| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೨. ದುತಿಯವಗ್ಗೋ
2. Dutiyavaggo
(೧೯) ೧೦. ವೋಹಾರಕಥಾ
(19) 10. Vohārakathā
೩೪೭. ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋತಿ? ಆಮನ್ತಾ। ಲೋಕುತ್ತರೇ ಸೋತೇ ಪಟಿಹಞ್ಞತಿ ನೋ ಲೋಕಿಯೇ, ಲೋಕುತ್ತರೇನ ವಿಞ್ಞಾಣೇನ ಪಟಿವಿಜಾನನ್ತಿ ನೋ ಲೋಕಿಯೇನ, ಸಾವಕಾ ಪಟಿವಿಜಾನನ್ತಿ ನೋ ಪುಥುಜ್ಜನಾತಿ? ನ ಹೇವಂ ವತ್ತಬ್ಬೇ…ಪೇ॰…।
347. Buddhassa bhagavato vohāro lokuttaroti? Āmantā. Lokuttare sote paṭihaññati no lokiye, lokuttarena viññāṇena paṭivijānanti no lokiyena, sāvakā paṭivijānanti no puthujjanāti? Na hevaṃ vattabbe…pe….
ನನು ಬುದ್ಧಸ್ಸ ಭಗವತೋ ವೋಹಾರೋ ಲೋಕಿಯೇ ಸೋತೇ ಪಟಿಹಞ್ಞತೀತಿ? ಆಮನ್ತಾ। ಹಞ್ಚಿ ಬುದ್ಧಸ್ಸ ಭಗವತೋ ವೋಹಾರೋ ಲೋಕಿಯೇ ಸೋತೇ ಪಟಿಹಞ್ಞತಿ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋ’’ತಿ।
Nanu buddhassa bhagavato vohāro lokiye sote paṭihaññatīti? Āmantā. Hañci buddhassa bhagavato vohāro lokiye sote paṭihaññati, no ca vata re vattabbe – ‘‘buddhassa bhagavato vohāro lokuttaro’’ti.
ನನು ಬುದ್ಧಸ್ಸ ಭಗವತೋ ವೋಹಾರಂ ಲೋಕಿಯೇನ ವಿಞ್ಞಾಣೇನ ಪಟಿವಿಜಾನನ್ತೀತಿ? ಆಮನ್ತಾ। ಹಞ್ಚಿ ಬುದ್ಧಸ್ಸ ಭಗವತೋ ವೋಹಾರಂ ಲೋಕಿಯೇನ ವಿಞ್ಞಾಣೇನ ಪಟಿವಿಜಾನನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋ’’ತಿ।
Nanu buddhassa bhagavato vohāraṃ lokiyena viññāṇena paṭivijānantīti? Āmantā. Hañci buddhassa bhagavato vohāraṃ lokiyena viññāṇena paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
ನನು ಬುದ್ಧಸ್ಸ ಭಗವತೋ ವೋಹಾರಂ ಪುಥುಜ್ಜನಾ ಪಟಿವಿಜಾನನ್ತೀತಿ? ಆಮನ್ತಾ। ಹಞ್ಚಿ ಬುದ್ಧಸ್ಸ ಭಗವತೋ ವೋಹಾರಂ ಪುಥುಜ್ಜನಾ ಪಟಿವಿಜಾನನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋ’’ತಿ।
Nanu buddhassa bhagavato vohāraṃ puthujjanā paṭivijānantīti? Āmantā. Hañci buddhassa bhagavato vohāraṃ puthujjanā paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
೩೪೮. ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋತಿ? ಆಮನ್ತಾ। ಮಗ್ಗೋ ಫಲಂ ನಿಬ್ಬಾನಂ, ಸೋತಾಪತ್ತಿಮಗ್ಗೋ ಸೋತಾಪತ್ತಿಫಲಂ, ಸಕದಾಗಾಮಿಮಗ್ಗೋ ಸಕದಾಗಾಮಿಫಲಂ, ಅನಾಗಾಮಿಮಗ್ಗೋ ಅನಾಗಾಮಿಫಲಂ, ಅರಹತ್ತಮಗ್ಗೋ ಅರಹತ್ತಫಲಂ, ಸತಿಪಟ್ಠಾನಂ ಸಮ್ಮಪ್ಪಧಾನಂ ಇದ್ಧಿಪಾದೋ ಇನ್ದ್ರಿಯಂ ಬಲಂ ಬೋಜ್ಝಙ್ಗೋತಿ? ನ ಹೇವಂ ವತ್ತಬ್ಬೇ…ಪೇ॰…।
348. Buddhassa bhagavato vohāro lokuttaroti? Āmantā. Maggo phalaṃ nibbānaṃ, sotāpattimaggo sotāpattiphalaṃ, sakadāgāmimaggo sakadāgāmiphalaṃ, anāgāmimaggo anāgāmiphalaṃ, arahattamaggo arahattaphalaṃ, satipaṭṭhānaṃ sammappadhānaṃ iddhipādo indriyaṃ balaṃ bojjhaṅgoti? Na hevaṃ vattabbe…pe….
ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋತಿ? ಆಮನ್ತಾ। ಅತ್ಥಿ ಕೇಚಿ ಬುದ್ಧಸ್ಸ ಭಗವತೋ ವೋಹಾರಂ ಸುಣನ್ತೀತಿ? ಆಮನ್ತಾ। ಲೋಕುತ್ತರೋ ಧಮ್ಮೋ ಸೋತವಿಞ್ಞೇಯ್ಯೋ, ಸೋತಸ್ಮಿಂ ಪಟಿಹಞ್ಞತಿ, ಸೋತಸ್ಸ ಆಪಾಥಂ ಆಗಚ್ಛತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Buddhassa bhagavato vohāro lokuttaroti? Āmantā. Atthi keci buddhassa bhagavato vohāraṃ suṇantīti? Āmantā. Lokuttaro dhammo sotaviññeyyo, sotasmiṃ paṭihaññati, sotassa āpāthaṃ āgacchatīti? Na hevaṃ vattabbe…pe….
ನನು ಲೋಕುತ್ತರೋ ಧಮ್ಮೋ ನ ಸೋತವಿಞ್ಞೇಯ್ಯೋ, ನ ಸೋತಸ್ಮಿಂ ಪಟಿಹಞ್ಞತಿ, ನ ಸೋತಸ್ಸ ಆಪಾಥಂ ಆಗಚ್ಛತೀತಿ? ಆಮನ್ತಾ। ಹಞ್ಚಿ ಲೋಕುತ್ತರೋ ಧಮ್ಮೋ ನ ಸೋತವಿಞ್ಞೇಯ್ಯೋ, ನ ಸೋತಸ್ಮಿಂ ಪಟಿಹಞ್ಞತಿ, ನ ಸೋತಸ್ಸ ಆಪಾಥಂ ಆಗಚ್ಛತಿ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋ’’ತಿ।
Nanu lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchatīti? Āmantā. Hañci lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchati, no ca vata re vattabbe – ‘‘buddhassa bhagavato vohāro lokuttaro’’ti.
೩೪೯. ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋತಿ? ಆಮನ್ತಾ। ಅತ್ಥಿ ಕೇಚಿ ಬುದ್ಧಸ್ಸ ಭಗವತೋ ವೋಹಾರೇ ರಜ್ಜೇಯ್ಯುನ್ತಿ? ಆಮನ್ತಾ। ಲೋಕುತ್ತರೋ ಧಮ್ಮೋ ರಾಗಟ್ಠಾನಿಯೋ ರಜನೀಯೋ ಕಮನೀಯೋ ಮದನೀಯೋ ಬನ್ಧನೀಯೋ ಮುಚ್ಛನೀಯೋತಿ? ನ ಹೇವಂ ವತ್ತಬ್ಬೇ…ಪೇ॰…।
349. Buddhassa bhagavato vohāro lokuttaroti? Āmantā. Atthi keci buddhassa bhagavato vohāre rajjeyyunti? Āmantā. Lokuttaro dhammo rāgaṭṭhāniyo rajanīyo kamanīyo madanīyo bandhanīyo mucchanīyoti? Na hevaṃ vattabbe…pe….
ನನು ಲೋಕುತ್ತರೋ ಧಮ್ಮೋ ನ ರಾಗಟ್ಠಾನಿಯೋ ನ ರಜನೀಯೋ ನ ಕಮನೀಯೋ ನ ಮದನೀಯೋ ನ ಬನ್ಧನೀಯೋ ನ ಮುಚ್ಛನೀಯೋತಿ? ಆಮನ್ತಾ। ಹಞ್ಚಿ ಲೋಕುತ್ತರೋ ಧಮ್ಮೋ ನ ರಾಗಟ್ಠಾನಿಯೋ ನ ರಜನೀಯೋ ನ ಕಮನೀಯೋ ನ ಮದನೀಯೋ ನ ಬನ್ಧನೀಯೋ ನ ಮುಚ್ಛನೀಯೋ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋ’’ತಿ।
Nanu lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyoti? Āmantā. Hañci lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyo, no ca vata re vattabbe – ‘‘buddhassa bhagavato vohāro lokuttaro’’ti.
ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋತಿ? ಆಮನ್ತಾ। ಅತ್ಥಿ ಕೇಚಿ ಬುದ್ಧಸ್ಸ ಭಗವತೋ ವೋಹಾರೇ ದುಸ್ಸೇಯ್ಯುನ್ತಿ? ಆಮನ್ತಾ। ಲೋಕುತ್ತರೋ ಧಮ್ಮೋ ದೋಸಟ್ಠಾನಿಯೋ ಕೋಪಟ್ಠಾನಿಯೋ ಪಟಿಘಟ್ಠಾನಿಯೋತಿ? ನ ಹೇವಂ ವತ್ತಬ್ಬೇ…ಪೇ॰…।
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre dusseyyunti? Āmantā. Lokuttaro dhammo dosaṭṭhāniyo kopaṭṭhāniyo paṭighaṭṭhāniyoti? Na hevaṃ vattabbe…pe….
ನನು ಲೋಕುತ್ತರೋ ಧಮ್ಮೋ ನ ದೋಸಟ್ಠಾನಿಯೋ ನ ಕೋಪಟ್ಠಾನಿಯೋ ನ ಪಟಿಘಟ್ಠಾನಿಯೋತಿ? ಆಮನ್ತಾ। ಹಞ್ಚಿ ಲೋಕುತ್ತರೋ ಧಮ್ಮೋ ನ ದೋಸಟ್ಠಾನಿಯೋ ನ ಕೋಪಟ್ಠಾನಿಯೋ ನ ಪಟಿಘಟ್ಠಾನಿಯೋ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋ’’ತಿ।
Nanu lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyoti? Āmantā. Hañci lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyo, no ca vata re vattabbe – ‘‘buddhassa bhagavato vohāro lokuttaro’’ti.
ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋತಿ? ಆಮನ್ತಾ। ಅತ್ಥಿ ಕೇಚಿ ಬುದ್ಧಸ್ಸ ಭಗವತೋ ವೋಹಾರೇ ಮುಯ್ಹೇಯ್ಯುನ್ತಿ? ಆಮನ್ತಾ। ಲೋಕುತ್ತರೋ ಧಮ್ಮೋ ಮೋಹಟ್ಠಾನಿಯೋ ಅಞ್ಞಾಣಕರಣೋ ಅಚಕ್ಖುಕರಣೋ ಪಞ್ಞಾನಿರೋಧಿಕೋ ವಿಘಾತಪಕ್ಖಿಕೋ ಅನಿಬ್ಬಾನಸಂವತ್ತನಿಕೋತಿ? ನ ಹೇವಂ ವತ್ತಬ್ಬೇ…ಪೇ॰…।
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre muyheyyunti? Āmantā. Lokuttaro dhammo mohaṭṭhāniyo aññāṇakaraṇo acakkhukaraṇo paññānirodhiko vighātapakkhiko anibbānasaṃvattanikoti? Na hevaṃ vattabbe…pe….
ನನು ಲೋಕುತ್ತರೋ ಧಮ್ಮೋ ನ ಮೋಹಟ್ಠಾನಿಯೋ ನ ಅಞ್ಞಾಣಕರಣೋ ನ ಅಚಕ್ಖುಕರಣೋ ಪಞ್ಞಾವುದ್ಧಿಕೋ ಅವಿಘಾತಪಕ್ಖಿಕೋ ನಿಬ್ಬಾನಸಂವತ್ತನಿಕೋತಿ? ಆಮನ್ತಾ। ಹಞ್ಚಿ ಲೋಕುತ್ತರೋ ಧಮ್ಮೋ ನ ಮೋಹಟ್ಠಾನಿಯೋ ನ ಅಞ್ಞಾಣಕರಣೋ ನ ಅಚಕ್ಖುಕರಣೋ ಪಞ್ಞಾವುದ್ಧಿಕೋ ಅವಿಘಾತಪಕ್ಖಿಕೋ ನಿಬ್ಬಾನಸಂವತ್ತನಿಕೋ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋ’’ತಿ।
Nanu lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattanikoti? Āmantā. Hañci lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattaniko, no ca vata re vattabbe – ‘‘buddhassa bhagavato vohāro lokuttaro’’ti.
೩೫೦. ಬುದ್ಧಸ್ಸ ಭಗವತೋ ವೋಹಾರೋ ಲೋಕುತ್ತರೋತಿ? ಆಮನ್ತಾ। ಯೇ ಕೇಚಿ ಬುದ್ಧಸ್ಸ ಭಗವತೋ ವೋಹಾರಂ ಸುಣನ್ತಿ, ಸಬ್ಬೇ ತೇ ಮಗ್ಗಂ ಭಾವೇನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
350. Buddhassa bhagavato vohāro lokuttaroti? Āmantā. Ye keci buddhassa bhagavato vohāraṃ suṇanti, sabbe te maggaṃ bhāventīti? Na hevaṃ vattabbe…pe….
ಯೇ ಕೇಚಿ ಬುದ್ಧಸ್ಸ ಭಗವತೋ ವೋಹಾರಂ ಸುಣನ್ತಿ, ಸಬ್ಬೇ ತೇ ಮಗ್ಗಂ ಭಾವೇನ್ತೀತಿ? ಆಮನ್ತಾ। ಬಾಲಪುಥುಜ್ಜನಾ ಬುದ್ಧಸ್ಸ ಭಗವತೋ ವೋಹಾರಂ ಸುಣನ್ತಿ, ಬಾಲಪುಥುಜ್ಜನಾ ಮಗ್ಗಂ ಭಾವೇನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰… ಮಾತುಘಾತಕೋ ಮಗ್ಗಂ ಭಾವೇತಿ…ಪೇ॰… ಪಿತುಘಾತಕೋ… ಅರಹನ್ತಘಾತಕೋ… ರುಹಿರುಪ್ಪಾದಕೋ… ಸಙ್ಘಭೇದಕೋ ಬುದ್ಧಸ್ಸ ಭಗವತೋ ವೋಹಾರಂ ಸುಣಾತಿ, ಸಙ್ಘಭೇದಕೋ ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Ye keci buddhassa bhagavato vohāraṃ suṇanti, sabbe te maggaṃ bhāventīti? Āmantā. Bālaputhujjanā buddhassa bhagavato vohāraṃ suṇanti, bālaputhujjanā maggaṃ bhāventīti? Na hevaṃ vattabbe…pe… mātughātako maggaṃ bhāveti…pe… pitughātako… arahantaghātako… ruhiruppādako… saṅghabhedako buddhassa bhagavato vohāraṃ suṇāti, saṅghabhedako maggaṃ bhāvetīti? Na hevaṃ vattabbe…pe….
೩೫೧. ಲಬ್ಭಾ ಸೋವಣ್ಣಮಯಾಯ ಲಟ್ಠಿಯಾ ಧಞ್ಞಪುಞ್ಜೋಪಿ ಸುವಣ್ಣಪುಞ್ಜೋಪಿ ಆಚಿಕ್ಖಿತುನ್ತಿ? ಆಮನ್ತಾ। ಏವಮೇವಂ ಭಗವಾ ಲೋಕುತ್ತರೇನ ವೋಹಾರೇನ ಲೋಕಿಯಮ್ಪಿ ಲೋಕುತ್ತರಮ್ಪಿ ಧಮ್ಮಂ ವೋಹರತೀತಿ।
351. Labbhā sovaṇṇamayāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokuttarena vohārena lokiyampi lokuttarampi dhammaṃ voharatīti.
ಲಬ್ಭಾ ಏಲಣ್ಡಿಯಾಯ ಲಟ್ಠಿಯಾ ಧಞ್ಞಪುಞ್ಜೋಪಿ ಸುವಣ್ಣಪುಞ್ಜೋಪಿ ಆಚಿಕ್ಖಿತುನ್ತಿ? ಆಮನ್ತಾ। ಏವಮೇವಂ ಭಗವಾ ಲೋಕಿಯೇನ ವೋಹಾರೇನ ಲೋಕಿಯಮ್ಪಿ ಲೋಕುತ್ತರಮ್ಪಿ ಧಮ್ಮಂ ವೋಹರತೀತಿ।
Labbhā elaṇḍiyāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokiyena vohārena lokiyampi lokuttarampi dhammaṃ voharatīti.
೩೫೨. ಬುದ್ಧಸ್ಸ ಭಗವತೋ ವೋಹಾರೋ ಲೋಕಿಯಂ ವೋಹರನ್ತಸ್ಸ ಲೋಕಿಯೋ ಹೋತಿ, ಲೋಕುತ್ತರಂ ವೋಹರನ್ತಸ್ಸ ಲೋಕುತ್ತರೋ ಹೋತೀತಿ? ಆಮನ್ತಾ। ಲೋಕಿಯಂ ವೋಹರನ್ತಸ್ಸ ಲೋಕಿಯೇ ಸೋತೇ ಪಟಿಹಞ್ಞತಿ, ಲೋಕುತ್ತರಂ ವೋಹರನ್ತಸ್ಸ ಲೋಕುತ್ತರೇ ಸೋತೇ ಪಟಿಹಞ್ಞತಿ; ಲೋಕಿಯಂ ವೋಹರನ್ತಸ್ಸ ಲೋಕಿಯೇನ ವಿಞ್ಞಾಣೇನ ಪಟಿವಿಜಾನನ್ತಿ, ಲೋಕುತ್ತರಂ ವೋಹರನ್ತಸ್ಸ ಲೋಕುತ್ತರೇನ ವಿಞ್ಞಾಣೇನ ಪಟಿವಿಜಾನನ್ತಿ; ಲೋಕಿಯಂ ವೋಹರನ್ತಸ್ಸ ಪುಥುಜ್ಜನಾ ಪಟಿವಿಜಾನನ್ತಿ , ಲೋಕುತ್ತರಂ ವೋಹರನ್ತಸ್ಸ ಸಾವಕಾ ಪಟಿವಿಜಾನನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
352. Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Lokiyaṃ voharantassa lokiye sote paṭihaññati, lokuttaraṃ voharantassa lokuttare sote paṭihaññati; lokiyaṃ voharantassa lokiyena viññāṇena paṭivijānanti, lokuttaraṃ voharantassa lokuttarena viññāṇena paṭivijānanti; lokiyaṃ voharantassa puthujjanā paṭivijānanti , lokuttaraṃ voharantassa sāvakā paṭivijānantīti? Na hevaṃ vattabbe…pe….
ನ ವತ್ತಬ್ಬಂ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕಿಯಂ ವೋಹರನ್ತಸ್ಸ ಲೋಕಿಯೋ ಹೋತಿ, ಲೋಕುತ್ತರಂ ವೋಹರನ್ತಸ್ಸ ಲೋಕುತ್ತರೋ ಹೋತೀತಿ? ಆಮನ್ತಾ। ನನು ಭಗವಾ ಲೋಕಿಯಮ್ಪಿ ಲೋಕುತ್ತರಮ್ಪಿ ಧಮ್ಮಂ ವೋಹರತೀತಿ? ಆಮನ್ತಾ। ಹಞ್ಚಿ ಭಗವಾ ಲೋಕಿಯಮ್ಪಿ ಲೋಕುತ್ತರಮ್ಪಿ ಧಮ್ಮಂ ವೋಹರತಿ, ತೇನ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ವೋಹಾರೋ ಲೋಕಿಯಂ ವೋಹರನ್ತಸ್ಸ ಲೋಕಿಯೋ ಹೋತಿ, ಲೋಕುತ್ತರಂ ವೋಹರನ್ತಸ್ಸ ಲೋಕುತ್ತರೋ ಹೋತೀ’’ತಿ।
Na vattabbaṃ – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Nanu bhagavā lokiyampi lokuttarampi dhammaṃ voharatīti? Āmantā. Hañci bhagavā lokiyampi lokuttarampi dhammaṃ voharati, tena vata re vattabbe – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotī’’ti.
ಬುದ್ಧಸ್ಸ ಭಗವತೋ ವೋಹಾರೋ ಲೋಕಿಯಂ ವೋಹರನ್ತಸ್ಸ ಲೋಕಿಯೋ ಹೋತಿ, ಲೋಕುತ್ತರಂ ವೋಹರನ್ತಸ್ಸ ಲೋಕುತ್ತರೋ ಹೋತೀತಿ? ಆಮನ್ತಾ। ಮಗ್ಗಂ ವೋಹರನ್ತಸ್ಸ ಮಗ್ಗೋ ಹೋತಿ, ಅಮಗ್ಗಂ ವೋಹರನ್ತಸ್ಸ ಅಮಗ್ಗೋ ಹೋತಿ, ಫಲಂ ವೋಹರನ್ತಸ್ಸ ಫಲಂ ಹೋತಿ, ಅಫಲಂ ವೋಹರನ್ತಸ್ಸ ಅಫಲಂ ಹೋತಿ, ನಿಬ್ಬಾನಂ ವೋಹರನ್ತಸ್ಸ ನಿಬ್ಬಾನಂ ಹೋತಿ, ಅನಿಬ್ಬಾನಂ ವೋಹರನ್ತಸ್ಸ ಅನಿಬ್ಬಾನಂ ಹೋತಿ, ಸಙ್ಖತಂ ವೋಹರನ್ತಸ್ಸ ಸಙ್ಖತಂ ಹೋತಿ, ಅಸಙ್ಖತಂ ವೋಹರನ್ತಸ್ಸ ಅಸಙ್ಖತಂ ಹೋತಿ, ರೂಪಂ ವೋಹರನ್ತಸ್ಸ ರೂಪಂ ಹೋತಿ, ಅರೂಪಂ ವೋಹರನ್ತಸ್ಸ ಅರೂಪಂ ಹೋತಿ, ವೇದನಂ ವೋಹರನ್ತಸ್ಸ ವೇದನಾ ಹೋತಿ, ಅವೇದನಂ ವೋಹರನ್ತಸ್ಸ ಅವೇದನಾ ಹೋತಿ, ಸಞ್ಞಂ ವೋಹರನ್ತಸ್ಸ ಸಞ್ಞಾ ಹೋತಿ, ಅಸಞ್ಞಂ ವೋಹರನ್ತಸ್ಸ ಅಸಞ್ಞಾ ಹೋತಿ, ಸಙ್ಖಾರೇ ವೋಹರನ್ತಸ್ಸ ಸಙ್ಖಾರಾ ಹೋನ್ತಿ, ಅಸಙ್ಖಾರೇ ವೋಹರನ್ತಸ್ಸ ಅಸಙ್ಖಾರಾ ಹೋನ್ತಿ, ವಿಞ್ಞಾಣಂ ವೋಹರನ್ತಸ್ಸ ವಿಞ್ಞಾಣಂ ಹೋತಿ, ಅವಿಞ್ಞಾಣಂ ವೋಹರನ್ತಸ್ಸ ಅವಿಞ್ಞಾಣಂ ಹೋತೀತಿ ? ನ ಹೇವಂ ವತ್ತಬ್ಬೇ…ಪೇ॰…।
Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Maggaṃ voharantassa maggo hoti, amaggaṃ voharantassa amaggo hoti, phalaṃ voharantassa phalaṃ hoti, aphalaṃ voharantassa aphalaṃ hoti, nibbānaṃ voharantassa nibbānaṃ hoti, anibbānaṃ voharantassa anibbānaṃ hoti, saṅkhataṃ voharantassa saṅkhataṃ hoti, asaṅkhataṃ voharantassa asaṅkhataṃ hoti, rūpaṃ voharantassa rūpaṃ hoti, arūpaṃ voharantassa arūpaṃ hoti, vedanaṃ voharantassa vedanā hoti, avedanaṃ voharantassa avedanā hoti, saññaṃ voharantassa saññā hoti, asaññaṃ voharantassa asaññā hoti, saṅkhāre voharantassa saṅkhārā honti, asaṅkhāre voharantassa asaṅkhārā honti, viññāṇaṃ voharantassa viññāṇaṃ hoti, aviññāṇaṃ voharantassa aviññāṇaṃ hotīti ? Na hevaṃ vattabbe…pe….
ವೋಹಾರಕಥಾ ನಿಟ್ಠಿತಾ।
Vohārakathā niṭṭhitā.
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೧೦. ವೋಹಾರಕಥಾವಣ್ಣನಾ • 10. Vohārakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧೦. ವೋಹಾರಕಥಾವಣ್ಣನಾ • 10. Vohārakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧೦. ವೋಹಾರಕಥಾವಣ್ಣನಾ • 10. Vohārakathāvaṇṇanā
