| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༢. ཝིཏྠཏསུཏྟཝཎྞནཱ
2. Vitthatasuttavaṇṇanā
༢. དུཏིཡེ ཀཱཡདུཙྩརིཏེནཱཏིཨཱདཱིསུ ཨུཔཡོགཏྠེ ཀརཎཝཙནཾ, ཧིརཱིཡིཏབྦཱནི ཀཱཡདུཙྩརིཏཱདཱིནི ཧིརཱིཡཏི ཛིགུཙྪཏཱིཏི ཨཏྠོ། ཨོཏྟཔྤནིདྡེསེ ཧེཏྭཏྠེ ཀརཎཝཙནཾ, ཀཱཡདུཙྩརིཏཱདཱིཧི ཨོཏྟཔྤསྶ ཧེཏུབྷཱུཏེཧི ཨོཏྟཔྤཏི བྷཱཡཏཱིཏི ཨཏྠོ།
2. Dutiye kāyaduccaritenātiādīsu upayogatthe karaṇavacanaṃ, hirīyitabbāni kāyaduccaritādīni hirīyati jigucchatīti attho. Ottappaniddese hetvatthe karaṇavacanaṃ, kāyaduccaritādīhi ottappassa hetubhūtehi ottappati bhāyatīti attho.
ཨཱརདྡྷཝཱིརིཡོཏི པགྒཧིཏཝཱིརིཡོ ཨནོསཀྐིཏམཱནསོ། པཧཱནཱཡཱཏི པཧཱནཏྠཱཡ། ཨུཔསམྤདཱཡཱཏི པཊིལཱབྷཏྠཱཡ། ཐཱམཝཱཏི ཝཱིརིཡཐཱམེན སམནྣཱགཏོ། དལ༹ྷཔརཀྐམོཏི ཐིརཔརཀྐམོ། ཨནིཀྑིཏྟདྷུརོ ཀུསལེསུ དྷམྨེསཱུཏི ཀུསལེསུ དྷམྨེསུ ཨནོརོཔིཏདྷུརོ ཨནོསཀྐིཏཝཱིརིཡོ།
Āraddhavīriyoti paggahitavīriyo anosakkitamānaso. Pahānāyāti pahānatthāya. Upasampadāyāti paṭilābhatthāya. Thāmavāti vīriyathāmena samannāgato. Daḷhaparakkamoti thiraparakkamo. Anikkhittadhuro kusalesu dhammesūti kusalesu dhammesu anoropitadhuro anosakkitavīriyo.
ཨུདཡཏྠགཱམིནིཡཱཏི པཉྩནྣཾ ཁནྡྷཱནཾ ཨུདཡཝཡགཱམིནིཡཱ ཨུདཡཉྩ ཝཡཉྩ པཊིཝིཛ྄ཛྷིཏུཾ སམཏྠཱཡ། པཉྙཱཡ སམནྣཱགཏོཏི ཝིཔསྶནཱཔཉྙཱཡ ཙེཝ མགྒཔཉྙཱཡ ཙ སམངྒིབྷཱུཏོ། ཨརིཡཱཡཱཏི ཝིཀྑམྦྷནཝསེན ཙ སམུཙྪེདཝསེན ཙ ཀིལེསེཧི ཨཱརཀཱ ཋིཏཱཡ པརིསུདྡྷཱཡ། ནིབྦེདྷིཀཱཡཱཏི སཱ ཙ ཨབྷིནིཝིཛ྄ཛྷནཏོ ནིབྦེདྷིཀཱཏི ཝུཙྩཏི, ཏཱཡ སམནྣཱགཏོཏི ཨཏྠོ། ཏཏྠ མགྒཔཉྙཱ སམུཙྪེདཝསེན ཨནིབྦིདྡྷཔུབྦཾ ཨཔྤདཱལིཏཔུབྦཾ ལོབྷཀྑནྡྷཾ དོསཀྑནྡྷཾ མོཧཀྑནྡྷཾ ནིབྦིཛ྄ཛྷཏི པདཱལེཏཱིཏི ནིབྦེདྷིཀཱ, ཝིཔསྶནཱཔཉྙཱ ཏདངྒཝསེན ནིབྦེདྷིཀཱ, མགྒཔཉྙཱཡ པཊིལཱབྷསཾཝཏྟནཏོ ཏབྦིཔསྶནཱ ནིབྦེདྷིཀཱཏི ཝཏྟུཾ ཝཊྚཏི། སམྨཱ དུཀྑཀྑཡགཱམིནིཡཱཏི ཨིདྷཱཔི མགྒཔཉྙཱ སམྨཱ ཧེཏུནཱ ནཡེན ཝཊྚདུཀྑཉྩ ཀིལེསདུཀྑཉྩ ཁེཔཡམཱནཱ གཙྪཏཱིཏི སམྨཱ དུཀྑཀྑཡགཱམིནཱི ནཱམ, ཝིཔསྶནཱཔཉྙཱ ཏདངྒཝསེན ཝཊྚདུཀྑཉྩ ཀིལེསདུཀྑཉྩ ཁེཔཡམཱནཱ གཙྪཏཱིཏི དུཀྑཀྑཡགཱམིནཱི། དུཀྑཀྑཡགཱམིནིཡཱ ཝཱ མགྒཔཉྙཱཡ པཊིལཱབྷཱཡ སཾཝཏྟནཏོཔེསཱ དུཀྑཀྑཡགཱམིནཱིཏི ཝེདིཏབྦཱ། ཨིཏི ཨིམསྨིཾ སུཏྟེ པཉྩ བལཱནི མིསྶཀཱནེཝ ཀཐིཏཱནི, ཏཐཱ པཉྩམེ།
Udayatthagāminiyāti pañcannaṃ khandhānaṃ udayavayagāminiyā udayañca vayañca paṭivijjhituṃ samatthāya. Paññāyasamannāgatoti vipassanāpaññāya ceva maggapaññāya ca samaṅgibhūto. Ariyāyāti vikkhambhanavasena ca samucchedavasena ca kilesehi ārakā ṭhitāya parisuddhāya. Nibbedhikāyāti sā ca abhinivijjhanato nibbedhikāti vuccati, tāya samannāgatoti attho. Tattha maggapaññā samucchedavasena anibbiddhapubbaṃ appadālitapubbaṃ lobhakkhandhaṃ dosakkhandhaṃ mohakkhandhaṃ nibbijjhati padāletīti nibbedhikā, vipassanāpaññā tadaṅgavasena nibbedhikā, maggapaññāya paṭilābhasaṃvattanato tabbipassanā nibbedhikāti vattuṃ vaṭṭati. Sammā dukkhakkhayagāminiyāti idhāpi maggapaññā sammā hetunā nayena vaṭṭadukkhañca kilesadukkhañca khepayamānā gacchatīti sammā dukkhakkhayagāminī nāma, vipassanāpaññā tadaṅgavasena vaṭṭadukkhañca kilesadukkhañca khepayamānā gacchatīti dukkhakkhayagāminī. Dukkhakkhayagāminiyā vā maggapaññāya paṭilābhāya saṃvattanatopesā dukkhakkhayagāminīti veditabbā. Iti imasmiṃ sutte pañca balāni missakāneva kathitāni, tathā pañcame.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༢. ཝིཏྠཏསུཏྟཾ • 2. Vitthatasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. མཧཱསུཔིནསུཏྟཝཎྞནཱ • 6. Mahāsupinasuttavaṇṇanā
