| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
१०. वोहारकथावण्णना
10. Vohārakathāvaṇṇanā
३४७. इदानि वोहारकथा नाम होति। तत्थ बुद्धो भगवा लोकुत्तरेन वोहारेन वोहरतीति येसं लद्धि, सेय्यथापि एतरहि अन्धकानं; ते सन्धाय पुच्छा सकवादिस्स, लद्धिवसेन पटिञ्ञा परवादिस्स। लोकुत्तरे सोतेतिआदीनि तस्स अयुत्तवादीभावदीपनत्थं वुत्तानि। अयञ्हेत्थ अधिप्पायो – ‘‘सद्दायतनमेव ते लोकुत्तरं, उदाहु सोतादीनिपी’’ति।
347. Idāni vohārakathā nāma hoti. Tattha buddho bhagavā lokuttarena vohārena voharatīti yesaṃ laddhi, seyyathāpi etarahi andhakānaṃ; te sandhāya pucchā sakavādissa, laddhivasena paṭiññā paravādissa. Lokuttare sotetiādīni tassa ayuttavādībhāvadīpanatthaṃ vuttāni. Ayañhettha adhippāyo – ‘‘saddāyatanameva te lokuttaraṃ, udāhu sotādīnipī’’ti.
हञ्चि बुद्धस्स भगवतो वोहारो लोकिये सोते पटिहञ्ञतीति एत्थ यदि सो लोकुत्तरे पटिहञ्ञेय्य। लोकुत्तरो सियाति एवमत्थो न गहेतब्बो। लोकिये पटिहञ्ञमानस्स पन लोकुत्तरता नाम नत्थीति अयमेत्थाधिप्पायो। लोकियेन विञ्ञाणेनाति एत्थापि लोकियेनेवाति अत्थो। इतरथा अनेकन्तता सिया। लोकुत्तरञ्हि लोकियेनपि ञाणेन ञायती। एवं सब्बं यथानुरूपतो वेदितब्बं। सब्बे ते मग्गं भावेन्तीति पञ्हेसु ये मग्गं नप्पटिलभन्ति, ते सन्धाय पटिक्खिपति। ये पटिलभन्ति, ते सन्धाय पटिजानाति।
Hañci buddhassa bhagavato vohāro lokiye sote paṭihaññatīti ettha yadi so lokuttare paṭihaññeyya. Lokuttaro siyāti evamattho na gahetabbo. Lokiye paṭihaññamānassa pana lokuttaratā nāma natthīti ayametthādhippāyo. Lokiyena viññāṇenāti etthāpi lokiyenevāti attho. Itarathā anekantatā siyā. Lokuttarañhi lokiyenapi ñāṇena ñāyatī. Evaṃ sabbaṃ yathānurūpato veditabbaṃ. Sabbe te maggaṃ bhāventīti pañhesu ye maggaṃ nappaṭilabhanti, te sandhāya paṭikkhipati. Ye paṭilabhanti, te sandhāya paṭijānāti.
३५१. सोवण्णमयायाति सुवण्णमयाय। इदं परवादिस्स उदाहरणं।
351. Sovaṇṇamayāyāti suvaṇṇamayāya. Idaṃ paravādissa udāharaṇaṃ.
एळण्डियायाति एळण्डमयाय। इदं सकवादिस्स उदाहरणं। लोकियं वोहरन्तस्स लोकियोति अयम्पि एका लद्धि। सा एतरहि एकच्चानं अन्धकानं लद्धि। सेसमेत्थ उत्तानत्थमेवाति।
Eḷaṇḍiyāyāti eḷaṇḍamayāya. Idaṃ sakavādissa udāharaṇaṃ. Lokiyaṃ voharantassa lokiyoti ayampi ekā laddhi. Sā etarahi ekaccānaṃ andhakānaṃ laddhi. Sesamettha uttānatthamevāti.
वोहारकथावण्णना।
Vohārakathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१९) १०. वोहारकथा • (19) 10. Vohārakathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / १०. वोहारकथावण्णना • 10. Vohārakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / १०. वोहारकथावण्णना • 10. Vohārakathāvaṇṇanā
