| Library / Tipiṭaka / ติปิฎก • Tipiṭaka / ปญฺจปกรณ-อฎฺฐกถา • Pañcapakaraṇa-aṭṭhakathā |
๑๐. โวหารกถาวณฺณนา
10. Vohārakathāvaṇṇanā
๓๔๗. อิทานิ โวหารกถา นาม โหติฯ ตตฺถ พุโทฺธ ภควา โลกุตฺตเรน โวหาเรน โวหรตีติ เยสํ ลทฺธิ, เสยฺยถาปิ เอตรหิ อนฺธกานํ; เต สนฺธาย ปุจฺฉา สกวาทิสฺส, ลทฺธิวเสน ปฎิญฺญา ปรวาทิสฺสฯ โลกุตฺตเร โสเตติอาทีนิ ตสฺส อยุตฺตวาทีภาวทีปนตฺถํ วุตฺตานิฯ อยเญฺหตฺถ อธิปฺปาโย – ‘‘สทฺทายตนเมว เต โลกุตฺตรํ, อุทาหุ โสตาทีนิปี’’ติฯ
347. Idāni vohārakathā nāma hoti. Tattha buddho bhagavā lokuttarena vohārena voharatīti yesaṃ laddhi, seyyathāpi etarahi andhakānaṃ; te sandhāya pucchā sakavādissa, laddhivasena paṭiññā paravādissa. Lokuttare sotetiādīni tassa ayuttavādībhāvadīpanatthaṃ vuttāni. Ayañhettha adhippāyo – ‘‘saddāyatanameva te lokuttaraṃ, udāhu sotādīnipī’’ti.
หญฺจิ พุทฺธสฺส ภควโต โวหาโร โลกิเย โสเต ปฎิหญฺญตีติ เอตฺถ ยทิ โส โลกุตฺตเร ปฎิหเญฺญยฺยฯ โลกุตฺตโร สิยาติ เอวมโตฺถ น คเหตโพฺพฯ โลกิเย ปฎิหญฺญมานสฺส ปน โลกุตฺตรตา นาม นตฺถีติ อยเมตฺถาธิปฺปาโยฯ โลกิเยน วิญฺญาเณนาติ เอตฺถาปิ โลกิเยเนวาติ อโตฺถฯ อิตรถา อเนกนฺตตา สิยาฯ โลกุตฺตรญฺหิ โลกิเยนปิ ญาเณน ญายตีฯ เอวํ สพฺพํ ยถานุรูปโต เวทิตพฺพํฯ สเพฺพ เต มคฺคํ ภาเวนฺตีติ ปเญฺหสุ เย มคฺคํ นปฺปฎิลภนฺติ, เต สนฺธาย ปฎิกฺขิปติฯ เย ปฎิลภนฺติ, เต สนฺธาย ปฎิชานาติฯ
Hañci buddhassa bhagavato vohāro lokiye sote paṭihaññatīti ettha yadi so lokuttare paṭihaññeyya. Lokuttaro siyāti evamattho na gahetabbo. Lokiye paṭihaññamānassa pana lokuttaratā nāma natthīti ayametthādhippāyo. Lokiyena viññāṇenāti etthāpi lokiyenevāti attho. Itarathā anekantatā siyā. Lokuttarañhi lokiyenapi ñāṇena ñāyatī. Evaṃ sabbaṃ yathānurūpato veditabbaṃ. Sabbe te maggaṃ bhāventīti pañhesu ye maggaṃ nappaṭilabhanti, te sandhāya paṭikkhipati. Ye paṭilabhanti, te sandhāya paṭijānāti.
๓๕๑. โสวณฺณมยายาติ สุวณฺณมยายฯ อิทํ ปรวาทิสฺส อุทาหรณํฯ
351. Sovaṇṇamayāyāti suvaṇṇamayāya. Idaṃ paravādissa udāharaṇaṃ.
เอฬณฺฑิยายาติ เอฬณฺฑมยายฯ อิทํ สกวาทิสฺส อุทาหรณํฯ โลกิยํ โวหรนฺตสฺส โลกิโยติ อยมฺปิ เอกา ลทฺธิฯ สา เอตรหิ เอกจฺจานํ อนฺธกานํ ลทฺธิฯ เสสเมตฺถ อุตฺตานตฺถเมวาติฯ
Eḷaṇḍiyāyāti eḷaṇḍamayāya. Idaṃ sakavādissa udāharaṇaṃ. Lokiyaṃ voharantassa lokiyoti ayampi ekā laddhi. Sā etarahi ekaccānaṃ andhakānaṃ laddhi. Sesamettha uttānatthamevāti.
โวหารกถาวณฺณนาฯ
Vohārakathāvaṇṇanā.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / กถาวตฺถุปาฬิ • Kathāvatthupāḷi / (๑๙) ๑๐. โวหารกถา • (19) 10. Vohārakathā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๑๐. โวหารกถาวณฺณนา • 10. Vohārakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๑๐. โวหารกถาวณฺณนา • 10. Vohārakathāvaṇṇanā
