| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
९. वनसंयुत्तं
9. Vanasaṃyuttaṃ
१. विवेकसुत्तं
1. Vivekasuttaṃ
२२१. एवं मे सुतं – एकं समयं अञ्ञतरो भिक्खु कोसलेसु विहरति अञ्ञतरस्मिं वनसण्डे। तेन खो पन समयेन सो भिक्खु दिवाविहारगतो पापके अकुसले वितक्के वितक्केति गेहनिस्सिते। अथ खो या तस्मिं वनसण्डे अधिवत्था देवता तस्स भिक्खुनो अनुकम्पिका अत्थकामा तं भिक्खुं संवेजेतुकामा येन सो भिक्खु तेनुपसङ्कमि; उपसङ्कमित्वा तं भिक्खुं गाथाहि अज्झभासि –
221. Evaṃ me sutaṃ – ekaṃ samayaṃ aññataro bhikkhu kosalesu viharati aññatarasmiṃ vanasaṇḍe. Tena kho pana samayena so bhikkhu divāvihāragato pāpake akusale vitakke vitakketi gehanissite. Atha kho yā tasmiṃ vanasaṇḍe adhivatthā devatā tassa bhikkhuno anukampikā atthakāmā taṃ bhikkhuṃ saṃvejetukāmā yena so bhikkhu tenupasaṅkami; upasaṅkamitvā taṃ bhikkhuṃ gāthāhi ajjhabhāsi –
‘‘विवेककामोसि वनं पविट्ठो,
‘‘Vivekakāmosi vanaṃ paviṭṭho,
अथ ते मनो निच्छरती बहिद्धा।
Atha te mano niccharatī bahiddhā;
जनो जनस्मिं विनयस्सु छन्दं,
Jano janasmiṃ vinayassu chandaṃ,
ततो सुखी होहिसि वीतरागो॥
Tato sukhī hohisi vītarāgo.
‘‘अरतिं पजहासि सतो, भवासि सतं तं सारयामसे।
‘‘Aratiṃ pajahāsi sato, bhavāsi sataṃ taṃ sārayāmase;
पातालरजो हि दुत्तरो, मा तं कामरजो अवाहरि॥
Pātālarajo hi duttaro, mā taṃ kāmarajo avāhari.
‘‘सकुणो यथा पंसुकुन्थितो 1, विधुनं पातयति सितं रजं।
‘‘Sakuṇo yathā paṃsukunthito 2, vidhunaṃ pātayati sitaṃ rajaṃ;
एवं भिक्खु पधानवा सतिमा, विधुनं पातयति सितं रज’’न्त्न्त्ति॥
Evaṃ bhikkhu padhānavā satimā, vidhunaṃ pātayati sitaṃ raja’’ntntti.
अथ खो सो भिक्खु ताय देवताय संवेजितो संवेगमापादीति।
Atha kho so bhikkhu tāya devatāya saṃvejito saṃvegamāpādīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १. विवेकसुत्तवण्णना • 1. Vivekasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १. विवेकसुत्तवण्णना • 1. Vivekasuttavaṇṇanā
