| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১০. ৰোহারকথাৰণ্ণনা
10. Vohārakathāvaṇṇanā
৩৪৭. ইদানি ৰোহারকথা নাম হোতি। তত্থ বুদ্ধো ভগৰা লোকুত্তরেন ৰোহারেন ৰোহরতীতি যেসং লদ্ধি, সেয্যথাপি এতরহি অন্ধকানং; তে সন্ধায পুচ্ছা সকৰাদিস্স, লদ্ধিৰসেন পটিঞ্ঞা পরৰাদিস্স। লোকুত্তরে সোতেতিআদীনি তস্স অযুত্তৰাদীভাৰদীপনত্থং ৰুত্তানি। অযঞ্হেত্থ অধিপ্পাযো – ‘‘সদ্দাযতনমেৰ তে লোকুত্তরং, উদাহু সোতাদীনিপী’’তি।
347. Idāni vohārakathā nāma hoti. Tattha buddho bhagavā lokuttarena vohārena voharatīti yesaṃ laddhi, seyyathāpi etarahi andhakānaṃ; te sandhāya pucchā sakavādissa, laddhivasena paṭiññā paravādissa. Lokuttare sotetiādīni tassa ayuttavādībhāvadīpanatthaṃ vuttāni. Ayañhettha adhippāyo – ‘‘saddāyatanameva te lokuttaraṃ, udāhu sotādīnipī’’ti.
হঞ্চি বুদ্ধস্স ভগৰতো ৰোহারো লোকিযে সোতে পটিহঞ্ঞতীতি এত্থ যদি সো লোকুত্তরে পটিহঞ্ঞেয্য। লোকুত্তরো সিযাতি এৰমত্থো ন গহেতব্বো। লোকিযে পটিহঞ্ঞমানস্স পন লোকুত্তরতা নাম নত্থীতি অযমেত্থাধিপ্পাযো। লোকিযেন ৰিঞ্ঞাণেনাতি এত্থাপি লোকিযেনেৰাতি অত্থো। ইতরথা অনেকন্ততা সিযা। লোকুত্তরঞ্হি লোকিযেনপি ঞাণেন ঞাযতী। এৰং সব্বং যথানুরূপতো ৰেদিতব্বং। সব্বে তে মগ্গং ভাৰেন্তীতি পঞ্হেসু যে মগ্গং নপ্পটিলভন্তি, তে সন্ধায পটিক্খিপতি। যে পটিলভন্তি, তে সন্ধায পটিজানাতি।
Hañci buddhassa bhagavato vohāro lokiye sote paṭihaññatīti ettha yadi so lokuttare paṭihaññeyya. Lokuttaro siyāti evamattho na gahetabbo. Lokiye paṭihaññamānassa pana lokuttaratā nāma natthīti ayametthādhippāyo. Lokiyena viññāṇenāti etthāpi lokiyenevāti attho. Itarathā anekantatā siyā. Lokuttarañhi lokiyenapi ñāṇena ñāyatī. Evaṃ sabbaṃ yathānurūpato veditabbaṃ. Sabbe te maggaṃ bhāventīti pañhesu ye maggaṃ nappaṭilabhanti, te sandhāya paṭikkhipati. Ye paṭilabhanti, te sandhāya paṭijānāti.
৩৫১. সোৰণ্ণমযাযাতি সুৰণ্ণমযায। ইদং পরৰাদিস্স উদাহরণং।
351. Sovaṇṇamayāyāti suvaṇṇamayāya. Idaṃ paravādissa udāharaṇaṃ.
এল়ণ্ডিযাযাতি এল়ণ্ডমযায। ইদং সকৰাদিস্স উদাহরণং। লোকিযং ৰোহরন্তস্স লোকিযোতি অযম্পি একা লদ্ধি। সা এতরহি একচ্চানং অন্ধকানং লদ্ধি। সেসমেত্থ উত্তানত্থমেৰাতি।
Eḷaṇḍiyāyāti eḷaṇḍamayāya. Idaṃ sakavādissa udāharaṇaṃ. Lokiyaṃ voharantassa lokiyoti ayampi ekā laddhi. Sā etarahi ekaccānaṃ andhakānaṃ laddhi. Sesamettha uttānatthamevāti.
ৰোহারকথাৰণ্ণনা।
Vohārakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৯) ১০. ৰোহারকথা • (19) 10. Vohārakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১০. ৰোহারকথাৰণ্ণনা • 10. Vohārakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১০. ৰোহারকথাৰণ্ণনা • 10. Vohārakathāvaṇṇanā
