| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
មហាសង្គាមោ
Mahāsaṅgāmo
១. វោហរន្តេន ជានិតព្ពាទិ
1. Voharantena jānitabbādi
៣៦៨. សង្គាមាវចរេ ភិក្ខុនា សង្ឃេ វោហរន្តេន វត្ថុ ជានិតព្ពំ, វិបត្តិ ជានិតព្ពា, អាបត្តិ ជានិតព្ពា, និទានំ ជានិតព្ពំ, អាការោ ជានិតព្ពោ, បុព្ពាបរំ ជានិតព្ពំ, កតាកតំ ជានិតព្ពំ, កម្មំ ជានិតព្ពំ, អធិករណំ ជានិតព្ពំ, សមថោ ជានិតព្ពោ, ន ឆន្ទាគតិ គន្តព្ពា, ន ទោសាគតិ គន្តព្ពា, ន មោហាគតិ គន្តព្ពា, ន ភយាគតិ គន្តព្ពា, សញ្ញាបនីយេ ឋានេ សញ្ញាបេតព្ពំ, និជ្ឈាបនីយេ ឋានេ និជ្ឈាបេតព្ពំ, បេក្ខនីយេ ឋានេ បេក្ខិតព្ពំ, បសាទនីយេ ឋានេ បសាទេតព្ពំ, លទ្ធបក្ខោម្ហីតិ បរបក្ខោ នាវជានិតព្ពោ, ពហុស្សុតោម្ហីតិ អប្បស្សុតោ នាវជានិតព្ពោ, ថេរតរោម្ហីតិ នវកតរោ នាវជានិតព្ពោ, អសម្បត្តំ ន ព្យាហាតព្ពំ, សម្បត្តំ ធម្មតោ វិនយតោ ន បរិហាបេតព្ពំ, យេន ធម្មេន យេន វិនយេន យេន សត្ថុសាសនេន តំ អធិករណំ វូបសម្មតិ, តថា តំ អធិករណំ វូបសមេតព្ពំ។
368. Saṅgāmāvacare bhikkhunā saṅghe voharantena vatthu jānitabbaṃ, vipatti jānitabbā, āpatti jānitabbā, nidānaṃ jānitabbaṃ, ākāro jānitabbo, pubbāparaṃ jānitabbaṃ, katākataṃ jānitabbaṃ, kammaṃ jānitabbaṃ, adhikaraṇaṃ jānitabbaṃ, samatho jānitabbo, na chandāgati gantabbā, na dosāgati gantabbā, na mohāgati gantabbā, na bhayāgati gantabbā, saññāpanīye ṭhāne saññāpetabbaṃ, nijjhāpanīye ṭhāne nijjhāpetabbaṃ, pekkhanīye ṭhāne pekkhitabbaṃ, pasādanīye ṭhāne pasādetabbaṃ, laddhapakkhomhīti parapakkho nāvajānitabbo, bahussutomhīti appassuto nāvajānitabbo, therataromhīti navakataro nāvajānitabbo, asampattaṃ na byāhātabbaṃ, sampattaṃ dhammato vinayato na parihāpetabbaṃ, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbaṃ.
៣៦៩. វត្ថុ ជានិតព្ពន្តិ អដ្ឋបារាជិកានំ 1 វត្ថុ ជានិតព្ពំ, តេវីសសង្ឃាទិសេសានំ វត្ថុ ជានិតព្ពំ, ទ្វេអនិយតានំ វត្ថុ ជានិតព្ពំ, ទ្វេចត្តារីសនិស្សគ្គិយានំ វត្ថុ ជានិតព្ពំ, អដ្ឋាសីតិសតបាចិត្តិយានំ វត្ថុ ជានិតព្ពំ, ទ្វាទសបាដិទេសនីយានំ វត្ថុ ជានិតព្ពំ, ទុក្កដានំ វត្ថុ ជានិតព្ពំ, ទុព្ភាសិតានំ វត្ថុ ជានិតព្ពំ។
369. Vatthu jānitabbanti aṭṭhapārājikānaṃ 2 vatthu jānitabbaṃ, tevīsasaṅghādisesānaṃ vatthu jānitabbaṃ, dveaniyatānaṃ vatthu jānitabbaṃ, dvecattārīsanissaggiyānaṃ vatthu jānitabbaṃ, aṭṭhāsītisatapācittiyānaṃ vatthu jānitabbaṃ, dvādasapāṭidesanīyānaṃ vatthu jānitabbaṃ, dukkaṭānaṃ vatthu jānitabbaṃ, dubbhāsitānaṃ vatthu jānitabbaṃ.
៣៧០. វិបត្តិ ជានិតព្ពាតិ សីលវិបត្តិ ជានិតព្ពា, អាចារវិបត្តិ ជានិតព្ពា, ទិដ្ឋិវិបត្តិ ជានិតព្ពា, អាជីវវិបត្តិ ជានិតព្ពា។
370.Vipatti jānitabbāti sīlavipatti jānitabbā, ācāravipatti jānitabbā, diṭṭhivipatti jānitabbā, ājīvavipatti jānitabbā.
៣៧១. អាបត្តិ ជានិតព្ពាតិ បារាជិកាបត្តិ ជានិតព្ពា, សង្ឃាទិសេសាបត្តិ ជានិតព្ពា, ថុល្លច្ចយាបត្តិ ជានិតព្ពា, បាចិត្តិយាបត្តិ ជានិតព្ពា, បាដិទេសនីយាបត្តិ ជានិតព្ពា, ទុក្កដាបត្តិ ជានិតព្ពា, ទុព្ភាសិតាបត្តិ ជានិតព្ពា។
371.Āpatti jānitabbāti pārājikāpatti jānitabbā, saṅghādisesāpatti jānitabbā, thullaccayāpatti jānitabbā, pācittiyāpatti jānitabbā, pāṭidesanīyāpatti jānitabbā, dukkaṭāpatti jānitabbā, dubbhāsitāpatti jānitabbā.
៣៧២. និទានំ ជានិតព្ពន្តិ អដ្ឋបារាជិកានំ និទានំ ជានិតព្ពំ, តេវីសសង្ឃាទិសេសានំ និទានំ ជានិតព្ពំ, ទ្វេអនិយតានំ និទានំ ជានិតព្ពំ, ទ្វេចត្តារីសនិស្សគ្គិយានំ និទានំ ជានិតព្ពំ, អដ្ឋាសីតិសតបាចិត្តិយានំ និទានំ ជានិតព្ពំ, ទ្វាទសបាដិទេសនីយានំ និទានំ ជានិតព្ពំ, ទុក្កដានំ និទានំ ជានិតព្ពំ, ទុព្ភាសិតានំ និទានំ ជានិតព្ពំ។
372.Nidānaṃjānitabbanti aṭṭhapārājikānaṃ nidānaṃ jānitabbaṃ, tevīsasaṅghādisesānaṃ nidānaṃ jānitabbaṃ, dveaniyatānaṃ nidānaṃ jānitabbaṃ, dvecattārīsanissaggiyānaṃ nidānaṃ jānitabbaṃ, aṭṭhāsītisatapācittiyānaṃ nidānaṃ jānitabbaṃ, dvādasapāṭidesanīyānaṃ nidānaṃ jānitabbaṃ, dukkaṭānaṃ nidānaṃ jānitabbaṃ, dubbhāsitānaṃ nidānaṃ jānitabbaṃ.
៣៧៣. អាការោ ជានិតព្ពោតិ សង្ឃោ អាការតោ ជានិតព្ពោ, គណោ អាការតោ ជានិតព្ពោ, បុគ្គលោ អាការតោ ជានិតព្ពោ, ចោទកោ អាការតោ ជានិតព្ពោ, ចុទិតកោ អាការតោ ជានិតព្ពោ ។ សង្ឃោ អាការតោ ជានិតព្ពោតិ បដិពលោ នុ ខោ អយំ សង្ឃោ ឥមំ អធិករណំ វូបសមេតុំ ធម្មេន វិនយេន សត្ថុសាសនេន ឧទាហុ នោតិ, ឯវំ សង្ឃោ អាការតោ ជានិតព្ពោ។ គណោ អាការតោ ជានិតព្ពោតិ បដិពលោ នុ ខោ អយំ គណោ ឥមំ អធិករណំ វូបសមេតុំ ធម្មេន វិនយេន សត្ថុសាសនេន ឧទាហុ នោតិ, ឯវំ គណោ អាការតោ ជានិតព្ពោ ។ បុគ្គលោ អាការតោ ជានិតព្ពោតិ បដិពលោ នុ ខោ អយំ បុគ្គលោ ឥមំ អធិករណំ វូបសមេតុំ ធម្មេន វិនយេន សត្ថុសាសនេន ឧទាហុ នោតិ, ឯវំ បុគ្គលោ អាការតោ ជានិតព្ពោ។ ចោទកោ អាការតោ ជានិតព្ពោតិ កច្ចិ នុ ខោ អយមាយស្មា បញ្ចសុ ធម្មេសុ បតិដ្ឋាយ បរំ ចោទេតិ ឧទាហុ នោតិ, ឯវំ ចោទកោ អាការតោ ជានិតព្ពោ។ ចុទិតកោ អាការតោ ជានិតព្ពោតិ កច្ចិ នុ ខោ អយមាយស្មា ទ្វីសុ ធម្មេសុ បតិដ្ឋិតោ សច្ចេ ច អកុប្បេ ច ឧទាហុ នោតិ, ឯវំ ចុទិតកោ អាការតោ ជានិតព្ពោ។
373.Ākāro jānitabboti saṅgho ākārato jānitabbo, gaṇo ākārato jānitabbo, puggalo ākārato jānitabbo, codako ākārato jānitabbo, cuditako ākārato jānitabbo . Saṅgho ākārato jānitabboti paṭibalo nu kho ayaṃ saṅgho imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ saṅgho ākārato jānitabbo. Gaṇo ākārato jānitabboti paṭibalo nu kho ayaṃ gaṇo imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ gaṇo ākārato jānitabbo . Puggalo ākārato jānitabboti paṭibalo nu kho ayaṃ puggalo imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ puggalo ākārato jānitabbo. Codako ākārato jānitabboti kacci nu kho ayamāyasmā pañcasu dhammesu patiṭṭhāya paraṃ codeti udāhu noti, evaṃ codako ākārato jānitabbo. Cuditako ākārato jānitabboti kacci nu kho ayamāyasmā dvīsu dhammesu patiṭṭhito sacce ca akuppe ca udāhu noti, evaṃ cuditako ākārato jānitabbo.
៣៧៤. បុព្ពាបរំ ជានិតព្ពន្តិ កច្ចិ នុ ខោ អយមាយស្មា វត្ថុតោ វា វត្ថុំ សង្កមតិ, វិបត្តិតោ វា វិបត្តិំ សង្កមតិ, អាបត្តិតោ វា អាបត្តិំ សង្កមតិ, អវជានិត្វា វា បដិជានាតិ, បដិជានិត្វា វា អវជានាតិ, អញ្ញេន វា អញ្ញំ បដិចរតិ, ឧទាហុ នោតិ, ឯវំ បុព្ពាបរំ ជានិតព្ពំ។
374.Pubbāparaṃ jānitabbanti kacci nu kho ayamāyasmā vatthuto vā vatthuṃ saṅkamati, vipattito vā vipattiṃ saṅkamati, āpattito vā āpattiṃ saṅkamati, avajānitvā vā paṭijānāti, paṭijānitvā vā avajānāti, aññena vā aññaṃ paṭicarati, udāhu noti, evaṃ pubbāparaṃ jānitabbaṃ.
៣៧៥. កតាកតំ ជានិតព្ពន្តិ មេថុនធម្មោ ជានិតព្ពោ, មេថុនធម្មស្ស អនុលោមំ ជានិតព្ពំ, មេថុនធម្មស្ស បុព្ពភាគោ ជានិតព្ពោ។ មេថុនធម្មោ ជានិតព្ពោតិ ទ្វយំទ្វយសមាបត្តិ ជានិតព្ពា។ មេថុនធម្មស្ស អនុលោមំ ជានិតព្ពន្តិ ភិក្ខុ អត្តនោ មុខេន បរស្ស អង្គជាតំ គណ្ហាតិ ។ មេថុនធម្មស្ស បុព្ពភាគោ ជានិតព្ពោតិ វណ្ណាវណ្ណោ 3, កាយសំសគ្គោ, ទុដ្ឋុល្លវាចា, អត្តកាមបារិចរិយា, វចនមនុប្បទានំ 4។
375.Katākataṃ jānitabbanti methunadhammo jānitabbo, methunadhammassa anulomaṃ jānitabbaṃ, methunadhammassa pubbabhāgo jānitabbo. Methunadhammo jānitabboti dvayaṃdvayasamāpatti jānitabbā. Methunadhammassa anulomaṃjānitabbanti bhikkhu attano mukhena parassa aṅgajātaṃ gaṇhāti . Methunadhammassa pubbabhāgo jānitabboti vaṇṇāvaṇṇo 5, kāyasaṃsaggo, duṭṭhullavācā, attakāmapāricariyā, vacanamanuppadānaṃ 6.
៣៧៦. កម្មំ ជានិតព្ពន្តិ សោឡសកម្មានិ ជានិតព្ពានិ – ចត្តារិ អបលោកនកម្មានិ ជានិតព្ពានិ, ចត្តារិ ញត្តិកម្មានិ ជានិតព្ពានិ, ចត្តារិ ញត្តិទុតិយកម្មានិ ជានិតព្ពានិ, ចត្តារិ ញត្តិចតុត្ថកម្មានិ ជានិតព្ពានិ។
376.Kammaṃ jānitabbanti soḷasakammāni jānitabbāni – cattāri apalokanakammāni jānitabbāni, cattāri ñattikammāni jānitabbāni, cattāri ñattidutiyakammāni jānitabbāni, cattāri ñatticatutthakammāni jānitabbāni.
៣៧៧. អធិករណំ ជានិតព្ពន្តិ ចត្តារិ អធិករណានិ ជានិតព្ពានិ – វិវាទាធិករណំ ជានិតព្ពំ, អនុវាទាធិករណំ ជានិតព្ពំ, អាបត្តាធិករណំ ជានិតព្ពំ, កិច្ចាធិករណំ ជានិតព្ពំ។
377.Adhikaraṇaṃ jānitabbanti cattāri adhikaraṇāni jānitabbāni – vivādādhikaraṇaṃ jānitabbaṃ, anuvādādhikaraṇaṃ jānitabbaṃ, āpattādhikaraṇaṃ jānitabbaṃ, kiccādhikaraṇaṃ jānitabbaṃ.
៣៧៨. សមថោ ជានិតព្ពោតិ សត្ត សមថា ជានិតព្ពា – សម្មុខាវិនយោ ជានិតព្ពោ, សតិវិនយោ ជានិតព្ពោ, អមូឡ្ហវិនយោ ជានិតព្ពោ, បដិញ្ញាតករណំ ជានិតព្ពំ, យេភុយ្យសិកា ជានិតព្ពា, តស្សបាបិយសិកា ជានិតព្ពា, តិណវត្ថារកោ ជានិតព្ពោ។
378.Samatho jānitabboti satta samathā jānitabbā – sammukhāvinayo jānitabbo, sativinayo jānitabbo, amūḷhavinayo jānitabbo, paṭiññātakaraṇaṃ jānitabbaṃ, yebhuyyasikā jānitabbā, tassapāpiyasikā jānitabbā, tiṇavatthārako jānitabbo.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / វោហរន្តេន ជានិតព្ពាទិវណ្ណនា • Voharantena jānitabbādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / សង្គាមទ្វយវណ្ណនា • Saṅgāmadvayavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / វោហរន្តេនជានិតព្ពាទិវណ្ណនា • Voharantenajānitabbādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / វោហរន្តេន ជានិតព្ពាទិវណ្ណនា • Voharantena jānitabbādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / វោហរន្តេន ជានិតព្ពាទិវណ្ណនា • Voharantena jānitabbādivaṇṇanā
