| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. யஜமானஸுத்தவண்ணனா
6. Yajamānasuttavaṇṇanā
262. ச²ட்டே² யஜமானானந்தி யஜந்தானங். ததா³ கிர அங்க³மக³த⁴வாஸிகா மனுஸ்ஸா அனுஸங்வச்ச²ரங் ஸப்பிமது⁴பா²ணிதாதீ³ஸு அக்³க³ங் க³ஹெத்வா ஏகஸ்மிங் டா²னே தா³ரூனங் ஸட்டி²மத்தே ஸகடபா⁴ரே ராஸிங் கத்வா அக்³கி³ங் த³த்வா பஜ்ஜலிதகாலே ‘‘மஹாப்³ரஹ்முனோ யஜாமா’’தி தங் ஸப்³ப³ங் பக்கி²பந்தி. ‘‘ஏகவாரங் பக்கி²த்தங் ஸஹஸ்ஸகு³ணப²லங் தே³தீ’’தி நேஸங் லத்³தி⁴. ஸக்கோ தே³வராஜா ‘‘ஸப்³பே³பிமே ஸப்³ப³அக்³கா³னி க³ஹெத்வா ‘மஹாப்³ரஹ்முனோ யஜாமா’தி அக்³கி³ம்ஹி ஜா²பெந்தி. அப²லங் கரொந்தி, மயி பஸ்ஸந்தே மா நஸ்ஸந்து, யதா² பு³த்³த⁴ஸ்ஸ சேவ ஸங்க⁴ஸ்ஸ ச த³த்வா ப³ஹுங் புஞ்ஞங் பஸவந்தி, ஏவங் கரிஸ்ஸாமீ’’தி தா³ருராஸிங் ஜலாபெத்வா ஓலோகெந்தேஸு மனுஸ்ஸேஸு புண்ணமதி³வஸே ப்³ரஹ்மத்தபா⁴வங் மாபெத்வா மஹாஜனஸ்ஸ பஸ்ஸந்தஸ்ஸேவ சந்த³மண்ட³லங் பி⁴ந்தி³த்வா நிக்க²ந்தோ விய அஹோஸி. மஹாஜனோ தி³ஸ்வா ‘‘இமங் யஞ்ஞங் படிக்³க³ஹேதுங் மஹாப்³ரஹ்மா ஆக³ச்ச²தீ’’தி ஜண்ணுகேஹி பூ⁴மியங் பதிட்டா²ய, அஞ்ஜலிங் பக்³க³ய்ஹ நமஸ்ஸமானோ அட்டா²ஸி. ப்³ராஹ்மணா ஆஹங்ஸு ‘‘தும்ஹே ‘மயங் தக்கேன கதே²மா’தி மஞ்ஞத², இதா³னி பஸ்ஸத², அயங் வோ ப்³ரஹ்மா ஸஹத்தா² யஞ்ஞங் படிக்³க³ஹேதுங் ஆக³ச்ச²தீ’’தி. ஸக்கோ ஆக³ந்த்வா தா³ருசிதகமத்த²கே ஆகாஸே ட²த்வா ‘‘கஸ்ஸாயங் ஸக்காரோ’’தி புச்சி²? தும்ஹாகங், ப⁴ந்தே, படிக்³க³ண்ஹத² நோ யஞ்ஞந்தி. தேன ஹி ஆக³ச்ச²த², மா துலங் ச²ட்³டெ³த்வா ஹத்தே²ன துலயித்த², அயங் ஸத்தா² து⁴ரவிஹாரே வஸதி, தங் புச்சி²ஸ்ஸாம ‘‘கஸ்ஸ தி³ன்னங் மஹப்ப²லங் ஹோதீ’’தி ? உப⁴யரட்ட²வாஸினோ க³ஹெத்வா ஸத்து² ஸந்திகங் க³ந்த்வா புச்ச²ந்தோ ஏவமாஹ.
262. Chaṭṭhe yajamānānanti yajantānaṃ. Tadā kira aṅgamagadhavāsikā manussā anusaṃvaccharaṃ sappimadhuphāṇitādīsu aggaṃ gahetvā ekasmiṃ ṭhāne dārūnaṃ saṭṭhimatte sakaṭabhāre rāsiṃ katvā aggiṃ datvā pajjalitakāle ‘‘mahābrahmuno yajāmā’’ti taṃ sabbaṃ pakkhipanti. ‘‘Ekavāraṃ pakkhittaṃ sahassaguṇaphalaṃ detī’’ti nesaṃ laddhi. Sakko devarājā ‘‘sabbepime sabbaaggāni gahetvā ‘mahābrahmuno yajāmā’ti aggimhi jhāpenti. Aphalaṃ karonti, mayi passante mā nassantu, yathā buddhassa ceva saṅghassa ca datvā bahuṃ puññaṃ pasavanti, evaṃ karissāmī’’ti dārurāsiṃ jalāpetvā olokentesu manussesu puṇṇamadivase brahmattabhāvaṃ māpetvā mahājanassa passantasseva candamaṇḍalaṃ bhinditvā nikkhanto viya ahosi. Mahājano disvā ‘‘imaṃ yaññaṃ paṭiggahetuṃ mahābrahmā āgacchatī’’ti jaṇṇukehi bhūmiyaṃ patiṭṭhāya, añjaliṃ paggayha namassamāno aṭṭhāsi. Brāhmaṇā āhaṃsu ‘‘tumhe ‘mayaṃ takkena kathemā’ti maññatha, idāni passatha, ayaṃ vo brahmā sahatthā yaññaṃ paṭiggahetuṃ āgacchatī’’ti. Sakko āgantvā dārucitakamatthake ākāse ṭhatvā ‘‘kassāyaṃ sakkāro’’ti pucchi? Tumhākaṃ, bhante, paṭiggaṇhatha no yaññanti. Tena hi āgacchatha, mā tulaṃ chaḍḍetvā hatthena tulayittha, ayaṃ satthā dhuravihāre vasati, taṃ pucchissāma ‘‘kassa dinnaṃ mahapphalaṃ hotī’’ti ? Ubhayaraṭṭhavāsino gahetvā satthu santikaṃ gantvā pucchanto evamāha.
தத்த² புஞ்ஞபெக்கா²னந்தி புஞ்ஞங் இச்ச²ந்தானங் புஞ்ஞத்தி²கானங். ஓபதி⁴கங் புஞ்ஞந்தி உபதி⁴விபாகங் புஞ்ஞங். ஸங்கே⁴ தி³ன்னங் மஹப்ப²லந்தி அரியஸங்கே⁴ தி³ன்னங் விப்பா²ரவந்தங் ஹோதி. தே³ஸனாவஸானே சதுராஸீதிபாணஸஹஸ்ஸானி அமதபானங் பிவிங்ஸு. ததோ பட்டா²ய மனுஸ்ஸா ஸப்³பா³னி அக்³க³தா³னானி பி⁴க்கு²ஸங்க⁴ஸ்ஸ அத³ங்ஸு. ச²ட்ட²ங்.
Tattha puññapekkhānanti puññaṃ icchantānaṃ puññatthikānaṃ. Opadhikaṃ puññanti upadhivipākaṃ puññaṃ. Saṅghe dinnaṃ mahapphalanti ariyasaṅghe dinnaṃ vipphāravantaṃ hoti. Desanāvasāne caturāsītipāṇasahassāni amatapānaṃ piviṃsu. Tato paṭṭhāya manussā sabbāni aggadānāni bhikkhusaṅghassa adaṃsu. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. யஜமானஸுத்தங் • 6. Yajamānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. யஜமானஸுத்தவண்ணனா • 6. Yajamānasuttavaṇṇanā
