| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
44-49. виваддан̃аан̣ачагганид̣̇д̣̇зсаван̣н̣анаа
44-49. Vivaṭṭañāṇachakkaniddesavaṇṇanā
95. виваддан̃аан̣ачагганид̣̇д̣̇зсз нзгкаммаад̇хибад̇ад̇д̇аа бан̃н̃аад̇и нзгкаммам̣ ад̇хигам̣ гад̇ваа нзгкаммаад̇хигабхаавзна бавад̇д̇аа бан̃н̃аа. гаамажчанд̣̇ад̇о сан̃н̃ааяа виваддад̇ийд̇и нзгкаммаад̇хибад̇игад̇абан̃н̃аасамбаяуд̇д̇асан̃н̃ааяа хзд̇убхууд̇ааяа, гаран̣абхууд̇ааяа ваа гаамажчанд̣̇ад̇о виваддад̇и бараавад̇д̇ад̇и, бараммукий ход̇ийд̇и ад̇т̇о. зса наяо сзсзсу.
95. Vivaṭṭañāṇachakkaniddese nekkhammādhipatattā paññāti nekkhammaṃ adhikaṃ katvā nekkhammādhikabhāvena pavattā paññā. Kāmacchandato saññāya vivaṭṭatīti nekkhammādhipatikatapaññāsampayuttasaññāya hetubhūtāya, karaṇabhūtāya vā kāmacchandato vivaṭṭati parāvattati, parammukhī hotīti attho. Esa nayo sesesu.
96. гаамажчанд̣̇о наанад̇д̇анд̇и гаамажчанд̣̇о санд̇авуд̇д̇ид̇ааяа абхаавад̇о на згасабхааво. нзгкаммам̣ згад̇д̇анд̇и нзгкаммам̣ санд̇авуд̇д̇ибхаавад̇о згасабхааво. нзгкаммзгад̇д̇ам̣ жзд̇аяад̇од̇и гаамажчанд̣̇з аад̣̇ийнавад̣̇ассанзна нзгкаммам̣ бавад̇д̇аяад̇о. гаамажчанд̣̇ад̇о жид̇д̇ам̣ виваддад̇ийд̇и д̣̇идтаад̣̇ийнавад̇о гаамажчанд̣̇ад̇о нзгкаммагкан̣з жид̇д̇ам̣ виваддад̇и. зса наяо сзсзсу.
96.Kāmacchando nānattanti kāmacchando santavuttitāya abhāvato na ekasabhāvo. Nekkhammaṃ ekattanti nekkhammaṃ santavuttibhāvato ekasabhāvo. Nekkhammekattaṃ cetayatoti kāmacchande ādīnavadassanena nekkhammaṃ pavattayato. Kāmacchandato cittaṃ vivaṭṭatīti diṭṭhādīnavato kāmacchandato nekkhammakkhaṇe cittaṃ vivaṭṭati. Esa nayo sesesu.
97. гаамажчанд̣̇ам̣ баж̇аханд̇од̇и нзгкаммабавад̇д̇игкан̣з гаамажчанд̣̇ам̣ вигкамбханаббахаанзна баж̇аханд̇о. нзгкаммавасзна жид̇д̇ам̣ ад̇хидтаад̇ийд̇и бадилад̣̇д̇хасса нзгкаммасса васзна д̇ам̣самбаяуд̇д̇ажид̇д̇ам̣ ад̇хид̇идтад̇и ад̇хигам̣ гаронд̇о д̇идтад̇и, бавад̇д̇зд̇ийд̇и ад̇т̇о. зса наяо сзсзсу.
97.Kāmacchandaṃ pajahantoti nekkhammapavattikkhaṇe kāmacchandaṃ vikkhambhanappahānena pajahanto. Nekkhammavasena cittaṃ adhiṭṭhātīti paṭiladdhassa nekkhammassa vasena taṃsampayuttacittaṃ adhitiṭṭhati adhikaṃ karonto tiṭṭhati, pavattetīti attho. Esa nayo sesesu.
98. жагку сун̃н̃ам̣ ад̇д̇зна ваад̇и б̣аалаж̇анабаригаббид̇асса гаарагавзд̣̇агасан̇каад̇асса ад̇д̇ано абхааваа жагку ад̇д̇зна жа сун̃н̃ам̣. яан̃хи яад̇т̇а на ход̇и, д̇зна д̇ам̣ сун̃н̃ам̣ наама ход̇и. ад̇д̇аниязна ваад̇и ад̇д̇ано абхаавзнзва ад̇д̇ано санд̇агассаби абхааваа ад̇д̇ано санд̇агзна жа сун̃н̃ам̣. логасса ад̇д̇аад̇и жа ад̇д̇анияанд̇и жа убхаяат̇аа г̇аахасамбхавад̇о д̇ад̣̇убхаяаг̇аахабадисзд̇ханад̇т̇ам̣ ад̇д̇аабхааво жа ад̇д̇анияаабхааво жа вуд̇д̇о. нижжзна ваад̇и бхан̇г̇ам̣ ад̇иггамид̇ваа д̇идтанд̇асса гассажи абхаавад̇о нижжзна жа сун̃н̃ам̣. д̇хувзна ваад̇и бавад̇д̇игкан̣зби т̇ирасса гассажи абхаавад̇о д̇хувзна жа сун̃н̃ам̣. сассад̇зна ваад̇и саб̣б̣агаалзби виж̇ж̇амаанасса гассажи абхаавад̇о сассад̇зна жа сун̃н̃ам̣. авибарин̣аамад̇хаммзна ваад̇и ж̇араабхан̇г̇авасзна д̣̇вид̇хаа абаривад̇д̇амаанабагад̇игасса гассажи абхаавад̇о авибарин̣аамад̇хаммзна жа сун̃н̃ам̣. ат̇а ваа нижжабхаавзна жа д̇хувабхаавзна жа сассад̇абхаавзна жа авибарин̣аамад̇хаммабхаавзна жа сун̃н̃анд̇и ад̇т̇о. самужжаяад̇т̇о ваа-сад̣̇д̣̇о. яат̇аабхууд̇ам̣ ж̇аанад̇о бассад̇од̇и ижжзвам̣ анад̇д̇аанубассанаан̃аан̣зна яат̇аасабхаавзна ж̇аананд̇асса жагкунаа вияа жа бассанд̇асса. жагкаабхинивзсад̇о н̃аан̣ам̣ виваддад̇ийд̇и жагку ад̇д̇аад̇и ваа ад̇д̇анияанд̇и ваа бавад̇д̇амаанад̇о д̣̇идтаабхинивзсад̇о д̇ад̣̇ан̇г̇аббахаанавасзна н̃аан̣ам̣ виваддад̇и. зса наяо сзсзсу.
98.Cakkhu suññaṃ attena vāti bālajanaparikappitassa kārakavedakasaṅkhātassa attano abhāvā cakkhu attena ca suññaṃ. Yañhi yattha na hoti, tena taṃ suññaṃ nāma hoti. Attaniyena vāti attano abhāveneva attano santakassapi abhāvā attano santakena ca suññaṃ. Lokassa attāti ca attaniyanti ca ubhayathā gāhasambhavato tadubhayagāhapaṭisedhanatthaṃ attābhāvo ca attaniyābhāvo ca vutto. Niccena vāti bhaṅgaṃ atikkamitvā tiṭṭhantassa kassaci abhāvato niccena ca suññaṃ. Dhuvena vāti pavattikkhaṇepi thirassa kassaci abhāvato dhuvena ca suññaṃ. Sassatena vāti sabbakālepi vijjamānassa kassaci abhāvato sassatena ca suññaṃ. Avipariṇāmadhammena vāti jarābhaṅgavasena dvidhā aparivattamānapakatikassa kassaci abhāvato avipariṇāmadhammena ca suññaṃ. Atha vā niccabhāvena ca dhuvabhāvena ca sassatabhāvena ca avipariṇāmadhammabhāvena ca suññanti attho. Samuccayattho vā-saddo. Yathābhūtaṃ jānato passatoti iccevaṃ anattānupassanāñāṇena yathāsabhāvena jānantassa cakkhunā viya ca passantassa. Cakkhābhinivesato ñāṇaṃ vivaṭṭatīti cakkhu attāti vā attaniyanti vā pavattamānato diṭṭhābhinivesato tadaṅgappahānavasena ñāṇaṃ vivaṭṭati. Esa nayo sesesu.
99. нзгкаммзна гаамажчанд̣̇ам̣ восаж̇ж̇ад̇ийд̇и нзгкаммалаабхий буг̇г̇ало нзгкаммзна д̇аббадибагкам̣ гаамажчанд̣̇ам̣ барижжаж̇ад̇и. восаг̇г̇з бан̃н̃аад̇и гаамажчанд̣̇асса восаг̇г̇абхууд̇з нзгкаммз д̇ам̣самбаяуд̇д̇аа бан̃н̃аа. зса наяо сзсзсу. бийл̣анадтаад̣̇аяо хздтаа вуд̇д̇ад̇т̇аа зва. бариж̇аананд̇о виваддад̇ийд̇и буг̇г̇алаад̇хидтаанаа д̣̇зсанаа, маг̇г̇асаман̇г̇ийбуг̇г̇ало д̣̇угкасса жад̇уб̣б̣ид̇хам̣ ад̇т̇ам̣ гижжавасзна бариж̇аананд̇о д̣̇убхад̇о вудтаанавасзна виваддад̇и, н̃аан̣авивадданзби н̃аан̣асаман̇г̇ий виваддад̇ийд̇и вуд̇д̇о.
99.Nekkhammena kāmacchandaṃ vosajjatīti nekkhammalābhī puggalo nekkhammena tappaṭipakkhaṃ kāmacchandaṃ pariccajati. Vosagge paññāti kāmacchandassa vosaggabhūte nekkhamme taṃsampayuttā paññā. Esa nayo sesesu. Pīḷanaṭṭhādayo heṭṭhā vuttatthā eva. Parijānanto vivaṭṭatīti puggalādhiṭṭhānā desanā, maggasamaṅgīpuggalo dukkhassa catubbidhaṃ atthaṃ kiccavasena parijānanto dubhato vuṭṭhānavasena vivaṭṭati, ñāṇavivaṭṭanepi ñāṇasamaṅgī vivaṭṭatīti vutto.
100. д̇ат̇адтз бан̃н̃аад̇и зд̇асса буг̇г̇алассзва д̇ат̇адтз вивадданаа бан̃н̃аа. зса наяо сзсзсу. ид̣̇аани маг̇г̇агкан̣з зва гижжавасзна аагааранаанад̇д̇ад̇о ча виваддан̃аан̣аани д̣̇ассзд̇ум̣ сан̃н̃аавиваддод̇иаад̣̇имаад̇игам̣ табзд̇ваа д̇ам̣ ад̇т̇ад̇о вибхаж̇анд̇о сан̃ж̇аананд̇о виваддад̇ийд̇иаад̣̇имааха. д̇ад̇т̇а сан̃ж̇аананд̇о виваддад̇ийд̇и сан̃н̃аавиваддод̇и яасмаа буб̣б̣абхааг̇з нзгкаммаад̣̇им̣ ад̇хибад̇ид̇о сан̃ж̇аананд̇о яог̇ий бажчаа нзгкаммасамбаяуд̇д̇ан̃аан̣зна гаамажчанд̣̇аад̣̇ид̇о виваддад̇и, д̇асмаа д̇ам̣ н̃аан̣ам̣ сан̃н̃аавиваддо наамаад̇и ад̇т̇о. жзд̇аяанд̇о виваддад̇ийд̇и жзд̇овиваддод̇и яасмаа яог̇ий нзгкаммзгад̇д̇аад̣̇ийни жзд̇аяанд̇о самбаяуд̇д̇ан̃аан̣зна гаамажчанд̣̇аад̣̇ид̇о виваддад̇и, д̇асмаа д̇ам̣ н̃аан̣ам̣ жзд̇овиваддо наамаад̇и ад̇т̇о. виж̇аананд̇о виваддад̇ийд̇и жид̇д̇авиваддод̇и яасмаа яог̇ий нзгкаммаад̣̇ивасзна жид̇д̇аад̇хидтаанзна виж̇аананд̇о д̇ам̣самбаяуд̇д̇ан̃аан̣зна гаамажчанд̣̇аад̣̇ид̇о виваддад̇и, д̇асмаа д̇ам̣ н̃аан̣ам̣ жид̇д̇авиваддо наамаад̇и ад̇т̇о. н̃аан̣ам̣ гаронд̇о виваддад̇ийд̇и н̃аан̣авиваддод̇и яасмаа яог̇ий чаб̣б̣ид̇хам̣ аж̇жхад̇д̇игааяад̇анам̣ анад̇д̇аанубассанаан̃аан̣зна сун̃н̃ад̇о вид̣̇ид̇ам̣ гаронд̇о д̇знзва н̃аан̣зна д̣̇идтаабхинивзсад̇о виваддад̇и, д̇асмаа д̇ам̣ н̃аан̣ам̣ н̃аан̣авиваддо наамаад̇и ад̇т̇о. восаж̇ж̇анд̇о виваддад̇ийд̇и вимогкавиваддод̇и яасмаа яог̇ий нзгкаммаад̣̇ийхи гаамажчанд̣̇аад̣̇ийни восаж̇ж̇анд̇о д̇ам̣самбаяуд̇д̇ан̃аан̣зна гаамажчанд̣̇аад̣̇ид̇о виваддад̇и, д̇асмаа д̇ам̣ н̃аан̣ам̣ вимогкавиваддо наамаад̇и ад̇т̇о. д̇ат̇адтз виваддад̇ийд̇и сажжавиваддод̇и яасмаа яог̇ий жад̇уб̣б̣ид̇хз д̇ат̇адтз д̣̇убхад̇о вудтаанавасзна виваддад̇и, д̇асмаа маг̇г̇ан̃аан̣ам̣ сажжавиваддо наамаад̇и ад̇т̇о. маг̇г̇ан̃аан̣амзва ваа д̇ат̇адтз д̣̇убхад̇о вудтаанабхаавзна виваддад̇ийд̇и сажжавиваддод̇и ад̇т̇о.
100.Tathaṭṭhepaññāti etassa puggalasseva tathaṭṭhe vivaṭṭanā paññā. Esa nayo sesesu. Idāni maggakkhaṇe eva kiccavasena ākāranānattato cha vivaṭṭañāṇāni dassetuṃ saññāvivaṭṭotiādimātikaṃ ṭhapetvā taṃ atthato vibhajanto sañjānanto vivaṭṭatītiādimāha. Tattha sañjānanto vivaṭṭatīti saññāvivaṭṭoti yasmā pubbabhāge nekkhammādiṃ adhipatito sañjānanto yogī pacchā nekkhammasampayuttañāṇena kāmacchandādito vivaṭṭati, tasmā taṃ ñāṇaṃ saññāvivaṭṭo nāmāti attho. Cetayanto vivaṭṭatīti cetovivaṭṭoti yasmā yogī nekkhammekattādīni cetayanto sampayuttañāṇena kāmacchandādito vivaṭṭati, tasmā taṃ ñāṇaṃ cetovivaṭṭo nāmāti attho. Vijānanto vivaṭṭatīti cittavivaṭṭoti yasmā yogī nekkhammādivasena cittādhiṭṭhānena vijānanto taṃsampayuttañāṇena kāmacchandādito vivaṭṭati, tasmā taṃ ñāṇaṃ cittavivaṭṭo nāmāti attho. Ñāṇaṃ karonto vivaṭṭatīti ñāṇavivaṭṭoti yasmā yogī chabbidhaṃ ajjhattikāyatanaṃ anattānupassanāñāṇena suññato viditaṃ karonto teneva ñāṇena diṭṭhābhinivesato vivaṭṭati, tasmā taṃ ñāṇaṃ ñāṇavivaṭṭo nāmāti attho. Vosajjanto vivaṭṭatīti vimokkhavivaṭṭoti yasmā yogī nekkhammādīhi kāmacchandādīni vosajjanto taṃsampayuttañāṇena kāmacchandādito vivaṭṭati, tasmā taṃ ñāṇaṃ vimokkhavivaṭṭo nāmāti attho. Tathaṭṭhe vivaṭṭatīti saccavivaṭṭoti yasmā yogī catubbidhe tathaṭṭhe dubhato vuṭṭhānavasena vivaṭṭati, tasmā maggañāṇaṃ saccavivaṭṭo nāmāti attho. Maggañāṇameva vā tathaṭṭhe dubhato vuṭṭhānabhāvena vivaṭṭatīti saccavivaṭṭoti attho.
яад̇т̇а сан̃н̃аавиваддод̇иаад̣̇и сажжавиваддан̃аан̣анид̣̇д̣̇зсз вуд̇д̇ад̇д̇аа сажжавиваддан̃аан̣агкан̣амзва санд̇хааяа вуд̇д̇анд̇и взд̣̇ид̇аб̣б̣ам̣. маг̇г̇агкан̣зязва хи саб̣б̣аани яуж̇ж̇анд̇и. гат̇ам̣? н̃аан̣авиваддз н̃аан̣ан̃хи важ̇ж̇зд̇ваа сзсзсу арияамаг̇г̇о саруубзнзва ааг̇ад̇о. вибассанаагижжасса бана маг̇г̇знзва сиж̇жханад̇о вибассанаагижжасид̣̇д̇хивасзна н̃аан̣авиваддан̃аан̣амби маг̇г̇агкан̣з яуж̇ж̇ад̇и. маг̇г̇ан̃аан̣знзва ваа ‘‘жагку сун̃н̃а’’нд̇иаад̣̇и гижжавасзна бадивид̣̇д̇хамзва ход̇ийд̇и маг̇г̇агкан̣з д̇ам̣ н̃аан̣ам̣ вад̇д̇ум̣ яуж̇ж̇ад̇иязва. ад̇т̇аяож̇анаа банзд̇т̇а ‘‘яад̇т̇а маг̇г̇агкан̣з сан̃н̃аавиваддо, д̇ад̇т̇а жзд̇овиваддо. яад̇т̇а маг̇г̇агкан̣з жзд̇овиваддо , д̇ад̇т̇а сан̃н̃аавиваддо’’д̇и звамаад̣̇инаа наязна саб̣б̣асам̣санд̣̇анзсу яож̇анаа гаад̇аб̣б̣аа. ат̇а ваа сан̃н̃аавиваддажзд̇овиваддажид̇д̇авиваддавимогкавиваддзсу жад̇уннам̣ арияамаг̇г̇аанам̣ ааг̇ад̇ад̇д̇аа сажжавиваддо ааг̇ад̇оязва ход̇и. н̃аан̣авиваддо жа сажжавиваддзнзва гижжавасзна сид̣̇д̇хо ход̇и. сан̃н̃аажзд̇ожид̇д̇авимогкавиваддзсвзва жа бзяяаалз вид̇т̇аарияамаанз ‘‘анад̇д̇аанубассанаад̇хибад̇ад̇д̇аа бан̃н̃аа абхинивзсад̇о сан̃н̃ааяа виваддад̇ийд̇и ад̇хибад̇ад̇д̇аа бан̃н̃аа сан̃н̃аавиваддз н̃аан̣а’’нд̇и жа, ‘‘абхинивзсо наанад̇д̇ам̣, анад̇д̇аанубассанаа згад̇д̇ам̣. анад̇д̇аанубассанзгад̇д̇ам̣ жзд̇аяад̇о абхинивзсад̇о жид̇д̇ам̣ виваддад̇ийд̇и наанад̇д̇з бан̃н̃аа жзд̇овиваддз н̃аан̣а’’нд̇и жа, ‘‘абхинивзсам̣ баж̇аханд̇о анад̇д̇аанубассанаавасзна жид̇д̇ам̣ ад̇хидтаад̇ийд̇и ад̇хидтаанз бан̃н̃аа жид̇д̇авиваддз н̃аан̣а’’нд̇и жа, ‘‘анад̇д̇аанубассанааяа абхинивзсам̣ восаж̇ж̇ад̇ийд̇и восаг̇г̇з бан̃н̃аа вимогкавиваддз н̃аан̣а’’нд̇и жа баатасамбхавад̇о н̃аан̣авиваддз н̃аан̣амби д̇зсу ааг̇ад̇амзва ход̇и. н̃аан̣авиваддз жа анад̇д̇аанубассанааяа вудтааяа арияамаг̇г̇ам̣ бадилад̣̇д̇хасса гижжавасзна ‘‘жагку сун̃н̃ам̣ ад̇д̇зна ваа ад̇д̇аниязна ваа’’д̇иаад̣̇ияуж̇ж̇анад̇о сажжавиваддо лаб̣бхад̇и, д̇асмаа згзгасмим̣ виваддз сзсаа бан̃жа бан̃жа виваддаа лаб̣бханд̇и. д̇асмаа звам̣ ‘‘яад̇т̇а сан̃н̃аавиваддо, д̇ад̇т̇а жзд̇овиваддо’’д̇иаад̣̇игаани сам̣санд̣̇анаани вуд̇д̇аанийд̇и взд̣̇ид̇аб̣б̣ам̣.
Yatthasaññāvivaṭṭotiādi saccavivaṭṭañāṇaniddese vuttattā saccavivaṭṭañāṇakkhaṇameva sandhāya vuttanti veditabbaṃ. Maggakkhaṇeyeva hi sabbāni yujjanti. Kathaṃ? Ñāṇavivaṭṭe ñāṇañhi vajjetvā sesesu ariyamaggo sarūpeneva āgato. Vipassanākiccassa pana maggeneva sijjhanato vipassanākiccasiddhivasena ñāṇavivaṭṭañāṇampi maggakkhaṇe yujjati. Maggañāṇeneva vā ‘‘cakkhu suñña’’ntiādi kiccavasena paṭividdhameva hotīti maggakkhaṇe taṃ ñāṇaṃ vattuṃ yujjatiyeva. Atthayojanā panettha ‘‘yattha maggakkhaṇe saññāvivaṭṭo, tattha cetovivaṭṭo. Yattha maggakkhaṇe cetovivaṭṭo , tattha saññāvivaṭṭo’’ti evamādinā nayena sabbasaṃsandanesu yojanā kātabbā. Atha vā saññāvivaṭṭacetovivaṭṭacittavivaṭṭavimokkhavivaṭṭesu catunnaṃ ariyamaggānaṃ āgatattā saccavivaṭṭo āgatoyeva hoti. Ñāṇavivaṭṭo ca saccavivaṭṭeneva kiccavasena siddho hoti. Saññācetocittavimokkhavivaṭṭesveva ca peyyāle vitthāriyamāne ‘‘anattānupassanādhipatattā paññā abhinivesato saññāya vivaṭṭatīti adhipatattā paññā saññāvivaṭṭe ñāṇa’’nti ca, ‘‘abhiniveso nānattaṃ, anattānupassanā ekattaṃ. Anattānupassanekattaṃ cetayato abhinivesato cittaṃ vivaṭṭatīti nānatte paññā cetovivaṭṭe ñāṇa’’nti ca, ‘‘abhinivesaṃ pajahanto anattānupassanāvasena cittaṃ adhiṭṭhātīti adhiṭṭhāne paññā cittavivaṭṭe ñāṇa’’nti ca, ‘‘anattānupassanāya abhinivesaṃ vosajjatīti vosagge paññā vimokkhavivaṭṭe ñāṇa’’nti ca pāṭhasambhavato ñāṇavivaṭṭe ñāṇampi tesu āgatameva hoti. Ñāṇavivaṭṭe ca anattānupassanāya vuṭṭhāya ariyamaggaṃ paṭiladdhassa kiccavasena ‘‘cakkhu suññaṃ attena vā attaniyena vā’’tiādiyujjanato saccavivaṭṭo labbhati, tasmā ekekasmiṃ vivaṭṭe sesā pañca pañca vivaṭṭā labbhanti. Tasmā evaṃ ‘‘yattha saññāvivaṭṭo, tattha cetovivaṭṭo’’tiādikāni saṃsandanāni vuttānīti veditabbaṃ.
виваддан̃аан̣ачагганид̣̇д̣̇зсаван̣н̣анаа нидтид̇аа.
Vivaṭṭañāṇachakkaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 44-49. чавиваддан̃аан̣анид̣̇д̣̇зсо • 44-49. Chavivaṭṭañāṇaniddeso
