| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
вуд̣дхабаб̣б̣аж̇ид̇авад̇т̇угат̇ааван̣н̣анаа
Vuḍḍhapabbajitavatthukathāvaṇṇanā
303. аад̇умаавад̇т̇умхи ан̃н̃ад̇аро вуд̣дхабаб̣б̣аж̇ид̇од̇и субхад̣̇д̣̇о наама ан̃н̃ад̇аро бхигку вуд̣дхагаалз баб̣б̣аж̇ид̇ад̇д̇аа ‘‘вуд̣дхабаб̣б̣аж̇ид̇о’’д̇и вуд̇д̇о. д̣̇вз д̣̇аарагаад̇и сааман̣зрабхуумияам̣ тид̇аа д̣̇вз буд̇д̇аа. наал̣ияааваабагзнаад̇и наал̣ияаа жзва т̇авигааяа жа. сам̣харим̣сууд̇и яасмаа мануссаа д̇з д̣̇аарагз ман̃ж̇убхаан̣инз бадибхаанаванд̇з д̣̇исваа гаарзд̇угаамааби агаарзд̇угаамааби гаарзнд̇иязва, гад̇агаалз жа ‘‘гим̣ г̇ан̣хиссат̇а д̇аад̇аа’’д̇и бужчанд̇и. д̇з вад̣̇анд̇и ‘‘на амхаагам̣ ан̃н̃зна гзнажи ад̇т̇о, бид̇аа бана но бхаг̇авад̇о ааг̇ад̇агаалз яааг̇уд̣̇аанам̣ гаад̇угаамо’’д̇и. д̇ам̣ суд̇ваа мануссаа абариг̇ан̣зд̇ваава яам̣ д̇з саггонд̇и харид̇ум̣, саб̣б̣ам̣ д̣̇знд̇и. яамби на саггонд̇и, мануссзхи бзсзнд̇и. д̇асмаа д̇з д̣̇аарагаа б̣ахум̣ лон̣амби д̇зламби саббимби д̇ан̣д̣уламби каад̣̇анийяамби сам̣харим̣су.
303. Ātumāvatthumhi aññataro vuḍḍhapabbajitoti subhaddo nāma aññataro bhikkhu vuḍḍhakāle pabbajitattā ‘‘vuḍḍhapabbajito’’ti vutto. Dve dārakāti sāmaṇerabhūmiyaṃ ṭhitā dve puttā. Nāḷiyāvāpakenāti nāḷiyā ceva thavikāya ca. Saṃhariṃsūti yasmā manussā te dārake mañjubhāṇine paṭibhānavante disvā kāretukāmāpi akāretukāmāpi kārentiyeva, katakāle ca ‘‘kiṃ gaṇhissatha tātā’’ti pucchanti. Te vadanti ‘‘na amhākaṃ aññena kenaci attho, pitā pana no bhagavato āgatakāle yāgudānaṃ kātukāmo’’ti. Taṃ sutvā manussā aparigaṇetvāva yaṃ te sakkonti harituṃ, sabbaṃ denti. Yampi na sakkonti, manussehi pesenti. Tasmā te dārakā bahuṃ loṇampi telampi sappimpi taṇḍulampi khādanīyampi saṃhariṃsu.
аад̇умааяам̣ вихарад̇ийд̇и аад̇умам̣ ниссааяа вихарад̇и. бхусааг̇аарзд̇и бхусамаяз аг̇аарагз. д̇ад̇т̇а гира маханд̇ам̣ балаалабун̃ж̇ам̣ аб̣бханд̇арад̇о балаалам̣ ниггад̣дхид̇ваа саалаасад̣̇исам̣ баб̣б̣аж̇ид̇аанам̣ васанаяог̇г̇адтаанасад̣̇исам̣ гад̇ам̣, д̇ад̣̇аа бхаг̇аваа д̇ад̇т̇а васи. ат̇а бхаг̇авад̇и аад̇умам̣ ааг̇анд̇ваа бхусааг̇аарагам̣ бавидтз субхад̣̇д̣̇о сааяанхасамаяам̣ г̇аамад̣̇ваарам̣ г̇анд̇ваа мануссз ааманд̇зси ‘‘убаасагаа наахам̣ д̇умхаагам̣ санд̇игаа ан̃н̃ам̣ гин̃жи бажжаасийсаами, маяхам̣ д̣̇аарагзхи аанийд̇ад̇злаад̣̇ийниязва сан̇гхасса бахонд̇и, хад̇т̇агаммамад̇д̇ам̣ мз д̣̇зт̇аа’’д̇и. гим̣, бханд̇з, гаромаад̇и? ‘‘ид̣̇ан̃жид̣̇ан̃жа г̇ан̣хат̇аа’’д̇и саб̣б̣уубагаран̣аани г̇аахзд̇ваа вихаарз уд̣̇д̇ханаани гаарзд̇ваа згам̣ гаал̣агам̣ гаасаавам̣ ниваасзд̇ваа д̇аад̣̇исамзва баарубид̇ваа ‘‘ид̣̇ам̣ гарот̇а, ид̣̇ам̣ гарот̇аа’’д̇и саб̣б̣арад̇д̇им̣ вижаарзнд̇о сад̇асахассам̣ виссаж̇ж̇зд̇ваа бхож̇ж̇аяааг̇ун̃жа мад̇хуг̇ол̣аган̃жа бадияаад̣̇аабзси. бхож̇ж̇аяааг̇у наама батамам̣ бхун̃ж̇ид̇ваа баад̇аб̣б̣аяааг̇у, д̇ад̇т̇а саббимад̇хупаан̣ид̇амажчамам̣сабубпапаларасаад̣̇и яам̣гин̃жи каад̣̇анийяам̣ наама, саб̣б̣ам̣ бависад̇и, гийл̣ид̇угаамаанам̣ сийсамагканаяог̇г̇аа ход̇и суг̇анд̇хаг̇анд̇хаа.
Ātumāyaṃ viharatīti ātumaṃ nissāya viharati. Bhusāgāreti bhusamaye agārake. Tattha kira mahantaṃ palālapuñjaṃ abbhantarato palālaṃ nikkaḍḍhitvā sālāsadisaṃ pabbajitānaṃ vasanayoggaṭṭhānasadisaṃ kataṃ, tadā bhagavā tattha vasi. Atha bhagavati ātumaṃ āgantvā bhusāgārakaṃ paviṭṭhe subhaddo sāyanhasamayaṃ gāmadvāraṃ gantvā manusse āmantesi ‘‘upāsakā nāhaṃ tumhākaṃ santikā aññaṃ kiñci paccāsīsāmi, mayhaṃ dārakehi ānītatelādīniyeva saṅghassa pahonti, hatthakammamattaṃ me dethā’’ti. Kiṃ, bhante, karomāti? ‘‘Idañcidañca gaṇhathā’’ti sabbūpakaraṇāni gāhetvā vihāre uddhanāni kāretvā ekaṃ kāḷakaṃ kāsāvaṃ nivāsetvā tādisameva pārupitvā ‘‘idaṃ karotha, idaṃ karothā’’ti sabbarattiṃ vicārento satasahassaṃ vissajjetvā bhojjayāguñca madhugoḷakañca paṭiyādāpesi. Bhojjayāgu nāma paṭhamaṃ bhuñjitvā pātabbayāgu, tattha sappimadhuphāṇitamacchamaṃsapupphaphalarasādi yaṃkiñci khādanīyaṃ nāma, sabbaṃ pavisati, kīḷitukāmānaṃ sīsamakkhanayoggā hoti sugandhagandhā.
ат̇а бхаг̇аваа гаалассзва сарийрабадиж̇аг̇г̇анам̣ гад̇ваа бхигкусан̇гхабаривуд̇о бин̣д̣ааяа жарид̇ум̣ аад̇умаг̇ааманаг̇араабхимуко бааяааси. мануссаа д̇асса аарожзсум̣ ‘‘бхаг̇аваа бин̣д̣ааяа г̇аамам̣ бависад̇и, д̇аяаа гасса яааг̇у бадияаад̣̇ид̇аа’’д̇и. со яат̇аанивад̇т̇абааруд̇зхзва д̇зхи гаал̣агагаасаавзхи згзна хад̇т̇зна д̣̇аб̣б̣ин̃жа гадажчун̃жа г̇ахзд̇ваа б̣рахмаа вияа д̣̇агкин̣аж̇аан̣уман̣д̣алам̣ бхуумияам̣ бад̇идтаабзд̇ваа ванд̣̇ид̇ваа ‘‘бадиг̇г̇ан̣хаад̇у мз, бханд̇з, бхаг̇аваа яааг̇у’’нд̇и ааха. д̇зна вуд̇д̇ам̣ ‘‘ат̇а ко со вуд̣дхабаб̣б̣аж̇ид̇о д̇ассаа рад̇д̇ияаа ажжаязна б̣ахуд̇арам̣ яааг̇ум̣ бадияаад̣̇аабзд̇ваа бхаг̇авад̇о убанаамзсий’’д̇и. ж̇аананд̇ааби д̇ат̇ааг̇ад̇аа бужчанд̇ийд̇иаад̣̇и вуд̇д̇анаяамзва. гуд̇ааяанд̇и гуд̇о аяам̣. сзсамзд̇т̇а уд̇д̇аанамзва.
Atha bhagavā kālasseva sarīrapaṭijagganaṃ katvā bhikkhusaṅghaparivuto piṇḍāya carituṃ ātumagāmanagarābhimukho pāyāsi. Manussā tassa ārocesuṃ ‘‘bhagavā piṇḍāya gāmaṃ pavisati, tayā kassa yāgu paṭiyāditā’’ti. So yathānivatthapāruteheva tehi kāḷakakāsāvehi ekena hatthena dabbiñca kaṭacchuñca gahetvā brahmā viya dakkhiṇajāṇumaṇḍalaṃ bhūmiyaṃ patiṭṭhāpetvā vanditvā ‘‘paṭiggaṇhātu me, bhante, bhagavā yāgu’’nti āha. Tena vuttaṃ ‘‘atha kho so vuḍḍhapabbajito tassā rattiyā accayena bahutaraṃ yāguṃ paṭiyādāpetvā bhagavato upanāmesī’’ti. Jānantāpi tathāgatā pucchantītiādi vuttanayameva. Kutāyanti kuto ayaṃ. Sesamettha uttānameva.
304. д̣̇асабхааг̇ам̣ д̣̇ад̇ваад̇и д̣̇асамабхааг̇ам̣ д̣̇ад̇ваа. д̇знзвааха ‘‘д̣̇аса годтаасз гад̇ваа зго годтаасо бхуумисаамигаанам̣ д̣̇аад̇аб̣б̣о’’д̇и.
304.Dasabhāgaṃ datvāti dasamabhāgaṃ datvā. Tenevāha ‘‘dasa koṭṭhāse katvā eko koṭṭhāso bhūmisāmikānaṃ dātabbo’’ti.
вуд̣дхабаб̣б̣аж̇ид̇авад̇т̇угат̇ааван̣н̣анаа нидтид̇аа.
Vuḍḍhapabbajitavatthukathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 184. вуд̣дхабаб̣б̣аж̇ид̇авад̇т̇у • 184. Vuḍḍhapabbajitavatthu
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / рож̇амаллаад̣̇ивад̇т̇угат̇аа • Rojamallādivatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / рож̇амаллаад̣̇ивад̇т̇угат̇ааван̣н̣анаа • Rojamallādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 183. рож̇амаллаад̣̇ивад̇т̇угат̇аа • 183. Rojamallādivatthukathā
