idaṃ vuccati, bhikkhave, ottappabalaṃ.
‘‘කතමඤ්‌ච, භික්‌ඛවෙ, වීරියබලං? ඉධ, භික්‌ඛවෙ, අරියසාවකො ආරද්‌ධවීරියො විහරති අකුසලානං ධම්‌මානං පහානාය, කුසලානං ධම්‌මානං උපසම්‌පදාය, ථාමවා දළ්‌හපරක්‌කමො අනික්‌ඛිත්‌තධුරො කුසලෙසු ධම්‌මෙසු. ඉදං වුච්‌චති, භික්‌ඛවෙ, වීරියබලං.
‘‘Katamañca, bhikkhave, vīriyabalaṃ? Idha, bhikkhave, ariyasāvako āraddhavīriyo viharati akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu. Idaṃ vuccati, bhikkhave, vīriyabalaṃ.
‘‘කතමඤ්‌ච, භික්‌ඛවෙ, පඤ්‌ඤාබලං? ඉධ, භික්‌ඛවෙ, අරියසාවකො පඤ්‌ඤවා හොති උදයත්‌ථගාමිනියා පඤ්‌ඤාය සමන්‌නාගතො අරියාය නිබ්‌බෙධිකාය සම්‌මා දුක්‌ඛක්‌ඛයගාමිනියා. ඉදං වුච්‌චති, භික්‌ඛවෙ, පඤ්‌ඤාබලං. ඉමානි ඛො, භික්‌ඛවෙ, පඤ්‌ච සෙඛබලානි.
‘‘Katamañca, bhikkhave, paññābalaṃ? Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā. Idaṃ vuccati, bhikkhave, paññābalaṃ. Imāni kho, bhikkhave, pañca sekhabalāni.
‘‘තස්‌මාතිහ, භික්‌ඛවෙ, එවං සික්‌ඛිතබ්‌බං – ‘සද්‌ධාබලෙන සමන්‌නාගතා භවිස්‌සාම සෙඛබලෙන, හිරීබලෙන… ඔත්‌තප්‌පබලෙන … වීරියබලෙන… පඤ්‌ඤාබලෙන සමන්‌නාගතා භවිස්‌සාම සෙඛබලෙනා’ති. එවඤ්‌හි ඛො, භික්‌ඛවෙ, සික්‌ඛිතබ්‌බ’’න්‌ති. දුතියං.
‘‘Tasmātiha, bhikkhave, evaṃ sikkhitabbaṃ – ‘saddhābalena samannāgatā bhavissāma sekhabalena, hirībalena… ottappabalena … vīriyabalena… paññābalena samannāgatā bhavissāma sekhabalenā’ti. Evañhi kho, bhikkhave, sikkhitabba’’nti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. විත්‌ථතසුත්‌තවණ්‌ණනා • 2. Vitthatasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. මහාසුපිනසුත්‌තවණ්‌ණනා • 6. Mahāsupinasuttavaṇṇanā
