| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੬. ਯਜਮਾਨਸੁਤ੍ਤવਣ੍ਣਨਾ
6. Yajamānasuttavaṇṇanā
੨੬੨. ਛਟ੍ਠੇ ਯਜਮਾਨਾਨਨ੍ਤਿ ਯਜਨ੍ਤਾਨਂ। ਤਦਾ ਕਿਰ ਅਙ੍ਗਮਗਧવਾਸਿਕਾ ਮਨੁਸ੍ਸਾ ਅਨੁਸਂવਚ੍ਛਰਂ ਸਪ੍ਪਿਮਧੁਫਾਣਿਤਾਦੀਸੁ ਅਗ੍ਗਂ ਗਹੇਤ੍વਾ ਏਕਸ੍ਮਿਂ ਠਾਨੇ ਦਾਰੂਨਂ ਸਟ੍ਠਿਮਤ੍ਤੇ ਸਕਟਭਾਰੇ ਰਾਸਿਂ ਕਤ੍વਾ ਅਗ੍ਗਿਂ ਦਤ੍વਾ ਪਜ੍ਜਲਿਤਕਾਲੇ ‘‘ਮਹਾਬ੍ਰਹ੍ਮੁਨੋ ਯਜਾਮਾ’’ਤਿ ਤਂ ਸਬ੍ਬਂ ਪਕ੍ਖਿਪਨ੍ਤਿ। ‘‘ਏਕવਾਰਂ ਪਕ੍ਖਿਤ੍ਤਂ ਸਹਸ੍ਸਗੁਣਫਲਂ ਦੇਤੀ’’ਤਿ ਨੇਸਂ ਲਦ੍ਧਿ। ਸਕ੍ਕੋ ਦੇવਰਾਜਾ ‘‘ਸਬ੍ਬੇਪਿਮੇ ਸਬ੍ਬਅਗ੍ਗਾਨਿ ਗਹੇਤ੍વਾ ‘ਮਹਾਬ੍ਰਹ੍ਮੁਨੋ ਯਜਾਮਾ’ਤਿ ਅਗ੍ਗਿਮ੍ਹਿ ਝਾਪੇਨ੍ਤਿ। ਅਫਲਂ ਕਰੋਨ੍ਤਿ, ਮਯਿ ਪਸ੍ਸਨ੍ਤੇ ਮਾ ਨਸ੍ਸਨ੍ਤੁ, ਯਥਾ ਬੁਦ੍ਧਸ੍ਸ ਚੇવ ਸਙ੍ਘਸ੍ਸ ਚ ਦਤ੍વਾ ਬਹੁਂ ਪੁਞ੍ਞਂ ਪਸવਨ੍ਤਿ, ਏવਂ ਕਰਿਸ੍ਸਾਮੀ’’ਤਿ ਦਾਰੁਰਾਸਿਂ ਜਲਾਪੇਤ੍વਾ ਓਲੋਕੇਨ੍ਤੇਸੁ ਮਨੁਸ੍ਸੇਸੁ ਪੁਣ੍ਣਮਦਿવਸੇ ਬ੍ਰਹ੍ਮਤ੍ਤਭਾવਂ ਮਾਪੇਤ੍વਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇવ ਚਨ੍ਦਮਣ੍ਡਲਂ ਭਿਨ੍ਦਿਤ੍વਾ ਨਿਕ੍ਖਨ੍ਤੋ વਿਯ ਅਹੋਸਿ। ਮਹਾਜਨੋ ਦਿਸ੍વਾ ‘‘ਇਮਂ ਯਞ੍ਞਂ ਪਟਿਗ੍ਗਹੇਤੁਂ ਮਹਾਬ੍ਰਹ੍ਮਾ ਆਗਚ੍ਛਤੀ’’ਤਿ ਜਣ੍ਣੁਕੇਹਿ ਭੂਮਿਯਂ ਪਤਿਟ੍ਠਾਯ, ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨੋ ਅਟ੍ਠਾਸਿ। ਬ੍ਰਾਹ੍ਮਣਾ ਆਹਂਸੁ ‘‘ਤੁਮ੍ਹੇ ‘ਮਯਂ ਤਕ੍ਕੇਨ ਕਥੇਮਾ’ਤਿ ਮਞ੍ਞਥ, ਇਦਾਨਿ ਪਸ੍ਸਥ, ਅਯਂ વੋ ਬ੍ਰਹ੍ਮਾ ਸਹਤ੍ਥਾ ਯਞ੍ਞਂ ਪਟਿਗ੍ਗਹੇਤੁਂ ਆਗਚ੍ਛਤੀ’’ਤਿ। ਸਕ੍ਕੋ ਆਗਨ੍ਤ੍વਾ ਦਾਰੁਚਿਤਕਮਤ੍ਥਕੇ ਆਕਾਸੇ ਠਤ੍વਾ ‘‘ਕਸ੍ਸਾਯਂ ਸਕ੍ਕਾਰੋ’’ਤਿ ਪੁਚ੍ਛਿ? ਤੁਮ੍ਹਾਕਂ, ਭਨ੍ਤੇ, ਪਟਿਗ੍ਗਣ੍ਹਥ ਨੋ ਯਞ੍ਞਨ੍ਤਿ। ਤੇਨ ਹਿ ਆਗਚ੍ਛਥ, ਮਾ ਤੁਲਂ ਛਡ੍ਡੇਤ੍વਾ ਹਤ੍ਥੇਨ ਤੁਲਯਿਤ੍ਥ, ਅਯਂ ਸਤ੍ਥਾ ਧੁਰવਿਹਾਰੇ વਸਤਿ, ਤਂ ਪੁਚ੍ਛਿਸ੍ਸਾਮ ‘‘ਕਸ੍ਸ ਦਿਨ੍ਨਂ ਮਹਪ੍ਫਲਂ ਹੋਤੀ’’ਤਿ ? ਉਭਯਰਟ੍ਠવਾਸਿਨੋ ਗਹੇਤ੍વਾ ਸਤ੍ਥੁ ਸਨ੍ਤਿਕਂ ਗਨ੍ਤ੍વਾ ਪੁਚ੍ਛਨ੍ਤੋ ਏવਮਾਹ।
262. Chaṭṭhe yajamānānanti yajantānaṃ. Tadā kira aṅgamagadhavāsikā manussā anusaṃvaccharaṃ sappimadhuphāṇitādīsu aggaṃ gahetvā ekasmiṃ ṭhāne dārūnaṃ saṭṭhimatte sakaṭabhāre rāsiṃ katvā aggiṃ datvā pajjalitakāle ‘‘mahābrahmuno yajāmā’’ti taṃ sabbaṃ pakkhipanti. ‘‘Ekavāraṃ pakkhittaṃ sahassaguṇaphalaṃ detī’’ti nesaṃ laddhi. Sakko devarājā ‘‘sabbepime sabbaaggāni gahetvā ‘mahābrahmuno yajāmā’ti aggimhi jhāpenti. Aphalaṃ karonti, mayi passante mā nassantu, yathā buddhassa ceva saṅghassa ca datvā bahuṃ puññaṃ pasavanti, evaṃ karissāmī’’ti dārurāsiṃ jalāpetvā olokentesu manussesu puṇṇamadivase brahmattabhāvaṃ māpetvā mahājanassa passantasseva candamaṇḍalaṃ bhinditvā nikkhanto viya ahosi. Mahājano disvā ‘‘imaṃ yaññaṃ paṭiggahetuṃ mahābrahmā āgacchatī’’ti jaṇṇukehi bhūmiyaṃ patiṭṭhāya, añjaliṃ paggayha namassamāno aṭṭhāsi. Brāhmaṇā āhaṃsu ‘‘tumhe ‘mayaṃ takkena kathemā’ti maññatha, idāni passatha, ayaṃ vo brahmā sahatthā yaññaṃ paṭiggahetuṃ āgacchatī’’ti. Sakko āgantvā dārucitakamatthake ākāse ṭhatvā ‘‘kassāyaṃ sakkāro’’ti pucchi? Tumhākaṃ, bhante, paṭiggaṇhatha no yaññanti. Tena hi āgacchatha, mā tulaṃ chaḍḍetvā hatthena tulayittha, ayaṃ satthā dhuravihāre vasati, taṃ pucchissāma ‘‘kassa dinnaṃ mahapphalaṃ hotī’’ti ? Ubhayaraṭṭhavāsino gahetvā satthu santikaṃ gantvā pucchanto evamāha.
ਤਤ੍ਥ ਪੁਞ੍ਞਪੇਕ੍ਖਾਨਨ੍ਤਿ ਪੁਞ੍ਞਂ ਇਚ੍ਛਨ੍ਤਾਨਂ ਪੁਞ੍ਞਤ੍ਥਿਕਾਨਂ। ਓਪਧਿਕਂ ਪੁਞ੍ਞਨ੍ਤਿ ਉਪਧਿવਿਪਾਕਂ ਪੁਞ੍ਞਂ। ਸਙ੍ਘੇ ਦਿਨ੍ਨਂ ਮਹਪ੍ਫਲਨ੍ਤਿ ਅਰਿਯਸਙ੍ਘੇ ਦਿਨ੍ਨਂ વਿਪ੍ਫਾਰવਨ੍ਤਂ ਹੋਤਿ। ਦੇਸਨਾવਸਾਨੇ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਿવਿਂਸੁ। ਤਤੋ ਪਟ੍ਠਾਯ ਮਨੁਸ੍ਸਾ ਸਬ੍ਬਾਨਿ ਅਗ੍ਗਦਾਨਾਨਿ ਭਿਕ੍ਖੁਸਙ੍ਘਸ੍ਸ ਅਦਂਸੁ। ਛਟ੍ਠਂ।
Tattha puññapekkhānanti puññaṃ icchantānaṃ puññatthikānaṃ. Opadhikaṃ puññanti upadhivipākaṃ puññaṃ. Saṅghe dinnaṃ mahapphalanti ariyasaṅghe dinnaṃ vipphāravantaṃ hoti. Desanāvasāne caturāsītipāṇasahassāni amatapānaṃ piviṃsu. Tato paṭṭhāya manussā sabbāni aggadānāni bhikkhusaṅghassa adaṃsu. Chaṭṭhaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੬. ਯਜਮਾਨਸੁਤ੍ਤਂ • 6. Yajamānasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੬. ਯਜਮਾਨਸੁਤ੍ਤવਣ੍ਣਨਾ • 6. Yajamānasuttavaṇṇanā
