| Library / Tipiṭaka / ཏིཔིཊཀ • Tipiṭaka / ཐེརཱིགཱཐཱ-ཨཊྛཀཐཱ • Therīgāthā-aṭṭhakathā |
༡༦. ཝུཌྜྷཔབྦཛིཏསུམནཱཐེརཱིགཱཐཱཝཎྞནཱ
16. Vuḍḍhapabbajitasumanātherīgāthāvaṇṇanā
སུཁཾ ཏྭཾ ཝུཌྜྷིཀེ སེཧཱིཏི སུམནཱཡ ཝུཌྜྷཔབྦཛིཏཱཡ གཱཐཱ། ཨཡམྤི པུརིམབུདྡྷེསུ ཀཏཱདྷིཀཱརཱ ཏཏྠ ཏཏྠ བྷཝེ ཀུསལཾ ཨུཔཙིནིཏྭཱ ཨིམསྨིཾ བུདྡྷུཔྤཱདེ སཱཝཏྠིཡཾ མཧཱཀོསལརཉྙོ བྷགིནཱི ཧུཏྭཱ ནིབྦཏྟི། སཱ སཏྠཱརཱ རཉྙོ པསེནདིསྶ ཀོསལསྶ ‘‘ཙཏྟཱརོ ཁོ མེ, མཧཱརཱཛ, དཧརཱཏི ན ཨུཉྙཱཏབྦཱ’’ཏིཨཱདིནཱ (སཾ॰ ནི॰ ༡.༡༡༢) དེསིཏཾ དྷམྨཾ སུཏྭཱ ལདྡྷཔྤསཱདཱ སརཎེསུ ཙ སཱིལེསུ ཙ པཏིཊྛཱཡ པབྦཛིཏུཀཱམཱཔི ‘‘ཨཡྻིཀཾ པཊིཛགྒིསྶཱམཱི’’ཏི ཙིརཀཱལཾ ཝཱིཏིནཱམེཏྭཱ ཨཔརབྷཱགེ ཨཡྻིཀཱཡ ཀཱལངྐཏཱཡ རཉྙཱ སདྡྷིཾ མཧགྒྷཱནི ཨཏྠརཎཔཱཝུརཎཱནི གཱཧཱཔེཏྭཱ ཝིཧཱརཾ གནྟྭཱ སངྒྷསྶ དཱཔེཏྭཱ སཏྠུ སནྟིཀེ དྷམྨཾ སུཏྭཱ ཨནཱགཱམིཕལེ པཏིཊྛིཏཱ པབྦཛྫཾ ཡཱཙི། སཏྠཱ ཏསྶཱ ཉཱཎཔརིཔཱཀཾ དིསྭཱ –
Sukhaṃ tvaṃ vuḍḍhike sehīti sumanāya vuḍḍhapabbajitāya gāthā. Ayampi purimabuddhesu katādhikārā tattha tattha bhave kusalaṃ upacinitvā imasmiṃ buddhuppāde sāvatthiyaṃ mahākosalarañño bhaginī hutvā nibbatti. Sā satthārā rañño pasenadissa kosalassa ‘‘cattāro kho me, mahārāja, daharāti na uññātabbā’’tiādinā (saṃ. ni. 1.112) desitaṃ dhammaṃ sutvā laddhappasādā saraṇesu ca sīlesu ca patiṭṭhāya pabbajitukāmāpi ‘‘ayyikaṃ paṭijaggissāmī’’ti cirakālaṃ vītināmetvā aparabhāge ayyikāya kālaṅkatāya raññā saddhiṃ mahagghāni attharaṇapāvuraṇāni gāhāpetvā vihāraṃ gantvā saṅghassa dāpetvā satthu santike dhammaṃ sutvā anāgāmiphale patiṭṭhitā pabbajjaṃ yāci. Satthā tassā ñāṇaparipākaṃ disvā –
༡༦.
16.
‘‘སུཁཾ ཏྭཾ ཝུཌྜྷིཀེ སེཧི, ཀཏྭཱ ཙོལེ༹ན པཱརུཏཱ།
‘‘Sukhaṃ tvaṃ vuḍḍhike sehi, katvā coḷena pārutā;
ཨུཔསནྟོ ཧི ཏེ རཱགོ, སཱིཏིབྷཱུཏཱསི ནིབྦུཏཱ’’ཏི༎ –
Upasanto hi te rāgo, sītibhūtāsi nibbutā’’ti. –
ཨིམཾ གཱཐཾ ཨབྷཱསི། སཱ གཱཐཱཔརིཡོསཱནེ སཧ པཊིསམྦྷིདཱཧི ཨརཧཏྟཾ པཏྭཱ ཨུདཱནཝསེན ཏམེཝ གཱཐཾ ཨབྷཱསི། ཨིདམེཝ ཙསྶཱ ཨཉྙཱབྱཱཀརཎཾ ཨཧོསི, སཱ ཏཱཝདེཝ པབྦཛི། གཱཐཱཡ པན ཝུཌྜྷིཀེཏི ཝུཌྜྷེ, ཝཡོཝུཌྜྷེཏི ཨཏྠོ། ཨཡཾ པན སཱིལཱདིགུཎེཧིཔི ཝུཌྜྷཱ, ཐེརིཡཱ ཝུཏྟགཱཐཱཡ ཙཏུཏྠཔཱདེ སཱིཏིབྷཱུཏཱསི ནིབྦུཏཱཏི ཡོཛེཏབྦཾ། སེསཾ ཝུཏྟནཡམེཝ།
Imaṃ gāthaṃ abhāsi. Sā gāthāpariyosāne saha paṭisambhidāhi arahattaṃ patvā udānavasena tameva gāthaṃ abhāsi. Idameva cassā aññābyākaraṇaṃ ahosi, sā tāvadeva pabbaji. Gāthāya pana vuḍḍhiketi vuḍḍhe, vayovuḍḍheti attho. Ayaṃ pana sīlādiguṇehipi vuḍḍhā, theriyā vuttagāthāya catutthapāde sītibhūtāsi nibbutāti yojetabbaṃ. Sesaṃ vuttanayameva.
ཝུཌྜྷཔབྦཛིཏསུམནཱཐེརཱིགཱཐཱཝཎྞནཱ ནིཊྛིཏཱ།
Vuḍḍhapabbajitasumanātherīgāthāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཐེརཱིགཱཐཱཔཱལི༹ • Therīgāthāpāḷi / ༡༦. ཝུཌྜྷཔབྦཛིཏསུམནཱཐེརཱིགཱཐཱ • 16. Vuḍḍhapabbajitasumanātherīgāthā
