| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
2. විත්‌ථතසුත්‌තවණ්‌ණනා
2. Vitthatasuttavaṇṇanā
2. දුතියෙ කායදුච්‌චරිතෙනාතිආදීසු උපයොගත්‌ථෙ කරණවචනං, හිරීයිතබ්‌බානි කායදුච්‌චරිතාදීනි හිරීයති ජිගුච්‌ඡතීති අත්‌ථො. ඔත්‌තප්‌පනිද්‌දෙසෙ හෙත්‌වත්‌ථෙ කරණවචනං, කායදුච්‌චරිතාදීහි ඔත්‌තප්‌පස්‌ස හෙතුභූතෙහි ඔත්‌තප්‌පති භායතීති අත්‌ථො.
2. Dutiye kāyaduccaritenātiādīsu upayogatthe karaṇavacanaṃ, hirīyitabbāni kāyaduccaritādīni hirīyati jigucchatīti attho. Ottappaniddese hetvatthe karaṇavacanaṃ, kāyaduccaritādīhi ottappassa hetubhūtehi ottappati bhāyatīti attho.
ආරද්‌ධවීරියොති පග්‌ගහිතවීරියො අනොසක්‌කිතමානසො. පහානායාති පහානත්‌ථාය. උපසම්‌පදායාති පටිලාභත්‌ථාය. ථාමවාති වීරියථාමෙන සමන්‌නාගතො. දළ්‌හපරක්‌කමොති ථිරපරක්‌කමො. අනික්‌ඛිත්‌තධුරො කුසලෙසු ධම්‌මෙසූති කුසලෙසු ධම්‌මෙසු අනොරොපිතධුරො අනොසක්‌කිතවීරියො.
Āraddhavīriyoti paggahitavīriyo anosakkitamānaso. Pahānāyāti pahānatthāya. Upasampadāyāti paṭilābhatthāya. Thāmavāti vīriyathāmena samannāgato. Daḷhaparakkamoti thiraparakkamo. Anikkhittadhuro kusalesu dhammesūti kusalesu dhammesu anoropitadhuro anosakkitavīriyo.
උදයත්‌ථගාමිනියාති පඤ්‌චන්‌නං ඛන්‌ධානං උදයවයගාමිනියා උදයඤ්‌ච වයඤ්‌ච පටිවිජ්‌ඣිතුං සමත්‌ථාය. පඤ්‌ඤාය සමන්‌නාගතොති විපස්‌සනාපඤ්‌ඤාය චෙව මග්‌ගපඤ්‌ඤාය ච සමඞ්‌ගිභූතො. අරියායාති වික්‌ඛම්‌භනවසෙන ච සමුච්‌ඡෙදවසෙන ච කිලෙසෙහි ආරකා ඨිතාය පරිසුද්‌ධාය. නිබ්‌බෙධිකායාති සා ච අභිනිවිජ්‌ඣනතො නිබ්‌බෙධිකාති වුච්‌චති, තාය සමන්‌නාගතොති අත්‌ථො. තත්‌ථ මග්‌ගපඤ්‌ඤා සමුච්‌ඡෙදවසෙන අනිබ්‌බිද්‌ධපුබ්‌බං අප්‌පදාලිතපුබ්‌බං ලොභක්‌ඛන්‌ධං දොසක්‌ඛන්‌ධං මොහක්‌ඛන්‌ධං නිබ්‌බිජ්‌ඣති පදාලෙතීති නිබ්‌බෙධිකා, විපස්‌සනාපඤ්‌ඤා තදඞ්‌ගවසෙන නිබ්‌බෙධිකා, මග්‌ගපඤ්‌ඤාය පටිලාභසංවත්‌තනතො තබ්‌බිපස්‌සනා නිබ්‌බෙධිකාති වත්‌තුං වට්‌ටති. සම්‌මා දුක්‌ඛක්‌ඛයගාමිනියාති ඉධාපි මග්‌ගපඤ්‌ඤා සම්‌මා හෙතුනා නයෙන වට්‌ටදුක්‌ඛඤ්‌ච කිලෙසදුක්‌ඛඤ්‌ච ඛෙපයමානා ගච්‌ඡතීති සම්‌මා දුක්‌ඛක්‌ඛයගාමිනී නාම, විපස්‌සනාපඤ්‌ඤා තදඞ්‌ගවසෙන වට්‌ටදුක්‌ඛඤ්‌ච කිලෙසදුක්‌ඛඤ්‌ච ඛෙපයමානා ගච්‌ඡතීති දුක්‌ඛක්‌ඛයගාමිනී. දුක්‌ඛක්‌ඛයගාමිනියා වා මග්‌ගපඤ්‌ඤාය පටිලාභාය සංවත්‌තනතොපෙසා දුක්‌ඛක්‌ඛයගාමිනීති වෙදිතබ්‌බා. ඉති ඉමස්‌මිං සුත්‌තෙ පඤ්‌ච බලානි මිස්‌සකානෙව කථිතානි, තථා පඤ්‌චමෙ.
Udayatthagāminiyāti pañcannaṃ khandhānaṃ udayavayagāminiyā udayañca vayañca paṭivijjhituṃ samatthāya. Paññāyasamannāgatoti vipassanāpaññāya ceva maggapaññāya ca samaṅgibhūto. Ariyāyāti vikkhambhanavasena ca samucchedavasena ca kilesehi ārakā ṭhitāya parisuddhāya. Nibbedhikāyāti sā ca abhinivijjhanato nibbedhikāti vuccati, tāya samannāgatoti attho. Tattha maggapaññā samucchedavasena anibbiddhapubbaṃ appadālitapubbaṃ lobhakkhandhaṃ dosakkhandhaṃ mohakkhandhaṃ nibbijjhati padāletīti nibbedhikā, vipassanāpaññā tadaṅgavasena nibbedhikā, maggapaññāya paṭilābhasaṃvattanato tabbipassanā nibbedhikāti vattuṃ vaṭṭati. Sammā dukkhakkhayagāminiyāti idhāpi maggapaññā sammā hetunā nayena vaṭṭadukkhañca kilesadukkhañca khepayamānā gacchatīti sammā dukkhakkhayagāminī nāma, vipassanāpaññā tadaṅgavasena vaṭṭadukkhañca kilesadukkhañca khepayamānā gacchatīti dukkhakkhayagāminī. Dukkhakkhayagāminiyā vā maggapaññāya paṭilābhāya saṃvattanatopesā dukkhakkhayagāminīti veditabbā. Iti imasmiṃ sutte pañca balāni missakāneva kathitāni, tathā pañcame.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 2. විත්‌ථතසුත්‌තං • 2. Vitthatasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. මහාසුපිනසුත්‌තවණ්‌ණනා • 6. Mahāsupinasuttavaṇṇanā
