| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
2. දුතියවග්‌ගො
2. Dutiyavaggo
(19) 10. වොහාරකථා
(19) 10. Vohārakathā
347. බුද්‌ධස්‌ස භගවතො වොහාරො ලොකුත්‌තරොති? ආමන්‌තා. ලොකුත්‌තරෙ සොතෙ පටිහඤ්‌ඤති නො ලොකියෙ, ලොකුත්‌තරෙන විඤ්‌ඤාණෙන පටිවිජානන්‌ති නො ලොකියෙන, සාවකා පටිවිජානන්‌ති නො පුථුජ්‌ජනාති? න හෙවං වත්‌තබ්‌බෙ…පෙ.….
347. Buddhassa bhagavato vohāro lokuttaroti? Āmantā. Lokuttare sote paṭihaññati no lokiye, lokuttarena viññāṇena paṭivijānanti no lokiyena, sāvakā paṭivijānanti no puthujjanāti? Na hevaṃ vattabbe…pe….
නනු බුද්‌ධස්‌ස භගවතො වොහාරො ලොකියෙ සොතෙ පටිහඤ්‌ඤතීති? ආමන්‌තා. හඤ්‌චි බුද්‌ධස්‌ස භගවතො වොහාරො ලොකියෙ සොතෙ පටිහඤ්‌ඤති, නො ච වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකුත්‌තරො’’ති.
Nanu buddhassa bhagavato vohāro lokiye sote paṭihaññatīti? Āmantā. Hañci buddhassa bhagavato vohāro lokiye sote paṭihaññati, no ca vata re vattabbe – ‘‘buddhassa bhagavato vohāro lokuttaro’’ti.
නනු බුද්‌ධස්‌ස භගවතො වොහාරං ලොකියෙන විඤ්‌ඤාණෙන පටිවිජානන්‌තීති? ආමන්‌තා. හඤ්‌චි බුද්‌ධස්‌ස භගවතො වොහාරං ලොකියෙන විඤ්‌ඤාණෙන පටිවිජානන්‌ති, නො ච වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකුත්‌තරො’’ති.
Nanu buddhassa bhagavato vohāraṃ lokiyena viññāṇena paṭivijānantīti? Āmantā. Hañci buddhassa bhagavato vohāraṃ lokiyena viññāṇena paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
නනු බුද්‌ධස්‌ස භගවතො වොහාරං පුථුජ්‌ජනා පටිවිජානන්‌තීති? ආමන්‌තා. හඤ්‌චි බුද්‌ධස්‌ස භගවතො වොහාරං පුථුජ්‌ජනා පටිවිජානන්‌ති, නො ච වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකුත්‌තරො’’ති.
Nanu buddhassa bhagavato vohāraṃ puthujjanā paṭivijānantīti? Āmantā. Hañci buddhassa bhagavato vohāraṃ puthujjanā paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
348. බුද්‌ධස්‌ස භගවතො වොහාරො ලොකුත්‌තරොති? ආමන්‌තා. මග්‌ගො ඵලං නිබ්‌බානං, සොතාපත්‌තිමග්‌ගො සොතාපත්‌තිඵලං, සකදාගාමිමග්‌ගො සකදාගාමිඵලං, අනාගාමිමග්‌ගො අනාගාමිඵලං, අරහත්‌තමග්‌ගො අරහත්‌තඵලං, සතිපට්‌ඨානං සම්‌මප්‌පධානං ඉද්‌ධිපාදො ඉන්‌ද්‍රියං බලං බොජ්‌ඣඞ්‌ගොති? න හෙවං වත්‌තබ්‌බෙ…පෙ.….
348. Buddhassa bhagavato vohāro lokuttaroti? Āmantā. Maggo phalaṃ nibbānaṃ, sotāpattimaggo sotāpattiphalaṃ, sakadāgāmimaggo sakadāgāmiphalaṃ, anāgāmimaggo anāgāmiphalaṃ, arahattamaggo arahattaphalaṃ, satipaṭṭhānaṃ sammappadhānaṃ iddhipādo indriyaṃ balaṃ bojjhaṅgoti? Na hevaṃ vattabbe…pe….
බුද්‌ධස්‌ස භගවතො වොහාරො ලොකුත්‌තරොති? ආමන්‌තා. අත්‌ථි කෙචි බුද්‌ධස්‌ස භගවතො වොහාරං සුණන්‌තීති? ආමන්‌තා. ලොකුත්‌තරො ධම්‌මො සොතවිඤ්‌ඤෙය්‍යො, සොතස්‌මිං පටිහඤ්‌ඤති, සොතස්‌ස ආපාථං ආගච්‌ඡතීති? න හෙවං වත්‌තබ්‌බෙ…පෙ.….
Buddhassa bhagavato vohāro lokuttaroti? Āmantā. Atthi keci buddhassa bhagavato vohāraṃ suṇantīti? Āmantā. Lokuttaro dhammo sotaviññeyyo, sotasmiṃ paṭihaññati, sotassa āpāthaṃ āgacchatīti? Na hevaṃ vattabbe…pe….
නනු ලොකුත්‌තරො ධම්‌මො න සොතවිඤ්‌ඤෙය්‍යො, න සොතස්‌මිං පටිහඤ්‌ඤති, න සොතස්‌ස ආපාථං ආගච්‌ඡතීති? ආමන්‌තා. හඤ්‌චි ලොකුත්‌තරො ධම්‌මො න සොතවිඤ්‌ඤෙය්‍යො, න සොතස්‌මිං පටිහඤ්‌ඤති, න සොතස්‌ස ආපාථං ආගච්‌ඡති, නො ච වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකුත්‌තරො’’ති.
Nanu lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchatīti? Āmantā. Hañci lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchati, no ca vata re vattabbe – ‘‘buddhassa bhagavato vohāro lokuttaro’’ti.
349. බුද්‌ධස්‌ස භගවතො වොහාරො ලොකුත්‌තරොති? ආමන්‌තා. අත්‌ථි කෙචි බුද්‌ධස්‌ස භගවතො වොහාරෙ රජ්‌ජෙය්‍යුන්‌ති? ආමන්‌තා. ලොකුත්‌තරො ධම්‌මො රාගට්‌ඨානියො රජනීයො කමනීයො මදනීයො බන්‌ධනීයො මුච්‌ඡනීයොති? න හෙවං වත්‌තබ්‌බෙ…පෙ.….
349. Buddhassa bhagavato vohāro lokuttaroti? Āmantā. Atthi keci buddhassa bhagavato vohāre rajjeyyunti? Āmantā. Lokuttaro dhammo rāgaṭṭhāniyo rajanīyo kamanīyo madanīyo bandhanīyo mucchanīyoti? Na hevaṃ vattabbe…pe….
නනු ලොකුත්‌තරො ධම්‌මො න රාගට්‌ඨානියො න රජනීයො න කමනීයො න මදනීයො න බන්‌ධනීයො න මුච්‌ඡනීයොති? ආමන්‌තා. හඤ්‌චි ලොකුත්‌තරො ධම්‌මො න රාගට්‌ඨානියො න රජනීයො න කමනීයො න මදනීයො න බන්‌ධනීයො න මුච්‌ඡනීයො, නො ච වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකුත්‌තරො’’ති.
Nanu lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyoti? Āmantā. Hañci lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyo, no ca vata re vattabbe – ‘‘buddhassa bhagavato vohāro lokuttaro’’ti.
බුද්‌ධස්‌ස භගවතො වොහාරො ලොකුත්‌තරොති? ආමන්‌තා. අත්‌ථි කෙචි බුද්‌ධස්‌ස භගවතො වොහාරෙ දුස්‌සෙය්‍යුන්‌ති? ආමන්‌තා. ලොකුත්‌තරො ධම්‌මො දොසට්‌ඨානියො කොපට්‌ඨානියො පටිඝට්‌ඨානියොති? න හෙවං වත්‌තබ්‌බෙ…පෙ.….
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre dusseyyunti? Āmantā. Lokuttaro dhammo dosaṭṭhāniyo kopaṭṭhāniyo paṭighaṭṭhāniyoti? Na hevaṃ vattabbe…pe….
නනු ලොකුත්‌තරො ධම්‌මො න දොසට්‌ඨානියො න කොපට්‌ඨානියො න පටිඝට්‌ඨානියොති? ආමන්‌තා. හඤ්‌චි ලොකුත්‌තරො ධම්‌මො න දොසට්‌ඨානියො න කොපට්‌ඨානියො න පටිඝට්‌ඨානියො, නො ච වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකුත්‌තරො’’ති.
Nanu lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyoti? Āmantā. Hañci lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyo, no ca vata re vattabbe – ‘‘buddhassa bhagavato vohāro lokuttaro’’ti.
බුද්‌ධස්‌ස භගවතො වොහාරො ලොකුත්‌තරොති? ආමන්‌තා. අත්‌ථි කෙචි බුද්‌ධස්‌ස භගවතො වොහාරෙ මුය්‌හෙය්‍යුන්‌ති? ආමන්‌තා. ලොකුත්‌තරො ධම්‌මො මොහට්‌ඨානියො අඤ්‌ඤාණකරණො අචක්‌ඛුකරණො පඤ්‌ඤානිරොධිකො විඝාතපක්‌ඛිකො අනිබ්‌බානසංවත්‌තනිකොති? න හෙවං වත්‌තබ්‌බෙ…පෙ.….
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre muyheyyunti? Āmantā. Lokuttaro dhammo mohaṭṭhāniyo aññāṇakaraṇo acakkhukaraṇo paññānirodhiko vighātapakkhiko anibbānasaṃvattanikoti? Na hevaṃ vattabbe…pe….
නනු ලොකුත්‌තරො ධම්‌මො න මොහට්‌ඨානියො න අඤ්‌ඤාණකරණො න අචක්‌ඛුකරණො පඤ්‌ඤාවුද්‌ධිකො අවිඝාතපක්‌ඛිකො නිබ්‌බානසංවත්‌තනිකොති? ආමන්‌තා. හඤ්‌චි ලොකුත්‌තරො ධම්‌මො න මොහට්‌ඨානියො න අඤ්‌ඤාණකරණො න අචක්‌ඛුකරණො පඤ්‌ඤාවුද්‌ධිකො අවිඝාතපක්‌ඛිකො නිබ්‌බානසංවත්‌තනිකො, නො ච වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකුත්‌තරො’’ති.
Nanu lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattanikoti? Āmantā. Hañci lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattaniko, no ca vata re vattabbe – ‘‘buddhassa bhagavato vohāro lokuttaro’’ti.
350. බුද්‌ධස්‌ස භගවතො වොහාරො ලොකුත්‌තරොති? ආමන්‌තා. යෙ කෙචි බුද්‌ධස්‌ස භගවතො වොහාරං සුණන්‌ති, සබ්‌බෙ තෙ මග්‌ගං භාවෙන්‌තීති? න හෙවං වත්‌තබ්‌බෙ…පෙ.….
350. Buddhassa bhagavato vohāro lokuttaroti? Āmantā. Ye keci buddhassa bhagavato vohāraṃ suṇanti, sabbe te maggaṃ bhāventīti? Na hevaṃ vattabbe…pe….
යෙ කෙචි බුද්‌ධස්‌ස භගවතො වොහාරං සුණන්‌ති, සබ්‌බෙ තෙ මග්‌ගං භාවෙන්‌තීති? ආමන්‌තා. බාලපුථුජ්‌ජනා බුද්‌ධස්‌ස භගවතො වොහාරං සුණන්‌ති, බාලපුථුජ්‌ජනා මග්‌ගං භාවෙන්‌තීති? න හෙවං වත්‌තබ්‌බෙ…පෙ.… මාතුඝාතකො මග්‌ගං භාවෙති…පෙ.… පිතුඝාතකො… අරහන්‌තඝාතකො… රුහිරුප්‌පාදකො… සඞ්‌ඝභෙදකො බුද්‌ධස්‌ස භගවතො වොහාරං සුණාති, සඞ්‌ඝභෙදකො මග්‌ගං භාවෙතීති? න හෙවං වත්‌තබ්‌බෙ…පෙ.….
Ye keci buddhassa bhagavato vohāraṃ suṇanti, sabbe te maggaṃ bhāventīti? Āmantā. Bālaputhujjanā buddhassa bhagavato vohāraṃ suṇanti, bālaputhujjanā maggaṃ bhāventīti? Na hevaṃ vattabbe…pe… mātughātako maggaṃ bhāveti…pe… pitughātako… arahantaghātako… ruhiruppādako… saṅghabhedako buddhassa bhagavato vohāraṃ suṇāti, saṅghabhedako maggaṃ bhāvetīti? Na hevaṃ vattabbe…pe….
351. ලබ්‌භා සොවණ්‌ණමයාය ලට්‌ඨියා ධඤ්‌ඤපුඤ්‌ජොපි සුවණ්‌ණපුඤ්‌ජොපි ආචික්‌ඛිතුන්‌ති? ආමන්‌තා. එවමෙවං භගවා ලොකුත්‌තරෙන වොහාරෙන ලොකියම්‌පි ලොකුත්‌තරම්‌පි ධම්‌මං වොහරතීති.
351. Labbhā sovaṇṇamayāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokuttarena vohārena lokiyampi lokuttarampi dhammaṃ voharatīti.
ලබ්‌භා එලණ්‌ඩියාය ලට්‌ඨියා ධඤ්‌ඤපුඤ්‌ජොපි සුවණ්‌ණපුඤ්‌ජොපි ආචික්‌ඛිතුන්‌ති? ආමන්‌තා. එවමෙවං භගවා ලොකියෙන වොහාරෙන ලොකියම්‌පි ලොකුත්‌තරම්‌පි ධම්‌මං වොහරතීති.
Labbhā elaṇḍiyāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokiyena vohārena lokiyampi lokuttarampi dhammaṃ voharatīti.
352. බුද්‌ධස්‌ස භගවතො වොහාරො ලොකියං වොහරන්‌තස්‌ස ලොකියො හොති, ලොකුත්‌තරං වොහරන්‌තස්‌ස ලොකුත්‌තරො හොතීති? ආමන්‌තා. ලොකියං වොහරන්‌තස්‌ස ලොකියෙ සොතෙ පටිහඤ්‌ඤති, ලොකුත්‌තරං වොහරන්‌තස්‌ස ලොකුත්‌තරෙ සොතෙ පටිහඤ්‌ඤති; ලොකියං වොහරන්‌තස්‌ස ලොකියෙන විඤ්‌ඤාණෙන පටිවිජානන්‌ති, ලොකුත්‌තරං වොහරන්‌තස්‌ස ලොකුත්‌තරෙන විඤ්‌ඤාණෙන පටිවිජානන්‌ති; ලොකියං වොහරන්‌තස්‌ස පුථුජ්‌ජනා පටිවිජානන්‌ති , ලොකුත්‌තරං වොහරන්‌තස්‌ස සාවකා පටිවිජානන්‌තීති? න හෙවං වත්‌තබ්‌බෙ…පෙ.….
352. Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Lokiyaṃ voharantassa lokiye sote paṭihaññati, lokuttaraṃ voharantassa lokuttare sote paṭihaññati; lokiyaṃ voharantassa lokiyena viññāṇena paṭivijānanti, lokuttaraṃ voharantassa lokuttarena viññāṇena paṭivijānanti; lokiyaṃ voharantassa puthujjanā paṭivijānanti , lokuttaraṃ voharantassa sāvakā paṭivijānantīti? Na hevaṃ vattabbe…pe….
න වත්‌තබ්‌බං – ‘‘බුද්‌ධස්‌ස භගවතො වොහාරො ලොකියං වොහරන්‌තස්‌ස ලොකියො හොති, ලොකුත්‌තරං වොහරන්‌තස්‌ස ලොකුත්‌තරො හොතීති? ආමන්‌තා. නනු භගවා ලොකියම්‌පි ලොකුත්‌තරම්‌පි ධම්‌මං වොහරතීති? ආමන්‌තා. හඤ්‌චි භගවා ලොකියම්‌පි ලොකුත්‌තරම්‌පි ධම්‌මං වොහරති, තෙන වත රෙ වත්‌තබ්‌බෙ – ‘‘බුද්‌ධස්‌ස භගවතො වොහාරො ලොකියං වොහරන්‌තස්‌ස ලොකියො හොති, ලොකුත්‌තරං වොහරන්‌තස්‌ස ලොකුත්‌තරො හොතී’’ති.
Na vattabbaṃ – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Nanu bhagavā lokiyampi lokuttarampi dhammaṃ voharatīti? Āmantā. Hañci bhagavā lokiyampi lokuttarampi dhammaṃ voharati, tena vata re vattabbe – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotī’’ti.
බුද්‌ධස්‌ස භගවතො වොහාරො ලොකියං වොහරන්‌තස්‌ස ලොකියො හොති, ලොකුත්‌තරං වොහරන්‌තස්‌ස ලොකුත්‌තරො හොතීති? ආමන්‌තා. මග්‌ගං වොහරන්‌තස්‌ස මග්‌ගො හොති, අමග්‌ගං වොහරන්‌තස්‌ස අමග්‌ගො හොති, ඵලං වොහරන්‌තස්‌ස ඵලං හොති, අඵලං වොහරන්‌තස්‌ස අඵලං හොති, නිබ්‌බානං වොහරන්‌තස්‌ස නිබ්‌බානං හොති, අනිබ්‌බානං වොහරන්‌තස්‌ස අනිබ්‌බානං හොති, සඞ්‌ඛතං වොහරන්‌තස්‌ස සඞ්‌ඛතං හොති, අසඞ්‌ඛතං වොහරන්‌තස්‌ස අසඞ්‌ඛතං හොති, රූපං වොහරන්‌තස්‌ස රූපං හොති, අරූපං වොහරන්‌තස්‌ස අරූපං හොති, වෙදනං වොහරන්‌තස්‌ස වෙදනා හොති, අවෙදනං වොහරන්‌තස්‌ස අවෙදනා හොති, සඤ්‌ඤං වොහරන්‌තස්‌ස සඤ්‌ඤා හොති, අසඤ්‌ඤං වොහරන්‌තස්‌ස අසඤ්‌ඤා හොති, සඞ්‌ඛාරෙ වොහරන්‌තස්‌ස සඞ්‌ඛාරා හොන්‌ති, අසඞ්‌ඛාරෙ වොහරන්‌තස්‌ස අසඞ්‌ඛාරා හොන්‌ති, විඤ්‌ඤාණං වොහරන්‌තස්‌ස විඤ්‌ඤාණං හොති, අවිඤ්‌ඤාණං වොහරන්‌තස්‌ස අවිඤ්‌ඤාණං හොතීති ? න හෙවං වත්‌තබ්‌බෙ…පෙ.….
Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Maggaṃ voharantassa maggo hoti, amaggaṃ voharantassa amaggo hoti, phalaṃ voharantassa phalaṃ hoti, aphalaṃ voharantassa aphalaṃ hoti, nibbānaṃ voharantassa nibbānaṃ hoti, anibbānaṃ voharantassa anibbānaṃ hoti, saṅkhataṃ voharantassa saṅkhataṃ hoti, asaṅkhataṃ voharantassa asaṅkhataṃ hoti, rūpaṃ voharantassa rūpaṃ hoti, arūpaṃ voharantassa arūpaṃ hoti, vedanaṃ voharantassa vedanā hoti, avedanaṃ voharantassa avedanā hoti, saññaṃ voharantassa saññā hoti, asaññaṃ voharantassa asaññā hoti, saṅkhāre voharantassa saṅkhārā honti, asaṅkhāre voharantassa asaṅkhārā honti, viññāṇaṃ voharantassa viññāṇaṃ hoti, aviññāṇaṃ voharantassa aviññāṇaṃ hotīti ? Na hevaṃ vattabbe…pe….
වොහාරකථා නිට්‌ඨිතා.
Vohārakathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 10. වොහාරකථාවණ්‌ණනා • 10. Vohārakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 10. වොහාරකථාවණ්‌ණනා • 10. Vohārakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 10. වොහාරකථාවණ්‌ණනා • 10. Vohārakathāvaṇṇanā
