| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
வோஹாரவக்³க³வண்ணனா
Vohāravaggavaṇṇanā
424. ‘‘நேவ தே³ஸனாய ந வுட்டா²னேனா’’தி இத³ங் பாராஜிகாபத்திங் ஸந்தா⁴ய வுத்தங். தோ³ஸானுரூபந்தி வத்து²ஸங்கா²தஸ்ஸ தோ³ஸஸ்ஸ அனுரூபங்.
424. ‘‘Neva desanāya na vuṭṭhānenā’’ti idaṃ pārājikāpattiṃ sandhāya vuttaṃ. Dosānurūpanti vatthusaṅkhātassa dosassa anurūpaṃ.
பயோக³ங் ந ஜானாதீதி எத்த² ஸசே பயோகோ³ மூலேன விஸதி³ஸோ ஹுத்வா பி⁴ன்னோ ஹோதி, ஏவங் ஸதி மூலபயோக³ந்தி ந வத்தப்³ப³ந்தி ஆஹ ‘‘அதி⁴கரணானங் ஹீ’’திஆதி³. ஹீதி ஸச்சங், யஸ்மா வா. மூலமேவ பயோகா³ நாம ஹொந்தி, ந அஞ்ஞந்தி அதி⁴ப்பாயோ.
Payogaṃ na jānātīti ettha sace payogo mūlena visadiso hutvā bhinno hoti, evaṃ sati mūlapayoganti na vattabbanti āha ‘‘adhikaraṇānaṃ hī’’tiādi. Hīti saccaṃ, yasmā vā. Mūlameva payogā nāma honti, na aññanti adhippāyo.
காதப்³ப³ந்தி ந ஜானாதீதி காதப்³ப³ங் இதி கம்மஸ்ஸ கரணங் ந ஜானாதீதி யோஜனா. வத்தூ²தி ப⁴ண்ட³னகலஹாதி³வத்து², நியஸ்ஸாதீ³னங் வத்தூ²தி ஸம்ப³ந்தோ⁴ . சதுன்னந்தி தஜ்ஜனீயனியஸ்ஸபப்³பா³ஜனீயபடிஸாரணீயவஸேன சதுன்னங். யாசதீதி ஸங்க⁴ங் கம்மஸ்ஸ வூபஸமங் யாசதி.
Kātabbanti na jānātīti kātabbaṃ iti kammassa karaṇaṃ na jānātīti yojanā. Vatthūti bhaṇḍanakalahādivatthu, niyassādīnaṃ vatthūti sambandho . Catunnanti tajjanīyaniyassapabbājanīyapaṭisāraṇīyavasena catunnaṃ. Yācatīti saṅghaṃ kammassa vūpasamaṃ yācati.
வத்து²ந்தி எத்த² ஆபத்திக்க²ந்தா⁴னமேவ வத்து²ந்தி ஆஹ ‘‘ஸத்தன்னங் ஆபத்திக்க²ந்தா⁴ன’’ந்தி. பதே³ஸபஞ்ஞத்திஸப்³ப³த்த²பஞ்ஞத்திஸாதா⁴ரணபஞ்ஞத்திஅஸாதா⁴ரணபஞ்ஞத்திஏகதோபஞ்ஞ- த்திஉப⁴தோபஞ்ஞத்திவஸேன ச²ன்னங் பஞ்ஞத்தீனங் பஞ்ஞத்தியங் பவிட்ட²த்தா வுத்தங் ‘‘திவித⁴ங் பஞ்ஞத்தி’’ந்தி. ‘‘ஹெட்டு²பரியங் கத்வா பத³ங் யோஜேதீ’’தி இமினா பத³பச்சாப⁴ட்ட²ந்தி எத்த² பதா³னங் ஹெட்டு²பரியவஸேன படினிவத்தித்வா ஆப⁴ஸ்ஸனங் க³ளனங் சுதங் பத³பச்சாப⁴ட்ட²ந்தி அத்த²ங் த³ஸ்ஸேதி.
Vatthunti ettha āpattikkhandhānameva vatthunti āha ‘‘sattannaṃ āpattikkhandhāna’’nti. Padesapaññattisabbatthapaññattisādhāraṇapaññattiasādhāraṇapaññattiekatopañña- ttiubhatopaññattivasena channaṃ paññattīnaṃ paññattiyaṃ paviṭṭhattā vuttaṃ ‘‘tividhaṃ paññatti’’nti. ‘‘Heṭṭhupariyaṃ katvā padaṃ yojetī’’ti iminā padapaccābhaṭṭhanti ettha padānaṃ heṭṭhupariyavasena paṭinivattitvā ābhassanaṃ gaḷanaṃ cutaṃ padapaccābhaṭṭhanti atthaṃ dasseti.
வினயேதி எத்த² ந கேவலங் பாளியங்யேவ, அத² கோ² அட்ட²கதா²யம்பீதி ஆஹ ‘‘வினயபாளியஞ்சேவ அட்ட²கதா²யஞ்சா’’தி.
Vinayeti ettha na kevalaṃ pāḷiyaṃyeva, atha kho aṭṭhakathāyampīti āha ‘‘vinayapāḷiyañceva aṭṭhakathāyañcā’’ti.
ஞத்திங் ந ஜானாதீதி எத்த² ஞத்திபே⁴த³ங் த³ஸ்ஸெந்தோ ஆஹ ‘‘ஸங்கே²பதோ’’திஆதி³. தத்தா²தி து³விதா⁴ஸு ஞத்தீஸு. கம்மஞத்தீதி அனுஸ்ஸாவனகம்மஸ்ஸ டா²னே டி²தா ஞத்தி. அனுஸ்ஸாவனகம்மங் நத்தி², ஸயமேவ அனுஸ்ஸாவனகம்மட்டா²னே டி²தாதி அத்தோ². கம்மபாத³ஞத்தீதி அனுஸ்ஸாவனகம்மஸ்ஸ பாத³பூ⁴தா மூலபூ⁴தா ஞத்தி. நவஸு டா²னேஸூதி ஓஸாரணாதீ³ஸு நவஸு டா²னேஸூ. த்³வீஸு டா²னேஸூதி ஞத்திது³தியஞத்திசதுத்த²வஸேன த்³வீஸு டா²னேஸு, கம்மபாத³ஞத்தியா கரணங் ந ஜானாதீதி ஸம்ப³ந்தோ⁴. ய்வாயங் சதுப்³பி³தோ⁴ ஸமதோ²தி யோஜனா. தந்தி சதுப்³பி³த⁴ங் ஸமத²ங். ஞத்தியாதி ஸாம்யத்தே² ஸாமிவசனங். யங் அதி⁴கரணங் வூபஸமதீதி ஸம்ப³ந்தோ⁴. தஸ்ஸாதி அதி⁴கரணஸ்ஸ. தங் வூபஸமங் ந ஜானாதீதி ஸம்ப³ந்தோ⁴.
Ñattiṃna jānātīti ettha ñattibhedaṃ dassento āha ‘‘saṅkhepato’’tiādi. Tatthāti duvidhāsu ñattīsu. Kammañattīti anussāvanakammassa ṭhāne ṭhitā ñatti. Anussāvanakammaṃ natthi, sayameva anussāvanakammaṭṭhāne ṭhitāti attho. Kammapādañattīti anussāvanakammassa pādabhūtā mūlabhūtā ñatti. Navasu ṭhānesūti osāraṇādīsu navasu ṭhānesū. Dvīsu ṭhānesūti ñattidutiyañatticatutthavasena dvīsu ṭhānesu, kammapādañattiyā karaṇaṃ na jānātīti sambandho. Yvāyaṃ catubbidho samathoti yojanā. Tanti catubbidhaṃ samathaṃ. Ñattiyāti sāmyatthe sāmivacanaṃ. Yaṃ adhikaraṇaṃ vūpasamatīti sambandho. Tassāti adhikaraṇassa. Taṃ vūpasamaṃ na jānātīti sambandho.
ஸுத்தங் ந ஜானாதீதி எத்த² ஸுத்தஸத்³த³ஸ்ஸ கதா³சி கத்த²சி மாதிகாயஞ்ச ஸுத்தந்தபிடகே ச பவத்தனதோ இத⁴ உப⁴தோவிப⁴ங்கே³தி ஆஹ ‘‘உப⁴தோவிப⁴ங்க³’’ந்தி. வினயங் ந ஜானாதீதி எத்த² வினயஸத்³த³ஸ்ஸ ஸகலே வினயபிடகே வத்தமானஸ்ஸாபி ஸுத்தந்தி எத்த² உப⁴தோவிப⁴ங்க³ஸ்ஸ க³ஹிதத்தா இத⁴ க²ந்த⁴கபரிவாராவ க³ஹேதப்³பா³தி ஆஹ ‘‘க²ந்த⁴கபரிவாரங் ந ஜானாதீ’’தி.
Suttaṃ na jānātīti ettha suttasaddassa kadāci katthaci mātikāyañca suttantapiṭake ca pavattanato idha ubhatovibhaṅgeti āha ‘‘ubhatovibhaṅga’’nti. Vinayaṃ na jānātīti ettha vinayasaddassa sakale vinayapiṭake vattamānassāpi suttanti ettha ubhatovibhaṅgassa gahitattā idha khandhakaparivārāva gahetabbāti āha ‘‘khandhakaparivāraṃ na jānātī’’ti.
வினயங் ந ஜானாதீதி எத்த² வினயபிடகஸ்ஸ க³ஹேதப்³ப³த்தா வுத்தங் ‘‘ட²பெத்வா வினயபிடக’’ந்தி. ஸுத்தந்திகே சத்தாரோ மஹாபதே³ஸேதி (தீ³॰ நி॰ 2.187 ஆத³யோ; அ॰ நி॰ 4.180) பு³த்³தா⁴பதே³ஸஸங்கா⁴பதே³ஸஸம்ப³ஹுலத்தே²ராபதே³ஸஏகத்தே²ரா பதே³ஸவஸேன சத்தாரோ மஹாபதே³ஸே. எத்தா²தி பஞ்சகே. யந்தி வசனங். ஸப்³ப³த்தா²தி ஸப்³பே³ஸு பஞ்சகேஸு.
Vinayaṃ na jānātīti ettha vinayapiṭakassa gahetabbattā vuttaṃ ‘‘ṭhapetvā vinayapiṭaka’’nti. Suttantike cattāro mahāpadeseti (dī. ni. 2.187 ādayo; a. ni. 4.180) buddhāpadesasaṅghāpadesasambahulattherāpadesaekattherā padesavasena cattāro mahāpadese. Etthāti pañcake. Yanti vacanaṃ. Sabbatthāti sabbesu pañcakesu.
இதி
Iti
அனிஸ்ஸிதவக்³க³-நப்படிப்பஸ்ஸம்ப⁴னவக்³க³-வோஹாரவக்³க³வண்ணனாய
Anissitavagga-nappaṭippassambhanavagga-vohāravaggavaṇṇanāya
யோஜனா ஸமத்தா.
Yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. வோஹாரவக்³கோ³ • 3. Vohāravaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / வோஹாரவக்³க³வண்ணனா • Vohāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வோஹாரவக்³க³வண்ணனா • Vohāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வோஹாரவக்³க³வண்ணனா • Vohāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வோஹாரவக்³கா³தி³வண்ணனா • Vohāravaggādivaṇṇanā
