| Library / Tipiṭaka / តិបិដក • Tipiṭaka / បញ្ចបករណ-អនុដីកា • Pañcapakaraṇa-anuṭīkā |
១០. វោហារកថាវណ្ណនា
10. Vohārakathāvaṇṇanā
៣៤៧. វិសយវិសយីសូតិ រូបចក្ខាទិកេ សន្ធាយាហ។ តេ ហិ រូបក្ខន្ធបរិយាបន្នត្តា ឯកន្តេន លោកិយា។ វិសយស្សេវាតិ សទ្ទស្សេវ។ សោ ហិ វោហរិតព្ពតោ វោហារករណតាយ ច ‘‘វោហារោ’’តិ បាឡិយំ វុត្តោ។ នត្ថេត្ថ ការណំ វិសយីនំ វិសយស្សបិ អាសវាទិអនារម្មណតាភាវតោ។ អសិទ្ធលោកុត្តរភាវស្ស ឯកន្តសាសវត្តា តស្ស សទ្ទាយតនស្ស យថា លោកុត្តរតា តវ មតេនាតិ អធិប្បាយោ។
347. Visayavisayīsūti rūpacakkhādike sandhāyāha. Te hi rūpakkhandhapariyāpannattā ekantena lokiyā. Visayassevāti saddasseva. So hi voharitabbato vohārakaraṇatāya ca ‘‘vohāro’’ti pāḷiyaṃ vutto. Natthettha kāraṇaṃ visayīnaṃ visayassapi āsavādianārammaṇatābhāvato. Asiddhalokuttarabhāvassa ekantasāsavattā tassa saddāyatanassa yathā lokuttaratā tava matenāti adhippāyo.
បដិហញ្ញេយ្យាតិ ឥទំ បរិកប្បវចនំ។ បរិកប្បវចនញ្ច អយាថាវន្តិ អាហ ‘‘ន ហិ…បេ.… អត្ថី’’តិ។ ន ហិ ជលំ អនលន្តិ បរិកប្បិតំ ទហតិ បចតិ វា។ កិំ លោកិយេន ញាណេន ជានិតព្ពតោ លោកិយោ រូបាយតនាទិ វិយ, ឧទាហុ លោកុត្តរោ បច្ចវេក្ខិយមានមគ្គាទិ វិយាតិ ឯវមេត្ថ ហេតុស្ស អនេកន្តភាវោ វេទិតព្ពោ។ តេនាហ ‘‘លោកិយេ លោកុត្តរេ ច សម្ភវតោ’’តិ។
Paṭihaññeyyāti idaṃ parikappavacanaṃ. Parikappavacanañca ayāthāvanti āha ‘‘na hi…pe… atthī’’ti. Na hi jalaṃ analanti parikappitaṃ dahati pacati vā. Kiṃ lokiyena ñāṇena jānitabbato lokiyo rūpāyatanādi viya, udāhu lokuttaro paccavekkhiyamānamaggādi viyāti evamettha hetussa anekantabhāvo veditabbo. Tenāha ‘‘lokiye lokuttare ca sambhavato’’ti.
វោហារកថាវណ្ណនា និដ្ឋិតា។
Vohārakathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១៩) ១០. វោហារកថា • (19) 10. Vohārakathā
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១០. វោហារកថាវណ្ណនា • 10. Vohārakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១០. វោហារកថាវណ្ណនា • 10. Vohārakathāvaṇṇanā
