| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
மஹாஸங்கா³மோ
Mahāsaṅgāmo
1. வோஹரந்தேன ஜானிதப்³பா³தி³
1. Voharantena jānitabbādi
368. ஸங்கா³மாவசரே பி⁴க்கு²னா ஸங்கே⁴ வோஹரந்தேன வத்து² ஜானிதப்³ப³ங், விபத்தி ஜானிதப்³பா³, ஆபத்தி ஜானிதப்³பா³, நிதா³னங் ஜானிதப்³ப³ங், ஆகாரோ ஜானிதப்³போ³, புப்³பா³பரங் ஜானிதப்³ப³ங், கதாகதங் ஜானிதப்³ப³ங், கம்மங் ஜானிதப்³ப³ங், அதி⁴கரணங் ஜானிதப்³ப³ங், ஸமதோ² ஜானிதப்³போ³, ந ச²ந்தா³க³தி க³ந்தப்³பா³, ந தோ³ஸாக³தி க³ந்தப்³பா³, ந மோஹாக³தி க³ந்தப்³பா³, ந ப⁴யாக³தி க³ந்தப்³பா³, ஸஞ்ஞாபனீயே டா²னே ஸஞ்ஞாபேதப்³ப³ங், நிஜ்ஜா²பனீயே டா²னே நிஜ்ஜா²பேதப்³ப³ங், பெக்க²னீயே டா²னே பெக்கி²தப்³ப³ங், பஸாத³னீயே டா²னே பஸாதே³தப்³ப³ங், லத்³த⁴பக்கொ²ம்ஹீதி பரபக்கோ² நாவஜானிதப்³போ³, ப³ஹுஸ்ஸுதொம்ஹீதி அப்பஸ்ஸுதோ நாவஜானிதப்³போ³, தே²ரதரொம்ஹீதி நவகதரோ நாவஜானிதப்³போ³, அஸம்பத்தங் ந ப்³யாஹாதப்³ப³ங், ஸம்பத்தங் த⁴ம்மதோ வினயதோ ந பரிஹாபேதப்³ப³ங், யேன த⁴ம்மேன யேன வினயேன யேன ஸத்து²ஸாஸனேன தங் அதி⁴கரணங் வூபஸம்மதி, ததா² தங் அதி⁴கரணங் வூபஸமேதப்³ப³ங்.
368. Saṅgāmāvacare bhikkhunā saṅghe voharantena vatthu jānitabbaṃ, vipatti jānitabbā, āpatti jānitabbā, nidānaṃ jānitabbaṃ, ākāro jānitabbo, pubbāparaṃ jānitabbaṃ, katākataṃ jānitabbaṃ, kammaṃ jānitabbaṃ, adhikaraṇaṃ jānitabbaṃ, samatho jānitabbo, na chandāgati gantabbā, na dosāgati gantabbā, na mohāgati gantabbā, na bhayāgati gantabbā, saññāpanīye ṭhāne saññāpetabbaṃ, nijjhāpanīye ṭhāne nijjhāpetabbaṃ, pekkhanīye ṭhāne pekkhitabbaṃ, pasādanīye ṭhāne pasādetabbaṃ, laddhapakkhomhīti parapakkho nāvajānitabbo, bahussutomhīti appassuto nāvajānitabbo, therataromhīti navakataro nāvajānitabbo, asampattaṃ na byāhātabbaṃ, sampattaṃ dhammato vinayato na parihāpetabbaṃ, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbaṃ.
369. வத்து² ஜானிதப்³ப³ந்தி அட்ட²பாராஜிகானங் 1 வத்து² ஜானிதப்³ப³ங், தேவீஸஸங்கா⁴தி³ஸேஸானங் வத்து² ஜானிதப்³ப³ங், த்³வேஅனியதானங் வத்து² ஜானிதப்³ப³ங், த்³வேசத்தாரீஸனிஸ்ஸக்³கி³யானங் வத்து² ஜானிதப்³ப³ங், அட்டா²ஸீதிஸதபாசித்தியானங் வத்து² ஜானிதப்³ப³ங், த்³வாத³ஸபாடிதே³ஸனீயானங் வத்து² ஜானிதப்³ப³ங், து³க்கடானங் வத்து² ஜானிதப்³ப³ங், து³ப்³பா⁴ஸிதானங் வத்து² ஜானிதப்³ப³ங்.
369. Vatthu jānitabbanti aṭṭhapārājikānaṃ 2 vatthu jānitabbaṃ, tevīsasaṅghādisesānaṃ vatthu jānitabbaṃ, dveaniyatānaṃ vatthu jānitabbaṃ, dvecattārīsanissaggiyānaṃ vatthu jānitabbaṃ, aṭṭhāsītisatapācittiyānaṃ vatthu jānitabbaṃ, dvādasapāṭidesanīyānaṃ vatthu jānitabbaṃ, dukkaṭānaṃ vatthu jānitabbaṃ, dubbhāsitānaṃ vatthu jānitabbaṃ.
370. விபத்தி ஜானிதப்³பா³தி ஸீலவிபத்தி ஜானிதப்³பா³, ஆசாரவிபத்தி ஜானிதப்³பா³, தி³ட்டி²விபத்தி ஜானிதப்³பா³, ஆஜீவவிபத்தி ஜானிதப்³பா³.
370.Vipatti jānitabbāti sīlavipatti jānitabbā, ācāravipatti jānitabbā, diṭṭhivipatti jānitabbā, ājīvavipatti jānitabbā.
371. ஆபத்தி ஜானிதப்³பா³தி பாராஜிகாபத்தி ஜானிதப்³பா³, ஸங்கா⁴தி³ஸேஸாபத்தி ஜானிதப்³பா³, து²ல்லச்சயாபத்தி ஜானிதப்³பா³, பாசித்தியாபத்தி ஜானிதப்³பா³, பாடிதே³ஸனீயாபத்தி ஜானிதப்³பா³, து³க்கடாபத்தி ஜானிதப்³பா³, து³ப்³பா⁴ஸிதாபத்தி ஜானிதப்³பா³.
371.Āpatti jānitabbāti pārājikāpatti jānitabbā, saṅghādisesāpatti jānitabbā, thullaccayāpatti jānitabbā, pācittiyāpatti jānitabbā, pāṭidesanīyāpatti jānitabbā, dukkaṭāpatti jānitabbā, dubbhāsitāpatti jānitabbā.
372. நிதா³னங் ஜானிதப்³ப³ந்தி அட்ட²பாராஜிகானங் நிதா³னங் ஜானிதப்³ப³ங், தேவீஸஸங்கா⁴தி³ஸேஸானங் நிதா³னங் ஜானிதப்³ப³ங், த்³வேஅனியதானங் நிதா³னங் ஜானிதப்³ப³ங், த்³வேசத்தாரீஸனிஸ்ஸக்³கி³யானங் நிதா³னங் ஜானிதப்³ப³ங், அட்டா²ஸீதிஸதபாசித்தியானங் நிதா³னங் ஜானிதப்³ப³ங், த்³வாத³ஸபாடிதே³ஸனீயானங் நிதா³னங் ஜானிதப்³ப³ங், து³க்கடானங் நிதா³னங் ஜானிதப்³ப³ங், து³ப்³பா⁴ஸிதானங் நிதா³னங் ஜானிதப்³ப³ங்.
372.Nidānaṃjānitabbanti aṭṭhapārājikānaṃ nidānaṃ jānitabbaṃ, tevīsasaṅghādisesānaṃ nidānaṃ jānitabbaṃ, dveaniyatānaṃ nidānaṃ jānitabbaṃ, dvecattārīsanissaggiyānaṃ nidānaṃ jānitabbaṃ, aṭṭhāsītisatapācittiyānaṃ nidānaṃ jānitabbaṃ, dvādasapāṭidesanīyānaṃ nidānaṃ jānitabbaṃ, dukkaṭānaṃ nidānaṃ jānitabbaṃ, dubbhāsitānaṃ nidānaṃ jānitabbaṃ.
373. ஆகாரோ ஜானிதப்³போ³தி ஸங்கோ⁴ ஆகாரதோ ஜானிதப்³போ³, க³ணோ ஆகாரதோ ஜானிதப்³போ³, புக்³க³லோ ஆகாரதோ ஜானிதப்³போ³, சோத³கோ ஆகாரதோ ஜானிதப்³போ³, சுதி³தகோ ஆகாரதோ ஜானிதப்³போ³ . ஸங்கோ⁴ ஆகாரதோ ஜானிதப்³போ³தி படிப³லோ நு கோ² அயங் ஸங்கோ⁴ இமங் அதி⁴கரணங் வூபஸமேதுங் த⁴ம்மேன வினயேன ஸத்து²ஸாஸனேன உதா³ஹு நோதி, ஏவங் ஸங்கோ⁴ ஆகாரதோ ஜானிதப்³போ³. க³ணோ ஆகாரதோ ஜானிதப்³போ³தி படிப³லோ நு கோ² அயங் க³ணோ இமங் அதி⁴கரணங் வூபஸமேதுங் த⁴ம்மேன வினயேன ஸத்து²ஸாஸனேன உதா³ஹு நோதி, ஏவங் க³ணோ ஆகாரதோ ஜானிதப்³போ³ . புக்³க³லோ ஆகாரதோ ஜானிதப்³போ³தி படிப³லோ நு கோ² அயங் புக்³க³லோ இமங் அதி⁴கரணங் வூபஸமேதுங் த⁴ம்மேன வினயேன ஸத்து²ஸாஸனேன உதா³ஹு நோதி, ஏவங் புக்³க³லோ ஆகாரதோ ஜானிதப்³போ³. சோத³கோ ஆகாரதோ ஜானிதப்³போ³தி கச்சி நு கோ² அயமாயஸ்மா பஞ்சஸு த⁴ம்மேஸு பதிட்டா²ய பரங் சோதே³தி உதா³ஹு நோதி, ஏவங் சோத³கோ ஆகாரதோ ஜானிதப்³போ³. சுதி³தகோ ஆகாரதோ ஜானிதப்³போ³தி கச்சி நு கோ² அயமாயஸ்மா த்³வீஸு த⁴ம்மேஸு பதிட்டி²தோ ஸச்சே ச அகுப்பே ச உதா³ஹு நோதி, ஏவங் சுதி³தகோ ஆகாரதோ ஜானிதப்³போ³.
373.Ākāro jānitabboti saṅgho ākārato jānitabbo, gaṇo ākārato jānitabbo, puggalo ākārato jānitabbo, codako ākārato jānitabbo, cuditako ākārato jānitabbo . Saṅgho ākārato jānitabboti paṭibalo nu kho ayaṃ saṅgho imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ saṅgho ākārato jānitabbo. Gaṇo ākārato jānitabboti paṭibalo nu kho ayaṃ gaṇo imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ gaṇo ākārato jānitabbo . Puggalo ākārato jānitabboti paṭibalo nu kho ayaṃ puggalo imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ puggalo ākārato jānitabbo. Codako ākārato jānitabboti kacci nu kho ayamāyasmā pañcasu dhammesu patiṭṭhāya paraṃ codeti udāhu noti, evaṃ codako ākārato jānitabbo. Cuditako ākārato jānitabboti kacci nu kho ayamāyasmā dvīsu dhammesu patiṭṭhito sacce ca akuppe ca udāhu noti, evaṃ cuditako ākārato jānitabbo.
374. புப்³பா³பரங் ஜானிதப்³ப³ந்தி கச்சி நு கோ² அயமாயஸ்மா வத்து²தோ வா வத்து²ங் ஸங்கமதி, விபத்திதோ வா விபத்திங் ஸங்கமதி, ஆபத்திதோ வா ஆபத்திங் ஸங்கமதி, அவஜானித்வா வா படிஜானாதி, படிஜானித்வா வா அவஜானாதி, அஞ்ஞேன வா அஞ்ஞங் படிசரதி, உதா³ஹு நோதி, ஏவங் புப்³பா³பரங் ஜானிதப்³ப³ங்.
374.Pubbāparaṃ jānitabbanti kacci nu kho ayamāyasmā vatthuto vā vatthuṃ saṅkamati, vipattito vā vipattiṃ saṅkamati, āpattito vā āpattiṃ saṅkamati, avajānitvā vā paṭijānāti, paṭijānitvā vā avajānāti, aññena vā aññaṃ paṭicarati, udāhu noti, evaṃ pubbāparaṃ jānitabbaṃ.
375. கதாகதங் ஜானிதப்³ப³ந்தி மேது²னத⁴ம்மோ ஜானிதப்³போ³, மேது²னத⁴ம்மஸ்ஸ அனுலோமங் ஜானிதப்³ப³ங், மேது²னத⁴ம்மஸ்ஸ புப்³ப³பா⁴கோ³ ஜானிதப்³போ³. மேது²னத⁴ம்மோ ஜானிதப்³போ³தி த்³வயங்த்³வயஸமாபத்தி ஜானிதப்³பா³. மேது²னத⁴ம்மஸ்ஸ அனுலோமங் ஜானிதப்³ப³ந்தி பி⁴க்கு² அத்தனோ முகே²ன பரஸ்ஸ அங்க³ஜாதங் க³ண்ஹாதி . மேது²னத⁴ம்மஸ்ஸ புப்³ப³பா⁴கோ³ ஜானிதப்³போ³தி வண்ணாவண்ணோ 3, காயஸங்ஸக்³கோ³, து³ட்டு²ல்லவாசா, அத்தகாமபாரிசரியா, வசனமனுப்பதா³னங் 4.
375.Katākataṃ jānitabbanti methunadhammo jānitabbo, methunadhammassa anulomaṃ jānitabbaṃ, methunadhammassa pubbabhāgo jānitabbo. Methunadhammo jānitabboti dvayaṃdvayasamāpatti jānitabbā. Methunadhammassa anulomaṃjānitabbanti bhikkhu attano mukhena parassa aṅgajātaṃ gaṇhāti . Methunadhammassa pubbabhāgo jānitabboti vaṇṇāvaṇṇo 5, kāyasaṃsaggo, duṭṭhullavācā, attakāmapāricariyā, vacanamanuppadānaṃ 6.
376. கம்மங் ஜானிதப்³ப³ந்தி ஸோளஸகம்மானி ஜானிதப்³பா³னி – சத்தாரி அபலோகனகம்மானி ஜானிதப்³பா³னி, சத்தாரி ஞத்திகம்மானி ஜானிதப்³பா³னி, சத்தாரி ஞத்திது³தியகம்மானி ஜானிதப்³பா³னி, சத்தாரி ஞத்திசதுத்த²கம்மானி ஜானிதப்³பா³னி.
376.Kammaṃ jānitabbanti soḷasakammāni jānitabbāni – cattāri apalokanakammāni jānitabbāni, cattāri ñattikammāni jānitabbāni, cattāri ñattidutiyakammāni jānitabbāni, cattāri ñatticatutthakammāni jānitabbāni.
377. அதி⁴கரணங் ஜானிதப்³ப³ந்தி சத்தாரி அதி⁴கரணானி ஜானிதப்³பா³னி – விவாதா³தி⁴கரணங் ஜானிதப்³ப³ங், அனுவாதா³தி⁴கரணங் ஜானிதப்³ப³ங், ஆபத்தாதி⁴கரணங் ஜானிதப்³ப³ங், கிச்சாதி⁴கரணங் ஜானிதப்³ப³ங்.
377.Adhikaraṇaṃ jānitabbanti cattāri adhikaraṇāni jānitabbāni – vivādādhikaraṇaṃ jānitabbaṃ, anuvādādhikaraṇaṃ jānitabbaṃ, āpattādhikaraṇaṃ jānitabbaṃ, kiccādhikaraṇaṃ jānitabbaṃ.
378. ஸமதோ² ஜானிதப்³போ³தி ஸத்த ஸமதா² ஜானிதப்³பா³ – ஸம்முகா²வினயோ ஜானிதப்³போ³, ஸதிவினயோ ஜானிதப்³போ³, அமூள்ஹவினயோ ஜானிதப்³போ³, படிஞ்ஞாதகரணங் ஜானிதப்³ப³ங், யேபு⁴ய்யஸிகா ஜானிதப்³பா³, தஸ்ஸபாபியஸிகா ஜானிதப்³பா³, திணவத்தா²ரகோ ஜானிதப்³போ³.
378.Samatho jānitabboti satta samathā jānitabbā – sammukhāvinayo jānitabbo, sativinayo jānitabbo, amūḷhavinayo jānitabbo, paṭiññātakaraṇaṃ jānitabbaṃ, yebhuyyasikā jānitabbā, tassapāpiyasikā jānitabbā, tiṇavatthārako jānitabbo.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / வோஹரந்தேன ஜானிதப்³பா³தி³வண்ணனா • Voharantena jānitabbādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸங்கா³மத்³வயவண்ணனா • Saṅgāmadvayavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வோஹரந்தேனஜானிதப்³பா³தி³வண்ணனா • Voharantenajānitabbādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வோஹரந்தேன ஜானிதப்³பா³தி³வண்ணனா • Voharantena jānitabbādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / வோஹரந்தேன ஜானிதப்³பா³தி³வண்ணனா • Voharantena jānitabbādivaṇṇanā
