| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
யாகு³மது⁴கோ³ளகாதி³கதா²வண்ணனா
Yāgumadhugoḷakādikathāvaṇṇanā
283. யதா²த⁴ம்மோ காரேதப்³போ³தி இத³ங் ஸங்கீ³திகாரகவசனங். ந ஹி ப⁴க³வா தமேவ ஸிக்கா²பத³ங் த்³விக்க²த்துங் பஞ்ஞபேஸி, ஏவங் ஏவரூபேஸூதி ஏகே. பட²மபஞ்ஞத்தமேவ ஸந்தா⁴ய வுத்தங், ததா²பி ந ச தே பி⁴க்கூ² ஸாபத்திகா ஜாதா. கத²ங்? பரம்பரபோ⁴ஜனஸிக்கா²பத³ஸ்ஸ அட்டு²ப்பத்தியா. ‘‘அபிச மயங் காலஸ்ஸேவ பிண்டா³ய சரித்வா பு⁴ஞ்ஜிம்ஹா’’தி வுத்தங். மாதிகாவிப⁴ங்கே³ (பாசி॰ 227) ச ‘‘பரம்பரபோ⁴ஜனங் நாம பஞ்சன்னங் போ⁴ஜனானங் அஞ்ஞதரேன போ⁴ஜனேன நிமந்திதோ, தங் ட²பெத்வா அஞ்ஞங் பஞ்சன்னங் போ⁴ஜனானங் அஞ்ஞதரங் போ⁴ஜனங் பு⁴ஞ்ஜதி, ஏதங் பரம்பரபோ⁴ஜனங் நாமா’’தி வுத்தங், தஸ்மா அஞ்ஞங் போ⁴ஜனங் நாம நிமந்தனதோ லத்³த⁴ங் யங் கிஞ்சீதி ஸித்³த⁴ங். யஸ்மா ந போ⁴ஜ்ஜயாகு³னிமந்தனதோ லத்³த⁴போ⁴ஜனங், தஸ்மா ‘‘எத்த² அனாபத்தீ’’தி தே பி⁴க்கூ² பரிபு⁴ஞ்ஜிங்ஸூதி. எத்த² ‘‘யதா²த⁴ம்மோ காரேதப்³போ³’’தி வுத்தத்தா பன அஞ்ஞனிமந்தனதோ லத்³த⁴போ⁴ஜனமேவ பு⁴ஞ்ஜந்தஸ்ஸ ஆபத்தி, நேதரந்தி அனுஞ்ஞாதங். ததோ பட்டா²ய தஸ்ஸ அனாபத்திவாரே ‘‘நிச்சப⁴த்தே ஸலாகப⁴த்தே பக்கி²கே உபோஸதி²கே பாடிபதி³கே’’தி வுத்தங். புப்³பே³ வேஸாலியா பஞ்ஞத்தகாலே நத்தி², யதி³ அத்தி², அட்டு²ப்பத்திமாதிகாவிப⁴ங்க³விரோதோ⁴, தஸ்மா ‘‘அபிச மயங் காலஸ்ஸேவ பிண்டா³ய சரித்வா பு⁴ஞ்ஜிம்ஹா’’தி அட்டு²ப்பத்தியங் வுத்தத்தா, பத³பா⁴ஜனேபி ‘‘அஞ்ஞங் பஞ்சன்னங் போ⁴ஜனானங் அஞ்ஞதரங் போ⁴ஜனங் பு⁴ஞ்ஜதீ’’தி அவிஸேஸேன வுத்தத்தா ச பட²மங் வா பச்சா² வா நிமந்திதங் போ⁴ஜனங் ட²பெத்வா அனிமந்திதமேவ பு⁴ஞ்ஜந்தஸ்ஸ ஆபத்தி, நேதரந்தி கிஞ்சாபி ஆபன்னங், ‘‘ந, பி⁴க்க²வே, அஞ்ஞத்ர நிமந்திதேன அஞ்ஞஸ்ஸ போ⁴ஜ்ஜயாகு³ பரிபு⁴ஞ்ஜிதப்³பா³’’தி வுத்தத்தா பன பட²மனிமந்திதபோ⁴ஜனதோ அஞ்ஞங் பச்சா² லத்³த⁴ங் நிமந்திதபோ⁴ஜனங், நிச்சப⁴த்தாதீ³னி ச பு⁴ஞ்ஜந்தஸ்ஸ ஆபத்தீதி ஆபஜ்ஜமானங் விய ஜாதந்தி அனுபஞ்ஞத்திப்பஸங்க³னிவாரணங், அனிமந்தனபோ⁴ஜனே ஆபத்திப்பஸங்க³னிவாரணஞ்ச கரொந்தோ, பட²மபஞ்ஞத்திஸிக்கா²பத³மேவ இமினா அத்தே²ன பரிணாமெந்தோ ச ‘‘யதா²த⁴ம்மோ காரேதப்³போ³’’தி ப⁴க³வா ஆஹ, தஸ்மா ததோ பட்டா²ய பச்சா² நிமந்தனபோ⁴ஜனங் பு⁴ஞ்ஜந்தஸ்ஸேவ ஆபத்தி. தேஸு ந நிச்சப⁴த்தாதீ³னீதி ஆபன்னங். தேனேவாயஸ்மா உபாலித்தே²ரோ தஸ்ஸ அனாபத்திவாரே ‘‘நிச்சப⁴த்தே’’திஆதீ³னி பஞ்ச பதா³னி பக்கி²பித்வா ஸங்கா³யி. அதி⁴ப்பாயஞ்ஞூ ஹி தே மஹானாகா³, தஸ்மா பட²மமேவ யங் ப⁴க³வதா வுத்தங் ‘‘பஞ்ச போ⁴ஜனானி ட²பெத்வா ஸப்³ப³த்த² அனாபத்தீ’’தி வசனங், பச்சா²பி தங் அனுரக்க²ந்தேன அபோ⁴ஜனங் மது⁴கோ³ளகங் அபராமஸித்வா போ⁴ஜ்ஜயாகு³ ஏவ வுத்தாதி ஏவங் ஆசரியோ.
283.Yathādhammo kāretabboti idaṃ saṅgītikārakavacanaṃ. Na hi bhagavā tameva sikkhāpadaṃ dvikkhattuṃ paññapesi, evaṃ evarūpesūti eke. Paṭhamapaññattameva sandhāya vuttaṃ, tathāpi na ca te bhikkhū sāpattikā jātā. Kathaṃ? Paramparabhojanasikkhāpadassa aṭṭhuppattiyā. ‘‘Apica mayaṃ kālasseva piṇḍāya caritvā bhuñjimhā’’ti vuttaṃ. Mātikāvibhaṅge (pāci. 227) ca ‘‘paramparabhojanaṃ nāma pañcannaṃ bhojanānaṃ aññatarena bhojanena nimantito, taṃ ṭhapetvā aññaṃ pañcannaṃ bhojanānaṃ aññataraṃ bhojanaṃ bhuñjati, etaṃ paramparabhojanaṃ nāmā’’ti vuttaṃ, tasmā aññaṃ bhojanaṃ nāma nimantanato laddhaṃ yaṃ kiñcīti siddhaṃ. Yasmā na bhojjayāgunimantanato laddhabhojanaṃ, tasmā ‘‘ettha anāpattī’’ti te bhikkhū paribhuñjiṃsūti. Ettha ‘‘yathādhammo kāretabbo’’ti vuttattā pana aññanimantanato laddhabhojanameva bhuñjantassa āpatti, netaranti anuññātaṃ. Tato paṭṭhāya tassa anāpattivāre ‘‘niccabhatte salākabhatte pakkhike uposathike pāṭipadike’’ti vuttaṃ. Pubbe vesāliyā paññattakāle natthi, yadi atthi, aṭṭhuppattimātikāvibhaṅgavirodho, tasmā ‘‘apica mayaṃ kālasseva piṇḍāya caritvā bhuñjimhā’’ti aṭṭhuppattiyaṃ vuttattā, padabhājanepi ‘‘aññaṃ pañcannaṃ bhojanānaṃ aññataraṃ bhojanaṃ bhuñjatī’’ti avisesena vuttattā ca paṭhamaṃ vā pacchā vā nimantitaṃ bhojanaṃ ṭhapetvā animantitameva bhuñjantassa āpatti, netaranti kiñcāpi āpannaṃ, ‘‘na, bhikkhave, aññatra nimantitena aññassa bhojjayāgu paribhuñjitabbā’’ti vuttattā pana paṭhamanimantitabhojanato aññaṃ pacchā laddhaṃ nimantitabhojanaṃ, niccabhattādīni ca bhuñjantassa āpattīti āpajjamānaṃ viya jātanti anupaññattippasaṅganivāraṇaṃ, animantanabhojane āpattippasaṅganivāraṇañca karonto, paṭhamapaññattisikkhāpadameva iminā atthena pariṇāmento ca ‘‘yathādhammo kāretabbo’’ti bhagavā āha, tasmā tato paṭṭhāya pacchā nimantanabhojanaṃ bhuñjantasseva āpatti. Tesu na niccabhattādīnīti āpannaṃ. Tenevāyasmā upālitthero tassa anāpattivāre ‘‘niccabhatte’’tiādīni pañca padāni pakkhipitvā saṅgāyi. Adhippāyaññū hi te mahānāgā, tasmā paṭhamameva yaṃ bhagavatā vuttaṃ ‘‘pañca bhojanāni ṭhapetvā sabbattha anāpattī’’ti vacanaṃ, pacchāpi taṃ anurakkhantena abhojanaṃ madhugoḷakaṃ aparāmasitvā bhojjayāgu eva vuttāti evaṃ ācariyo.
எத்தா²ஹ – யதா² பச்சா²லத்³த⁴லேஸேன தே²ரேன நிச்சப⁴த்தாதி³பக்கே²போ கதோ, ஏவங் கதி²னக்க²ந்த⁴கே பரம்பரபோ⁴ஜனங் பக்கி²பித்வா ‘‘அத்த²தகதி²னானங் வோ, பி⁴க்க²வே, ச² கப்பிஸ்ஸந்தீ’’தி கிமத்த²ங் ந வுச்சந்தி? வுச்சதே – யதா²வுத்தலேஸனித³ஸ்ஸனத்த²ங். அஞ்ஞதா² இத³ங் ஸிக்கா²பத³ங் வேஸாலியங், அந்த⁴கவிந்தே³ சாதி உப⁴யத்த² உபட்³டு⁴பட்³டே⁴ன பஞ்ஞத்தங் ஸியா. நோ சே, ஸாபத்திகா பி⁴க்கூ² ஸியுங், ந ச தே ஸாபத்திகா அப்படிக்கி²த்தேபி தேஸங் குக்குச்சத³ஸ்ஸனதோ. ‘‘தேன ஹி, ப்³ராஹ்மண, பி⁴க்கூ²னங் தே³ஹீதி. பி⁴க்கூ² குக்குச்சாயந்தா ந படிக்³க³ண்ஹந்தீ’’தி ஹி வுத்தங். தேஸஞ்ஹி ‘‘பரிபு⁴ஞ்ஜதா²’’தி ப⁴க³வதோ ஆணத்தியா பரிபு⁴த்தானம்பி ‘‘ஓதி³ஸ்ஸகங் நு கோ² இத³ங் அம்ஹாக’’ந்தி விமதிப்பத்தானங் விமதிவினோத³னத்த²ங் ‘‘அனுஜானாமி, பி⁴க்க²வே, யாகு³ஞ்ச மது⁴கோ³ளகஞ்சா’’தி வுத்தங். ஏவமிதா⁴பேதே பஞ்ஞத்தங் பரம்பரபோ⁴ஜனஸிக்கா²பத³ங் ஓமத்³தி³த்வா பரம்பரபோ⁴ஜனங் கத²ங் பு⁴ஞ்ஜிஸ்ஸந்தீதி. எத்தா²ஹு கேசி ஆசரியா பரம்பரபோ⁴ஜனஸிக்கா²பதே³னேவ ‘‘அஞ்ஞஸ்ஸ போ⁴ஜனங் ந கப்பதீ’’தி ஜானந்தாபி ‘‘அனுஜானாமி, பி⁴க்க²வே, யாகு³ஞ்சா’’தி விஸுங் அனுஞ்ஞாதத்தா ‘‘படக்³கி³தா³னமஹாவிகடாதி³ விய கப்பதீ’’தி ஸஞ்ஞாய பு⁴ஞ்ஜிங்ஸு. தேன வுத்தங் ‘‘அபிச மயங் காலஸ்ஸேவ போ⁴ஜ்ஜயாகு³யா தா⁴தா’’திஆதி³, தங் அயுத்தங் தத்த² அட்டு²ப்பத்திமாதிகாவிப⁴ங்க³விரோதே⁴ன அனாபத்திவாரே நிச்சப⁴த்தாதீ³னங் அஸம்ப⁴வப்பஸங்க³தோ, பி⁴க்கூ²னங் ஸாபத்திகபா⁴வானதிக்கமனதோ, மிச்சா²கா³ஹஹேதுப்பஸங்கே³ன ப⁴க³வதா அனுஞ்ஞாதப்பஸங்க³தோ ச. தே ஹி பி⁴க்கூ² யஸ்மா ப⁴க³வா கத்த²சி வினயவஸேன கப்பியம்பி ‘‘கா³தா²பி⁴கீ³தங் மே அபோ⁴ஜனெய்ய’’ந்தி (ஸங்॰ நி॰ 1.194; ஸு॰ நி॰ 81; மி॰ ப॰ 4.5.9) படிக்கி²பதி, தஸ்மா ப⁴க³வதோ அதி⁴ப்பாயங் பதி ‘‘குக்குச்சாயந்தா ந படிக்³க³ண்ஹந்தீ’’தி வுத்தங், ஸிக்கா²பத³ங் பதி ப⁴க³வாபி அத்தனோ அதி⁴ப்பாயப்பகாஸனத்த²மேவ ‘‘அனுஜானாமி, பி⁴க்க²வே, யாகு³ஞ்சா’’தி ஆஹ. து³ரவக்³கா³ஹோ ஹி ப⁴க³வதோ அதி⁴ப்பாயோ. ததா² ஹி பா⁴ரத்³வாஜஸ்ஸ பாயாஸங் அபோ⁴ஜனெய்யந்தி அகதவிஞ்ஞத்திப்பஸங்க³தோ படிக்கி²பி. ஆனந்த³த்தே²ரேன விஞ்ஞாபெத்வா ஸஜ்ஜிதங் தேகடுலயாகு³ங் பன ‘‘யத³பி, ஆனந்த³, விஞ்ஞத்தங், தத³பி அகப்பிய’’ந்தி அவத்வா ‘‘யத³பி, ஆனந்த³, அந்தோவுத்த²’’ந்திஆதி³மேவாஹ. தேன நோ சே தங் அந்தோவுத்த²ங் கப்பதீதி அதி⁴ப்பாயத³ஸ்ஸனேன பணீதபோ⁴ஜனஸூபோத³னவிஞ்ஞத்திஸிக்கா²பதா³னி உபத்த²ம்பே⁴தி ப⁴க³வதோபி கப்பதி, பகே³வ அம்ஹாகந்தி.
Etthāha – yathā pacchāladdhalesena therena niccabhattādipakkhepo kato, evaṃ kathinakkhandhake paramparabhojanaṃ pakkhipitvā ‘‘atthatakathinānaṃ vo, bhikkhave, cha kappissantī’’ti kimatthaṃ na vuccanti? Vuccate – yathāvuttalesanidassanatthaṃ. Aññathā idaṃ sikkhāpadaṃ vesāliyaṃ, andhakavinde cāti ubhayattha upaḍḍhupaḍḍhena paññattaṃ siyā. No ce, sāpattikā bhikkhū siyuṃ, na ca te sāpattikā appaṭikkhittepi tesaṃ kukkuccadassanato. ‘‘Tena hi, brāhmaṇa, bhikkhūnaṃ dehīti. Bhikkhū kukkuccāyantā na paṭiggaṇhantī’’ti hi vuttaṃ. Tesañhi ‘‘paribhuñjathā’’ti bhagavato āṇattiyā paribhuttānampi ‘‘odissakaṃ nu kho idaṃ amhāka’’nti vimatippattānaṃ vimativinodanatthaṃ ‘‘anujānāmi, bhikkhave, yāguñca madhugoḷakañcā’’ti vuttaṃ. Evamidhāpete paññattaṃ paramparabhojanasikkhāpadaṃ omadditvā paramparabhojanaṃ kathaṃ bhuñjissantīti. Etthāhu keci ācariyā paramparabhojanasikkhāpadeneva ‘‘aññassa bhojanaṃ na kappatī’’ti jānantāpi ‘‘anujānāmi, bhikkhave, yāguñcā’’ti visuṃ anuññātattā ‘‘paṭaggidānamahāvikaṭādi viya kappatī’’ti saññāya bhuñjiṃsu. Tena vuttaṃ ‘‘apica mayaṃ kālasseva bhojjayāguyā dhātā’’tiādi, taṃ ayuttaṃ tattha aṭṭhuppattimātikāvibhaṅgavirodhena anāpattivāre niccabhattādīnaṃ asambhavappasaṅgato, bhikkhūnaṃ sāpattikabhāvānatikkamanato, micchāgāhahetuppasaṅgena bhagavatā anuññātappasaṅgato ca. Te hi bhikkhū yasmā bhagavā katthaci vinayavasena kappiyampi ‘‘gāthābhigītaṃ me abhojaneyya’’nti (saṃ. ni. 1.194; su. ni. 81; mi. pa. 4.5.9) paṭikkhipati, tasmā bhagavato adhippāyaṃ pati ‘‘kukkuccāyantā na paṭiggaṇhantī’’ti vuttaṃ, sikkhāpadaṃ pati bhagavāpi attano adhippāyappakāsanatthameva ‘‘anujānāmi, bhikkhave, yāguñcā’’ti āha. Duravaggāho hi bhagavato adhippāyo. Tathā hi bhāradvājassa pāyāsaṃ abhojaneyyanti akataviññattippasaṅgato paṭikkhipi. Ānandattherena viññāpetvā sajjitaṃ tekaṭulayāguṃ pana ‘‘yadapi, ānanda, viññattaṃ, tadapi akappiya’’nti avatvā ‘‘yadapi, ānanda, antovuttha’’ntiādimevāha. Tena no ce taṃ antovutthaṃ kappatīti adhippāyadassanena paṇītabhojanasūpodanaviññattisikkhāpadāni upatthambheti bhagavatopi kappati, pageva amhākanti.
284. கி³லானஸ்ஸேவ ப⁴க³வதா கு³ளோ அனுஞ்ஞாதோதி ‘‘யானி கோ² பன தானி கி³லானானங் பி⁴க்கூ²னங் படிஸாயனீயானீ’’தி (பாரா॰ 622) வசனவஸேன வுத்தங், தேனேவ தே இத⁴ படிக்³க³ஹணே குக்குச்சாயிங்ஸு. இத⁴ பன ‘‘அனுஜானாமி, பி⁴க்க²வே, கி³லானஸ்ஸ கு³ளோத³க’’ந்தி வத்தப்³பே³ கு³ளாதி⁴காரத்தா புப்³பே³ அனுஞ்ஞாதஞ்ச வத்வா அகி³லானஸ்ஸ கு³ளோத³கங் அனுஞ்ஞாதங், தேன கி³லானேன ஸதி பச்சயே கு³ளோ பரிபு⁴ஞ்ஜிதப்³போ³, கு³ளோத³கங் அஸதி பச்சயேபி வட்டதீதி இமங் விஸேஸங் தீ³பேதி. தத்த² ‘‘கு³ளோத³கங் காலிகேஸு ஸத்தாஹகாலிகங், ப⁴க³வதா ஓதி³ஸ்ஸானுஞ்ஞாதத்தா ஸத்தாஹாதிக்கமேன து³க்கட’’ந்தி வத³ந்தி, தங் ந யுத்தங், உத³கஸம்பி⁴ன்னத்தா ஸத்தாஹகாலிகபா⁴வங் ஜஹதி. ‘‘யதா² அம்பா³தி³ உத³கஸம்பி⁴ன்னங் யாமகாலிகங் ஜாதங், ததா² ஸத்தாஹகாலிகங் ஜஹித்வா தத³னந்தரே யாவஜீவிகே டி²த’’ந்தி வத³ந்தி, தங் யுத்தங், தஞ்ச ப⁴க³வதா ஓதி³ஸ்ஸானுஞ்ஞாதத்தா பச்சவெக்க²ணாபா⁴வே தோ³ஸோ நத்தி². ‘‘கு³ளோத³க’ந்தி வுத்தத்தா உத³கக³திக’’ந்தி வத³ந்தி. யதி³ உத³கமிஸ்ஸங் உத³கக³திகங் ஹோதி, மது⁴பி ஸியா தங் ததா² அனுஞ்ஞாதத்தா. மா ஹோது, அப்படிக்³க³ஹெத்வா பரிபு⁴ஞ்ஜிதப்³ப³ங் ஸியா உத³கக³திகத்தா, தஞ்ச ந ஹோதி, ‘‘ஸப்³ப³த்தா²பி உபபரிக்கி²த்வா க³ஹேதப்³ப³’’ந்தி அஞ்ஞதரஸ்மிங் க³ண்டி²பதே³ வுத்தங்.
284.Gilānasseva bhagavatā guḷo anuññātoti ‘‘yāni kho pana tāni gilānānaṃ bhikkhūnaṃ paṭisāyanīyānī’’ti (pārā. 622) vacanavasena vuttaṃ, teneva te idha paṭiggahaṇe kukkuccāyiṃsu. Idha pana ‘‘anujānāmi, bhikkhave, gilānassa guḷodaka’’nti vattabbe guḷādhikārattā pubbe anuññātañca vatvā agilānassa guḷodakaṃ anuññātaṃ, tena gilānena sati paccaye guḷo paribhuñjitabbo, guḷodakaṃ asati paccayepi vaṭṭatīti imaṃ visesaṃ dīpeti. Tattha ‘‘guḷodakaṃ kālikesu sattāhakālikaṃ, bhagavatā odissānuññātattā sattāhātikkamena dukkaṭa’’nti vadanti, taṃ na yuttaṃ, udakasambhinnattā sattāhakālikabhāvaṃ jahati. ‘‘Yathā ambādi udakasambhinnaṃ yāmakālikaṃ jātaṃ, tathā sattāhakālikaṃ jahitvā tadanantare yāvajīvike ṭhita’’nti vadanti, taṃ yuttaṃ, tañca bhagavatā odissānuññātattā paccavekkhaṇābhāve doso natthi. ‘‘Guḷodaka’nti vuttattā udakagatika’’nti vadanti. Yadi udakamissaṃ udakagatikaṃ hoti, madhupi siyā taṃ tathā anuññātattā. Mā hotu, appaṭiggahetvā paribhuñjitabbaṃ siyā udakagatikattā, tañca na hoti, ‘‘sabbatthāpi upaparikkhitvā gahetabba’’nti aññatarasmiṃ gaṇṭhipade vuttaṃ.
285. ஸுஞ்ஞாகா³ரந்தி சதுத்த²ஜ்ஜா²னங்.
285.Suññāgāranti catutthajjhānaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
171. தருணபஸன்னமஹாமத்தவத்து² • 171. Taruṇapasannamahāmattavatthu
172. பே³லட்ட²கச்சானவத்து² • 172. Belaṭṭhakaccānavatthu
173. பாடலிகா³மவத்து² • 173. Pāṭaligāmavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā
யாகு³மது⁴கோ³ளகாதி³கதா² • Yāgumadhugoḷakādikathā
பாடலிகா³மவத்து²கதா² • Pāṭaligāmavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
யாகு³மது⁴கோ³ளகாதி³கதா²வண்ணனா • Yāgumadhugoḷakādikathāvaṇṇanā
பாடலிகா³மவத்து²கதா²வண்ணனா • Pāṭaligāmavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / யாகு³மது⁴கோ³ளகாதி³கதா²வண்ணனா • Yāgumadhugoḷakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
170. யாகு³மது⁴கோ³ளகாதி³கதா² • 170. Yāgumadhugoḷakādikathā
173. பாடலிகா³மவத்து²கதா² • 173. Pāṭaligāmavatthukathā
