| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
4. вудтисуд̇д̇аван̣н̣анаа
4. Vuṭṭhisuttavaṇṇanā
74. жад̇уд̇т̇з б̣ийж̇анд̇и уббад̇анд̇аанам̣ сад̇д̇авид̇хам̣ д̇хан̃н̃аб̣ийж̇ам̣ сздтам̣. д̇асмин̃хи уг̇г̇ад̇з ж̇анабад̣̇о кзмо ход̇и субхигко. нибад̇ад̇анд̇и нибад̇анд̇аанам̣ мзгхавудти сздтаа. мзгхавудтияан̃хи сад̇и вивид̇хаани сассаани уббаж̇ж̇анд̇и, ж̇анабад̣̇аа пийд̇аа хонд̇и кзмаа субхигкаа. баваж̇амаанаананд̇и ж̇ан̇г̇амаанам̣ бад̣̇асаа жарамаанаанам̣ г̇ааво сздтаа. д̇аа ниссааяа хи сад̇д̇аа бан̃жа г̇орасз барибхун̃ж̇амаанаа сукам̣ вихаранд̇и. бавад̣̇ад̇анд̇и рааж̇агуламаж̇жхаад̣̇ийсу вад̣̇анд̇аанам̣ буд̇д̇о варо. со хи маад̇аабид̇уунам̣ анад̇т̇аавахам̣ на вад̣̇ад̇и.
74. Catutthe bījanti uppatantānaṃ sattavidhaṃ dhaññabījaṃ seṭṭhaṃ. Tasmiñhi uggate janapado khemo hoti subhikkho. Nipatatanti nipatantānaṃ meghavuṭṭhi seṭṭhā. Meghavuṭṭhiyañhi sati vividhāni sassāni uppajjanti, janapadā phītā honti khemā subhikkhā. Pavajamānānanti jaṅgamānaṃ padasā caramānānaṃ gāvo seṭṭhā. Tā nissāya hi sattā pañca gorase paribhuñjamānā sukhaṃ viharanti. Pavadatanti rājakulamajjhādīsu vadantānaṃ putto varo. So hi mātāpitūnaṃ anatthāvahaṃ na vadati.
виж̇ж̇аа уббад̇ад̇ам̣ сздтаад̇и буримабан̃хз гира суд̇ваа самийбз тид̇аа згаа д̣̇звад̇аа ‘‘д̣̇звад̇з, гасмаа д̇вам̣ зд̇ам̣ бан̃хам̣ д̣̇асаб̣алам̣ бужчаси? ахам̣ д̇з гат̇зссаамий’’д̇и ад̇д̇ано канд̇ияаа лад̣̇д̇хияаа бан̃хам̣ гат̇зси. ат̇а нам̣ ид̇араа д̣̇звад̇аа ааха – ‘‘яаава бад̇хам̣сий вад̣̇зси д̣̇звад̇з яаава баг̇аб̣бхаа мукараа, ахам̣ б̣уд̣̇д̇хам̣ бхаг̇аванд̇ам̣ бужчаами. д̇вам̣ маяхам̣ гасмаа гат̇зсий’’д̇и? нивад̇д̇зд̇ваа д̇ад̣̇зва бан̃хам̣ д̣̇асаб̣алам̣ бужчи. ат̇ассаа сад̇т̇аа виссаж̇ж̇знд̇о виж̇ж̇аа уббад̇ад̇анд̇иаад̣̇имааха. д̇ад̇т̇а виж̇ж̇аад̇и жад̇умаг̇г̇авиж̇ж̇аа. саа хи уббад̇амаанаа саб̣б̣аагусалад̇хаммз самуг̇гхаад̇зд̇и. д̇асмаа ‘‘уббад̇ад̇ам̣ сздтаа’’д̇и вуд̇д̇аа. авиж̇ж̇аад̇и ваддамуулагамахааавиж̇ж̇аа. саа хи нибад̇анд̇аанам̣ осийд̣̇анд̇аанам̣ вараа. баваж̇амаанаананд̇и бад̣̇асаа жарамаанаанам̣ ж̇ан̇г̇амаанам̣ аномабун̃н̃агкзд̇д̇абхууд̇о сан̇гхо варо. д̇ан̃хи д̇ад̇т̇а д̇ад̇т̇а д̣̇исваа басаннажид̇д̇аа сад̇д̇аа сод̇т̇им̣ баабун̣анд̇и. б̣уд̣̇д̇ход̇и яаад̣̇исо буд̇д̇о ваа ход̇у ан̃н̃о ваа, язсам̣ гзсан̃жи вад̣̇амаанаанам̣ б̣уд̣̇д̇хо варо. д̇асса хи д̇хаммад̣̇зсанам̣ ааг̇амма анзгасад̇асахассаанам̣ баан̣аанам̣ б̣анд̇ханамогко ход̇ийд̇и. жад̇уд̇т̇ам̣.
Vijjāuppatataṃ seṭṭhāti purimapañhe kira sutvā samīpe ṭhitā ekā devatā ‘‘devate, kasmā tvaṃ etaṃ pañhaṃ dasabalaṃ pucchasi? Ahaṃ te kathessāmī’’ti attano khantiyā laddhiyā pañhaṃ kathesi. Atha naṃ itarā devatā āha – ‘‘yāva padhaṃsī vadesi devate yāva pagabbhā mukharā, ahaṃ buddhaṃ bhagavantaṃ pucchāmi. Tvaṃ mayhaṃ kasmā kathesī’’ti? Nivattetvā tadeva pañhaṃ dasabalaṃ pucchi. Athassā satthā vissajjento vijjā uppatatantiādimāha. Tattha vijjāti catumaggavijjā. Sā hi uppatamānā sabbākusaladhamme samugghāteti. Tasmā ‘‘uppatataṃ seṭṭhā’’ti vuttā. Avijjāti vaṭṭamūlakamahāavijjā. Sā hi nipatantānaṃ osīdantānaṃ varā. Pavajamānānanti padasā caramānānaṃ jaṅgamānaṃ anomapuññakkhettabhūto saṅgho varo. Tañhi tattha tattha disvā pasannacittā sattā sotthiṃ pāpuṇanti. Buddhoti yādiso putto vā hotu añño vā, yesaṃ kesañci vadamānānaṃ buddho varo. Tassa hi dhammadesanaṃ āgamma anekasatasahassānaṃ pāṇānaṃ bandhanamokkho hotīti. Catutthaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 4. вудтисуд̇д̇ам̣ • 4. Vuṭṭhisuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 4. вудтисуд̇д̇аван̣н̣анаа • 4. Vuṭṭhisuttavaṇṇanā
