| Library / Tipiṭaka / ਤਿਪਿਟਕ • Tipiṭaka / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi |
વੋਹਾਰવਗ੍ਗવਣ੍ਣਨਾ
Vohāravaggavaṇṇanā
੪੨੪. ‘‘ਨੇવ ਦੇਸਨਾਯ ਨ વੁਟ੍ਠਾਨੇਨਾ’’ਤਿ ਇਦਂ ਪਾਰਾਜਿਕਾਪਤ੍ਤਿਂ ਸਨ੍ਧਾਯ વੁਤ੍ਤਂ। ਦੋਸਾਨੁਰੂਪਨ੍ਤਿ વਤ੍ਥੁਸਙ੍ਖਾਤਸ੍ਸ ਦੋਸਸ੍ਸ ਅਨੁਰੂਪਂ।
424. ‘‘Neva desanāya na vuṭṭhānenā’’ti idaṃ pārājikāpattiṃ sandhāya vuttaṃ. Dosānurūpanti vatthusaṅkhātassa dosassa anurūpaṃ.
ਪਯੋਗਂ ਨ ਜਾਨਾਤੀਤਿ ਏਤ੍ਥ ਸਚੇ ਪਯੋਗੋ ਮੂਲੇਨ વਿਸਦਿਸੋ ਹੁਤ੍વਾ ਭਿਨ੍ਨੋ ਹੋਤਿ, ਏવਂ ਸਤਿ ਮੂਲਪਯੋਗਨ੍ਤਿ ਨ વਤ੍ਤਬ੍ਬਨ੍ਤਿ ਆਹ ‘‘ਅਧਿਕਰਣਾਨਂ ਹੀ’’ਤਿਆਦਿ। ਹੀਤਿ ਸਚ੍ਚਂ, ਯਸ੍ਮਾ વਾ। ਮੂਲਮੇવ ਪਯੋਗਾ ਨਾਮ ਹੋਨ੍ਤਿ, ਨ ਅਞ੍ਞਨ੍ਤਿ ਅਧਿਪ੍ਪਾਯੋ।
Payogaṃ na jānātīti ettha sace payogo mūlena visadiso hutvā bhinno hoti, evaṃ sati mūlapayoganti na vattabbanti āha ‘‘adhikaraṇānaṃ hī’’tiādi. Hīti saccaṃ, yasmā vā. Mūlameva payogā nāma honti, na aññanti adhippāyo.
ਕਾਤਬ੍ਬਨ੍ਤਿ ਨ ਜਾਨਾਤੀਤਿ ਕਾਤਬ੍ਬਂ ਇਤਿ ਕਮ੍ਮਸ੍ਸ ਕਰਣਂ ਨ ਜਾਨਾਤੀਤਿ ਯੋਜਨਾ। વਤ੍ਥੂਤਿ ਭਣ੍ਡਨਕਲਹਾਦਿવਤ੍ਥੁ, ਨਿਯਸ੍ਸਾਦੀਨਂ વਤ੍ਥੂਤਿ ਸਮ੍ਬਨ੍ਧੋ । ਚਤੁਨ੍ਨਨ੍ਤਿ ਤਜ੍ਜਨੀਯਨਿਯਸ੍ਸਪਬ੍ਬਾਜਨੀਯਪਟਿਸਾਰਣੀਯવਸੇਨ ਚਤੁਨ੍ਨਂ। ਯਾਚਤੀਤਿ ਸਙ੍ਘਂ ਕਮ੍ਮਸ੍ਸ વੂਪਸਮਂ ਯਾਚਤਿ।
Kātabbanti na jānātīti kātabbaṃ iti kammassa karaṇaṃ na jānātīti yojanā. Vatthūti bhaṇḍanakalahādivatthu, niyassādīnaṃ vatthūti sambandho . Catunnanti tajjanīyaniyassapabbājanīyapaṭisāraṇīyavasena catunnaṃ. Yācatīti saṅghaṃ kammassa vūpasamaṃ yācati.
વਤ੍ਥੁਨ੍ਤਿ ਏਤ੍ਥ ਆਪਤ੍ਤਿਕ੍ਖਨ੍ਧਾਨਮੇવ વਤ੍ਥੁਨ੍ਤਿ ਆਹ ‘‘ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨ’’ਨ੍ਤਿ। ਪਦੇਸਪਞ੍ਞਤ੍ਤਿਸਬ੍ਬਤ੍ਥਪਞ੍ਞਤ੍ਤਿਸਾਧਾਰਣਪਞ੍ਞਤ੍ਤਿਅਸਾਧਾਰਣਪਞ੍ਞਤ੍ਤਿਏਕਤੋਪਞ੍ਞ- ਤ੍ਤਿਉਭਤੋਪਞ੍ਞਤ੍ਤਿવਸੇਨ ਛਨ੍ਨਂ ਪਞ੍ਞਤ੍ਤੀਨਂ ਪਞ੍ਞਤ੍ਤਿਯਂ ਪવਿਟ੍ਠਤ੍ਤਾ વੁਤ੍ਤਂ ‘‘ਤਿવਿਧਂ ਪਞ੍ਞਤ੍ਤਿ’’ਨ੍ਤਿ। ‘‘ਹੇਟ੍ਠੁਪਰਿਯਂ ਕਤ੍વਾ ਪਦਂ ਯੋਜੇਤੀ’’ਤਿ ਇਮਿਨਾ ਪਦਪਚ੍ਚਾਭਟ੍ਠਨ੍ਤਿ ਏਤ੍ਥ ਪਦਾਨਂ ਹੇਟ੍ਠੁਪਰਿਯવਸੇਨ ਪਟਿਨਿવਤ੍ਤਿਤ੍વਾ ਆਭਸ੍ਸਨਂ ਗਲ਼ਨਂ ਚੁਤਂ ਪਦਪਚ੍ਚਾਭਟ੍ਠਨ੍ਤਿ ਅਤ੍ਥਂ ਦਸ੍ਸੇਤਿ।
Vatthunti ettha āpattikkhandhānameva vatthunti āha ‘‘sattannaṃ āpattikkhandhāna’’nti. Padesapaññattisabbatthapaññattisādhāraṇapaññattiasādhāraṇapaññattiekatopañña- ttiubhatopaññattivasena channaṃ paññattīnaṃ paññattiyaṃ paviṭṭhattā vuttaṃ ‘‘tividhaṃ paññatti’’nti. ‘‘Heṭṭhupariyaṃ katvā padaṃ yojetī’’ti iminā padapaccābhaṭṭhanti ettha padānaṃ heṭṭhupariyavasena paṭinivattitvā ābhassanaṃ gaḷanaṃ cutaṃ padapaccābhaṭṭhanti atthaṃ dasseti.
વਿਨਯੇਤਿ ਏਤ੍ਥ ਨ ਕੇવਲਂ ਪਾਲ਼ਿਯਂਯੇવ, ਅਥ ਖੋ ਅਟ੍ਠਕਥਾਯਮ੍ਪੀਤਿ ਆਹ ‘‘વਿਨਯਪਾਲ਼ਿਯਞ੍ਚੇવ ਅਟ੍ਠਕਥਾਯਞ੍ਚਾ’’ਤਿ।
Vinayeti ettha na kevalaṃ pāḷiyaṃyeva, atha kho aṭṭhakathāyampīti āha ‘‘vinayapāḷiyañceva aṭṭhakathāyañcā’’ti.
ਞਤ੍ਤਿਂ ਨ ਜਾਨਾਤੀਤਿ ਏਤ੍ਥ ਞਤ੍ਤਿਭੇਦਂ ਦਸ੍ਸੇਨ੍ਤੋ ਆਹ ‘‘ਸਙ੍ਖੇਪਤੋ’’ਤਿਆਦਿ। ਤਤ੍ਥਾਤਿ ਦੁવਿਧਾਸੁ ਞਤ੍ਤੀਸੁ। ਕਮ੍ਮਞਤ੍ਤੀਤਿ ਅਨੁਸ੍ਸਾવਨਕਮ੍ਮਸ੍ਸ ਠਾਨੇ ਠਿਤਾ ਞਤ੍ਤਿ। ਅਨੁਸ੍ਸਾવਨਕਮ੍ਮਂ ਨਤ੍ਥਿ, ਸਯਮੇવ ਅਨੁਸ੍ਸਾવਨਕਮ੍ਮਟ੍ਠਾਨੇ ਠਿਤਾਤਿ ਅਤ੍ਥੋ। ਕਮ੍ਮਪਾਦਞਤ੍ਤੀਤਿ ਅਨੁਸ੍ਸਾવਨਕਮ੍ਮਸ੍ਸ ਪਾਦਭੂਤਾ ਮੂਲਭੂਤਾ ਞਤ੍ਤਿ। ਨવਸੁ ਠਾਨੇਸੂਤਿ ਓਸਾਰਣਾਦੀਸੁ ਨવਸੁ ਠਾਨੇਸੂ। ਦ੍વੀਸੁ ਠਾਨੇਸੂਤਿ ਞਤ੍ਤਿਦੁਤਿਯਞਤ੍ਤਿਚਤੁਤ੍ਥવਸੇਨ ਦ੍વੀਸੁ ਠਾਨੇਸੁ, ਕਮ੍ਮਪਾਦਞਤ੍ਤਿਯਾ ਕਰਣਂ ਨ ਜਾਨਾਤੀਤਿ ਸਮ੍ਬਨ੍ਧੋ। ਯ੍વਾਯਂ ਚਤੁਬ੍ਬਿਧੋ ਸਮਥੋਤਿ ਯੋਜਨਾ। ਤਨ੍ਤਿ ਚਤੁਬ੍ਬਿਧਂ ਸਮਥਂ। ਞਤ੍ਤਿਯਾਤਿ ਸਾਮ੍ਯਤ੍ਥੇ ਸਾਮਿવਚਨਂ। ਯਂ ਅਧਿਕਰਣਂ વੂਪਸਮਤੀਤਿ ਸਮ੍ਬਨ੍ਧੋ। ਤਸ੍ਸਾਤਿ ਅਧਿਕਰਣਸ੍ਸ। ਤਂ વੂਪਸਮਂ ਨ ਜਾਨਾਤੀਤਿ ਸਮ੍ਬਨ੍ਧੋ।
Ñattiṃna jānātīti ettha ñattibhedaṃ dassento āha ‘‘saṅkhepato’’tiādi. Tatthāti duvidhāsu ñattīsu. Kammañattīti anussāvanakammassa ṭhāne ṭhitā ñatti. Anussāvanakammaṃ natthi, sayameva anussāvanakammaṭṭhāne ṭhitāti attho. Kammapādañattīti anussāvanakammassa pādabhūtā mūlabhūtā ñatti. Navasu ṭhānesūti osāraṇādīsu navasu ṭhānesū. Dvīsu ṭhānesūti ñattidutiyañatticatutthavasena dvīsu ṭhānesu, kammapādañattiyā karaṇaṃ na jānātīti sambandho. Yvāyaṃ catubbidho samathoti yojanā. Tanti catubbidhaṃ samathaṃ. Ñattiyāti sāmyatthe sāmivacanaṃ. Yaṃ adhikaraṇaṃ vūpasamatīti sambandho. Tassāti adhikaraṇassa. Taṃ vūpasamaṃ na jānātīti sambandho.
ਸੁਤ੍ਤਂ ਨ ਜਾਨਾਤੀਤਿ ਏਤ੍ਥ ਸੁਤ੍ਤਸਦ੍ਦਸ੍ਸ ਕਦਾਚਿ ਕਤ੍ਥਚਿ ਮਾਤਿਕਾਯਞ੍ਚ ਸੁਤ੍ਤਨ੍ਤਪਿਟਕੇ ਚ ਪવਤ੍ਤਨਤੋ ਇਧ ਉਭਤੋવਿਭਙ੍ਗੇਤਿ ਆਹ ‘‘ਉਭਤੋવਿਭਙ੍ਗ’’ਨ੍ਤਿ। વਿਨਯਂ ਨ ਜਾਨਾਤੀਤਿ ਏਤ੍ਥ વਿਨਯਸਦ੍ਦਸ੍ਸ ਸਕਲੇ વਿਨਯਪਿਟਕੇ વਤ੍ਤਮਾਨਸ੍ਸਾਪਿ ਸੁਤ੍ਤਨ੍ਤਿ ਏਤ੍ਥ ਉਭਤੋવਿਭਙ੍ਗਸ੍ਸ ਗਹਿਤਤ੍ਤਾ ਇਧ ਖਨ੍ਧਕਪਰਿવਾਰਾવ ਗਹੇਤਬ੍ਬਾਤਿ ਆਹ ‘‘ਖਨ੍ਧਕਪਰਿવਾਰਂ ਨ ਜਾਨਾਤੀ’’ਤਿ।
Suttaṃ na jānātīti ettha suttasaddassa kadāci katthaci mātikāyañca suttantapiṭake ca pavattanato idha ubhatovibhaṅgeti āha ‘‘ubhatovibhaṅga’’nti. Vinayaṃ na jānātīti ettha vinayasaddassa sakale vinayapiṭake vattamānassāpi suttanti ettha ubhatovibhaṅgassa gahitattā idha khandhakaparivārāva gahetabbāti āha ‘‘khandhakaparivāraṃ na jānātī’’ti.
વਿਨਯਂ ਨ ਜਾਨਾਤੀਤਿ ਏਤ੍ਥ વਿਨਯਪਿਟਕਸ੍ਸ ਗਹੇਤਬ੍ਬਤ੍ਤਾ વੁਤ੍ਤਂ ‘‘ਠਪੇਤ੍વਾ વਿਨਯਪਿਟਕ’’ਨ੍ਤਿ। ਸੁਤ੍ਤਨ੍ਤਿਕੇ ਚਤ੍ਤਾਰੋ ਮਹਾਪਦੇਸੇਤਿ (ਦੀ॰ ਨਿ॰ ੨.੧੮੭ ਆਦਯੋ; ਅ॰ ਨਿ॰ ੪.੧੮੦) ਬੁਦ੍ਧਾਪਦੇਸਸਙ੍ਘਾਪਦੇਸਸਮ੍ਬਹੁਲਤ੍ਥੇਰਾਪਦੇਸਏਕਤ੍ਥੇਰਾ ਪਦੇਸવਸੇਨ ਚਤ੍ਤਾਰੋ ਮਹਾਪਦੇਸੇ। ਏਤ੍ਥਾਤਿ ਪਞ੍ਚਕੇ। ਯਨ੍ਤਿ વਚਨਂ। ਸਬ੍ਬਤ੍ਥਾਤਿ ਸਬ੍ਬੇਸੁ ਪਞ੍ਚਕੇਸੁ।
Vinayaṃ na jānātīti ettha vinayapiṭakassa gahetabbattā vuttaṃ ‘‘ṭhapetvā vinayapiṭaka’’nti. Suttantike cattāro mahāpadeseti (dī. ni. 2.187 ādayo; a. ni. 4.180) buddhāpadesasaṅghāpadesasambahulattherāpadesaekattherā padesavasena cattāro mahāpadese. Etthāti pañcake. Yanti vacanaṃ. Sabbatthāti sabbesu pañcakesu.
ਇਤਿ
Iti
ਅਨਿਸ੍ਸਿਤવਗ੍ਗ-ਨਪ੍ਪਟਿਪ੍ਪਸ੍ਸਮ੍ਭਨવਗ੍ਗ-વੋਹਾਰવਗ੍ਗવਣ੍ਣਨਾਯ
Anissitavagga-nappaṭippassambhanavagga-vohāravaggavaṇṇanāya
ਯੋਜਨਾ ਸਮਤ੍ਤਾ।
Yojanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੩. વੋਹਾਰવਗ੍ਗੋ • 3. Vohāravaggo
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਪਰਿવਾਰ-ਅਟ੍ਠਕਥਾ • Parivāra-aṭṭhakathā / વੋਹਾਰવਗ੍ਗવਣ੍ਣਨਾ • Vohāravaggavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / વੋਹਾਰવਗ੍ਗવਣ੍ਣਨਾ • Vohāravaggavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / વੋਹਾਰવਗ੍ਗવਣ੍ਣਨਾ • Vohāravaggavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / વੋਹਾਰવਗ੍ਗਾਦਿવਣ੍ਣਨਾ • Vohāravaggādivaṇṇanā
