| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. வித்த²தஸுத்தவண்ணனா
4. Vitthatasuttavaṇṇanā
14. சதுத்தே² ஸதினேபக்கேனாதி ஸதியா நேபக்கேன, திக்க²விஸத³ஸூரபா⁴வேனாதி அத்தோ². அட்ட²கதா²யங் பன நேபக்கங் நாம பஞ்ஞாதி அதி⁴ப்பாயேன ‘‘நேபக்கங் வுச்சதி பஞ்ஞா’’தி வுத்தங். ஏவங் ஸதி அஞ்ஞோ நித்³தி³ட்டோ² நாம ஹோதி. ஸதிமாதி ச இமினா ஸவிஸேஸா ஸதி க³ஹிதாதி பரதோபி ‘‘சிரகதம்பி சிரபா⁴ஸிதம்பி ஸரிதா அனுஸ்ஸரிதா’’தி ஸதிகிச்சமேவ நித்³தி³ட்ட²ங், ந பஞ்ஞாகிச்சங், தஸ்மா ஸதினேபக்கேனாதி ஸதியா நேபக்கபா⁴வேனாதி ஸக்கா விஞ்ஞாதுங் லப்³ப⁴தேவ. பச்சயவிஸேஸவஸேன அஞ்ஞத⁴ம்மனிரபெக்கோ² ஸதியா ப³லவபா⁴வோ. ததா² ஹி ஞாணவிப்பயுத்தசித்தேனபி ஸஜ்ஜா²யனஸம்மஸனானி ஸம்ப⁴வந்தி.
14. Catutthe satinepakkenāti satiyā nepakkena, tikkhavisadasūrabhāvenāti attho. Aṭṭhakathāyaṃ pana nepakkaṃ nāma paññāti adhippāyena ‘‘nepakkaṃ vuccati paññā’’ti vuttaṃ. Evaṃ sati añño niddiṭṭho nāma hoti. Satimāti ca iminā savisesā sati gahitāti paratopi ‘‘cirakatampi cirabhāsitampi saritā anussaritā’’ti satikiccameva niddiṭṭhaṃ, na paññākiccaṃ, tasmā satinepakkenāti satiyā nepakkabhāvenāti sakkā viññātuṃ labbhateva. Paccayavisesavasena aññadhammanirapekkho satiyā balavabhāvo. Tathā hi ñāṇavippayuttacittenapi sajjhāyanasammasanāni sambhavanti.
சிரகதம்பீதி அத்தனா வா பரேன வா காயேன சிரகதங் சேதியங்க³ணவத்தாதி³மஹாவத்தப்படிபத்திபூரணங். சிரபா⁴ஸிதம்பீதி அத்தனா வா பரேன வா வாசாய சிரபா⁴ஸிதங் ஸக்கச்சங் உத்³தி³ஸனஉத்³தி³ஸாபனத⁴ம்மாஸாரணத⁴ம்மதே³ஸனாஉபனிஸின்னகபரிகதா²அனுமோத³னீயாதி³வஸேன பவத்திதங் வசீகம்மங். ஸரிதா அனுஸ்ஸரிதாதி தஸ்மிங் காயேன சிரகதே காயோ நாம காயவிஞ்ஞத்தி, சிரபா⁴ஸிதே வாசா நாம வசீவிஞ்ஞத்தி, தது³ப⁴யம்பி ரூபங், தங்ஸமுட்டா²பகா சித்தசேதஸிகா அரூபங். இதி இமே ரூபாரூபத⁴ம்மா ஏவங் உப்பஜ்ஜித்வா ஏவங் நிருத்³தா⁴தி ஸரதி சேவ அனுஸ்ஸரதி ச, ஸதிஸம்பொ³ஜ்ஜ²ங்க³ங் ஸமுட்டா²பேதீதி அத்தோ². பொ³ஜ்ஜ²ங்க³ஸமுட்டா²பிகா ஹி ஸதி இத⁴ அதி⁴ப்பேதா. தாய ஸதியா ஏஸ ஸகிங் ஸரணேன ஸரிதா, புனப்புனங் ஸரணேன அனுஸ்ஸரிதாதி வேதி³தப்³பா³.
Cirakatampīti attanā vā parena vā kāyena cirakataṃ cetiyaṅgaṇavattādimahāvattappaṭipattipūraṇaṃ. Cirabhāsitampīti attanā vā parena vā vācāya cirabhāsitaṃ sakkaccaṃ uddisanauddisāpanadhammāsāraṇadhammadesanāupanisinnakaparikathāanumodanīyādivasena pavattitaṃ vacīkammaṃ. Saritā anussaritāti tasmiṃ kāyena cirakate kāyo nāma kāyaviññatti, cirabhāsite vācā nāma vacīviññatti, tadubhayampi rūpaṃ, taṃsamuṭṭhāpakā cittacetasikā arūpaṃ. Iti ime rūpārūpadhammā evaṃ uppajjitvā evaṃ niruddhāti sarati ceva anussarati ca, satisambojjhaṅgaṃ samuṭṭhāpetīti attho. Bojjhaṅgasamuṭṭhāpikā hi sati idha adhippetā. Tāya satiyā esa sakiṃ saraṇena saritā, punappunaṃ saraṇena anussaritāti veditabbā.
வித்த²தஸுத்தவண்ணனா நிட்டி²தா.
Vitthatasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. வித்த²தஸுத்தங் • 4. Vitthatasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. வித்த²தஸுத்தவண்ணனா • 4. Vitthatasuttavaṇṇanā
