| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. ৰনসংযুত্তং
9. Vanasaṃyuttaṃ
১. ৰিৰেকসুত্তৰণ্ণনা
1. Vivekasuttavaṇṇanā
২২১. সংৰেজেতুকামাতি অত্থতো সংৰেগং উপ্পাদেতুকামা। তথাভূতা নং কিলেসসঙ্গণিকাদিতো ৰিৰেচেতুকামা নাম হোতীতি ৰুত্তং ‘‘ৰিৰেকং পটিপজ্জাপেতুকামা’’তি। বাহিরেসূতি গোচরজ্ঝত্ততো বহিভূতেসু। পুথুত্তারম্মণেসূতি রূপাদিনানারম্মণেসু। চরতীতি পৰত্ততি। ত্ৰং জনোতি ত্ৰং অত্তনো কিলেসেহি জননতো ৰিসুং জাতো তাদিসে এৰ অঞ্ঞস্মিং জনে ইমং অযোনিসোমনসিকারৰসেন পৰত্তমানং ছন্দরাগং ৰিনযস্সু ৰিনোদেহি। সতং তং সারযামসেতি নিয্যানিকসাসনে পব্বজিত্ৰা সত্থু সন্তিকে কম্মট্ঠানং গহেত্ৰা অরঞ্ঞৰাসেন চ সতিমন্তং পণ্ডিতং তং মযম্পি যথাউপ্পন্নং ৰিতক্কং ৰিনোদনায সারযাম, সতং ৰা সপ্পুরিসানং কিলেসৰিগমনধম্মং পটিপজ্জিত্ৰা ৰসন্তং তং সারযাম ৰট্টদুক্খং। পাতালন্তি মোহপাতালং কিলেসরজো, তদেৰ ‘‘পাতাল’’ন্তি ৰুত্তং। মা অৰহরীতি হেট্ঠা দুগ্গতিসোতং মা উপনেসি। সিতন্তি সম্বন্ধং। তেনাহ ‘‘সরীরলগ্গ’’ন্তি। ৰিৰেকমাপন্নোতি কিলেসৰিৰেকং সমথৰিপস্সনাভাৰনমাপন্নো। উত্তমৰীরিযন্তি উস্সোল়্হিলক্খণপ্পত্তং ৰীরিযং, চতুব্বিধং সমপ্পধানৰীরিযং ৰা সম্পত্তং। পগ্গয্হাতি আরোপেত্ৰা। পরমৰিৰেকন্তি পরমং সমুচ্ছেদৰিৰেকং।
221.Saṃvejetukāmāti atthato saṃvegaṃ uppādetukāmā. Tathābhūtā naṃ kilesasaṅgaṇikādito vivecetukāmā nāma hotīti vuttaṃ ‘‘vivekaṃ paṭipajjāpetukāmā’’ti. Bāhiresūti gocarajjhattato bahibhūtesu. Puthuttārammaṇesūti rūpādinānārammaṇesu. Caratīti pavattati. Tvaṃ janoti tvaṃ attano kilesehi jananato visuṃ jāto tādise eva aññasmiṃ jane imaṃ ayonisomanasikāravasena pavattamānaṃ chandarāgaṃ vinayassu vinodehi. Sataṃ taṃ sārayāmaseti niyyānikasāsane pabbajitvā satthu santike kammaṭṭhānaṃ gahetvā araññavāsena ca satimantaṃ paṇḍitaṃ taṃ mayampi yathāuppannaṃ vitakkaṃ vinodanāya sārayāma, sataṃ vā sappurisānaṃ kilesavigamanadhammaṃ paṭipajjitvā vasantaṃ taṃ sārayāma vaṭṭadukkhaṃ. Pātālanti mohapātālaṃ kilesarajo, tadeva ‘‘pātāla’’nti vuttaṃ. Mā avaharīti heṭṭhā duggatisotaṃ mā upanesi. Sitanti sambandhaṃ. Tenāha ‘‘sarīralagga’’nti. Vivekamāpannoti kilesavivekaṃ samathavipassanābhāvanamāpanno. Uttamavīriyanti ussoḷhilakkhaṇappattaṃ vīriyaṃ, catubbidhaṃ samappadhānavīriyaṃ vā sampattaṃ. Paggayhāti āropetvā. Paramavivekanti paramaṃ samucchedavivekaṃ.
ৰিৰেকসুত্তৰণ্ণনা নিট্ঠিতা।
Vivekasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. ৰিৰেকসুত্তং • 1. Vivekasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. ৰিৰেকসুত্তৰণ্ণনা • 1. Vivekasuttavaṇṇanā
