| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. සාරිපුත්‌තසංයුත්‌තං
7. Sāriputtasaṃyuttaṃ
1. විවෙකජසුත්‌තං
1. Vivekajasuttaṃ
332. එකං සමයං ආයස්‌මා සාරිපුත්‌තො සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. අථ ඛො ආයස්‌මා සාරිපුත්‌තො පුබ්‌බණ්‌හසමයං නිවාසෙත්‌වා පත්‌තචීවරමාදාය සාවත්‌ථිං පිණ්‌ඩාය පාවිසි. සාවත්‌ථියං පිණ්‌ඩාය චරිත්‌වා පච්‌ඡාභත්‌තං පිණ්‌ඩපාතපටික්‌කන්‌තො යෙන අන්‌ධවනං තෙනුපසඞ්‌කමි දිවාවිහාරාය. අන්‌ධවනං අජ්‌ඣොගාහෙත්‌වා අඤ්‌ඤතරස්‌මිං රුක්‌ඛමූලෙ දිවාවිහාරං නිසීදි.
332. Ekaṃ samayaṃ āyasmā sāriputto sāvatthiyaṃ viharati jetavane anāthapiṇḍikassa ārāme. Atha kho āyasmā sāriputto pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātapaṭikkanto yena andhavanaṃ tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi.
අථ ඛො ආයස්‌මා සාරිපුත්‌තො සායන්‌හසමයං පටිසල්‌ලානා වුට්‌ඨිතො යෙන ජෙතවනං අනාථපිණ්‌ඩිකස්‌ස ආරාමො තෙනුපසඞ්‌කමි. අද්‌දසා ඛො ආයස්‌මා ආනන්‌දො ආයස්‌මන්‌තං සාරිපුත්‌තං දූරතොව ආගච්‌ඡන්‌තං. දිස්‌වාන ආයස්‌මන්‌තං සාරිපුත්‌තං එතදවොච – ‘‘විප්‌පසන්‌නානි ඛො තෙ, ආවුසො සාරිපුත්‌ත, ඉන්‌ද්‍රියානි; පරිසුද්‌ධො මුඛවණ්‌ණො පරියොදාතො. කතමෙනායස්‌මා සාරිපුත්‌තො අජ්‌ජ විහාරෙන විහාසී’’ති?
Atha kho āyasmā sāriputto sāyanhasamayaṃ paṭisallānā vuṭṭhito yena jetavanaṃ anāthapiṇḍikassa ārāmo tenupasaṅkami. Addasā kho āyasmā ānando āyasmantaṃ sāriputtaṃ dūratova āgacchantaṃ. Disvāna āyasmantaṃ sāriputtaṃ etadavoca – ‘‘vippasannāni kho te, āvuso sāriputta, indriyāni; parisuddho mukhavaṇṇo pariyodāto. Katamenāyasmā sāriputto ajja vihārena vihāsī’’ti?
‘‘ඉධාහං, ආවුසො, විවිච්‌චෙව කාමෙහි විවිච්‌ච අකුසලෙහි ධම්‌මෙහි සවිතක්‌කං සවිචාරං විවෙකජං පීතිසුඛං පඨමං ඣානං උපසම්‌පජ්‌ජ විහරාමි. තස්‌ස මය්‌හං, ආවුසො, න එවං හොති – ‘අහං පඨමං ඣානං සමාපජ්‌ජාමී’ති වා ‘අහං පඨමං ඣානං සමාපන්‌නො’ති වා ‘අහං පඨමා ඣානා වුට්‌ඨිතො’ති වා’’ති. ‘‘තථා හි පනායස්‌මතො සාරිපුත්‌තස්‌ස දීඝරත්‌තං අහඞ්‌කාරමමඞ්‌කාරමානානුසයා සුසමූහතා. තස්‌මා ආයස්‌මතො සාරිපුත්‌තස්‌ස න එවං හොති – ‘අහං පඨමං ඣානං සමාපජ්‌ජාමී’ති වා ‘අහං පඨමං ඣානං සමාපන්‌නො’ති වා ‘අහං පඨමා ඣානා වුට්‌ඨිතො’ති වා’’ති. පඨමං.
‘‘Idhāhaṃ, āvuso, vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi. Tassa mayhaṃ, āvuso, na evaṃ hoti – ‘ahaṃ paṭhamaṃ jhānaṃ samāpajjāmī’ti vā ‘ahaṃ paṭhamaṃ jhānaṃ samāpanno’ti vā ‘ahaṃ paṭhamā jhānā vuṭṭhito’ti vā’’ti. ‘‘Tathā hi panāyasmato sāriputtassa dīgharattaṃ ahaṅkāramamaṅkāramānānusayā susamūhatā. Tasmā āyasmato sāriputtassa na evaṃ hoti – ‘ahaṃ paṭhamaṃ jhānaṃ samāpajjāmī’ti vā ‘ahaṃ paṭhamaṃ jhānaṃ samāpanno’ti vā ‘ahaṃ paṭhamā jhānā vuṭṭhito’ti vā’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-9. විවෙකජසුත්‌තාදිවණ්‌ණනා • 1-9. Vivekajasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-9. විවෙකජසුත්‌තාදිවණ්‌ණනා • 1-9. Vivekajasuttādivaṇṇanā
