| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. விவாத³மூலஸுத்தவண்ணனா
6. Vivādamūlasuttavaṇṇanā
36. ச²ட்டே² கோத⁴னோதி குஜ்ஜ²னஸீலோ. யஸ்மா ஸோ அப்பஹீனகோத⁴தாய அதி⁴க³தகோதோ⁴ நாம ஹோதி, தஸ்மா ‘‘கோதே⁴ன ஸமன்னாக³தோ’’தி ஆஹ. உபனாஹோ ஏதஸ்ஸ அத்தீ²தி உபனாஹீ, உபனய்ஹனஸீலோதி வா உபனாஹீ. விவாதோ³ நாம உப்பஜ்ஜமானோ யேபு⁴ய்யேன பட²மங் த்³வின்னங் வஸேன உப்பஜ்ஜதீதி வுத்தங் ‘‘த்³வின்னங் பி⁴க்கூ²னங் விவாதோ³’’தி. ஸோ பன யதா² ப³ஹூனங் அனத்தா²வஹோ ஹோதி, தங் நித³ஸ்ஸனமுகே²ன நித³ஸ்ஸெந்தோ ‘‘கத²’’ந்திஆதி³மாஹ. அப்³ப⁴ந்தரபரிஸாயாதி பரிஸப்³ப⁴ந்தரே.
36. Chaṭṭhe kodhanoti kujjhanasīlo. Yasmā so appahīnakodhatāya adhigatakodho nāma hoti, tasmā ‘‘kodhena samannāgato’’ti āha. Upanāho etassa atthīti upanāhī, upanayhanasīloti vā upanāhī. Vivādo nāma uppajjamāno yebhuyyena paṭhamaṃ dvinnaṃ vasena uppajjatīti vuttaṃ ‘‘dvinnaṃ bhikkhūnaṃ vivādo’’ti. So pana yathā bahūnaṃ anatthāvaho hoti, taṃ nidassanamukhena nidassento ‘‘katha’’ntiādimāha. Abbhantaraparisāyāti parisabbhantare.
கு³ணமக்க²னாய பவத்தோபி அத்தனோ காரகங் கூ³தே²ன பஹரந்திங் கூ³தோ² விய பட²மதரங் மக்கே²தீதி மக்கோ², ஸோ ஏதஸ்ஸ அத்தீ²தி மக்கீ². பளாஸதீதி பளாஸோ, பரஸ்ஸ கு³ணே ட³ங்ஸித்வா விய அபனேதீதி அத்தோ². ஸோ ஏதஸ்ஸ அத்தீ²தி பளாஸீ. பளாஸீ புக்³க³லோ ஹி து³தியஸ்ஸ து⁴ரங் ந தே³தி, ஸமங் ஹரித்வா அதிவத³தி. தேனாஹ ‘‘யுக³க்³கா³ஹலக்க²ணேன பளாஸேன ஸமன்னாக³தோ’’தி. இஸ்ஸதீதி இஸ்ஸுகீ. மச்ச²ராயதீதி மச்ச²ரங், தங் ஏதஸ்ஸ அத்தீ²தி மச்ச²ரீ. ஸட²யதி ந ஸம்மா பா⁴ஸதீதி ஸடோ² அஞ்ஞதா² ஸந்தங் அத்தானங் அஞ்ஞதா² பவேத³னதோ. மாயா ஏதஸ்ஸ அத்தீ² மாயாவீ. மிச்சா² பாபிகா விஞ்ஞுக³ரஹிதா ஏதஸ்ஸ தி³ட்டீ²தி மிச்சா²தி³ட்டி², கம்மபத²பரியாபன்னாய ‘‘நத்தி² தி³ன்ன’’ந்திஆதி³வத்து²காய மிச்ச²த்தபரியாபன்னாய அனிய்யானிகாய தி³ட்டி²யா ஸமன்னாக³தோதி அத்தோ². தேனாஹ ‘‘நத்தி²கவாதீ³’’திஆதி³.
Guṇamakkhanāya pavattopi attano kārakaṃ gūthena paharantiṃ gūtho viya paṭhamataraṃ makkhetīti makkho, so etassa atthīti makkhī. Paḷāsatīti paḷāso, parassa guṇe ḍaṃsitvā viya apanetīti attho. So etassa atthīti paḷāsī. Paḷāsī puggalo hi dutiyassa dhuraṃ na deti, samaṃ haritvā ativadati. Tenāha ‘‘yugaggāhalakkhaṇena paḷāsena samannāgato’’ti. Issatīti issukī. Maccharāyatīti maccharaṃ, taṃ etassa atthīti maccharī. Saṭhayati na sammā bhāsatīti saṭho aññathā santaṃ attānaṃ aññathā pavedanato. Māyā etassa atthī māyāvī. Micchā pāpikā viññugarahitā etassa diṭṭhīti micchādiṭṭhi, kammapathapariyāpannāya ‘‘natthi dinna’’ntiādivatthukāya micchattapariyāpannāya aniyyānikāya diṭṭhiyā samannāgatoti attho. Tenāha ‘‘natthikavādī’’tiādi.
ஸங் அத்தனோ தி³ட்டி²ங், ஸயங் வா அத்தனா யதா²க³ஹிதங் பராமஸதி, ஸபா⁴வங் அதிக்கமித்வா பரதோ ஆமஸதீதி ஸந்தி³ட்டீ²பராமாஸீ. ஆதா⁴னங் த³ள்ஹங் க³ண்ஹாதீதி ஆதா⁴னக்³கா³ஹீ, த³ள்ஹக்³கா³ஹீ, ‘‘இத³மேவ ஸச்ச’’ந்தி தி²ரக்³கா³ஹீதி அத்தோ². யுத்தங் காரணங் தி³ஸ்வாவ லத்³தி⁴ங் படினிஸ்ஸஜ்ஜதீதி படினிஸ்ஸக்³கீ³, து³க்கே²ன கிச்சே²ன கஸிரேன ப³ஹும்பி காரணங் த³ஸ்ஸெத்வா ந ஸக்கா படினிஸ்ஸக்³க³ங் காதுந்தி து³ப்படினிஸ்ஸக்³கீ³. யோ அத்தனோ உப்பன்னதி³ட்டி²ங் ‘‘இத³மேவ ஸச்ச’’ந்தி த³ள்ஹங் க³ண்ஹித்வா அபி பு³த்³தா⁴தீ³ஹி காரணங் த³ஸ்ஸெத்வா வுச்சமானோ ந படினிஸ்ஸஜ்ஜதி. தஸ்ஸேதங் அதி⁴வசனங். தாதி³ஸோ ஹி புக்³க³லோ யங் யதே³வ த⁴ம்மங் வா அத⁴ம்மங் வா ஸுணாதி, தங் ஸப்³ப³ங் ‘‘ஏவங் அம்ஹாகங் ஆசரியேஹி கதி²தங், ஏவங் அம்ஹேஹி ஸுத’’ந்தி கும்மோவ அங்கா³னி ஸகே கபாலே அந்தோயேவ ஸமோத³ஹதி. யதா² ஹி கச்ச²போ அத்தனோ ஹத்த²பாதா³தி³கே அங்கே³ கேனசி க⁴டிதே ஸப்³பா³னி அங்கா³னி அத்தனோ கபாலேயேவ ஸமோத³ஹதி, ந ப³ஹி நீஹரதி, ஏவமயம்பி ‘‘ந ஸுந்த³ரோ தவ கா³ஹோ, ச²ட்³டே³ஹி ந’’ந்தி வுத்தோ தங் ந விஸ்ஸஜ்ஜதி, அந்தோயேவ அத்தனோ ஹத³யே ஏவ ட²பெத்வா விசரதி, கும்பீ⁴லக்³கா³ஹங் க³ண்ஹாதி. யதா² ஸுஸுமாரா க³ஹிதங் ந படினிஸ்ஸஜ்ஜந்தி, ஏவங் க³ண்ஹாதி.
Saṃ attano diṭṭhiṃ, sayaṃ vā attanā yathāgahitaṃ parāmasati, sabhāvaṃ atikkamitvā parato āmasatīti sandiṭṭhīparāmāsī. Ādhānaṃ daḷhaṃ gaṇhātīti ādhānaggāhī, daḷhaggāhī, ‘‘idameva sacca’’nti thiraggāhīti attho. Yuttaṃ kāraṇaṃ disvāva laddhiṃ paṭinissajjatīti paṭinissaggī, dukkhena kicchena kasirena bahumpi kāraṇaṃ dassetvā na sakkā paṭinissaggaṃ kātunti duppaṭinissaggī. Yo attano uppannadiṭṭhiṃ ‘‘idameva sacca’’nti daḷhaṃ gaṇhitvā api buddhādīhi kāraṇaṃ dassetvā vuccamāno na paṭinissajjati. Tassetaṃ adhivacanaṃ. Tādiso hi puggalo yaṃ yadeva dhammaṃ vā adhammaṃ vā suṇāti, taṃ sabbaṃ ‘‘evaṃ amhākaṃ ācariyehi kathitaṃ, evaṃ amhehi suta’’nti kummova aṅgāni sake kapāle antoyeva samodahati. Yathā hi kacchapo attano hatthapādādike aṅge kenaci ghaṭite sabbāni aṅgāni attano kapāleyeva samodahati, na bahi nīharati, evamayampi ‘‘na sundaro tava gāho, chaḍḍehi na’’nti vutto taṃ na vissajjati, antoyeva attano hadaye eva ṭhapetvā vicarati, kumbhīlaggāhaṃ gaṇhāti. Yathā susumārā gahitaṃ na paṭinissajjanti, evaṃ gaṇhāti.
விவாத³மூலஸுத்தவண்ணனா நிட்டி²தா.
Vivādamūlasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. விவாத³மூலஸுத்தங் • 6. Vivādamūlasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. விவாத³மூலஸுத்தவண்ணனா • 6. Vivādamūlasuttavaṇṇanā
