| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༧. སཱརིཔུཏྟསཾཡུཏྟཾ
7. Sāriputtasaṃyuttaṃ
༡. ཝིཝེཀཛསུཏྟཾ
1. Vivekajasuttaṃ
༣༣༢. ཨེཀཾ སམཡཾ ཨཱཡསྨཱ སཱརིཔུཏྟོ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ ཨཱཡསྨཱ སཱརིཔུཏྟོ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ སཱཝཏྠིཾ པིཎྜཱཡ པཱཝིསི། སཱཝཏྠིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ ཡེན ཨནྡྷཝནཾ ཏེནུཔསངྐམི དིཝཱཝིཧཱརཱཡ། ཨནྡྷཝནཾ ཨཛ྄ཛྷོགཱཧེཏྭཱ ཨཉྙཏརསྨིཾ རུཀྑམཱུལེ དིཝཱཝིཧཱརཾ ནིསཱིདི།
332. Ekaṃ samayaṃ āyasmā sāriputto sāvatthiyaṃ viharati jetavane anāthapiṇḍikassa ārāme. Atha kho āyasmā sāriputto pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātapaṭikkanto yena andhavanaṃ tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi.
ཨཐ ཁོ ཨཱཡསྨཱ སཱརིཔུཏྟོ སཱཡནྷསམཡཾ པཊིསལླཱནཱ ཝུཊྛིཏོ ཡེན ཛེཏཝནཾ ཨནཱཐཔིཎྜིཀསྶ ཨཱརཱམོ ཏེནུཔསངྐམི། ཨདྡསཱ ཁོ ཨཱཡསྨཱ ཨཱནནྡོ ཨཱཡསྨནྟཾ སཱརིཔུཏྟཾ དཱུརཏོཝ ཨཱགཙྪནྟཾ། དིསྭཱན ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘ཝིཔྤསནྣཱནི ཁོ ཏེ, ཨཱཝུསོ སཱརིཔུཏྟ, ཨིནྡྲིཡཱནི; པརིསུདྡྷོ མུཁཝཎྞོ པརིཡོདཱཏོ། ཀཏམེནཱཡསྨཱ སཱརིཔུཏྟོ ཨཛྫ ཝིཧཱརེན ཝིཧཱསཱི’’ཏི?
Atha kho āyasmā sāriputto sāyanhasamayaṃ paṭisallānā vuṭṭhito yena jetavanaṃ anāthapiṇḍikassa ārāmo tenupasaṅkami. Addasā kho āyasmā ānando āyasmantaṃ sāriputtaṃ dūratova āgacchantaṃ. Disvāna āyasmantaṃ sāriputtaṃ etadavoca – ‘‘vippasannāni kho te, āvuso sāriputta, indriyāni; parisuddho mukhavaṇṇo pariyodāto. Katamenāyasmā sāriputto ajja vihārena vihāsī’’ti?
‘‘ཨིདྷཱཧཾ, ཨཱཝུསོ, ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཱམི། ཏསྶ མཡ྄ཧཾ, ཨཱཝུསོ, ན ཨེཝཾ ཧོཏི – ‘ཨཧཾ པཋམཾ ཛྷཱནཾ སམཱཔཛྫཱམཱི’ཏི ཝཱ ‘ཨཧཾ པཋམཾ ཛྷཱནཾ སམཱཔནྣོ’ཏི ཝཱ ‘ཨཧཾ པཋམཱ ཛྷཱནཱ ཝུཊྛིཏོ’ཏི ཝཱ’’ཏི། ‘‘ཏཐཱ ཧི པནཱཡསྨཏོ སཱརིཔུཏྟསྶ དཱིགྷརཏྟཾ ཨཧངྐཱརམམངྐཱརམཱནཱནུསཡཱ སུསམཱུཧཏཱ། ཏསྨཱ ཨཱཡསྨཏོ སཱརིཔུཏྟསྶ ན ཨེཝཾ ཧོཏི – ‘ཨཧཾ པཋམཾ ཛྷཱནཾ སམཱཔཛྫཱམཱི’ཏི ཝཱ ‘ཨཧཾ པཋམཾ ཛྷཱནཾ སམཱཔནྣོ’ཏི ཝཱ ‘ཨཧཾ པཋམཱ ཛྷཱནཱ ཝུཊྛིཏོ’ཏི ཝཱ’’ཏི། པཋམཾ།
‘‘Idhāhaṃ, āvuso, vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi. Tassa mayhaṃ, āvuso, na evaṃ hoti – ‘ahaṃ paṭhamaṃ jhānaṃ samāpajjāmī’ti vā ‘ahaṃ paṭhamaṃ jhānaṃ samāpanno’ti vā ‘ahaṃ paṭhamā jhānā vuṭṭhito’ti vā’’ti. ‘‘Tathā hi panāyasmato sāriputtassa dīgharattaṃ ahaṅkāramamaṅkāramānānusayā susamūhatā. Tasmā āyasmato sāriputtassa na evaṃ hoti – ‘ahaṃ paṭhamaṃ jhānaṃ samāpajjāmī’ti vā ‘ahaṃ paṭhamaṃ jhānaṃ samāpanno’ti vā ‘ahaṃ paṭhamā jhānā vuṭṭhito’ti vā’’ti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡-༩. ཝིཝེཀཛསུཏྟཱདིཝཎྞནཱ • 1-9. Vivekajasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡-༩. ཝིཝེཀཛསུཏྟཱདིཝཎྞནཱ • 1-9. Vivekajasuttādivaṇṇanā
