| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
10. වොහාරකථාවණ්‌ණනා
10. Vohārakathāvaṇṇanā
347. ඉදානි වොහාරකථා නාම හොති. තත්‌ථ බුද්‌ධො භගවා ලොකුත්‌තරෙන වොහාරෙන වොහරතීති යෙසං ලද්‌ධි, සෙය්‍යථාපි එතරහි අන්‌ධකානං; තෙ සන්‌ධාය පුච්‌ඡා සකවාදිස්‌ස, ලද්‌ධිවසෙන පටිඤ්‌ඤා පරවාදිස්‌ස. ලොකුත්‌තරෙ සොතෙතිආදීනි තස්‌ස අයුත්‌තවාදීභාවදීපනත්‌ථං වුත්‌තානි. අයඤ්‌හෙත්‌ථ අධිප්‌පායො – ‘‘සද්‌දායතනමෙව තෙ ලොකුත්‌තරං, උදාහු සොතාදීනිපී’’ති.
347. Idāni vohārakathā nāma hoti. Tattha buddho bhagavā lokuttarena vohārena voharatīti yesaṃ laddhi, seyyathāpi etarahi andhakānaṃ; te sandhāya pucchā sakavādissa, laddhivasena paṭiññā paravādissa. Lokuttare sotetiādīni tassa ayuttavādībhāvadīpanatthaṃ vuttāni. Ayañhettha adhippāyo – ‘‘saddāyatanameva te lokuttaraṃ, udāhu sotādīnipī’’ti.
හඤ්‌චි බුද්‌ධස්‌ස භගවතො වොහාරො ලොකියෙ සොතෙ පටිහඤ්‌ඤතීති එත්‌ථ යදි සො ලොකුත්‌තරෙ පටිහඤ්‌ඤෙය්‍ය. ලොකුත්‌තරො සියාති එවමත්‌ථො න ගහෙතබ්‌බො. ලොකියෙ පටිහඤ්‌ඤමානස්‌ස පන ලොකුත්‌තරතා නාම නත්‌ථීති අයමෙත්‌ථාධිප්‌පායො. ලොකියෙන විඤ්‌ඤාණෙනාති එත්‌ථාපි ලොකියෙනෙවාති අත්‌ථො. ඉතරථා අනෙකන්‌තතා සියා. ලොකුත්‌තරඤ්‌හි ලොකියෙනපි ඤාණෙන ඤායතී. එවං සබ්‌බං යථානුරූපතො වෙදිතබ්‌බං. සබ්‌බෙ තෙ මග්‌ගං භාවෙන්‌තීති පඤ්‌හෙසු යෙ මග්‌ගං නප්‌පටිලභන්‌ති, තෙ සන්‌ධාය පටික්‌ඛිපති. යෙ පටිලභන්‌ති, තෙ සන්‌ධාය පටිජානාති.
Hañci buddhassa bhagavato vohāro lokiye sote paṭihaññatīti ettha yadi so lokuttare paṭihaññeyya. Lokuttaro siyāti evamattho na gahetabbo. Lokiye paṭihaññamānassa pana lokuttaratā nāma natthīti ayametthādhippāyo. Lokiyena viññāṇenāti etthāpi lokiyenevāti attho. Itarathā anekantatā siyā. Lokuttarañhi lokiyenapi ñāṇena ñāyatī. Evaṃ sabbaṃ yathānurūpato veditabbaṃ. Sabbe te maggaṃ bhāventīti pañhesu ye maggaṃ nappaṭilabhanti, te sandhāya paṭikkhipati. Ye paṭilabhanti, te sandhāya paṭijānāti.
351. සොවණ්‌ණමයායාති සුවණ්‌ණමයාය. ඉදං පරවාදිස්‌ස උදාහරණං.
351. Sovaṇṇamayāyāti suvaṇṇamayāya. Idaṃ paravādissa udāharaṇaṃ.
එළණ්‌ඩියායාති එළණ්‌ඩමයාය. ඉදං සකවාදිස්‌ස උදාහරණං. ලොකියං වොහරන්‌තස්‌ස ලොකියොති අයම්‌පි එකා ලද්‌ධි. සා එතරහි එකච්‌චානං අන්‌ධකානං ලද්‌ධි. සෙසමෙත්‌ථ උත්‌තානත්‌ථමෙවාති.
Eḷaṇḍiyāyāti eḷaṇḍamayāya. Idaṃ sakavādissa udāharaṇaṃ. Lokiyaṃ voharantassa lokiyoti ayampi ekā laddhi. Sā etarahi ekaccānaṃ andhakānaṃ laddhi. Sesamettha uttānatthamevāti.
වොහාරකථාවණ්‌ණනා.
Vohārakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (19) 10. වොහාරකථා • (19) 10. Vohārakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 10. වොහාරකථාවණ්‌ණනා • 10. Vohārakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 10. වොහාරකථාවණ්‌ණනා • 10. Vohārakathāvaṇṇanā
