| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
မဟာသင္ဂာမော
Mahāsaṅgāmo
၁. ဝောဟရန္တေန ဇာနိတဗ္ဗာဒိ
1. Voharantena jānitabbādi
၃၆၈. သင္ဂာမာဝစရေ ဘိက္ခုနာ သင္ဃေ ဝောဟရန္တေန ဝတ္ထု ဇာနိတဗ္ဗံ, ဝိပတ္တိ ဇာနိတဗ္ဗာ, အာပတ္တိ ဇာနိတဗ္ဗာ, နိဒာနံ ဇာနိတဗ္ဗံ, အာကာရော ဇာနိတဗ္ဗော, ပုဗ္ဗာပရံ ဇာနိတဗ္ဗံ, ကတာကတံ ဇာနိတဗ္ဗံ, ကမ္မံ ဇာနိတဗ္ဗံ, အဓိကရဏံ ဇာနိတဗ္ဗံ, သမထော ဇာနိတဗ္ဗော, န ဆန္ဒာဂတိ ဂန္တဗ္ဗာ, န ဒောသာဂတိ ဂန္တဗ္ဗာ, န မောဟာဂတိ ဂန္တဗ္ဗာ, န ဘယာဂတိ ဂန္တဗ္ဗာ, သညာပနီယေ ဌာနေ သညာပေတဗ္ဗံ, နိဇ္ဈာပနီယေ ဌာနေ နိဇ္ဈာပေတဗ္ဗံ, ပေက္ခနီယေ ဌာနေ ပေက္ခိတဗ္ဗံ, ပသာဒနီယေ ဌာနေ ပသာဒေတဗ္ဗံ, လဒ္ဓပက္ခောမ္ဟီတိ ပရပက္ခော နာဝဇာနိတဗ္ဗော, ဗဟုသ္သုတောမ္ဟီတိ အပ္ပသ္သုတော နာဝဇာနိတဗ္ဗော, ထေရတရောမ္ဟီတိ နဝကတရော နာဝဇာနိတဗ္ဗော, အသမ္ပတ္တံ န ဗ္ယာဟာတဗ္ဗံ, သမ္ပတ္တံ ဓမ္မတော ဝိနယတော န ပရိဟာပေတဗ္ဗံ, ယေန ဓမ္မေန ယေန ဝိနယေန ယေန သတ္ထုသာသနေန တံ အဓိကရဏံ ဝူပသမ္မတိ, တထာ တံ အဓိကရဏံ ဝူပသမေတဗ္ဗံ။
368. Saṅgāmāvacare bhikkhunā saṅghe voharantena vatthu jānitabbaṃ, vipatti jānitabbā, āpatti jānitabbā, nidānaṃ jānitabbaṃ, ākāro jānitabbo, pubbāparaṃ jānitabbaṃ, katākataṃ jānitabbaṃ, kammaṃ jānitabbaṃ, adhikaraṇaṃ jānitabbaṃ, samatho jānitabbo, na chandāgati gantabbā, na dosāgati gantabbā, na mohāgati gantabbā, na bhayāgati gantabbā, saññāpanīye ṭhāne saññāpetabbaṃ, nijjhāpanīye ṭhāne nijjhāpetabbaṃ, pekkhanīye ṭhāne pekkhitabbaṃ, pasādanīye ṭhāne pasādetabbaṃ, laddhapakkhomhīti parapakkho nāvajānitabbo, bahussutomhīti appassuto nāvajānitabbo, therataromhīti navakataro nāvajānitabbo, asampattaṃ na byāhātabbaṃ, sampattaṃ dhammato vinayato na parihāpetabbaṃ, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbaṃ.
၃၆၉. ဝတ္ထု ဇာနိတဗ္ဗန္တိ အဋ္ဌပာရာဇိကာနံ 1 ဝတ္ထု ဇာနိတဗ္ဗံ, တေဝီသသင္ဃာဒိသေသာနံ ဝတ္ထု ဇာနိတဗ္ဗံ, ဒ္ဝေအနိယတာနံ ဝတ္ထု ဇာနိတဗ္ဗံ, ဒ္ဝေစတ္တာရီသနိသ္သဂ္ဂိယာနံ ဝတ္ထု ဇာနိတဗ္ဗံ, အဋ္ဌာသီတိသတပာစိတ္တိယာနံ ဝတ္ထု ဇာနိတဗ္ဗံ, ဒ္ဝာဒသပာဋိဒေသနီယာနံ ဝတ္ထု ဇာနိတဗ္ဗံ, ဒုက္ကဋာနံ ဝတ္ထု ဇာနိတဗ္ဗံ, ဒုဗ္ဘာသိတာနံ ဝတ္ထု ဇာနိတဗ္ဗံ။
369. Vatthu jānitabbanti aṭṭhapārājikānaṃ 2 vatthu jānitabbaṃ, tevīsasaṅghādisesānaṃ vatthu jānitabbaṃ, dveaniyatānaṃ vatthu jānitabbaṃ, dvecattārīsanissaggiyānaṃ vatthu jānitabbaṃ, aṭṭhāsītisatapācittiyānaṃ vatthu jānitabbaṃ, dvādasapāṭidesanīyānaṃ vatthu jānitabbaṃ, dukkaṭānaṃ vatthu jānitabbaṃ, dubbhāsitānaṃ vatthu jānitabbaṃ.
၃၇၀. ဝိပတ္တိ ဇာနိတဗ္ဗာတိ သီလဝိပတ္တိ ဇာနိတဗ္ဗာ, အာစာရဝိပတ္တိ ဇာနိတဗ္ဗာ, ဒိဋ္ဌိဝိပတ္တိ ဇာနိတဗ္ဗာ, အာဇီဝဝိပတ္တိ ဇာနိတဗ္ဗာ။
370.Vipatti jānitabbāti sīlavipatti jānitabbā, ācāravipatti jānitabbā, diṭṭhivipatti jānitabbā, ājīvavipatti jānitabbā.
၃၇၁. အာပတ္တိ ဇာနိတဗ္ဗာတိ ပာရာဇိကာပတ္တိ ဇာနိတဗ္ဗာ, သင္ဃာဒိသေသာပတ္တိ ဇာနိတဗ္ဗာ, ထုလ္လစ္စယာပတ္တိ ဇာနိတဗ္ဗာ, ပာစိတ္တိယာပတ္တိ ဇာနိတဗ္ဗာ, ပာဋိဒေသနီယာပတ္တိ ဇာနိတဗ္ဗာ, ဒုက္ကဋာပတ္တိ ဇာနိတဗ္ဗာ, ဒုဗ္ဘာသိတာပတ္တိ ဇာနိတဗ္ဗာ။
371.Āpatti jānitabbāti pārājikāpatti jānitabbā, saṅghādisesāpatti jānitabbā, thullaccayāpatti jānitabbā, pācittiyāpatti jānitabbā, pāṭidesanīyāpatti jānitabbā, dukkaṭāpatti jānitabbā, dubbhāsitāpatti jānitabbā.
၃၇၂. နိဒာနံ ဇာနိတဗ္ဗန္တိ အဋ္ဌပာရာဇိကာနံ နိဒာနံ ဇာနိတဗ္ဗံ, တေဝီသသင္ဃာဒိသေသာနံ နိဒာနံ ဇာနိတဗ္ဗံ, ဒ္ဝေအနိယတာနံ နိဒာနံ ဇာနိတဗ္ဗံ, ဒ္ဝေစတ္တာရီသနိသ္သဂ္ဂိယာနံ နိဒာနံ ဇာနိတဗ္ဗံ, အဋ္ဌာသီတိသတပာစိတ္တိယာနံ နိဒာနံ ဇာနိတဗ္ဗံ, ဒ္ဝာဒသပာဋိဒေသနီယာနံ နိဒာနံ ဇာနိတဗ္ဗံ, ဒုက္ကဋာနံ နိဒာနံ ဇာနိတဗ္ဗံ, ဒုဗ္ဘာသိတာနံ နိဒာနံ ဇာနိတဗ္ဗံ။
372.Nidānaṃjānitabbanti aṭṭhapārājikānaṃ nidānaṃ jānitabbaṃ, tevīsasaṅghādisesānaṃ nidānaṃ jānitabbaṃ, dveaniyatānaṃ nidānaṃ jānitabbaṃ, dvecattārīsanissaggiyānaṃ nidānaṃ jānitabbaṃ, aṭṭhāsītisatapācittiyānaṃ nidānaṃ jānitabbaṃ, dvādasapāṭidesanīyānaṃ nidānaṃ jānitabbaṃ, dukkaṭānaṃ nidānaṃ jānitabbaṃ, dubbhāsitānaṃ nidānaṃ jānitabbaṃ.
၃၇၃. အာကာရော ဇာနိတဗ္ဗောတိ သင္ဃော အာကာရတော ဇာနိတဗ္ဗော, ဂဏော အာကာရတော ဇာနိတဗ္ဗော, ပုဂ္ဂလော အာကာရတော ဇာနိတဗ္ဗော, စောဒကော အာကာရတော ဇာနိတဗ္ဗော, စုဒိတကော အာကာရတော ဇာနိတဗ္ဗော ။ သင္ဃော အာကာရတော ဇာနိတဗ္ဗောတိ ပဋိဗလော နု ခော အယံ သင္ဃော ဣမံ အဓိကရဏံ ဝူပသမေတုံ ဓမ္မေန ဝိနယေန သတ္ထုသာသနေန ဥဒာဟု နောတိ, ဧဝံ သင္ဃော အာကာရတော ဇာနိတဗ္ဗော။ ဂဏော အာကာရတော ဇာနိတဗ္ဗောတိ ပဋိဗလော နု ခော အယံ ဂဏော ဣမံ အဓိကရဏံ ဝူပသမေတုံ ဓမ္မေန ဝိနယေန သတ္ထုသာသနေန ဥဒာဟု နောတိ, ဧဝံ ဂဏော အာကာရတော ဇာနိတဗ္ဗော ။ ပုဂ္ဂလော အာကာရတော ဇာနိတဗ္ဗောတိ ပဋိဗလော နု ခော အယံ ပုဂ္ဂလော ဣမံ အဓိကရဏံ ဝူပသမေတုံ ဓမ္မေန ဝိနယေန သတ္ထုသာသနေန ဥဒာဟု နောတိ, ဧဝံ ပုဂ္ဂလော အာကာရတော ဇာနိတဗ္ဗော။ စောဒကော အာကာရတော ဇာနိတဗ္ဗောတိ ကစ္စိ နု ခော အယမာယသ္မာ ပဉ္စသု ဓမ္မေသု ပတိဋ္ဌာယ ပရံ စောဒေတိ ဥဒာဟု နောတိ, ဧဝံ စောဒကော အာကာရတော ဇာနိတဗ္ဗော။ စုဒိတကော အာကာရတော ဇာနိတဗ္ဗောတိ ကစ္စိ နု ခော အယမာယသ္မာ ဒ္ဝီသု ဓမ္မေသု ပတိဋ္ဌိတော သစ္စေ စ အကုပ္ပေ စ ဥဒာဟု နောတိ, ဧဝံ စုဒိတကော အာကာရတော ဇာနိတဗ္ဗော။
373.Ākāro jānitabboti saṅgho ākārato jānitabbo, gaṇo ākārato jānitabbo, puggalo ākārato jānitabbo, codako ākārato jānitabbo, cuditako ākārato jānitabbo . Saṅgho ākārato jānitabboti paṭibalo nu kho ayaṃ saṅgho imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ saṅgho ākārato jānitabbo. Gaṇo ākārato jānitabboti paṭibalo nu kho ayaṃ gaṇo imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ gaṇo ākārato jānitabbo . Puggalo ākārato jānitabboti paṭibalo nu kho ayaṃ puggalo imaṃ adhikaraṇaṃ vūpasametuṃ dhammena vinayena satthusāsanena udāhu noti, evaṃ puggalo ākārato jānitabbo. Codako ākārato jānitabboti kacci nu kho ayamāyasmā pañcasu dhammesu patiṭṭhāya paraṃ codeti udāhu noti, evaṃ codako ākārato jānitabbo. Cuditako ākārato jānitabboti kacci nu kho ayamāyasmā dvīsu dhammesu patiṭṭhito sacce ca akuppe ca udāhu noti, evaṃ cuditako ākārato jānitabbo.
၃၇၄. ပုဗ္ဗာပရံ ဇာနိတဗ္ဗန္တိ ကစ္စိ နု ခော အယမာယသ္မာ ဝတ္ထုတော ဝာ ဝတ္ထုံ သင္ကမတိ, ဝိပတ္တိတော ဝာ ဝိပတ္တိံ သင္ကမတိ, အာပတ္တိတော ဝာ အာပတ္တိံ သင္ကမတိ, အဝဇာနိတ္ဝာ ဝာ ပဋိဇာနာတိ, ပဋိဇာနိတ္ဝာ ဝာ အဝဇာနာတိ, အညေန ဝာ အညံ ပဋိစရတိ, ဥဒာဟု နောတိ, ဧဝံ ပုဗ္ဗာပရံ ဇာနိတဗ္ဗံ။
374.Pubbāparaṃ jānitabbanti kacci nu kho ayamāyasmā vatthuto vā vatthuṃ saṅkamati, vipattito vā vipattiṃ saṅkamati, āpattito vā āpattiṃ saṅkamati, avajānitvā vā paṭijānāti, paṭijānitvā vā avajānāti, aññena vā aññaṃ paṭicarati, udāhu noti, evaṃ pubbāparaṃ jānitabbaṃ.
၃၇၅. ကတာကတံ ဇာနိတဗ္ဗန္တိ မေထုနဓမ္မော ဇာနိတဗ္ဗော, မေထုနဓမ္မသ္သ အနုလောမံ ဇာနိတဗ္ဗံ, မေထုနဓမ္မသ္သ ပုဗ္ဗဘာဂော ဇာနိတဗ္ဗော။ မေထုနဓမ္မော ဇာနိတဗ္ဗောတိ ဒ္ဝယံဒ္ဝယသမာပတ္တိ ဇာနိတဗ္ဗာ။ မေထုနဓမ္မသ္သ အနုလောမံ ဇာနိတဗ္ဗန္တိ ဘိက္ခု အတ္တနော မုခေန ပရသ္သ အင္ဂဇာတံ ဂဏ္ဟာတိ ။ မေထုနဓမ္မသ္သ ပုဗ္ဗဘာဂော ဇာနိတဗ္ဗောတိ ဝဏ္ဏာဝဏ္ဏော 3, ကာယသံသဂ္ဂော, ဒုဋ္ဌုလ္လဝာစာ, အတ္တကာမပာရိစရိယာ, ဝစနမနုပ္ပဒာနံ 4။
375.Katākataṃ jānitabbanti methunadhammo jānitabbo, methunadhammassa anulomaṃ jānitabbaṃ, methunadhammassa pubbabhāgo jānitabbo. Methunadhammo jānitabboti dvayaṃdvayasamāpatti jānitabbā. Methunadhammassa anulomaṃjānitabbanti bhikkhu attano mukhena parassa aṅgajātaṃ gaṇhāti . Methunadhammassa pubbabhāgo jānitabboti vaṇṇāvaṇṇo 5, kāyasaṃsaggo, duṭṭhullavācā, attakāmapāricariyā, vacanamanuppadānaṃ 6.
၃၇၆. ကမ္မံ ဇာနိတဗ္ဗန္တိ သောဠသကမ္မာနိ ဇာနိတဗ္ဗာနိ – စတ္တာရိ အပလောကနကမ္မာနိ ဇာနိတဗ္ဗာနိ, စတ္တာရိ ဉတ္တိကမ္မာနိ ဇာနိတဗ္ဗာနိ, စတ္တာရိ ဉတ္တိဒုတိယကမ္မာနိ ဇာနိတဗ္ဗာနိ, စတ္တာရိ ဉတ္တိစတုတ္ထကမ္မာနိ ဇာနိတဗ္ဗာနိ။
376.Kammaṃ jānitabbanti soḷasakammāni jānitabbāni – cattāri apalokanakammāni jānitabbāni, cattāri ñattikammāni jānitabbāni, cattāri ñattidutiyakammāni jānitabbāni, cattāri ñatticatutthakammāni jānitabbāni.
၃၇၇. အဓိကရဏံ ဇာနိတဗ္ဗန္တိ စတ္တာရိ အဓိကရဏာနိ ဇာနိတဗ္ဗာနိ – ဝိဝာဒာဓိကရဏံ ဇာနိတဗ္ဗံ, အနုဝာဒာဓိကရဏံ ဇာနိတဗ္ဗံ, အာပတ္တာဓိကရဏံ ဇာနိတဗ္ဗံ, ကိစ္စာဓိကရဏံ ဇာနိတဗ္ဗံ။
377.Adhikaraṇaṃ jānitabbanti cattāri adhikaraṇāni jānitabbāni – vivādādhikaraṇaṃ jānitabbaṃ, anuvādādhikaraṇaṃ jānitabbaṃ, āpattādhikaraṇaṃ jānitabbaṃ, kiccādhikaraṇaṃ jānitabbaṃ.
၃၇၈. သမထော ဇာနိတဗ္ဗောတိ သတ္တ သမထာ ဇာနိတဗ္ဗာ – သမ္မုခာဝိနယော ဇာနိတဗ္ဗော, သတိဝိနယော ဇာနိတဗ္ဗော, အမူဠ္ဟဝိနယော ဇာနိတဗ္ဗော, ပဋိညာတကရဏံ ဇာနိတဗ္ဗံ, ယေဘုယ္ယသိကာ ဇာနိတဗ္ဗာ, တသ္သပာပိယသိကာ ဇာနိတဗ္ဗာ, တိဏဝတ္ထာရကော ဇာနိတဗ္ဗော။
378.Samatho jānitabboti satta samathā jānitabbā – sammukhāvinayo jānitabbo, sativinayo jānitabbo, amūḷhavinayo jānitabbo, paṭiññātakaraṇaṃ jānitabbaṃ, yebhuyyasikā jānitabbā, tassapāpiyasikā jānitabbā, tiṇavatthārako jānitabbo.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ဝောဟရန္တေန ဇာနိတဗ္ဗာဒိဝဏ္ဏနာ • Voharantena jānitabbādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သင္ဂာမဒ္ဝယဝဏ္ဏနာ • Saṅgāmadvayavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဝောဟရန္တေနဇာနိတဗ္ဗာဒိဝဏ္ဏနာ • Voharantenajānitabbādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဝောဟရန္တေန ဇာနိတဗ္ဗာဒိဝဏ္ဏနာ • Voharantena jānitabbādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဝောဟရန္တေန ဇာနိတဗ္ဗာဒိဝဏ္ဏနာ • Voharantena jānitabbādivaṇṇanā
