| Library / Tipiṭaka / திபிடக • Tipiṭaka / தே²ரீகா³தா²-அட்ட²கதா² • Therīgāthā-aṭṭhakathā |
16. வுட்³ட⁴பப்³ப³ஜிதஸுமனாதே²ரீகா³தா²வண்ணனா
16. Vuḍḍhapabbajitasumanātherīgāthāvaṇṇanā
ஸுக²ங் த்வங் வுட்³டி⁴கே ஸேஹீதி ஸுமனாய வுட்³ட⁴பப்³ப³ஜிதாய கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே குஸலங் உபசினித்வா இமஸ்மிங் பு³த்³து⁴ப்பாதே³ ஸாவத்தி²யங் மஹாகோஸலரஞ்ஞோ ப⁴கி³னீ ஹுத்வா நிப்³ப³த்தி. ஸா ஸத்தா²ரா ரஞ்ஞோ பஸேனதி³ஸ்ஸ கோஸலஸ்ஸ ‘‘சத்தாரோ கோ² மே, மஹாராஜ, த³ஹராதி ந உஞ்ஞாதப்³பா³’’திஆதி³னா (ஸங்॰ நி॰ 1.112) தே³ஸிதங் த⁴ம்மங் ஸுத்வா லத்³த⁴ப்பஸாதா³ ஸரணேஸு ச ஸீலேஸு ச பதிட்டா²ய பப்³ப³ஜிதுகாமாபி ‘‘அய்யிகங் படிஜக்³கி³ஸ்ஸாமீ’’தி சிரகாலங் வீதினாமெத்வா அபரபா⁴கே³ அய்யிகாய காலங்கதாய ரஞ்ஞா ஸத்³தி⁴ங் மஹக்³கா⁴னி அத்த²ரணபாவுரணானி கா³ஹாபெத்வா விஹாரங் க³ந்த்வா ஸங்க⁴ஸ்ஸ தா³பெத்வா ஸத்து² ஸந்திகே த⁴ம்மங் ஸுத்வா அனாகா³மிப²லே பதிட்டி²தா பப்³ப³ஜ்ஜங் யாசி. ஸத்தா² தஸ்ஸா ஞாணபரிபாகங் தி³ஸ்வா –
Sukhaṃ tvaṃ vuḍḍhike sehīti sumanāya vuḍḍhapabbajitāya gāthā. Ayampi purimabuddhesu katādhikārā tattha tattha bhave kusalaṃ upacinitvā imasmiṃ buddhuppāde sāvatthiyaṃ mahākosalarañño bhaginī hutvā nibbatti. Sā satthārā rañño pasenadissa kosalassa ‘‘cattāro kho me, mahārāja, daharāti na uññātabbā’’tiādinā (saṃ. ni. 1.112) desitaṃ dhammaṃ sutvā laddhappasādā saraṇesu ca sīlesu ca patiṭṭhāya pabbajitukāmāpi ‘‘ayyikaṃ paṭijaggissāmī’’ti cirakālaṃ vītināmetvā aparabhāge ayyikāya kālaṅkatāya raññā saddhiṃ mahagghāni attharaṇapāvuraṇāni gāhāpetvā vihāraṃ gantvā saṅghassa dāpetvā satthu santike dhammaṃ sutvā anāgāmiphale patiṭṭhitā pabbajjaṃ yāci. Satthā tassā ñāṇaparipākaṃ disvā –
16.
16.
‘‘ஸுக²ங் த்வங் வுட்³டி⁴கே ஸேஹி, கத்வா சோளேன பாருதா;
‘‘Sukhaṃ tvaṃ vuḍḍhike sehi, katvā coḷena pārutā;
உபஸந்தோ ஹி தே ராகோ³, ஸீதிபூ⁴தாஸி நிப்³பு³தா’’தி. –
Upasanto hi te rāgo, sītibhūtāsi nibbutā’’ti. –
இமங் கா³த²ங் அபா⁴ஸி. ஸா கா³தா²பரியோஸானே ஸஹ படிஸம்பி⁴தா³ஹி அரஹத்தங் பத்வா உதா³னவஸேன தமேவ கா³த²ங் அபா⁴ஸி. இத³மேவ சஸ்ஸா அஞ்ஞாப்³யாகரணங் அஹோஸி, ஸா தாவதே³வ பப்³ப³ஜி. கா³தா²ய பன வுட்³டி⁴கேதி வுட்³டே⁴, வயோவுட்³டே⁴தி அத்தோ². அயங் பன ஸீலாதி³கு³ணேஹிபி வுட்³டா⁴, தே²ரியா வுத்தகா³தா²ய சதுத்த²பாதே³ ஸீதிபூ⁴தாஸி நிப்³பு³தாதி யோஜேதப்³ப³ங். ஸேஸங் வுத்தனயமேவ.
Imaṃ gāthaṃ abhāsi. Sā gāthāpariyosāne saha paṭisambhidāhi arahattaṃ patvā udānavasena tameva gāthaṃ abhāsi. Idameva cassā aññābyākaraṇaṃ ahosi, sā tāvadeva pabbaji. Gāthāya pana vuḍḍhiketi vuḍḍhe, vayovuḍḍheti attho. Ayaṃ pana sīlādiguṇehipi vuḍḍhā, theriyā vuttagāthāya catutthapāde sītibhūtāsi nibbutāti yojetabbaṃ. Sesaṃ vuttanayameva.
வுட்³ட⁴பப்³ப³ஜிதஸுமனாதே²ரீகா³தா²வண்ணனா நிட்டி²தா.
Vuḍḍhapabbajitasumanātherīgāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரீகா³தா²பாளி • Therīgāthāpāḷi / 16. வுட்³ட⁴பப்³ப³ஜிதஸுமனாதே²ரீகா³தா² • 16. Vuḍḍhapabbajitasumanātherīgāthā
