| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
яааг̇умад̇хуг̇ол̣агаад̣̇игат̇ааван̣н̣анаа
Yāgumadhugoḷakādikathāvaṇṇanā
283. яат̇аад̇хаммо гаарзд̇аб̣б̣од̇и ид̣̇ам̣ сан̇г̇ийд̇игаарагаважанам̣. на хи бхаг̇аваа д̇амзва сигкаабад̣̇ам̣ д̣̇вигкад̇д̇ум̣ бан̃н̃абзси, звам̣ зваруубзсууд̇и згз. батамабан̃н̃ад̇д̇амзва санд̇хааяа вуд̇д̇ам̣, д̇ат̇ааби на жа д̇з бхигкуу саабад̇д̇игаа ж̇аад̇аа. гат̇ам̣? барамбарабхож̇анасигкаабад̣̇асса адтуббад̇д̇ияаа. ‘‘абижа маяам̣ гаалассзва бин̣д̣ааяа жарид̇ваа бхун̃ж̇имхаа’’д̇и вуд̇д̇ам̣. маад̇игаавибхан̇г̇з (баажи. 227) жа ‘‘барамбарабхож̇анам̣ наама бан̃жаннам̣ бхож̇анаанам̣ ан̃н̃ад̇арзна бхож̇анзна ниманд̇ид̇о, д̇ам̣ табзд̇ваа ан̃н̃ам̣ бан̃жаннам̣ бхож̇анаанам̣ ан̃н̃ад̇арам̣ бхож̇анам̣ бхун̃ж̇ад̇и, зд̇ам̣ барамбарабхож̇анам̣ наамаа’’д̇и вуд̇д̇ам̣, д̇асмаа ан̃н̃ам̣ бхож̇анам̣ наама ниманд̇анад̇о лад̣̇д̇хам̣ яам̣ гин̃жийд̇и сид̣̇д̇хам̣. яасмаа на бхож̇ж̇аяааг̇униманд̇анад̇о лад̣̇д̇хабхож̇анам̣, д̇асмаа ‘‘зд̇т̇а анаабад̇д̇ий’’д̇и д̇з бхигкуу барибхун̃ж̇им̣сууд̇и. зд̇т̇а ‘‘яат̇аад̇хаммо гаарзд̇аб̣б̣о’’д̇и вуд̇д̇ад̇д̇аа бана ан̃н̃аниманд̇анад̇о лад̣̇д̇хабхож̇анамзва бхун̃ж̇анд̇асса аабад̇д̇и, нзд̇аранд̇и анун̃н̃аад̇ам̣. д̇ад̇о бадтааяа д̇асса анаабад̇д̇иваарз ‘‘нижжабхад̇д̇з салаагабхад̇д̇з багкигз убосат̇игз баадибад̣̇игз’’д̇и вуд̇д̇ам̣. буб̣б̣з взсаалияаа бан̃н̃ад̇д̇агаалз над̇т̇и, яад̣̇и ад̇т̇и, адтуббад̇д̇имаад̇игаавибхан̇г̇авирод̇хо, д̇асмаа ‘‘абижа маяам̣ гаалассзва бин̣д̣ааяа жарид̇ваа бхун̃ж̇имхаа’’д̇и адтуббад̇д̇ияам̣ вуд̇д̇ад̇д̇аа, бад̣̇абхааж̇анзби ‘‘ан̃н̃ам̣ бан̃жаннам̣ бхож̇анаанам̣ ан̃н̃ад̇арам̣ бхож̇анам̣ бхун̃ж̇ад̇ий’’д̇и ависзсзна вуд̇д̇ад̇д̇аа жа батамам̣ ваа бажчаа ваа ниманд̇ид̇ам̣ бхож̇анам̣ табзд̇ваа аниманд̇ид̇амзва бхун̃ж̇анд̇асса аабад̇д̇и, нзд̇аранд̇и гин̃жааби аабаннам̣, ‘‘на, бхигкавз, ан̃н̃ад̇ра ниманд̇ид̇зна ан̃н̃асса бхож̇ж̇аяааг̇у барибхун̃ж̇ид̇аб̣б̣аа’’д̇и вуд̇д̇ад̇д̇аа бана батаманиманд̇ид̇абхож̇анад̇о ан̃н̃ам̣ бажчаа лад̣̇д̇хам̣ ниманд̇ид̇абхож̇анам̣, нижжабхад̇д̇аад̣̇ийни жа бхун̃ж̇анд̇асса аабад̇д̇ийд̇и аабаж̇ж̇амаанам̣ вияа ж̇аад̇анд̇и анубан̃н̃ад̇д̇иббасан̇г̇анивааран̣ам̣, аниманд̇анабхож̇анз аабад̇д̇иббасан̇г̇анивааран̣ан̃жа гаронд̇о, батамабан̃н̃ад̇д̇исигкаабад̣̇амзва иминаа ад̇т̇зна барин̣аамзнд̇о жа ‘‘яат̇аад̇хаммо гаарзд̇аб̣б̣о’’д̇и бхаг̇аваа ааха, д̇асмаа д̇ад̇о бадтааяа бажчаа ниманд̇анабхож̇анам̣ бхун̃ж̇анд̇ассзва аабад̇д̇и. д̇зсу на нижжабхад̇д̇аад̣̇ийнийд̇и аабаннам̣. д̇знзвааяасмаа убаалид̇т̇зро д̇асса анаабад̇д̇иваарз ‘‘нижжабхад̇д̇з’’д̇иаад̣̇ийни бан̃жа бад̣̇аани багкибид̇ваа сан̇г̇ааяи. ад̇хиббааяан̃н̃уу хи д̇з махаанааг̇аа, д̇асмаа батамамзва яам̣ бхаг̇авад̇аа вуд̇д̇ам̣ ‘‘бан̃жа бхож̇анаани табзд̇ваа саб̣б̣ад̇т̇а анаабад̇д̇ий’’д̇и важанам̣, бажчааби д̇ам̣ анурагканд̇зна абхож̇анам̣ мад̇хуг̇ол̣агам̣ абараамасид̇ваа бхож̇ж̇аяааг̇у зва вуд̇д̇аад̇и звам̣ аажарияо.
283.Yathādhammo kāretabboti idaṃ saṅgītikārakavacanaṃ. Na hi bhagavā tameva sikkhāpadaṃ dvikkhattuṃ paññapesi, evaṃ evarūpesūti eke. Paṭhamapaññattameva sandhāya vuttaṃ, tathāpi na ca te bhikkhū sāpattikā jātā. Kathaṃ? Paramparabhojanasikkhāpadassa aṭṭhuppattiyā. ‘‘Apica mayaṃ kālasseva piṇḍāya caritvā bhuñjimhā’’ti vuttaṃ. Mātikāvibhaṅge (pāci. 227) ca ‘‘paramparabhojanaṃ nāma pañcannaṃ bhojanānaṃ aññatarena bhojanena nimantito, taṃ ṭhapetvā aññaṃ pañcannaṃ bhojanānaṃ aññataraṃ bhojanaṃ bhuñjati, etaṃ paramparabhojanaṃ nāmā’’ti vuttaṃ, tasmā aññaṃ bhojanaṃ nāma nimantanato laddhaṃ yaṃ kiñcīti siddhaṃ. Yasmā na bhojjayāgunimantanato laddhabhojanaṃ, tasmā ‘‘ettha anāpattī’’ti te bhikkhū paribhuñjiṃsūti. Ettha ‘‘yathādhammo kāretabbo’’ti vuttattā pana aññanimantanato laddhabhojanameva bhuñjantassa āpatti, netaranti anuññātaṃ. Tato paṭṭhāya tassa anāpattivāre ‘‘niccabhatte salākabhatte pakkhike uposathike pāṭipadike’’ti vuttaṃ. Pubbe vesāliyā paññattakāle natthi, yadi atthi, aṭṭhuppattimātikāvibhaṅgavirodho, tasmā ‘‘apica mayaṃ kālasseva piṇḍāya caritvā bhuñjimhā’’ti aṭṭhuppattiyaṃ vuttattā, padabhājanepi ‘‘aññaṃ pañcannaṃ bhojanānaṃ aññataraṃ bhojanaṃ bhuñjatī’’ti avisesena vuttattā ca paṭhamaṃ vā pacchā vā nimantitaṃ bhojanaṃ ṭhapetvā animantitameva bhuñjantassa āpatti, netaranti kiñcāpi āpannaṃ, ‘‘na, bhikkhave, aññatra nimantitena aññassa bhojjayāgu paribhuñjitabbā’’ti vuttattā pana paṭhamanimantitabhojanato aññaṃ pacchā laddhaṃ nimantitabhojanaṃ, niccabhattādīni ca bhuñjantassa āpattīti āpajjamānaṃ viya jātanti anupaññattippasaṅganivāraṇaṃ, animantanabhojane āpattippasaṅganivāraṇañca karonto, paṭhamapaññattisikkhāpadameva iminā atthena pariṇāmento ca ‘‘yathādhammo kāretabbo’’ti bhagavā āha, tasmā tato paṭṭhāya pacchā nimantanabhojanaṃ bhuñjantasseva āpatti. Tesu na niccabhattādīnīti āpannaṃ. Tenevāyasmā upālitthero tassa anāpattivāre ‘‘niccabhatte’’tiādīni pañca padāni pakkhipitvā saṅgāyi. Adhippāyaññū hi te mahānāgā, tasmā paṭhamameva yaṃ bhagavatā vuttaṃ ‘‘pañca bhojanāni ṭhapetvā sabbattha anāpattī’’ti vacanaṃ, pacchāpi taṃ anurakkhantena abhojanaṃ madhugoḷakaṃ aparāmasitvā bhojjayāgu eva vuttāti evaṃ ācariyo.
зд̇т̇ааха – яат̇аа бажчаалад̣̇д̇халзсзна т̇зрзна нижжабхад̇д̇аад̣̇ибагкзбо гад̇о, звам̣ гат̇инагканд̇хагз барамбарабхож̇анам̣ багкибид̇ваа ‘‘ад̇т̇ад̇агат̇инаанам̣ во, бхигкавз, ча габбиссанд̇ий’’д̇и гимад̇т̇ам̣ на вужжанд̇и? вужжад̇з – яат̇аавуд̇д̇алзсанид̣̇ассанад̇т̇ам̣. ан̃н̃ат̇аа ид̣̇ам̣ сигкаабад̣̇ам̣ взсаалияам̣, анд̇хагавинд̣̇з жаад̇и убхаяад̇т̇а убад̣дхубад̣дхзна бан̃н̃ад̇д̇ам̣ сияаа. но жз, саабад̇д̇игаа бхигкуу сияум̣, на жа д̇з саабад̇д̇игаа аббадигкид̇д̇зби д̇зсам̣ гуггужжад̣̇ассанад̇о. ‘‘д̇зна хи, б̣раахман̣а, бхигкуунам̣ д̣̇зхийд̇и. бхигкуу гуггужжааяанд̇аа на бадиг̇г̇ан̣ханд̇ий’’д̇и хи вуд̇д̇ам̣. д̇зсан̃хи ‘‘барибхун̃ж̇ат̇аа’’д̇и бхаг̇авад̇о аан̣ад̇д̇ияаа барибхуд̇д̇аанамби ‘‘од̣̇иссагам̣ ну ко ид̣̇ам̣ амхаага’’нд̇и вимад̇иббад̇д̇аанам̣ вимад̇ивинод̣̇анад̇т̇ам̣ ‘‘ануж̇аанаами, бхигкавз, яааг̇ун̃жа мад̇хуг̇ол̣аган̃жаа’’д̇и вуд̇д̇ам̣. звамид̇хаабзд̇з бан̃н̃ад̇д̇ам̣ барамбарабхож̇анасигкаабад̣̇ам̣ омад̣̇д̣̇ид̇ваа барамбарабхож̇анам̣ гат̇ам̣ бхун̃ж̇иссанд̇ийд̇и. зд̇т̇ааху гзжи аажарияаа барамбарабхож̇анасигкаабад̣̇знзва ‘‘ан̃н̃асса бхож̇анам̣ на габбад̇ий’’д̇и ж̇аананд̇ааби ‘‘ануж̇аанаами, бхигкавз, яааг̇ун̃жаа’’д̇и висум̣ анун̃н̃аад̇ад̇д̇аа ‘‘бадаг̇г̇ид̣̇аанамахаавигадаад̣̇и вияа габбад̇ий’’д̇и сан̃н̃ааяа бхун̃ж̇им̣су. д̇зна вуд̇д̇ам̣ ‘‘абижа маяам̣ гаалассзва бхож̇ж̇аяааг̇уяаа д̇хаад̇аа’’д̇иаад̣̇и, д̇ам̣ аяуд̇д̇ам̣ д̇ад̇т̇а адтуббад̇д̇имаад̇игаавибхан̇г̇авирод̇хзна анаабад̇д̇иваарз нижжабхад̇д̇аад̣̇ийнам̣ асамбхаваббасан̇г̇ад̇о, бхигкуунам̣ саабад̇д̇игабхааваанад̇иггаманад̇о, мижчааг̇аахахзд̇уббасан̇г̇зна бхаг̇авад̇аа анун̃н̃аад̇аббасан̇г̇ад̇о жа. д̇з хи бхигкуу яасмаа бхаг̇аваа гад̇т̇ажи винаяавасзна габбияамби ‘‘г̇аат̇аабхиг̇ийд̇ам̣ мз абхож̇анзяяа’’нд̇и (сам̣. ни. 1.194; су. ни. 81; ми. ба. 4.5.9) бадигкибад̇и, д̇асмаа бхаг̇авад̇о ад̇хиббааяам̣ бад̇и ‘‘гуггужжааяанд̇аа на бадиг̇г̇ан̣ханд̇ий’’д̇и вуд̇д̇ам̣, сигкаабад̣̇ам̣ бад̇и бхаг̇авааби ад̇д̇ано ад̇хиббааяаббагаасанад̇т̇амзва ‘‘ануж̇аанаами, бхигкавз, яааг̇ун̃жаа’’д̇и ааха. д̣̇ураваг̇г̇аахо хи бхаг̇авад̇о ад̇хиббааяо. д̇ат̇аа хи бхаарад̣̇вааж̇асса бааяаасам̣ абхож̇анзяяанд̇и агад̇авин̃н̃ад̇д̇иббасан̇г̇ад̇о бадигкиби. аананд̣̇ад̇т̇зрзна вин̃н̃аабзд̇ваа саж̇ж̇ид̇ам̣ д̇згадулаяааг̇ум̣ бана ‘‘яад̣̇аби, аананд̣̇а, вин̃н̃ад̇д̇ам̣, д̇ад̣̇аби агаббияа’’нд̇и авад̇ваа ‘‘яад̣̇аби, аананд̣̇а, анд̇овуд̇т̇а’’нд̇иаад̣̇имзвааха. д̇зна но жз д̇ам̣ анд̇овуд̇т̇ам̣ габбад̇ийд̇и ад̇хиббааяад̣̇ассанзна бан̣ийд̇абхож̇анасуубод̣̇анавин̃н̃ад̇д̇исигкаабад̣̇аани убад̇т̇амбхзд̇и бхаг̇авад̇оби габбад̇и, баг̇зва амхааганд̇и.
Etthāha – yathā pacchāladdhalesena therena niccabhattādipakkhepo kato, evaṃ kathinakkhandhake paramparabhojanaṃ pakkhipitvā ‘‘atthatakathinānaṃ vo, bhikkhave, cha kappissantī’’ti kimatthaṃ na vuccanti? Vuccate – yathāvuttalesanidassanatthaṃ. Aññathā idaṃ sikkhāpadaṃ vesāliyaṃ, andhakavinde cāti ubhayattha upaḍḍhupaḍḍhena paññattaṃ siyā. No ce, sāpattikā bhikkhū siyuṃ, na ca te sāpattikā appaṭikkhittepi tesaṃ kukkuccadassanato. ‘‘Tena hi, brāhmaṇa, bhikkhūnaṃ dehīti. Bhikkhū kukkuccāyantā na paṭiggaṇhantī’’ti hi vuttaṃ. Tesañhi ‘‘paribhuñjathā’’ti bhagavato āṇattiyā paribhuttānampi ‘‘odissakaṃ nu kho idaṃ amhāka’’nti vimatippattānaṃ vimativinodanatthaṃ ‘‘anujānāmi, bhikkhave, yāguñca madhugoḷakañcā’’ti vuttaṃ. Evamidhāpete paññattaṃ paramparabhojanasikkhāpadaṃ omadditvā paramparabhojanaṃ kathaṃ bhuñjissantīti. Etthāhu keci ācariyā paramparabhojanasikkhāpadeneva ‘‘aññassa bhojanaṃ na kappatī’’ti jānantāpi ‘‘anujānāmi, bhikkhave, yāguñcā’’ti visuṃ anuññātattā ‘‘paṭaggidānamahāvikaṭādi viya kappatī’’ti saññāya bhuñjiṃsu. Tena vuttaṃ ‘‘apica mayaṃ kālasseva bhojjayāguyā dhātā’’tiādi, taṃ ayuttaṃ tattha aṭṭhuppattimātikāvibhaṅgavirodhena anāpattivāre niccabhattādīnaṃ asambhavappasaṅgato, bhikkhūnaṃ sāpattikabhāvānatikkamanato, micchāgāhahetuppasaṅgena bhagavatā anuññātappasaṅgato ca. Te hi bhikkhū yasmā bhagavā katthaci vinayavasena kappiyampi ‘‘gāthābhigītaṃ me abhojaneyya’’nti (saṃ. ni. 1.194; su. ni. 81; mi. pa. 4.5.9) paṭikkhipati, tasmā bhagavato adhippāyaṃ pati ‘‘kukkuccāyantā na paṭiggaṇhantī’’ti vuttaṃ, sikkhāpadaṃ pati bhagavāpi attano adhippāyappakāsanatthameva ‘‘anujānāmi, bhikkhave, yāguñcā’’ti āha. Duravaggāho hi bhagavato adhippāyo. Tathā hi bhāradvājassa pāyāsaṃ abhojaneyyanti akataviññattippasaṅgato paṭikkhipi. Ānandattherena viññāpetvā sajjitaṃ tekaṭulayāguṃ pana ‘‘yadapi, ānanda, viññattaṃ, tadapi akappiya’’nti avatvā ‘‘yadapi, ānanda, antovuttha’’ntiādimevāha. Tena no ce taṃ antovutthaṃ kappatīti adhippāyadassanena paṇītabhojanasūpodanaviññattisikkhāpadāni upatthambheti bhagavatopi kappati, pageva amhākanti.
284. г̇илаанассзва бхаг̇авад̇аа г̇ул̣о анун̃н̃аад̇од̇и ‘‘яаани ко бана д̇аани г̇илаанаанам̣ бхигкуунам̣ бадисааяанийяааний’’д̇и (баараа. 622) важанавасзна вуд̇д̇ам̣, д̇знзва д̇з ид̇ха бадиг̇г̇ахан̣з гуггужжааяим̣су. ид̇ха бана ‘‘ануж̇аанаами, бхигкавз, г̇илаанасса г̇ул̣од̣̇ага’’нд̇и вад̇д̇аб̣б̣з г̇ул̣аад̇хигаарад̇д̇аа буб̣б̣з анун̃н̃аад̇ан̃жа вад̇ваа аг̇илаанасса г̇ул̣од̣̇агам̣ анун̃н̃аад̇ам̣, д̇зна г̇илаанзна сад̇и бажжаяз г̇ул̣о барибхун̃ж̇ид̇аб̣б̣о, г̇ул̣од̣̇агам̣ асад̇и бажжаязби ваддад̇ийд̇и имам̣ висзсам̣ д̣̇ийбзд̇и. д̇ад̇т̇а ‘‘г̇ул̣од̣̇агам̣ гаалигзсу сад̇д̇аахагаалигам̣, бхаг̇авад̇аа од̣̇иссаанун̃н̃аад̇ад̇д̇аа сад̇д̇аахаад̇иггамзна д̣̇уггада’’нд̇и вад̣̇анд̇и, д̇ам̣ на яуд̇д̇ам̣, уд̣̇агасамбхиннад̇д̇аа сад̇д̇аахагаалигабхаавам̣ ж̇ахад̇и. ‘‘яат̇аа амб̣аад̣̇и уд̣̇агасамбхиннам̣ яаамагаалигам̣ ж̇аад̇ам̣, д̇ат̇аа сад̇д̇аахагаалигам̣ ж̇ахид̇ваа д̇ад̣̇ананд̇арз яааваж̇ийвигз тид̇а’’нд̇и вад̣̇анд̇и, д̇ам̣ яуд̇д̇ам̣, д̇ан̃жа бхаг̇авад̇аа од̣̇иссаанун̃н̃аад̇ад̇д̇аа бажжавзгкан̣аабхаавз д̣̇осо над̇т̇и. ‘‘г̇ул̣од̣̇ага’нд̇и вуд̇д̇ад̇д̇аа уд̣̇агаг̇ад̇ига’’нд̇и вад̣̇анд̇и. яад̣̇и уд̣̇агамиссам̣ уд̣̇агаг̇ад̇игам̣ ход̇и, мад̇хуби сияаа д̇ам̣ д̇ат̇аа анун̃н̃аад̇ад̇д̇аа. маа ход̇у, аббадиг̇г̇ахзд̇ваа барибхун̃ж̇ид̇аб̣б̣ам̣ сияаа уд̣̇агаг̇ад̇игад̇д̇аа, д̇ан̃жа на ход̇и, ‘‘саб̣б̣ад̇т̇ааби убабаригкид̇ваа г̇ахзд̇аб̣б̣а’’нд̇и ан̃н̃ад̇арасмим̣ г̇ан̣тибад̣̇з вуд̇д̇ам̣.
284.Gilānasseva bhagavatā guḷo anuññātoti ‘‘yāni kho pana tāni gilānānaṃ bhikkhūnaṃ paṭisāyanīyānī’’ti (pārā. 622) vacanavasena vuttaṃ, teneva te idha paṭiggahaṇe kukkuccāyiṃsu. Idha pana ‘‘anujānāmi, bhikkhave, gilānassa guḷodaka’’nti vattabbe guḷādhikārattā pubbe anuññātañca vatvā agilānassa guḷodakaṃ anuññātaṃ, tena gilānena sati paccaye guḷo paribhuñjitabbo, guḷodakaṃ asati paccayepi vaṭṭatīti imaṃ visesaṃ dīpeti. Tattha ‘‘guḷodakaṃ kālikesu sattāhakālikaṃ, bhagavatā odissānuññātattā sattāhātikkamena dukkaṭa’’nti vadanti, taṃ na yuttaṃ, udakasambhinnattā sattāhakālikabhāvaṃ jahati. ‘‘Yathā ambādi udakasambhinnaṃ yāmakālikaṃ jātaṃ, tathā sattāhakālikaṃ jahitvā tadanantare yāvajīvike ṭhita’’nti vadanti, taṃ yuttaṃ, tañca bhagavatā odissānuññātattā paccavekkhaṇābhāve doso natthi. ‘‘Guḷodaka’nti vuttattā udakagatika’’nti vadanti. Yadi udakamissaṃ udakagatikaṃ hoti, madhupi siyā taṃ tathā anuññātattā. Mā hotu, appaṭiggahetvā paribhuñjitabbaṃ siyā udakagatikattā, tañca na hoti, ‘‘sabbatthāpi upaparikkhitvā gahetabba’’nti aññatarasmiṃ gaṇṭhipade vuttaṃ.
285. сун̃н̃ааг̇ааранд̇и жад̇уд̇т̇аж̇жхаанам̣.
285.Suññāgāranti catutthajjhānaṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi
171. д̇арун̣абасаннамахаамад̇д̇авад̇т̇у • 171. Taruṇapasannamahāmattavatthu
172. б̣зладтагажжаанавад̇т̇у • 172. Belaṭṭhakaccānavatthu
173. баадалиг̇аамавад̇т̇у • 173. Pāṭaligāmavatthu
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā
яааг̇умад̇хуг̇ол̣агаад̣̇игат̇аа • Yāgumadhugoḷakādikathā
баадалиг̇аамавад̇т̇угат̇аа • Pāṭaligāmavatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā
яааг̇умад̇хуг̇ол̣агаад̣̇игат̇ааван̣н̣анаа • Yāgumadhugoḷakādikathāvaṇṇanā
баадалиг̇аамавад̇т̇угат̇ааван̣н̣анаа • Pāṭaligāmavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / яааг̇умад̇хуг̇ол̣агаад̣̇игат̇ааван̣н̣анаа • Yāgumadhugoḷakādikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi
170. яааг̇умад̇хуг̇ол̣агаад̣̇игат̇аа • 170. Yāgumadhugoḷakādikathā
173. баадалиг̇аамавад̇т̇угат̇аа • 173. Pāṭaligāmavatthukathā
