| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. ஸாரிபுத்தஸங்யுத்தங்
7. Sāriputtasaṃyuttaṃ
1. விவேகஜஸுத்தங்
1. Vivekajasuttaṃ
332. ஏகங் ஸமயங் ஆயஸ்மா ஸாரிபுத்தோ ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா ஸாரிபுத்தோ புப்³ப³ண்ஹஸமயங் நிவாஸெத்வா பத்தசீவரமாதா³ய ஸாவத்தி²ங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ யேன அந்த⁴வனங் தேனுபஸங்கமி தி³வாவிஹாராய. அந்த⁴வனங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே தி³வாவிஹாரங் நிஸீதி³.
332. Ekaṃ samayaṃ āyasmā sāriputto sāvatthiyaṃ viharati jetavane anāthapiṇḍikassa ārāme. Atha kho āyasmā sāriputto pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātapaṭikkanto yena andhavanaṃ tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi.
அத² கோ² ஆயஸ்மா ஸாரிபுத்தோ ஸாயன்ஹஸமயங் படிஸல்லானா வுட்டி²தோ யேன ஜேதவனங் அனாத²பிண்டி³கஸ்ஸ ஆராமோ தேனுபஸங்கமி. அத்³த³ஸா கோ² ஆயஸ்மா ஆனந்தோ³ ஆயஸ்மந்தங் ஸாரிபுத்தங் தூ³ரதோவ ஆக³ச்ச²ந்தங். தி³ஸ்வான ஆயஸ்மந்தங் ஸாரிபுத்தங் ஏதத³வோச – ‘‘விப்பஸன்னானி கோ² தே, ஆவுஸோ ஸாரிபுத்த, இந்த்³ரியானி; பரிஸுத்³தோ⁴ முக²வண்ணோ பரியோதா³தோ. கதமேனாயஸ்மா ஸாரிபுத்தோ அஜ்ஜ விஹாரேன விஹாஸீ’’தி?
Atha kho āyasmā sāriputto sāyanhasamayaṃ paṭisallānā vuṭṭhito yena jetavanaṃ anāthapiṇḍikassa ārāmo tenupasaṅkami. Addasā kho āyasmā ānando āyasmantaṃ sāriputtaṃ dūratova āgacchantaṃ. Disvāna āyasmantaṃ sāriputtaṃ etadavoca – ‘‘vippasannāni kho te, āvuso sāriputta, indriyāni; parisuddho mukhavaṇṇo pariyodāto. Katamenāyasmā sāriputto ajja vihārena vihāsī’’ti?
‘‘இதா⁴ஹங், ஆவுஸோ, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹராமி. தஸ்ஸ மய்ஹங், ஆவுஸோ, ந ஏவங் ஹோதி – ‘அஹங் பட²மங் ஜா²னங் ஸமாபஜ்ஜாமீ’தி வா ‘அஹங் பட²மங் ஜா²னங் ஸமாபன்னோ’தி வா ‘அஹங் பட²மா ஜா²னா வுட்டி²தோ’தி வா’’தி. ‘‘ததா² ஹி பனாயஸ்மதோ ஸாரிபுத்தஸ்ஸ தீ³க⁴ரத்தங் அஹங்காரமமங்காரமானானுஸயா ஸுஸமூஹதா. தஸ்மா ஆயஸ்மதோ ஸாரிபுத்தஸ்ஸ ந ஏவங் ஹோதி – ‘அஹங் பட²மங் ஜா²னங் ஸமாபஜ்ஜாமீ’தி வா ‘அஹங் பட²மங் ஜா²னங் ஸமாபன்னோ’தி வா ‘அஹங் பட²மா ஜா²னா வுட்டி²தோ’தி வா’’தி. பட²மங்.
‘‘Idhāhaṃ, āvuso, vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi. Tassa mayhaṃ, āvuso, na evaṃ hoti – ‘ahaṃ paṭhamaṃ jhānaṃ samāpajjāmī’ti vā ‘ahaṃ paṭhamaṃ jhānaṃ samāpanno’ti vā ‘ahaṃ paṭhamā jhānā vuṭṭhito’ti vā’’ti. ‘‘Tathā hi panāyasmato sāriputtassa dīgharattaṃ ahaṅkāramamaṅkāramānānusayā susamūhatā. Tasmā āyasmato sāriputtassa na evaṃ hoti – ‘ahaṃ paṭhamaṃ jhānaṃ samāpajjāmī’ti vā ‘ahaṃ paṭhamaṃ jhānaṃ samāpanno’ti vā ‘ahaṃ paṭhamā jhānā vuṭṭhito’ti vā’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-9. விவேகஜஸுத்தாதி³வண்ணனா • 1-9. Vivekajasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-9. விவேகஜஸுத்தாதி³வண்ணனா • 1-9. Vivekajasuttādivaṇṇanā
