| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২. দুতিযৰগ্গো
2. Dutiyavaggo
(১৯) ১০. ৰোহারকথা
(19) 10. Vohārakathā
৩৪৭. বুদ্ধস্স ভগৰতো ৰোহারো লোকুত্তরোতি? আমন্তা। লোকুত্তরে সোতে পটিহঞ্ঞতি নো লোকিযে, লোকুত্তরেন ৰিঞ্ঞাণেন পটিৰিজানন্তি নো লোকিযেন, সাৰকা পটিৰিজানন্তি নো পুথুজ্জনাতি? ন হেৰং ৰত্তব্বে…পে॰…।
347. Buddhassa bhagavato vohāro lokuttaroti? Āmantā. Lokuttare sote paṭihaññati no lokiye, lokuttarena viññāṇena paṭivijānanti no lokiyena, sāvakā paṭivijānanti no puthujjanāti? Na hevaṃ vattabbe…pe….
ননু বুদ্ধস্স ভগৰতো ৰোহারো লোকিযে সোতে পটিহঞ্ঞতীতি? আমন্তা। হঞ্চি বুদ্ধস্স ভগৰতো ৰোহারো লোকিযে সোতে পটিহঞ্ঞতি, নো চ ৰত রে ৰত্তব্বে – ‘‘বুদ্ধস্স ভগৰতো ৰোহারো লোকুত্তরো’’তি।
Nanu buddhassa bhagavato vohāro lokiye sote paṭihaññatīti? Āmantā. Hañci buddhassa bhagavato vohāro lokiye sote paṭihaññati, no ca vata re vattabbe – ‘‘buddhassa bhagavato vohāro lokuttaro’’ti.
ননু বুদ্ধস্স ভগৰতো ৰোহারং লোকিযেন ৰিঞ্ঞাণেন পটিৰিজানন্তীতি? আমন্তা। হঞ্চি বুদ্ধস্স ভগৰতো ৰোহারং লোকিযেন ৰিঞ্ঞাণেন পটিৰিজানন্তি, নো চ ৰত রে ৰত্তব্বে – ‘‘বুদ্ধস্স ভগৰতো ৰোহারো লোকুত্তরো’’তি।
Nanu buddhassa bhagavato vohāraṃ lokiyena viññāṇena paṭivijānantīti? Āmantā. Hañci buddhassa bhagavato vohāraṃ lokiyena viññāṇena paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
ননু বুদ্ধস্স ভগৰতো ৰোহারং পুথুজ্জনা পটিৰিজানন্তীতি? আমন্তা। হঞ্চি বুদ্ধস্স ভগৰতো ৰোহারং পুথুজ্জনা পটিৰিজানন্তি, নো চ ৰত রে ৰত্তব্বে – ‘‘বুদ্ধস্স ভগৰতো ৰোহারো লোকুত্তরো’’তি।
Nanu buddhassa bhagavato vohāraṃ puthujjanā paṭivijānantīti? Āmantā. Hañci buddhassa bhagavato vohāraṃ puthujjanā paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
৩৪৮. বুদ্ধস্স ভগৰতো ৰোহারো লোকুত্তরোতি? আমন্তা। মগ্গো ফলং নিব্বানং, সোতাপত্তিমগ্গো সোতাপত্তিফলং, সকদাগামিমগ্গো সকদাগামিফলং, অনাগামিমগ্গো অনাগামিফলং, অরহত্তমগ্গো অরহত্তফলং, সতিপট্ঠানং সম্মপ্পধানং ইদ্ধিপাদো ইন্দ্রিযং বলং বোজ্ঝঙ্গোতি? ন হেৰং ৰত্তব্বে…পে॰…।
348. Buddhassa bhagavato vohāro lokuttaroti? Āmantā. Maggo phalaṃ nibbānaṃ, sotāpattimaggo sotāpattiphalaṃ, sakadāgāmimaggo sakadāgāmiphalaṃ, anāgāmimaggo anāgāmiphalaṃ, arahattamaggo arahattaphalaṃ, satipaṭṭhānaṃ sammappadhānaṃ iddhipādo indriyaṃ balaṃ bojjhaṅgoti? Na hevaṃ vattabbe…pe….
বুদ্ধস্স ভগৰতো ৰোহারো লোকুত্তরোতি? আমন্তা। অত্থি কেচি বুদ্ধস্স ভগৰতো ৰোহারং সুণন্তীতি? আমন্তা। লোকুত্তরো ধম্মো সোতৰিঞ্ঞেয্যো, সোতস্মিং পটিহঞ্ঞতি, সোতস্স আপাথং আগচ্ছতীতি? ন হেৰং ৰত্তব্বে…পে॰…।
Buddhassa bhagavato vohāro lokuttaroti? Āmantā. Atthi keci buddhassa bhagavato vohāraṃ suṇantīti? Āmantā. Lokuttaro dhammo sotaviññeyyo, sotasmiṃ paṭihaññati, sotassa āpāthaṃ āgacchatīti? Na hevaṃ vattabbe…pe….
ননু লোকুত্তরো ধম্মো ন সোতৰিঞ্ঞেয্যো, ন সোতস্মিং পটিহঞ্ঞতি, ন সোতস্স আপাথং আগচ্ছতীতি? আমন্তা। হঞ্চি লোকুত্তরো ধম্মো ন সোতৰিঞ্ঞেয্যো, ন সোতস্মিং পটিহঞ্ঞতি, ন সোতস্স আপাথং আগচ্ছতি, নো চ ৰত রে ৰত্তব্বে – ‘‘বুদ্ধস্স ভগৰতো ৰোহারো লোকুত্তরো’’তি।
Nanu lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchatīti? Āmantā. Hañci lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchati, no ca vata re vattabbe – ‘‘buddhassa bhagavato vohāro lokuttaro’’ti.
৩৪৯. বুদ্ধস্স ভগৰতো ৰোহারো লোকুত্তরোতি? আমন্তা। অত্থি কেচি বুদ্ধস্স ভগৰতো ৰোহারে রজ্জেয্যুন্তি? আমন্তা। লোকুত্তরো ধম্মো রাগট্ঠানিযো রজনীযো কমনীযো মদনীযো বন্ধনীযো মুচ্ছনীযোতি? ন হেৰং ৰত্তব্বে…পে॰…।
349. Buddhassa bhagavato vohāro lokuttaroti? Āmantā. Atthi keci buddhassa bhagavato vohāre rajjeyyunti? Āmantā. Lokuttaro dhammo rāgaṭṭhāniyo rajanīyo kamanīyo madanīyo bandhanīyo mucchanīyoti? Na hevaṃ vattabbe…pe….
ননু লোকুত্তরো ধম্মো ন রাগট্ঠানিযো ন রজনীযো ন কমনীযো ন মদনীযো ন বন্ধনীযো ন মুচ্ছনীযোতি? আমন্তা। হঞ্চি লোকুত্তরো ধম্মো ন রাগট্ঠানিযো ন রজনীযো ন কমনীযো ন মদনীযো ন বন্ধনীযো ন মুচ্ছনীযো, নো চ ৰত রে ৰত্তব্বে – ‘‘বুদ্ধস্স ভগৰতো ৰোহারো লোকুত্তরো’’তি।
Nanu lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyoti? Āmantā. Hañci lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyo, no ca vata re vattabbe – ‘‘buddhassa bhagavato vohāro lokuttaro’’ti.
বুদ্ধস্স ভগৰতো ৰোহারো লোকুত্তরোতি? আমন্তা। অত্থি কেচি বুদ্ধস্স ভগৰতো ৰোহারে দুস্সেয্যুন্তি? আমন্তা। লোকুত্তরো ধম্মো দোসট্ঠানিযো কোপট্ঠানিযো পটিঘট্ঠানিযোতি? ন হেৰং ৰত্তব্বে…পে॰…।
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre dusseyyunti? Āmantā. Lokuttaro dhammo dosaṭṭhāniyo kopaṭṭhāniyo paṭighaṭṭhāniyoti? Na hevaṃ vattabbe…pe….
ননু লোকুত্তরো ধম্মো ন দোসট্ঠানিযো ন কোপট্ঠানিযো ন পটিঘট্ঠানিযোতি? আমন্তা। হঞ্চি লোকুত্তরো ধম্মো ন দোসট্ঠানিযো ন কোপট্ঠানিযো ন পটিঘট্ঠানিযো, নো চ ৰত রে ৰত্তব্বে – ‘‘বুদ্ধস্স ভগৰতো ৰোহারো লোকুত্তরো’’তি।
Nanu lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyoti? Āmantā. Hañci lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyo, no ca vata re vattabbe – ‘‘buddhassa bhagavato vohāro lokuttaro’’ti.
বুদ্ধস্স ভগৰতো ৰোহারো লোকুত্তরোতি? আমন্তা। অত্থি কেচি বুদ্ধস্স ভগৰতো ৰোহারে মুয্হেয্যুন্তি? আমন্তা। লোকুত্তরো ধম্মো মোহট্ঠানিযো অঞ্ঞাণকরণো অচক্খুকরণো পঞ্ঞানিরোধিকো ৰিঘাতপক্খিকো অনিব্বানসংৰত্তনিকোতি? ন হেৰং ৰত্তব্বে…পে॰…।
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre muyheyyunti? Āmantā. Lokuttaro dhammo mohaṭṭhāniyo aññāṇakaraṇo acakkhukaraṇo paññānirodhiko vighātapakkhiko anibbānasaṃvattanikoti? Na hevaṃ vattabbe…pe….
ননু লোকুত্তরো ধম্মো ন মোহট্ঠানিযো ন অঞ্ঞাণকরণো ন অচক্খুকরণো পঞ্ঞাৰুদ্ধিকো অৰিঘাতপক্খিকো নিব্বানসংৰত্তনিকোতি? আমন্তা। হঞ্চি লোকুত্তরো ধম্মো ন মোহট্ঠানিযো ন অঞ্ঞাণকরণো ন অচক্খুকরণো পঞ্ঞাৰুদ্ধিকো অৰিঘাতপক্খিকো নিব্বানসংৰত্তনিকো, নো চ ৰত রে ৰত্তব্বে – ‘‘বুদ্ধস্স ভগৰতো ৰোহারো লোকুত্তরো’’তি।
Nanu lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattanikoti? Āmantā. Hañci lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattaniko, no ca vata re vattabbe – ‘‘buddhassa bhagavato vohāro lokuttaro’’ti.
৩৫০. বুদ্ধস্স ভগৰতো ৰোহারো লোকুত্তরোতি? আমন্তা। যে কেচি বুদ্ধস্স ভগৰতো ৰোহারং সুণন্তি, সব্বে তে মগ্গং ভাৰেন্তীতি? ন হেৰং ৰত্তব্বে…পে॰…।
350. Buddhassa bhagavato vohāro lokuttaroti? Āmantā. Ye keci buddhassa bhagavato vohāraṃ suṇanti, sabbe te maggaṃ bhāventīti? Na hevaṃ vattabbe…pe….
যে কেচি বুদ্ধস্স ভগৰতো ৰোহারং সুণন্তি, সব্বে তে মগ্গং ভাৰেন্তীতি? আমন্তা। বালপুথুজ্জনা বুদ্ধস্স ভগৰতো ৰোহারং সুণন্তি, বালপুথুজ্জনা মগ্গং ভাৰেন্তীতি? ন হেৰং ৰত্তব্বে…পে॰… মাতুঘাতকো মগ্গং ভাৰেতি…পে॰… পিতুঘাতকো… অরহন্তঘাতকো… রুহিরুপ্পাদকো… সঙ্ঘভেদকো বুদ্ধস্স ভগৰতো ৰোহারং সুণাতি, সঙ্ঘভেদকো মগ্গং ভাৰেতীতি? ন হেৰং ৰত্তব্বে…পে॰…।
Ye keci buddhassa bhagavato vohāraṃ suṇanti, sabbe te maggaṃ bhāventīti? Āmantā. Bālaputhujjanā buddhassa bhagavato vohāraṃ suṇanti, bālaputhujjanā maggaṃ bhāventīti? Na hevaṃ vattabbe…pe… mātughātako maggaṃ bhāveti…pe… pitughātako… arahantaghātako… ruhiruppādako… saṅghabhedako buddhassa bhagavato vohāraṃ suṇāti, saṅghabhedako maggaṃ bhāvetīti? Na hevaṃ vattabbe…pe….
৩৫১. লব্ভা সোৰণ্ণমযায লট্ঠিযা ধঞ্ঞপুঞ্জোপি সুৰণ্ণপুঞ্জোপি আচিক্খিতুন্তি? আমন্তা। এৰমেৰং ভগৰা লোকুত্তরেন ৰোহারেন লোকিযম্পি লোকুত্তরম্পি ধম্মং ৰোহরতীতি।
351. Labbhā sovaṇṇamayāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokuttarena vohārena lokiyampi lokuttarampi dhammaṃ voharatīti.
লব্ভা এলণ্ডিযায লট্ঠিযা ধঞ্ঞপুঞ্জোপি সুৰণ্ণপুঞ্জোপি আচিক্খিতুন্তি? আমন্তা। এৰমেৰং ভগৰা লোকিযেন ৰোহারেন লোকিযম্পি লোকুত্তরম্পি ধম্মং ৰোহরতীতি।
Labbhā elaṇḍiyāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokiyena vohārena lokiyampi lokuttarampi dhammaṃ voharatīti.
৩৫২. বুদ্ধস্স ভগৰতো ৰোহারো লোকিযং ৰোহরন্তস্স লোকিযো হোতি, লোকুত্তরং ৰোহরন্তস্স লোকুত্তরো হোতীতি? আমন্তা। লোকিযং ৰোহরন্তস্স লোকিযে সোতে পটিহঞ্ঞতি, লোকুত্তরং ৰোহরন্তস্স লোকুত্তরে সোতে পটিহঞ্ঞতি; লোকিযং ৰোহরন্তস্স লোকিযেন ৰিঞ্ঞাণেন পটিৰিজানন্তি, লোকুত্তরং ৰোহরন্তস্স লোকুত্তরেন ৰিঞ্ঞাণেন পটিৰিজানন্তি; লোকিযং ৰোহরন্তস্স পুথুজ্জনা পটিৰিজানন্তি , লোকুত্তরং ৰোহরন্তস্স সাৰকা পটিৰিজানন্তীতি? ন হেৰং ৰত্তব্বে…পে॰…।
352. Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Lokiyaṃ voharantassa lokiye sote paṭihaññati, lokuttaraṃ voharantassa lokuttare sote paṭihaññati; lokiyaṃ voharantassa lokiyena viññāṇena paṭivijānanti, lokuttaraṃ voharantassa lokuttarena viññāṇena paṭivijānanti; lokiyaṃ voharantassa puthujjanā paṭivijānanti , lokuttaraṃ voharantassa sāvakā paṭivijānantīti? Na hevaṃ vattabbe…pe….
ন ৰত্তব্বং – ‘‘বুদ্ধস্স ভগৰতো ৰোহারো লোকিযং ৰোহরন্তস্স লোকিযো হোতি, লোকুত্তরং ৰোহরন্তস্স লোকুত্তরো হোতীতি? আমন্তা। ননু ভগৰা লোকিযম্পি লোকুত্তরম্পি ধম্মং ৰোহরতীতি? আমন্তা। হঞ্চি ভগৰা লোকিযম্পি লোকুত্তরম্পি ধম্মং ৰোহরতি, তেন ৰত রে ৰত্তব্বে – ‘‘বুদ্ধস্স ভগৰতো ৰোহারো লোকিযং ৰোহরন্তস্স লোকিযো হোতি, লোকুত্তরং ৰোহরন্তস্স লোকুত্তরো হোতী’’তি।
Na vattabbaṃ – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Nanu bhagavā lokiyampi lokuttarampi dhammaṃ voharatīti? Āmantā. Hañci bhagavā lokiyampi lokuttarampi dhammaṃ voharati, tena vata re vattabbe – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotī’’ti.
বুদ্ধস্স ভগৰতো ৰোহারো লোকিযং ৰোহরন্তস্স লোকিযো হোতি, লোকুত্তরং ৰোহরন্তস্স লোকুত্তরো হোতীতি? আমন্তা। মগ্গং ৰোহরন্তস্স মগ্গো হোতি, অমগ্গং ৰোহরন্তস্স অমগ্গো হোতি, ফলং ৰোহরন্তস্স ফলং হোতি, অফলং ৰোহরন্তস্স অফলং হোতি, নিব্বানং ৰোহরন্তস্স নিব্বানং হোতি, অনিব্বানং ৰোহরন্তস্স অনিব্বানং হোতি, সঙ্খতং ৰোহরন্তস্স সঙ্খতং হোতি, অসঙ্খতং ৰোহরন্তস্স অসঙ্খতং হোতি, রূপং ৰোহরন্তস্স রূপং হোতি, অরূপং ৰোহরন্তস্স অরূপং হোতি, ৰেদনং ৰোহরন্তস্স ৰেদনা হোতি, অৰেদনং ৰোহরন্তস্স অৰেদনা হোতি, সঞ্ঞং ৰোহরন্তস্স সঞ্ঞা হোতি, অসঞ্ঞং ৰোহরন্তস্স অসঞ্ঞা হোতি, সঙ্খারে ৰোহরন্তস্স সঙ্খারা হোন্তি, অসঙ্খারে ৰোহরন্তস্স অসঙ্খারা হোন্তি, ৰিঞ্ঞাণং ৰোহরন্তস্স ৰিঞ্ঞাণং হোতি, অৰিঞ্ঞাণং ৰোহরন্তস্স অৰিঞ্ঞাণং হোতীতি ? ন হেৰং ৰত্তব্বে…পে॰…।
Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Maggaṃ voharantassa maggo hoti, amaggaṃ voharantassa amaggo hoti, phalaṃ voharantassa phalaṃ hoti, aphalaṃ voharantassa aphalaṃ hoti, nibbānaṃ voharantassa nibbānaṃ hoti, anibbānaṃ voharantassa anibbānaṃ hoti, saṅkhataṃ voharantassa saṅkhataṃ hoti, asaṅkhataṃ voharantassa asaṅkhataṃ hoti, rūpaṃ voharantassa rūpaṃ hoti, arūpaṃ voharantassa arūpaṃ hoti, vedanaṃ voharantassa vedanā hoti, avedanaṃ voharantassa avedanā hoti, saññaṃ voharantassa saññā hoti, asaññaṃ voharantassa asaññā hoti, saṅkhāre voharantassa saṅkhārā honti, asaṅkhāre voharantassa asaṅkhārā honti, viññāṇaṃ voharantassa viññāṇaṃ hoti, aviññāṇaṃ voharantassa aviññāṇaṃ hotīti ? Na hevaṃ vattabbe…pe….
ৰোহারকথা নিট্ঠিতা।
Vohārakathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১০. ৰোহারকথাৰণ্ণনা • 10. Vohārakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১০. ৰোহারকথাৰণ্ণনা • 10. Vohārakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১০. ৰোহারকথাৰণ্ণনা • 10. Vohārakathāvaṇṇanā
