| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
९. वनसंयुत्तं
9. Vanasaṃyuttaṃ
१. विवेकसुत्तवण्णना
1. Vivekasuttavaṇṇanā
२२१. वनसंयुत्तस्स पठमे कोसलेसु विहरतीति सत्थु सन्तिके कम्मट्ठानं गहेत्वा तस्स जनपदस्स सुलभभिक्खताय तत्थ गन्त्वा विहरति। संवेजेतुकामाति विवेकं पटिपज्जापेतुकामा। विवेककामोति तयो विवेके पत्थयन्तो। निच्छरती बहिद्धाति बाहिरेसु पुथुत्तारम्मणेसु चरति। जनो जनस्मिन्ति त्वं जनो अञ्ञस्मिं जने छन्दरागं विनयस्सु। पजहासीति पजह। भवासीति भव। सतं तं सारयामसेति सतिमन्तं पण्डितं तं मयम्पि सारयाम, सतं वा धम्मं मयं तं सारयामाति अत्थो। पातालरजोति अप्पतिट्ठट्ठेन पातालसङ्खातो किलेसरजो। मा तं कामरजोति अयं कामरागरजो तं मा अवहरि, अपायमेव मा नेतूति अत्थो। पंसुकुन्थितोति पंसुमक्खितो। विधुनन्ति विधुनन्तो। सितं रजन्ति सरीरलग्गं रजं। संवेगमापादीति देवतापि नाम मं एवं सारेतीति विवेकमापन्नो, उत्तमवीरियं वा पग्गय्ह परमविवेकं मग्गमेव पटिपन्नोति। पठमं।
221. Vanasaṃyuttassa paṭhame kosalesu viharatīti satthu santike kammaṭṭhānaṃ gahetvā tassa janapadassa sulabhabhikkhatāya tattha gantvā viharati. Saṃvejetukāmāti vivekaṃ paṭipajjāpetukāmā. Vivekakāmoti tayo viveke patthayanto. Niccharatī bahiddhāti bāhiresu puthuttārammaṇesu carati. Jano janasminti tvaṃ jano aññasmiṃ jane chandarāgaṃ vinayassu. Pajahāsīti pajaha. Bhavāsīti bhava. Sataṃ taṃ sārayāmaseti satimantaṃ paṇḍitaṃ taṃ mayampi sārayāma, sataṃ vā dhammaṃ mayaṃ taṃ sārayāmāti attho. Pātālarajoti appatiṭṭhaṭṭhena pātālasaṅkhāto kilesarajo. Mā taṃ kāmarajoti ayaṃ kāmarāgarajo taṃ mā avahari, apāyameva mā netūti attho. Paṃsukunthitoti paṃsumakkhito. Vidhunanti vidhunanto. Sitaṃ rajanti sarīralaggaṃ rajaṃ. Saṃvegamāpādīti devatāpi nāma maṃ evaṃ sāretīti vivekamāpanno, uttamavīriyaṃ vā paggayha paramavivekaṃ maggameva paṭipannoti. Paṭhamaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. विवेकसुत्तं • 1. Vivekasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १. विवेकसुत्तवण्णना • 1. Vivekasuttavaṇṇanā
