| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
වොහාරවග්‌ගවණ්‌ණනා
Vohāravaggavaṇṇanā
424. ‘‘නෙව දෙසනාය න වුට්‌ඨානෙනා’’ති ඉදං පාරාජිකාපත්‌තිං සන්‌ධාය වුත්‌තං. දොසානුරූපන්‌ති වත්‌ථුසඞ්‌ඛාතස්‌ස දොසස්‌ස අනුරූපං.
424. ‘‘Neva desanāya na vuṭṭhānenā’’ti idaṃ pārājikāpattiṃ sandhāya vuttaṃ. Dosānurūpanti vatthusaṅkhātassa dosassa anurūpaṃ.
පයොගං න ජානාතීති එත්‌ථ සචෙ පයොගො මූලෙන විසදිසො හුත්‌වා භින්‌නො හොති, එවං සති මූලපයොගන්‌ති න වත්‌තබ්‌බන්‌ති ආහ ‘‘අධිකරණානං හී’’තිආදි. හීති සච්‌චං, යස්‌මා වා. මූලමෙව පයොගා නාම හොන්‌ති, න අඤ්‌ඤන්‌ති අධිප්‌පායො.
Payogaṃ na jānātīti ettha sace payogo mūlena visadiso hutvā bhinno hoti, evaṃ sati mūlapayoganti na vattabbanti āha ‘‘adhikaraṇānaṃ hī’’tiādi. Hīti saccaṃ, yasmā vā. Mūlameva payogā nāma honti, na aññanti adhippāyo.
කාතබ්‌බන්‌ති න ජානාතීති කාතබ්‌බං ඉති කම්‌මස්‌ස කරණං න ජානාතීති යොජනා. වත්‌ථූති භණ්‌ඩනකලහාදිවත්‌ථු, නියස්‌සාදීනං වත්‌ථූති සම්‌බන්‌ධො . චතුන්‌නන්‌ති තජ්‌ජනීයනියස්‌සපබ්‌බාජනීයපටිසාරණීයවසෙන චතුන්‌නං. යාචතීති සඞ්‌ඝං කම්‌මස්‌ස වූපසමං යාචති.
Kātabbanti na jānātīti kātabbaṃ iti kammassa karaṇaṃ na jānātīti yojanā. Vatthūti bhaṇḍanakalahādivatthu, niyassādīnaṃ vatthūti sambandho . Catunnanti tajjanīyaniyassapabbājanīyapaṭisāraṇīyavasena catunnaṃ. Yācatīti saṅghaṃ kammassa vūpasamaṃ yācati.
වත්‌ථුන්‌ති එත්‌ථ ආපත්‌තික්‌ඛන්‌ධානමෙව වත්‌ථුන්‌ති ආහ ‘‘සත්‌තන්‌නං ආපත්‌තික්‌ඛන්‌ධාන’’න්‌ති. පදෙසපඤ්‌ඤත්‌තිසබ්‌බත්‌ථපඤ්‌ඤත්‌තිසාධාරණපඤ්‌ඤත්‌තිඅසාධාරණපඤ්‌ඤත්‌තිඑකතොපඤ්‌ඤ- ත්‌තිඋභතොපඤ්‌ඤත්‌තිවසෙන ඡන්‌නං පඤ්‌ඤත්‌තීනං පඤ්‌ඤත්‌තියං පවිට්‌ඨත්‌තා වුත්‌තං ‘‘තිවිධං පඤ්‌ඤත්‌ති’’න්‌ති. ‘‘හෙට්‌ඨුපරියං කත්‌වා පදං යොජෙතී’’ති ඉමිනා පදපච්‌චාභට්‌ඨන්‌ති එත්‌ථ පදානං හෙට්‌ඨුපරියවසෙන පටිනිවත්‌තිත්‌වා ආභස්‌සනං ගළනං චුතං පදපච්‌චාභට්‌ඨන්‌ති අත්‌ථං දස්‌සෙති.
Vatthunti ettha āpattikkhandhānameva vatthunti āha ‘‘sattannaṃ āpattikkhandhāna’’nti. Padesapaññattisabbatthapaññattisādhāraṇapaññattiasādhāraṇapaññattiekatopañña- ttiubhatopaññattivasena channaṃ paññattīnaṃ paññattiyaṃ paviṭṭhattā vuttaṃ ‘‘tividhaṃ paññatti’’nti. ‘‘Heṭṭhupariyaṃ katvā padaṃ yojetī’’ti iminā padapaccābhaṭṭhanti ettha padānaṃ heṭṭhupariyavasena paṭinivattitvā ābhassanaṃ gaḷanaṃ cutaṃ padapaccābhaṭṭhanti atthaṃ dasseti.
විනයෙති එත්‌ථ න කෙවලං පාළියංයෙව, අථ ඛො අට්‌ඨකථායම්‌පීති ආහ ‘‘විනයපාළියඤ්‌චෙව අට්‌ඨකථායඤ්‌චා’’ති.
Vinayeti ettha na kevalaṃ pāḷiyaṃyeva, atha kho aṭṭhakathāyampīti āha ‘‘vinayapāḷiyañceva aṭṭhakathāyañcā’’ti.
ඤත්‌තිං න ජානාතීති එත්‌ථ ඤත්‌තිභෙදං දස්‌සෙන්‌තො ආහ ‘‘සඞ්‌ඛෙපතො’’තිආදි. තත්‌ථාති දුවිධාසු ඤත්‌තීසු. කම්‌මඤත්‌තීති අනුස්‌සාවනකම්‌මස්‌ස ඨානෙ ඨිතා ඤත්‌ති. අනුස්‌සාවනකම්‌මං නත්‌ථි, සයමෙව අනුස්‌සාවනකම්‌මට්‌ඨානෙ ඨිතාති අත්‌ථො. කම්‌මපාදඤත්‌තීති අනුස්‌සාවනකම්‌මස්‌ස පාදභූතා මූලභූතා ඤත්‌ති. නවසු ඨානෙසූති ඔසාරණාදීසු නවසු ඨානෙසූ. ද්‌වීසු ඨානෙසූති ඤත්‌තිදුතියඤත්‌තිචතුත්‌ථවසෙන ද්‌වීසු ඨානෙසු, කම්‌මපාදඤත්‌තියා කරණං න ජානාතීති සම්‌බන්‌ධො. ය්‌වායං චතුබ්‌බිධො සමථොති යොජනා. තන්‌ති චතුබ්‌බිධං සමථං. ඤත්‌තියාති සාම්‍යත්‌ථෙ සාමිවචනං. යං අධිකරණං වූපසමතීති සම්‌බන්‌ධො. තස්‌සාති අධිකරණස්‌ස. තං වූපසමං න ජානාතීති සම්‌බන්‌ධො.
Ñattiṃna jānātīti ettha ñattibhedaṃ dassento āha ‘‘saṅkhepato’’tiādi. Tatthāti duvidhāsu ñattīsu. Kammañattīti anussāvanakammassa ṭhāne ṭhitā ñatti. Anussāvanakammaṃ natthi, sayameva anussāvanakammaṭṭhāne ṭhitāti attho. Kammapādañattīti anussāvanakammassa pādabhūtā mūlabhūtā ñatti. Navasu ṭhānesūti osāraṇādīsu navasu ṭhānesū. Dvīsu ṭhānesūti ñattidutiyañatticatutthavasena dvīsu ṭhānesu, kammapādañattiyā karaṇaṃ na jānātīti sambandho. Yvāyaṃ catubbidho samathoti yojanā. Tanti catubbidhaṃ samathaṃ. Ñattiyāti sāmyatthe sāmivacanaṃ. Yaṃ adhikaraṇaṃ vūpasamatīti sambandho. Tassāti adhikaraṇassa. Taṃ vūpasamaṃ na jānātīti sambandho.
සුත්‌තං න ජානාතීති එත්‌ථ සුත්‌තසද්‌දස්‌ස කදාචි කත්‌ථචි මාතිකායඤ්‌ච සුත්‌තන්‌තපිටකෙ ච පවත්‌තනතො ඉධ උභතොවිභඞ්‌ගෙති ආහ ‘‘උභතොවිභඞ්‌ග’’න්‌ති. විනයං න ජානාතීති එත්‌ථ විනයසද්‌දස්‌ස සකලෙ විනයපිටකෙ වත්‌තමානස්‌සාපි සුත්‌තන්‌ති එත්‌ථ උභතොවිභඞ්‌ගස්‌ස ගහිතත්‌තා ඉධ ඛන්‌ධකපරිවාරාව ගහෙතබ්‌බාති ආහ ‘‘ඛන්‌ධකපරිවාරං න ජානාතී’’ති.
Suttaṃ na jānātīti ettha suttasaddassa kadāci katthaci mātikāyañca suttantapiṭake ca pavattanato idha ubhatovibhaṅgeti āha ‘‘ubhatovibhaṅga’’nti. Vinayaṃ na jānātīti ettha vinayasaddassa sakale vinayapiṭake vattamānassāpi suttanti ettha ubhatovibhaṅgassa gahitattā idha khandhakaparivārāva gahetabbāti āha ‘‘khandhakaparivāraṃ na jānātī’’ti.
විනයං න ජානාතීති එත්‌ථ විනයපිටකස්‌ස ගහෙතබ්‌බත්‌තා වුත්‌තං ‘‘ඨපෙත්‌වා විනයපිටක’’න්‌ති. සුත්‌තන්‌තිකෙ චත්‌තාරො මහාපදෙසෙති (දී. නි. 2.187 ආදයො; අ. නි. 4.180) බුද්‌ධාපදෙසසඞ්‌ඝාපදෙසසම්‌බහුලත්‌ථෙරාපදෙසඑකත්‌ථෙරා පදෙසවසෙන චත්‌තාරො මහාපදෙසෙ. එත්‌ථාති පඤ්‌චකෙ. යන්‌ති වචනං. සබ්‌බත්‌ථාති සබ්‌බෙසු පඤ්‌චකෙසු.
Vinayaṃ na jānātīti ettha vinayapiṭakassa gahetabbattā vuttaṃ ‘‘ṭhapetvā vinayapiṭaka’’nti. Suttantike cattāro mahāpadeseti (dī. ni. 2.187 ādayo; a. ni. 4.180) buddhāpadesasaṅghāpadesasambahulattherāpadesaekattherā padesavasena cattāro mahāpadese. Etthāti pañcake. Yanti vacanaṃ. Sabbatthāti sabbesu pañcakesu.
ඉති
Iti
අනිස්‌සිතවග්‌ග-නප්‌පටිප්‌පස්‌සම්‌භනවග්‌ග-වොහාරවග්‌ගවණ්‌ණනාය
Anissitavagga-nappaṭippassambhanavagga-vohāravaggavaṇṇanāya
යොජනා සමත්‌තා.
Yojanā samattā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 3. වොහාරවග්‌ගො • 3. Vohāravaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / වොහාරවග්‌ගවණ්‌ණනා • Vohāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / වොහාරවග්‌ගවණ්‌ණනා • Vohāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / වොහාරවග්‌ගවණ්‌ණනා • Vohāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
