| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೧೦. ವೋಹಾರಕಥಾವಣ್ಣನಾ
10. Vohārakathāvaṇṇanā
೩೪೭. ಇದಾನಿ ವೋಹಾರಕಥಾ ನಾಮ ಹೋತಿ। ತತ್ಥ ಬುದ್ಧೋ ಭಗವಾ ಲೋಕುತ್ತರೇನ ವೋಹಾರೇನ ವೋಹರತೀತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಏತರಹಿ ಅನ್ಧಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಲದ್ಧಿವಸೇನ ಪಟಿಞ್ಞಾ ಪರವಾದಿಸ್ಸ। ಲೋಕುತ್ತರೇ ಸೋತೇತಿಆದೀನಿ ತಸ್ಸ ಅಯುತ್ತವಾದೀಭಾವದೀಪನತ್ಥಂ ವುತ್ತಾನಿ। ಅಯಞ್ಹೇತ್ಥ ಅಧಿಪ್ಪಾಯೋ – ‘‘ಸದ್ದಾಯತನಮೇವ ತೇ ಲೋಕುತ್ತರಂ, ಉದಾಹು ಸೋತಾದೀನಿಪೀ’’ತಿ।
347. Idāni vohārakathā nāma hoti. Tattha buddho bhagavā lokuttarena vohārena voharatīti yesaṃ laddhi, seyyathāpi etarahi andhakānaṃ; te sandhāya pucchā sakavādissa, laddhivasena paṭiññā paravādissa. Lokuttare sotetiādīni tassa ayuttavādībhāvadīpanatthaṃ vuttāni. Ayañhettha adhippāyo – ‘‘saddāyatanameva te lokuttaraṃ, udāhu sotādīnipī’’ti.
ಹಞ್ಚಿ ಬುದ್ಧಸ್ಸ ಭಗವತೋ ವೋಹಾರೋ ಲೋಕಿಯೇ ಸೋತೇ ಪಟಿಹಞ್ಞತೀತಿ ಏತ್ಥ ಯದಿ ಸೋ ಲೋಕುತ್ತರೇ ಪಟಿಹಞ್ಞೇಯ್ಯ। ಲೋಕುತ್ತರೋ ಸಿಯಾತಿ ಏವಮತ್ಥೋ ನ ಗಹೇತಬ್ಬೋ। ಲೋಕಿಯೇ ಪಟಿಹಞ್ಞಮಾನಸ್ಸ ಪನ ಲೋಕುತ್ತರತಾ ನಾಮ ನತ್ಥೀತಿ ಅಯಮೇತ್ಥಾಧಿಪ್ಪಾಯೋ। ಲೋಕಿಯೇನ ವಿಞ್ಞಾಣೇನಾತಿ ಏತ್ಥಾಪಿ ಲೋಕಿಯೇನೇವಾತಿ ಅತ್ಥೋ। ಇತರಥಾ ಅನೇಕನ್ತತಾ ಸಿಯಾ। ಲೋಕುತ್ತರಞ್ಹಿ ಲೋಕಿಯೇನಪಿ ಞಾಣೇನ ಞಾಯತೀ। ಏವಂ ಸಬ್ಬಂ ಯಥಾನುರೂಪತೋ ವೇದಿತಬ್ಬಂ। ಸಬ್ಬೇ ತೇ ಮಗ್ಗಂ ಭಾವೇನ್ತೀತಿ ಪಞ್ಹೇಸು ಯೇ ಮಗ್ಗಂ ನಪ್ಪಟಿಲಭನ್ತಿ, ತೇ ಸನ್ಧಾಯ ಪಟಿಕ್ಖಿಪತಿ। ಯೇ ಪಟಿಲಭನ್ತಿ, ತೇ ಸನ್ಧಾಯ ಪಟಿಜಾನಾತಿ।
Hañci buddhassa bhagavato vohāro lokiye sote paṭihaññatīti ettha yadi so lokuttare paṭihaññeyya. Lokuttaro siyāti evamattho na gahetabbo. Lokiye paṭihaññamānassa pana lokuttaratā nāma natthīti ayametthādhippāyo. Lokiyena viññāṇenāti etthāpi lokiyenevāti attho. Itarathā anekantatā siyā. Lokuttarañhi lokiyenapi ñāṇena ñāyatī. Evaṃ sabbaṃ yathānurūpato veditabbaṃ. Sabbe te maggaṃ bhāventīti pañhesu ye maggaṃ nappaṭilabhanti, te sandhāya paṭikkhipati. Ye paṭilabhanti, te sandhāya paṭijānāti.
೩೫೧. ಸೋವಣ್ಣಮಯಾಯಾತಿ ಸುವಣ್ಣಮಯಾಯ। ಇದಂ ಪರವಾದಿಸ್ಸ ಉದಾಹರಣಂ।
351. Sovaṇṇamayāyāti suvaṇṇamayāya. Idaṃ paravādissa udāharaṇaṃ.
ಏಳಣ್ಡಿಯಾಯಾತಿ ಏಳಣ್ಡಮಯಾಯ। ಇದಂ ಸಕವಾದಿಸ್ಸ ಉದಾಹರಣಂ। ಲೋಕಿಯಂ ವೋಹರನ್ತಸ್ಸ ಲೋಕಿಯೋತಿ ಅಯಮ್ಪಿ ಏಕಾ ಲದ್ಧಿ। ಸಾ ಏತರಹಿ ಏಕಚ್ಚಾನಂ ಅನ್ಧಕಾನಂ ಲದ್ಧಿ। ಸೇಸಮೇತ್ಥ ಉತ್ತಾನತ್ಥಮೇವಾತಿ।
Eḷaṇḍiyāyāti eḷaṇḍamayāya. Idaṃ sakavādissa udāharaṇaṃ. Lokiyaṃ voharantassa lokiyoti ayampi ekā laddhi. Sā etarahi ekaccānaṃ andhakānaṃ laddhi. Sesamettha uttānatthamevāti.
ವೋಹಾರಕಥಾವಣ್ಣನಾ।
Vohārakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೯) ೧೦. ವೋಹಾರಕಥಾ • (19) 10. Vohārakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧೦. ವೋಹಾರಕಥಾವಣ್ಣನಾ • 10. Vohārakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧೦. ವೋಹಾರಕಥಾವಣ್ಣನಾ • 10. Vohārakathāvaṇṇanā
