| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. வுட்டி²ஸுத்தவண்ணனா
4. Vuṭṭhisuttavaṇṇanā
74. சதுத்தே² பீ³ஜந்தி உப்பதந்தானங் ஸத்தவித⁴ங் த⁴ஞ்ஞபீ³ஜங் ஸெட்ட²ங். தஸ்மிஞ்ஹி உக்³க³தே ஜனபதோ³ கே²மோ ஹோதி ஸுபி⁴க்கோ². நிபததந்தி நிபதந்தானங் மேக⁴வுட்டி² ஸெட்டா². மேக⁴வுட்டி²யஞ்ஹி ஸதி விவிதா⁴னி ஸஸ்ஸானி உப்பஜ்ஜந்தி, ஜனபதா³ பீ²தா ஹொந்தி கே²மா ஸுபி⁴க்கா². பவஜமானானந்தி ஜங்க³மானங் பத³ஸா சரமானானங் கா³வோ ஸெட்டா². தா நிஸ்ஸாய ஹி ஸத்தா பஞ்ச கோ³ரஸே பரிபு⁴ஞ்ஜமானா ஸுக²ங் விஹரந்தி. பவத³தந்தி ராஜகுலமஜ்ஜா²தீ³ஸு வத³ந்தானங் புத்தோ வரோ. ஸோ ஹி மாதாபிதூனங் அனத்தா²வஹங் ந வத³தி.
74. Catutthe bījanti uppatantānaṃ sattavidhaṃ dhaññabījaṃ seṭṭhaṃ. Tasmiñhi uggate janapado khemo hoti subhikkho. Nipatatanti nipatantānaṃ meghavuṭṭhi seṭṭhā. Meghavuṭṭhiyañhi sati vividhāni sassāni uppajjanti, janapadā phītā honti khemā subhikkhā. Pavajamānānanti jaṅgamānaṃ padasā caramānānaṃ gāvo seṭṭhā. Tā nissāya hi sattā pañca gorase paribhuñjamānā sukhaṃ viharanti. Pavadatanti rājakulamajjhādīsu vadantānaṃ putto varo. So hi mātāpitūnaṃ anatthāvahaṃ na vadati.
விஜ்ஜா உப்பததங் ஸெட்டா²தி புரிமபஞ்ஹே கிர ஸுத்வா ஸமீபே டி²தா ஏகா தே³வதா ‘‘தே³வதே, கஸ்மா த்வங் ஏதங் பஞ்ஹங் த³ஸப³லங் புச்ச²ஸி? அஹங் தே கதெ²ஸ்ஸாமீ’’தி அத்தனோ க²ந்தியா லத்³தி⁴யா பஞ்ஹங் கதே²ஸி. அத² நங் இதரா தே³வதா ஆஹ – ‘‘யாவ பத⁴ங்ஸீ வதே³ஸி தே³வதே யாவ பக³ப்³பா⁴ முக²ரா, அஹங் பு³த்³த⁴ங் ப⁴க³வந்தங் புச்சா²மி. த்வங் மய்ஹங் கஸ்மா கதே²ஸீ’’தி? நிவத்தெத்வா ததே³வ பஞ்ஹங் த³ஸப³லங் புச்சி². அத²ஸ்ஸா ஸத்தா² விஸ்ஸஜ்ஜெந்தோ விஜ்ஜா உப்பததந்திஆதி³மாஹ. தத்த² விஜ்ஜாதி சதுமக்³க³விஜ்ஜா. ஸா ஹி உப்பதமானா ஸப்³பா³குஸலத⁴ம்மே ஸமுக்³கா⁴தேதி. தஸ்மா ‘‘உப்பததங் ஸெட்டா²’’தி வுத்தா. அவிஜ்ஜாதி வட்டமூலகமஹாஅவிஜ்ஜா. ஸா ஹி நிபதந்தானங் ஓஸீத³ந்தானங் வரா. பவஜமானானந்தி பத³ஸா சரமானானங் ஜங்க³மானங் அனோமபுஞ்ஞக்கெ²த்தபூ⁴தோ ஸங்கோ⁴ வரோ. தஞ்ஹி தத்த² தத்த² தி³ஸ்வா பஸன்னசித்தா ஸத்தா ஸொத்தி²ங் பாபுணந்தி. பு³த்³தோ⁴தி யாதி³ஸோ புத்தோ வா ஹோது அஞ்ஞோ வா, யேஸங் கேஸஞ்சி வத³மானானங் பு³த்³தோ⁴ வரோ. தஸ்ஸ ஹி த⁴ம்மதே³ஸனங் ஆக³ம்ம அனேகஸதஸஹஸ்ஸானங் பாணானங் ப³ந்த⁴னமொக்கோ² ஹோதீதி. சதுத்த²ங்.
Vijjāuppatataṃ seṭṭhāti purimapañhe kira sutvā samīpe ṭhitā ekā devatā ‘‘devate, kasmā tvaṃ etaṃ pañhaṃ dasabalaṃ pucchasi? Ahaṃ te kathessāmī’’ti attano khantiyā laddhiyā pañhaṃ kathesi. Atha naṃ itarā devatā āha – ‘‘yāva padhaṃsī vadesi devate yāva pagabbhā mukharā, ahaṃ buddhaṃ bhagavantaṃ pucchāmi. Tvaṃ mayhaṃ kasmā kathesī’’ti? Nivattetvā tadeva pañhaṃ dasabalaṃ pucchi. Athassā satthā vissajjento vijjā uppatatantiādimāha. Tattha vijjāti catumaggavijjā. Sā hi uppatamānā sabbākusaladhamme samugghāteti. Tasmā ‘‘uppatataṃ seṭṭhā’’ti vuttā. Avijjāti vaṭṭamūlakamahāavijjā. Sā hi nipatantānaṃ osīdantānaṃ varā. Pavajamānānanti padasā caramānānaṃ jaṅgamānaṃ anomapuññakkhettabhūto saṅgho varo. Tañhi tattha tattha disvā pasannacittā sattā sotthiṃ pāpuṇanti. Buddhoti yādiso putto vā hotu añño vā, yesaṃ kesañci vadamānānaṃ buddho varo. Tassa hi dhammadesanaṃ āgamma anekasatasahassānaṃ pāṇānaṃ bandhanamokkho hotīti. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. வுட்டி²ஸுத்தங் • 4. Vuṭṭhisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. வுட்டி²ஸுத்தவண்ணனா • 4. Vuṭṭhisuttavaṇṇanā
