| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. ယဇမာနသုတ္တဝဏ္ဏနာ
6. Yajamānasuttavaṇṇanā
၂၆၂. ယဇန္တာနန္တိ ဒက္ခိဏေယ္ယံ ဥဒ္ဒိသ္သ ဒေန္တာနံ။ အဋ္ဌုပ္ပတ္တိကော သုတ္တနိက္ခေပောတိ ဒသ္သေတ္ဝာ အတ္ထဝဏ္ဏနံ ကာတုံ ‘‘တဒာ ကိရာ’’တိအာဒိ ဝုတ္တံ။ အဂ္ဂန္တိ သေဋ္ဌံ။ တေဟိ တေဟိ ဝာ ယထာလဒ္ဓသပ္ပိအာဒယော မာ နသ္သန္တု, အဂ္ဂဘာဝေန ဂဟိတာနိ သပ္ပိအာဒီနိ ကေဝလံ အဂ္ဂိမ္ဟိ ဈာပနေန, ဒေဝာ မနုသ္သာ မိစ္ဆာဂာဟေန မာ နသ္သန္တု။ တက္ကေနာတိ တက္ကမတ္တေန။ ‘‘ကထေမာ’’တိ အမ္ဟေ မညထ, ဣဒာနိ ပသ္သထ, ပစ္စက္ခတော အယံ ဝော။ပေ.။ အာဂစ္ဆတီတိ အာဟံသူတိ ယောဇနာ။
262.Yajantānanti dakkhiṇeyyaṃ uddissa dentānaṃ. Aṭṭhuppattiko suttanikkhepoti dassetvā atthavaṇṇanaṃ kātuṃ ‘‘tadā kirā’’tiādi vuttaṃ. Agganti seṭṭhaṃ. Tehi tehi vā yathāladdhasappiādayo mā nassantu, aggabhāvena gahitāni sappiādīni kevalaṃ aggimhi jhāpanena, devā manussā micchāgāhena mā nassantu. Takkenāti takkamattena. ‘‘Kathemā’’ti amhe maññatha, idāni passatha, paccakkhato ayaṃ vo…pe… āgacchatīti āhaṃsūti yojanā.
ဥပဓိဝိပာကန္တိ ဥပဓီသု ဝာ ဝိပစ္စတိ, ဥပဓယော ဝာ ဝိပာကာ ဧတသ္သာတိ ဥပဓိဝိပာကံ။ ဝိပ္ဖာရဝန္တံ ဟောတိ ဝိပုလပက္ခတာယ။ ဘိက္ခုသင္ဃသ္သ အဒံသု ‘‘သမ္မာသမ္ဗုဒ္ဓေန မဟာဗ္ရဟ္မုနာ စ ဧဝံ ဩဝာဒော ဒိန္နော’’တိ။
Upadhivipākanti upadhīsu vā vipaccati, upadhayo vā vipākā etassāti upadhivipākaṃ. Vipphāravantaṃ hoti vipulapakkhatāya. Bhikkhusaṅghassa adaṃsu ‘‘sammāsambuddhena mahābrahmunā ca evaṃ ovādo dinno’’ti.
ယဇမာနသုတ္တဝဏ္ဏနာ နိဋ္ဌိတာ။
Yajamānasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. ယဇမာနသုတ္တံ • 6. Yajamānasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. ယဇမာနသုတ္တဝဏ္ဏနာ • 6. Yajamānasuttavaṇṇanā
