| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೯. ವನಸಂಯುತ್ತಂ
9. Vanasaṃyuttaṃ
೧. ವಿವೇಕಸುತ್ತವಣ್ಣನಾ
1. Vivekasuttavaṇṇanā
೨೨೧. ಸಂವೇಜೇತುಕಾಮಾತಿ ಅತ್ಥತೋ ಸಂವೇಗಂ ಉಪ್ಪಾದೇತುಕಾಮಾ। ತಥಾಭೂತಾ ನಂ ಕಿಲೇಸಸಙ್ಗಣಿಕಾದಿತೋ ವಿವೇಚೇತುಕಾಮಾ ನಾಮ ಹೋತೀತಿ ವುತ್ತಂ ‘‘ವಿವೇಕಂ ಪಟಿಪಜ್ಜಾಪೇತುಕಾಮಾ’’ತಿ। ಬಾಹಿರೇಸೂತಿ ಗೋಚರಜ್ಝತ್ತತೋ ಬಹಿಭೂತೇಸು। ಪುಥುತ್ತಾರಮ್ಮಣೇಸೂತಿ ರೂಪಾದಿನಾನಾರಮ್ಮಣೇಸು। ಚರತೀತಿ ಪವತ್ತತಿ। ತ್ವಂ ಜನೋತಿ ತ್ವಂ ಅತ್ತನೋ ಕಿಲೇಸೇಹಿ ಜನನತೋ ವಿಸುಂ ಜಾತೋ ತಾದಿಸೇ ಏವ ಅಞ್ಞಸ್ಮಿಂ ಜನೇ ಇಮಂ ಅಯೋನಿಸೋಮನಸಿಕಾರವಸೇನ ಪವತ್ತಮಾನಂ ಛನ್ದರಾಗಂ ವಿನಯಸ್ಸು ವಿನೋದೇಹಿ। ಸತಂ ತಂ ಸಾರಯಾಮಸೇತಿ ನಿಯ್ಯಾನಿಕಸಾಸನೇ ಪಬ್ಬಜಿತ್ವಾ ಸತ್ಥು ಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ಅರಞ್ಞವಾಸೇನ ಚ ಸತಿಮನ್ತಂ ಪಣ್ಡಿತಂ ತಂ ಮಯಮ್ಪಿ ಯಥಾಉಪ್ಪನ್ನಂ ವಿತಕ್ಕಂ ವಿನೋದನಾಯ ಸಾರಯಾಮ, ಸತಂ ವಾ ಸಪ್ಪುರಿಸಾನಂ ಕಿಲೇಸವಿಗಮನಧಮ್ಮಂ ಪಟಿಪಜ್ಜಿತ್ವಾ ವಸನ್ತಂ ತಂ ಸಾರಯಾಮ ವಟ್ಟದುಕ್ಖಂ। ಪಾತಾಲನ್ತಿ ಮೋಹಪಾತಾಲಂ ಕಿಲೇಸರಜೋ, ತದೇವ ‘‘ಪಾತಾಲ’’ನ್ತಿ ವುತ್ತಂ। ಮಾ ಅವಹರೀತಿ ಹೇಟ್ಠಾ ದುಗ್ಗತಿಸೋತಂ ಮಾ ಉಪನೇಸಿ। ಸಿತನ್ತಿ ಸಮ್ಬನ್ಧಂ। ತೇನಾಹ ‘‘ಸರೀರಲಗ್ಗ’’ನ್ತಿ। ವಿವೇಕಮಾಪನ್ನೋತಿ ಕಿಲೇಸವಿವೇಕಂ ಸಮಥವಿಪಸ್ಸನಾಭಾವನಮಾಪನ್ನೋ। ಉತ್ತಮವೀರಿಯನ್ತಿ ಉಸ್ಸೋಳ್ಹಿಲಕ್ಖಣಪ್ಪತ್ತಂ ವೀರಿಯಂ, ಚತುಬ್ಬಿಧಂ ಸಮಪ್ಪಧಾನವೀರಿಯಂ ವಾ ಸಮ್ಪತ್ತಂ। ಪಗ್ಗಯ್ಹಾತಿ ಆರೋಪೇತ್ವಾ। ಪರಮವಿವೇಕನ್ತಿ ಪರಮಂ ಸಮುಚ್ಛೇದವಿವೇಕಂ।
221.Saṃvejetukāmāti atthato saṃvegaṃ uppādetukāmā. Tathābhūtā naṃ kilesasaṅgaṇikādito vivecetukāmā nāma hotīti vuttaṃ ‘‘vivekaṃ paṭipajjāpetukāmā’’ti. Bāhiresūti gocarajjhattato bahibhūtesu. Puthuttārammaṇesūti rūpādinānārammaṇesu. Caratīti pavattati. Tvaṃ janoti tvaṃ attano kilesehi jananato visuṃ jāto tādise eva aññasmiṃ jane imaṃ ayonisomanasikāravasena pavattamānaṃ chandarāgaṃ vinayassu vinodehi. Sataṃ taṃ sārayāmaseti niyyānikasāsane pabbajitvā satthu santike kammaṭṭhānaṃ gahetvā araññavāsena ca satimantaṃ paṇḍitaṃ taṃ mayampi yathāuppannaṃ vitakkaṃ vinodanāya sārayāma, sataṃ vā sappurisānaṃ kilesavigamanadhammaṃ paṭipajjitvā vasantaṃ taṃ sārayāma vaṭṭadukkhaṃ. Pātālanti mohapātālaṃ kilesarajo, tadeva ‘‘pātāla’’nti vuttaṃ. Mā avaharīti heṭṭhā duggatisotaṃ mā upanesi. Sitanti sambandhaṃ. Tenāha ‘‘sarīralagga’’nti. Vivekamāpannoti kilesavivekaṃ samathavipassanābhāvanamāpanno. Uttamavīriyanti ussoḷhilakkhaṇappattaṃ vīriyaṃ, catubbidhaṃ samappadhānavīriyaṃ vā sampattaṃ. Paggayhāti āropetvā. Paramavivekanti paramaṃ samucchedavivekaṃ.
ವಿವೇಕಸುತ್ತವಣ್ಣನಾ ನಿಟ್ಠಿತಾ।
Vivekasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ವಿವೇಕಸುತ್ತಂ • 1. Vivekasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ವಿವೇಕಸುತ್ತವಣ್ಣನಾ • 1. Vivekasuttavaṇṇanā
