| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
ৰোহারৰগ্গৰণ্ণনা
Vohāravaggavaṇṇanā
৪২৪. ‘‘নেৰ দেসনায ন ৰুট্ঠানেনা’’তি ইদং পারাজিকাপত্তিং সন্ধায ৰুত্তং। দোসানুরূপন্তি ৰত্থুসঙ্খাতস্স দোসস্স অনুরূপং।
424. ‘‘Neva desanāya na vuṭṭhānenā’’ti idaṃ pārājikāpattiṃ sandhāya vuttaṃ. Dosānurūpanti vatthusaṅkhātassa dosassa anurūpaṃ.
পযোগং ন জানাতীতি এত্থ সচে পযোগো মূলেন ৰিসদিসো হুত্ৰা ভিন্নো হোতি, এৰং সতি মূলপযোগন্তি ন ৰত্তব্বন্তি আহ ‘‘অধিকরণানং হী’’তিআদি। হীতি সচ্চং, যস্মা ৰা। মূলমেৰ পযোগা নাম হোন্তি, ন অঞ্ঞন্তি অধিপ্পাযো।
Payogaṃ na jānātīti ettha sace payogo mūlena visadiso hutvā bhinno hoti, evaṃ sati mūlapayoganti na vattabbanti āha ‘‘adhikaraṇānaṃ hī’’tiādi. Hīti saccaṃ, yasmā vā. Mūlameva payogā nāma honti, na aññanti adhippāyo.
কাতব্বন্তি ন জানাতীতি কাতব্বং ইতি কম্মস্স করণং ন জানাতীতি যোজনা। ৰত্থূতি ভণ্ডনকলহাদিৰত্থু, নিযস্সাদীনং ৰত্থূতি সম্বন্ধো । চতুন্নন্তি তজ্জনীযনিযস্সপব্বাজনীযপটিসারণীযৰসেন চতুন্নং। যাচতীতি সঙ্ঘং কম্মস্স ৰূপসমং যাচতি।
Kātabbanti na jānātīti kātabbaṃ iti kammassa karaṇaṃ na jānātīti yojanā. Vatthūti bhaṇḍanakalahādivatthu, niyassādīnaṃ vatthūti sambandho . Catunnanti tajjanīyaniyassapabbājanīyapaṭisāraṇīyavasena catunnaṃ. Yācatīti saṅghaṃ kammassa vūpasamaṃ yācati.
ৰত্থুন্তি এত্থ আপত্তিক্খন্ধানমেৰ ৰত্থুন্তি আহ ‘‘সত্তন্নং আপত্তিক্খন্ধান’’ন্তি। পদেসপঞ্ঞত্তিসব্বত্থপঞ্ঞত্তিসাধারণপঞ্ঞত্তিঅসাধারণপঞ্ঞত্তিএকতোপঞ্ঞ- ত্তিউভতোপঞ্ঞত্তিৰসেন ছন্নং পঞ্ঞত্তীনং পঞ্ঞত্তিযং পৰিট্ঠত্তা ৰুত্তং ‘‘তিৰিধং পঞ্ঞত্তি’’ন্তি। ‘‘হেট্ঠুপরিযং কত্ৰা পদং যোজেতী’’তি ইমিনা পদপচ্চাভট্ঠন্তি এত্থ পদানং হেট্ঠুপরিযৰসেন পটিনিৰত্তিত্ৰা আভস্সনং গল়নং চুতং পদপচ্চাভট্ঠন্তি অত্থং দস্সেতি।
Vatthunti ettha āpattikkhandhānameva vatthunti āha ‘‘sattannaṃ āpattikkhandhāna’’nti. Padesapaññattisabbatthapaññattisādhāraṇapaññattiasādhāraṇapaññattiekatopañña- ttiubhatopaññattivasena channaṃ paññattīnaṃ paññattiyaṃ paviṭṭhattā vuttaṃ ‘‘tividhaṃ paññatti’’nti. ‘‘Heṭṭhupariyaṃ katvā padaṃ yojetī’’ti iminā padapaccābhaṭṭhanti ettha padānaṃ heṭṭhupariyavasena paṭinivattitvā ābhassanaṃ gaḷanaṃ cutaṃ padapaccābhaṭṭhanti atthaṃ dasseti.
ৰিনযেতি এত্থ ন কেৰলং পাল়িযংযেৰ, অথ খো অট্ঠকথাযম্পীতি আহ ‘‘ৰিনযপাল়িযঞ্চেৰ অট্ঠকথাযঞ্চা’’তি।
Vinayeti ettha na kevalaṃ pāḷiyaṃyeva, atha kho aṭṭhakathāyampīti āha ‘‘vinayapāḷiyañceva aṭṭhakathāyañcā’’ti.
ঞত্তিং ন জানাতীতি এত্থ ঞত্তিভেদং দস্সেন্তো আহ ‘‘সঙ্খেপতো’’তিআদি। তত্থাতি দুৰিধাসু ঞত্তীসু। কম্মঞত্তীতি অনুস্সাৰনকম্মস্স ঠানে ঠিতা ঞত্তি। অনুস্সাৰনকম্মং নত্থি, সযমেৰ অনুস্সাৰনকম্মট্ঠানে ঠিতাতি অত্থো। কম্মপাদঞত্তীতি অনুস্সাৰনকম্মস্স পাদভূতা মূলভূতা ঞত্তি। নৰসু ঠানেসূতি ওসারণাদীসু নৰসু ঠানেসূ। দ্ৰীসু ঠানেসূতি ঞত্তিদুতিযঞত্তিচতুত্থৰসেন দ্ৰীসু ঠানেসু, কম্মপাদঞত্তিযা করণং ন জানাতীতি সম্বন্ধো। য্ৰাযং চতুব্বিধো সমথোতি যোজনা। তন্তি চতুব্বিধং সমথং। ঞত্তিযাতি সাম্যত্থে সামিৰচনং। যং অধিকরণং ৰূপসমতীতি সম্বন্ধো। তস্সাতি অধিকরণস্স। তং ৰূপসমং ন জানাতীতি সম্বন্ধো।
Ñattiṃna jānātīti ettha ñattibhedaṃ dassento āha ‘‘saṅkhepato’’tiādi. Tatthāti duvidhāsu ñattīsu. Kammañattīti anussāvanakammassa ṭhāne ṭhitā ñatti. Anussāvanakammaṃ natthi, sayameva anussāvanakammaṭṭhāne ṭhitāti attho. Kammapādañattīti anussāvanakammassa pādabhūtā mūlabhūtā ñatti. Navasu ṭhānesūti osāraṇādīsu navasu ṭhānesū. Dvīsu ṭhānesūti ñattidutiyañatticatutthavasena dvīsu ṭhānesu, kammapādañattiyā karaṇaṃ na jānātīti sambandho. Yvāyaṃ catubbidho samathoti yojanā. Tanti catubbidhaṃ samathaṃ. Ñattiyāti sāmyatthe sāmivacanaṃ. Yaṃ adhikaraṇaṃ vūpasamatīti sambandho. Tassāti adhikaraṇassa. Taṃ vūpasamaṃ na jānātīti sambandho.
সুত্তং ন জানাতীতি এত্থ সুত্তসদ্দস্স কদাচি কত্থচি মাতিকাযঞ্চ সুত্তন্তপিটকে চ পৰত্তনতো ইধ উভতোৰিভঙ্গেতি আহ ‘‘উভতোৰিভঙ্গ’’ন্তি। ৰিনযং ন জানাতীতি এত্থ ৰিনযসদ্দস্স সকলে ৰিনযপিটকে ৰত্তমানস্সাপি সুত্তন্তি এত্থ উভতোৰিভঙ্গস্স গহিতত্তা ইধ খন্ধকপরিৰারাৰ গহেতব্বাতি আহ ‘‘খন্ধকপরিৰারং ন জানাতী’’তি।
Suttaṃ na jānātīti ettha suttasaddassa kadāci katthaci mātikāyañca suttantapiṭake ca pavattanato idha ubhatovibhaṅgeti āha ‘‘ubhatovibhaṅga’’nti. Vinayaṃ na jānātīti ettha vinayasaddassa sakale vinayapiṭake vattamānassāpi suttanti ettha ubhatovibhaṅgassa gahitattā idha khandhakaparivārāva gahetabbāti āha ‘‘khandhakaparivāraṃ na jānātī’’ti.
ৰিনযং ন জানাতীতি এত্থ ৰিনযপিটকস্স গহেতব্বত্তা ৰুত্তং ‘‘ঠপেত্ৰা ৰিনযপিটক’’ন্তি। সুত্তন্তিকে চত্তারো মহাপদেসেতি (দী॰ নি॰ ২.১৮৭ আদযো; অ॰ নি॰ ৪.১৮০) বুদ্ধাপদেসসঙ্ঘাপদেসসম্বহুলত্থেরাপদেসএকত্থেরা পদেসৰসেন চত্তারো মহাপদেসে। এত্থাতি পঞ্চকে। যন্তি ৰচনং। সব্বত্থাতি সব্বেসু পঞ্চকেসু।
Vinayaṃ na jānātīti ettha vinayapiṭakassa gahetabbattā vuttaṃ ‘‘ṭhapetvā vinayapiṭaka’’nti. Suttantike cattāro mahāpadeseti (dī. ni. 2.187 ādayo; a. ni. 4.180) buddhāpadesasaṅghāpadesasambahulattherāpadesaekattherā padesavasena cattāro mahāpadese. Etthāti pañcake. Yanti vacanaṃ. Sabbatthāti sabbesu pañcakesu.
ইতি
Iti
অনিস্সিতৰগ্গ-নপ্পটিপ্পস্সম্ভনৰগ্গ-ৰোহারৰগ্গৰণ্ণনায
Anissitavagga-nappaṭippassambhanavagga-vohāravaggavaṇṇanāya
যোজনা সমত্তা।
Yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৩. ৰোহারৰগ্গো • 3. Vohāravaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / ৰোহারৰগ্গৰণ্ণনা • Vohāravaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৰোহারৰগ্গৰণ্ণনা • Vohāravaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৰোহারৰগ্গৰণ্ণনা • Vohāravaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহারৰগ্গাদিৰণ্ণনা • Vohāravaggādivaṇṇanā
