| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੪. વਿਤ੍ਥਤਸੁਤ੍ਤવਣ੍ਣਨਾ
4. Vitthatasuttavaṇṇanā
੧੪. ਚਤੁਤ੍ਥੇ ਸਤਿਨੇਪਕ੍ਕੇਨਾਤਿ ਸਤਿਯਾ ਨੇਪਕ੍ਕੇਨ, ਤਿਕ੍ਖવਿਸਦਸੂਰਭਾવੇਨਾਤਿ ਅਤ੍ਥੋ। ਅਟ੍ਠਕਥਾਯਂ ਪਨ ਨੇਪਕ੍ਕਂ ਨਾਮ ਪਞ੍ਞਾਤਿ ਅਧਿਪ੍ਪਾਯੇਨ ‘‘ਨੇਪਕ੍ਕਂ વੁਚ੍ਚਤਿ ਪਞ੍ਞਾ’’ਤਿ વੁਤ੍ਤਂ। ਏવਂ ਸਤਿ ਅਞ੍ਞੋ ਨਿਦ੍ਦਿਟ੍ਠੋ ਨਾਮ ਹੋਤਿ। ਸਤਿਮਾਤਿ ਚ ਇਮਿਨਾ ਸવਿਸੇਸਾ ਸਤਿ ਗਹਿਤਾਤਿ ਪਰਤੋਪਿ ‘‘ਚਿਰਕਤਮ੍ਪਿ ਚਿਰਭਾਸਿਤਮ੍ਪਿ ਸਰਿਤਾ ਅਨੁਸ੍ਸਰਿਤਾ’’ਤਿ ਸਤਿਕਿਚ੍ਚਮੇવ ਨਿਦ੍ਦਿਟ੍ਠਂ, ਨ ਪਞ੍ਞਾਕਿਚ੍ਚਂ, ਤਸ੍ਮਾ ਸਤਿਨੇਪਕ੍ਕੇਨਾਤਿ ਸਤਿਯਾ ਨੇਪਕ੍ਕਭਾવੇਨਾਤਿ ਸਕ੍ਕਾ વਿਞ੍ਞਾਤੁਂ ਲਬ੍ਭਤੇવ। ਪਚ੍ਚਯવਿਸੇਸવਸੇਨ ਅਞ੍ਞਧਮ੍ਮਨਿਰਪੇਕ੍ਖੋ ਸਤਿਯਾ ਬਲવਭਾવੋ। ਤਥਾ ਹਿ ਞਾਣવਿਪ੍ਪਯੁਤ੍ਤਚਿਤ੍ਤੇਨਪਿ ਸਜ੍ਝਾਯਨਸਮ੍ਮਸਨਾਨਿ ਸਮ੍ਭવਨ੍ਤਿ।
14. Catutthe satinepakkenāti satiyā nepakkena, tikkhavisadasūrabhāvenāti attho. Aṭṭhakathāyaṃ pana nepakkaṃ nāma paññāti adhippāyena ‘‘nepakkaṃ vuccati paññā’’ti vuttaṃ. Evaṃ sati añño niddiṭṭho nāma hoti. Satimāti ca iminā savisesā sati gahitāti paratopi ‘‘cirakatampi cirabhāsitampi saritā anussaritā’’ti satikiccameva niddiṭṭhaṃ, na paññākiccaṃ, tasmā satinepakkenāti satiyā nepakkabhāvenāti sakkā viññātuṃ labbhateva. Paccayavisesavasena aññadhammanirapekkho satiyā balavabhāvo. Tathā hi ñāṇavippayuttacittenapi sajjhāyanasammasanāni sambhavanti.
ਚਿਰਕਤਮ੍ਪੀਤਿ ਅਤ੍ਤਨਾ વਾ ਪਰੇਨ વਾ ਕਾਯੇਨ ਚਿਰਕਤਂ ਚੇਤਿਯਙ੍ਗਣવਤ੍ਤਾਦਿਮਹਾવਤ੍ਤਪ੍ਪਟਿਪਤ੍ਤਿਪੂਰਣਂ। ਚਿਰਭਾਸਿਤਮ੍ਪੀਤਿ ਅਤ੍ਤਨਾ વਾ ਪਰੇਨ વਾ વਾਚਾਯ ਚਿਰਭਾਸਿਤਂ ਸਕ੍ਕਚ੍ਚਂ ਉਦ੍ਦਿਸਨਉਦ੍ਦਿਸਾਪਨਧਮ੍ਮਾਸਾਰਣਧਮ੍ਮਦੇਸਨਾਉਪਨਿਸਿਨ੍ਨਕਪਰਿਕਥਾਅਨੁਮੋਦਨੀਯਾਦਿવਸੇਨ ਪવਤ੍ਤਿਤਂ વਚੀਕਮ੍ਮਂ। ਸਰਿਤਾ ਅਨੁਸ੍ਸਰਿਤਾਤਿ ਤਸ੍ਮਿਂ ਕਾਯੇਨ ਚਿਰਕਤੇ ਕਾਯੋ ਨਾਮ ਕਾਯવਿਞ੍ਞਤ੍ਤਿ, ਚਿਰਭਾਸਿਤੇ વਾਚਾ ਨਾਮ વਚੀવਿਞ੍ਞਤ੍ਤਿ, ਤਦੁਭਯਮ੍ਪਿ ਰੂਪਂ, ਤਂਸਮੁਟ੍ਠਾਪਕਾ ਚਿਤ੍ਤਚੇਤਸਿਕਾ ਅਰੂਪਂ। ਇਤਿ ਇਮੇ ਰੂਪਾਰੂਪਧਮ੍ਮਾ ਏવਂ ਉਪ੍ਪਜ੍ਜਿਤ੍વਾ ਏવਂ ਨਿਰੁਦ੍ਧਾਤਿ ਸਰਤਿ ਚੇવ ਅਨੁਸ੍ਸਰਤਿ ਚ, ਸਤਿਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਤੀਤਿ ਅਤ੍ਥੋ। ਬੋਜ੍ਝਙ੍ਗਸਮੁਟ੍ਠਾਪਿਕਾ ਹਿ ਸਤਿ ਇਧ ਅਧਿਪ੍ਪੇਤਾ। ਤਾਯ ਸਤਿਯਾ ਏਸ ਸਕਿਂ ਸਰਣੇਨ ਸਰਿਤਾ, ਪੁਨਪ੍ਪੁਨਂ ਸਰਣੇਨ ਅਨੁਸ੍ਸਰਿਤਾਤਿ વੇਦਿਤਬ੍ਬਾ।
Cirakatampīti attanā vā parena vā kāyena cirakataṃ cetiyaṅgaṇavattādimahāvattappaṭipattipūraṇaṃ. Cirabhāsitampīti attanā vā parena vā vācāya cirabhāsitaṃ sakkaccaṃ uddisanauddisāpanadhammāsāraṇadhammadesanāupanisinnakaparikathāanumodanīyādivasena pavattitaṃ vacīkammaṃ. Saritā anussaritāti tasmiṃ kāyena cirakate kāyo nāma kāyaviññatti, cirabhāsite vācā nāma vacīviññatti, tadubhayampi rūpaṃ, taṃsamuṭṭhāpakā cittacetasikā arūpaṃ. Iti ime rūpārūpadhammā evaṃ uppajjitvā evaṃ niruddhāti sarati ceva anussarati ca, satisambojjhaṅgaṃ samuṭṭhāpetīti attho. Bojjhaṅgasamuṭṭhāpikā hi sati idha adhippetā. Tāya satiyā esa sakiṃ saraṇena saritā, punappunaṃ saraṇena anussaritāti veditabbā.
વਿਤ੍ਥਤਸੁਤ੍ਤવਣ੍ਣਨਾ ਨਿਟ੍ਠਿਤਾ।
Vitthatasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੪. વਿਤ੍ਥਤਸੁਤ੍ਤਂ • 4. Vitthatasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੪. વਿਤ੍ਥਤਸੁਤ੍ਤવਣ੍ਣਨਾ • 4. Vitthatasuttavaṇṇanā
