| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
১০. ৰোহারকথাৰণ্ণনা
10. Vohārakathāvaṇṇanā
৩৪৭. ৰোহারকথাযং উদাহু সোতাদীনিপীতি একন্তলোকিযেসু ৰিসযৰিসযীসু ৰিসযস্সেৰ লোকুত্তরভাৰো, ন ৰিসযীনন্তি নত্থেত্থ কারণং। যথা চ ৰিসযীনং লোকুত্তরভাৰো অসিদ্ধো, তথা ৰিসযস্স সদ্দাযতনস্স। তত্থ যথা অসিদ্ধলোকুত্তরভাৰস্স তস্স লোকুত্তরতা, এৰং সোতাদীনং আপন্নাতি কিন্তি তানিপি লোকুত্তরানীতি অত্থো দট্ঠব্বো।
347. Vohārakathāyaṃ udāhu sotādīnipīti ekantalokiyesu visayavisayīsu visayasseva lokuttarabhāvo, na visayīnanti natthettha kāraṇaṃ. Yathā ca visayīnaṃ lokuttarabhāvo asiddho, tathā visayassa saddāyatanassa. Tattha yathā asiddhalokuttarabhāvassa tassa lokuttaratā, evaṃ sotādīnaṃ āpannāti kinti tānipi lokuttarānīti attho daṭṭhabbo.
যদি লোকুত্তরে পটিহঞ্ঞেয্য, লোকুত্তরো সিযাতি অত্থো ন গহেতব্বো। ন হি লোকুত্তরে পটিহঞ্ঞতীতি পরিকপ্পিতেপি সদ্দস্স লোকুত্তরভাৰো অত্থীতি অধিপ্পাযো। ‘‘লোকিযেন ঞাণেনা’’তি উদ্ধটং, ‘‘ৰিঞ্ঞাণেনা’’তি পন পাল়ি, তঞ্চ ৰিঞ্ঞাণং সোতসম্বন্ধেন সোতৰিঞ্ঞাণন্তি ৰিঞ্ঞাযতীতি। অনেকন্ততাতি লোকিযেন ঞাণেন জানিতব্বতো লোকিযোতি এতস্স হেতুস্স লোকিযে লোকুত্তরে চ সম্ভৰতো অনেকন্তভাৰো সিযাতি অধিপ্পাযো।
Yadi lokuttare paṭihaññeyya, lokuttaro siyāti attho na gahetabbo. Na hi lokuttare paṭihaññatīti parikappitepi saddassa lokuttarabhāvo atthīti adhippāyo. ‘‘Lokiyena ñāṇenā’’ti uddhaṭaṃ, ‘‘viññāṇenā’’ti pana pāḷi, tañca viññāṇaṃ sotasambandhena sotaviññāṇanti viññāyatīti. Anekantatāti lokiyena ñāṇena jānitabbato lokiyoti etassa hetussa lokiye lokuttare ca sambhavato anekantabhāvo siyāti adhippāyo.
ৰোহারকথাৰণ্ণনা নিট্ঠিতা।
Vohārakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৯) ১০. ৰোহারকথা • (19) 10. Vohārakathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১০. ৰোহারকথাৰণ্ণনা • 10. Vohārakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১০. ৰোহারকথাৰণ্ণনা • 10. Vohārakathāvaṇṇanā
