| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๙. วนสํยุตฺตํ
9. Vanasaṃyuttaṃ
๑. วิเวกสุตฺตํ
1. Vivekasuttaṃ
๒๒๑. เอวํ เม สุตํ – เอกํ สมยํ อญฺญตโร ภิกฺขุ โกสเลสุ วิหรติ อญฺญตรสฺมิํ วนสเณฺฑฯ เตน โข ปน สมเยน โส ภิกฺขุ ทิวาวิหารคโต ปาปเก อกุสเล วิตเกฺก วิตเกฺกติ เคหนิสฺสิเตฯ อถ โข ยา ตสฺมิํ วนสเณฺฑ อธิวตฺถา เทวตา ตสฺส ภิกฺขุโน อนุกมฺปิกา อตฺถกามา ตํ ภิกฺขุํ สํเวเชตุกามา เยน โส ภิกฺขุ เตนุปสงฺกมิ; อุปสงฺกมิตฺวา ตํ ภิกฺขุํ คาถาหิ อชฺฌภาสิ –
221. Evaṃ me sutaṃ – ekaṃ samayaṃ aññataro bhikkhu kosalesu viharati aññatarasmiṃ vanasaṇḍe. Tena kho pana samayena so bhikkhu divāvihāragato pāpake akusale vitakke vitakketi gehanissite. Atha kho yā tasmiṃ vanasaṇḍe adhivatthā devatā tassa bhikkhuno anukampikā atthakāmā taṃ bhikkhuṃ saṃvejetukāmā yena so bhikkhu tenupasaṅkami; upasaṅkamitvā taṃ bhikkhuṃ gāthāhi ajjhabhāsi –
‘‘วิเวกกาโมสิ วนํ ปวิโฎฺฐ,
‘‘Vivekakāmosi vanaṃ paviṭṭho,
อถ เต มโน นิจฺฉรตี พหิทฺธา;
Atha te mano niccharatī bahiddhā;
ชโน ชนสฺมิํ วินยสฺสุ ฉนฺทํ,
Jano janasmiṃ vinayassu chandaṃ,
ตโต สุขี โหหิสิ วีตราโคฯ
Tato sukhī hohisi vītarāgo.
‘‘อรติํ ปชหาสิ สโต, ภวาสิ สตํ ตํ สารยามเส;
‘‘Aratiṃ pajahāsi sato, bhavāsi sataṃ taṃ sārayāmase;
ปาตาลรโช หิ ทุตฺตโร, มา ตํ กามรโช อวาหริฯ
Pātālarajo hi duttaro, mā taṃ kāmarajo avāhari.
‘‘สกุโณ ยถา ปํสุกุนฺถิโต 1, วิธุนํ ปาตยติ สิตํ รชํ;
‘‘Sakuṇo yathā paṃsukunthito 2, vidhunaṃ pātayati sitaṃ rajaṃ;
เอวํ ภิกฺขุ ปธานวา สติมา, วิธุนํ ปาตยติ สิตํ รช’’นฺตฺนฺตฺติฯ
Evaṃ bhikkhu padhānavā satimā, vidhunaṃ pātayati sitaṃ raja’’ntntti.
อถ โข โส ภิกฺขุ ตาย เทวตาย สํเวชิโต สํเวคมาปาทีติฯ
Atha kho so bhikkhu tāya devatāya saṃvejito saṃvegamāpādīti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑. วิเวกสุตฺตวณฺณนา • 1. Vivekasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑. วิเวกสุตฺตวณฺณนา • 1. Vivekasuttavaṇṇanā
