| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၉. ဝနသံယုတ္တံ
9. Vanasaṃyuttaṃ
၁. ဝိဝေကသုတ္တဝဏ္ဏနာ
1. Vivekasuttavaṇṇanā
၂၂၁. သံဝေဇေတုကာမာတိ အတ္ထတော သံဝေဂံ ဥပ္ပာဒေတုကာမာ။ တထာဘူတာ နံ ကိလေသသင္ဂဏိကာဒိတော ဝိဝေစေတုကာမာ နာမ ဟောတီတိ ဝုတ္တံ ‘‘ဝိဝေကံ ပဋိပဇ္ဇာပေတုကာမာ’’တိ။ ဗာဟိရေသူတိ ဂောစရဇ္ဈတ္တတော ဗဟိဘူတေသု။ ပုထုတ္တာရမ္မဏေသူတိ ရူပာဒိနာနာရမ္မဏေသု။ စရတီတိ ပဝတ္တတိ။ တ္ဝံ ဇနောတိ တ္ဝံ အတ္တနော ကိလေသေဟိ ဇနနတော ဝိသုံ ဇာတော တာဒိသေ ဧဝ အညသ္မိံ ဇနေ ဣမံ အယောနိသောမနသိကာရဝသေန ပဝတ္တမာနံ ဆန္ဒရာဂံ ဝိနယသ္သု ဝိနောဒေဟိ။ သတံ တံ သာရယာမသေတိ နိယ္ယာနိကသာသနေ ပဗ္ဗဇိတ္ဝာ သတ္ထု သန္တိကေ ကမ္မဋ္ဌာနံ ဂဟေတ္ဝာ အရညဝာသေန စ သတိမန္တံ ပဏ္ဍိတံ တံ မယမ္ပိ ယထာဥပ္ပန္နံ ဝိတက္ကံ ဝိနောဒနာယ သာရယာမ, သတံ ဝာ သပ္ပုရိသာနံ ကိလေသဝိဂမနဓမ္မံ ပဋိပဇ္ဇိတ္ဝာ ဝသန္တံ တံ သာရယာမ ဝဋ္ဋဒုက္ခံ။ ပာတာလန္တိ မောဟပာတာလံ ကိလေသရဇော, တဒေဝ ‘‘ပာတာလ’’န္တိ ဝုတ္တံ။ မာ အဝဟရီတိ ဟေဋ္ဌာ ဒုဂ္ဂတိသောတံ မာ ဥပနေသိ။ သိတန္တိ သမ္ဗန္ဓံ။ တေနာဟ ‘‘သရီရလဂ္ဂ’’န္တိ။ ဝိဝေကမာပန္နောတိ ကိလေသဝိဝေကံ သမထဝိပသ္သနာဘာဝနမာပန္နော။ ဥတ္တမဝီရိယန္တိ ဥသ္သောဠ္ဟိလက္ခဏပ္ပတ္တံ ဝီရိယံ, စတုဗ္ဗိဓံ သမပ္ပဓာနဝီရိယံ ဝာ သမ္ပတ္တံ။ ပဂ္ဂယ္ဟာတိ အာရောပေတ္ဝာ။ ပရမဝိဝေကန္တိ ပရမံ သမုစ္ဆေဒဝိဝေကံ။
221.Saṃvejetukāmāti atthato saṃvegaṃ uppādetukāmā. Tathābhūtā naṃ kilesasaṅgaṇikādito vivecetukāmā nāma hotīti vuttaṃ ‘‘vivekaṃ paṭipajjāpetukāmā’’ti. Bāhiresūti gocarajjhattato bahibhūtesu. Puthuttārammaṇesūti rūpādinānārammaṇesu. Caratīti pavattati. Tvaṃ janoti tvaṃ attano kilesehi jananato visuṃ jāto tādise eva aññasmiṃ jane imaṃ ayonisomanasikāravasena pavattamānaṃ chandarāgaṃ vinayassu vinodehi. Sataṃ taṃ sārayāmaseti niyyānikasāsane pabbajitvā satthu santike kammaṭṭhānaṃ gahetvā araññavāsena ca satimantaṃ paṇḍitaṃ taṃ mayampi yathāuppannaṃ vitakkaṃ vinodanāya sārayāma, sataṃ vā sappurisānaṃ kilesavigamanadhammaṃ paṭipajjitvā vasantaṃ taṃ sārayāma vaṭṭadukkhaṃ. Pātālanti mohapātālaṃ kilesarajo, tadeva ‘‘pātāla’’nti vuttaṃ. Mā avaharīti heṭṭhā duggatisotaṃ mā upanesi. Sitanti sambandhaṃ. Tenāha ‘‘sarīralagga’’nti. Vivekamāpannoti kilesavivekaṃ samathavipassanābhāvanamāpanno. Uttamavīriyanti ussoḷhilakkhaṇappattaṃ vīriyaṃ, catubbidhaṃ samappadhānavīriyaṃ vā sampattaṃ. Paggayhāti āropetvā. Paramavivekanti paramaṃ samucchedavivekaṃ.
ဝိဝေကသုတ္တဝဏ္ဏနာ နိဋ္ဌိတာ။
Vivekasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ဝိဝေကသုတ္တံ • 1. Vivekasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ဝိဝေကသုတ္တဝဏ္ဏနာ • 1. Vivekasuttavaṇṇanā
